** من مسقط العامره اضافه جديده لمنتدى بكرى العامر.. الكاتب النشط الزاكى عبد الحميد رحبوا معى**

الاخوه الاحباب .. سلام فى هذاالصباح الجميل

باشمهندس بكرى لونت صباحى بكل الوان الطيف الزاهى الجميل
باهتمامك وقبولك طلبى بانضمام الاستاذ الكاتب النشط الاخ الزاكى عبد الحميد
حقيقى اضافه قيمه لنا جميعا اعضاء وزوار البورد ..
الشكر ليك معمم بالمحنه
يلا يا ناس مسقط زفوا معاى الزاكى من ساحة النادى لامن نوصلوا باب بكرى ..
الزاكى زفة بى كلامك السمح ما الزفه التانيه ديك .. ما تجيب لى الهوا
بدر الدين حلا انت فى مقدمة الركب .. بس اوع تغنى لينا يا الجيتونا..اها.. اها.. اها ...
وشوف لى معاك الرحمابى ده ده غتس وين ؟
فى انتظار ترحيبكم الحار يا اهلنا الطيبين..

ماشه الشغل وبجيكم صاده بى سيره ذاتيه لهذا الرجل الهميم
ربنا يعطر كل صباحاتكم بى السعاده والفرح
ويديكم العافيه
شكرا بكرى مره اخرى شكرا باريج كل الازهار..

هووووووووووووووووي أنا داير ارحب قبل ما يجي الضيف ويكتبلو كلاماً غلاد ويجهجه لي مداخلتي وابقى ما عارف أكتب شنو لأنه يا جماعة وأنا تراني بحذركم الزاكي دا لابس ثقافته في يراعو اليمين ويمين بالله عندو إنقليزي يفخربو السودان فهو من قامات سونا والبجي من سونا تفسحلو المنتديات
أعلن أنا بدرالدين شنا وبكامل قواي العقلية وحالتي المعتبرة شرعاً ترحيبي بالشفيف الزاكي عبدالحميد وأتمنى له اقامة طيبة بيننا
ولكم جميعا أقدم المبدع الزاكي
هيييييييييييييييييييييييي

صديقي البدر
ما أن أسمع صوتك عبر الأثير حتى يتنامى في داخلي حب يسربلني زهواًً يمتشق من غمد الزمن كبرياء ويعتمر قلنسوة فارس الحوبة.إبداعك يا صديقي يجعلك ملكا لغيرك وإن كنت في الربع الخالي..يا صديقي لعلك لا تدري أن صوتك من على البعد يطمئن أذني كقميص يوسف بين مقلتي يعقوب فارتد به بصيراً بعد أن أعماه الحزن على وليده-فأقول الدنيا ما زالت بخير بوجود أمثالك..فأنت وأمثالك يا صديقي الغد المشرق الذي به يتجدد الدهر ويستعيد به الزمن صباه الجميل..فتعود العصافير الملونة ترنق فوق سنابل القمح مغردة من جديد..دعني بالله عليك استشرف بك أملاً كطلع نضيد..

صديقي البدر
ما أن أسمع صوتك عبر الأثير حتى يتنامى في داخلي حب يسربلني زهواًً يمتشق من غمد الزمن كبرياء ويعتمر قلنسوة فارس الحوبة.إبداعك يا صديقي يجعلك ملكا لغيرك وإن كنت في الربع الخالي..يا صديقي لعلك لا تدري أن صوتك من على البعد يطمئن أذني كقميص يوسف بين مقلتي يعقوب فارتد به بصيراً بعد أن أعماه الحزن على وليده-فأقول الدنيا ما زالت بخير بوجود أمثالك..فأنت وأمثالك يا صديقي الغد المشرق الذي به يتجدد الدهر ويستعيد به الزمن صباه الجميل..فتعود العصافير الملونة ترنق فوق سنابل القمح مغردة من جديد..دعني بالله عليك استشرف بك أملاً كطلع نضيد..

وفي حفل (تأبيب) البوست
UP

سلاااااام يا الاهل
بدر الدين حبابك .. والله نورت البورد
لكن مالك جريت فسراع كدى ؟
قلت لى خايف من الزاكى وكلامو الغلاد ..
وانا اسوى شنو البديت النضمى الكتر.؟
عارف نحن كان ندى البوست ده ينزلوا لينا اخونا فضيلى جماع
ولا شاعرنا المختفى عبد القادر الكتيابى ..
لكن برضو الزكاى اخونا ونحن عارفنو بعد السيره والزفه دى ما ظنيتو يكشحنا
من البدايه بى شيتا ما نفرزو.. ومن هسه يا الزاكى يا خونا انقليزى يجهجهنا ما بندورو تب هنا.. على كيفك بعدين فى بوستاتك .. انا وبدر الدين اخوى ده بنجى نتاوق بالراااااحه .. كان لقينا ونسة بنفرزها بندخل ..وكان كلام شيتا كتر (بضم الكاف )
بنرجع بى دربنا ..
اها يا البدرى خليك قريب
الاهل الطيبين والاخوه اصدقاء الاخ الزاكى
جيتكم بالقليل والقليل المتواضع من مسيرة هذا الرجل الشامخ المتواضع حد الدهشه
اخونالزاكي عبد الحميد أحمدوهذه الجوله السريعه فى سيرته الذاتيه..
جامعة الخرطوم-كلية الآداب-شعبة اللغة الانجليزية
وكالة السودان للأنباء (سونا) رئيس قسم الملحق الأسبوعي (نشرة أسبوعبة كانت تصدر باللغة الانجليزية وتعنى بتحليل الأخبار وبنشر مقالات اجتماعية وسياسية عامة) –(من زملاء الدراسة (من البورداب الاخ الصديق بشرى الفاضل ) ومن زملاء المهنة في سونا ( الاخ الصديق خضر عطا المنان)
أجرى لقاءات صحافية عدة مع بعض رؤساء الدول منهم (عيدي أمين، مورارجي ديساي وإنديرا غاندي يوم كانت تتزعم المعارضة في حكم ديساي) نشرت له بعض الصحف الأجنبية مقالات (النيشن الكينية والكميونيكيتر الهندية والباتريوت الهندية)
يعمل حالياً في مجال الترجمة والتحرير وسبق أن ترجم عدة أعمال أدبية منها أشعار لبعض رواد الحركة الرومانسية في الشعر الانجليزي منهم ويليام بليك وشلي وصمويل كوليردج ومسرحية "في انتظار جودو" لصمويل بيكيت وبعض القصص القصيرة لجيمس جويس كما ترجم قصة قصيرة باسم ملاك راسم الخرائط وهي القصة التي نال عنها الروائي السوداني جمال محجوب جائزة الجارديان اللندنية....
التحيه لهذا الابداع المتدفق ولصاحبه كريم الخصال ..
اها يا ناس بشرى الفاضل وعريسنا الشاعر خضر .. ادونى البشاره جبت ليكم صاحبكم لغاية عندكم..
بدر الدين امشى اتغدأ انت احسن ليك .. وانا زاتى .. باقى ياخوى الشىء الفوق ده ما شاء الله وعينى بارده .. كتير بالحيل علينا .. لكن ايانا اصحاب البيت .. نقعد من المغيرب بره نستقبل الضيوف .. انت ما تنضم ..جيبهم ساى وصلهم جوه ..وانا ليك على خشمى ما بفتحو .. بطايب واجيب الشاى باللقيمات سمح ؟؟
ودعتكم الله

يا هلا وغلا
ويا مرحبا
بالاستاذ الزاكي عبدالحميد
البيت بيتك
ونورت الدار

مش من طرفك يا شاعرتنا الكبيرة الاستاذة سوما
اذن مقبول ومرحب به وعلى العين والراس

الأستاذ حمزاوي
الشكر الكثير على كلماتك الرائعات في الترحيب بي..والدار يا سيدي منورة بأهلها. وأرجو النواصل ففيه كنز لا يفنى..تحياتي

اهلا ومرحبا بالاخ الاديب الزاكى ........ واستازى طالما هو خريج سونا........ هلا ومرحبا

الأستاذ ًWad Aker
كثير الشكر والتقدير لك يا سيدي على ترحيبك الحار. سونا أخذنا منهابقدر ما أخذت مناإلى أن أسفر التعادل عن طلاق بين في أبريل 1980.لك تحياتي وتقدير أرجو التواصل-عبر البريد الاليكتروني إن شئت.

ألف مرحب بالأستاذ الزاكى عبد الحميد ونقول فعلا البورد نور

فكل ما يأتينا من بلاد الزهور والعطور والبخور هو زاكى ولا شك

ولا سيما انه قدم بواسطة الاستاذة الشاعرة الكبيرة سومه

الف اهلا سيدى ونرجو ان تطيب لك الديار هنا وتبقى معنا

الأستاذ قرشو
لك العتبى يا سيدي على تأخر ردي على كلماتك الجميلة في حقي والتي استفت منها عبق زمن جميل يقول شاعره ( إني لبخور لا يتأرج عطره إلا إذا أكلته النار) لك شكري على أمل التواصل.

أهلا بالصديق الزاكي جدا الزاكي.
ونتوقع منه المداخلات الجهبوزة.
إتحفنا يا صديقي بالحديث الأدبي فقدطغت السياسة جدا.
ونشكر الأستاذة SOMA على ما تقوم به تجاه كاتب مميز.

صديقي حامد
الأمل معقود عليك أنت يا سيدي لتخرجنا-أنا وغير كثر-من هذا التصحر الذي يجتاحنا بلا رحمة فالسياسة يبدو -يا سيدي- أنها عازمة على التمادي في التغول على حرف الآخرين ومنها حرفتكم فلا تستسلموا! فالإبداع مصباح لا يضيء إلا إذا أحرقته الشعلة. لك ودي

شكرا سوما

مرحب بالاستاذ الزاكي عبد الحميد هنا في البورد
و التحية لكل المتداخلين
الاستاذ الزاكي من ركائز مجتمع مسقط و رجل له اسهاماته المتنوعة في المجالين الثقافي و السياسي و يشهد له بذلك كل من يعرف النادي الاجتماعي للجالية السودانية
و الشكر موصول للاستاذ بكري عبد الرحمن صاحب المكان الذي سمح لنا بفرصة محاورة الاستاذ الزاكي و التداخل معه هنا في هواء البورد

طه جعفر و الهام عبد الخالق

طه وإلهام
الشكر الكثير على الترحيب الحار. في اعتقادي أهم ركيزة لمجتمع السودانيين في مسقط تستمد قوتها من النادي. والنادي كما يعلم الجميع لكما فيه حضور مميز والشاهد أن مناسبة الأغنية الوطنية التي تألقت فيها المبدعة إلهام ما زالت أصداؤها تدغدغ المشاعر كما الطل. أنتما رائعان وما يزيدكما روعة تلك الحميمية التي يستقبل بها الشاب جعفوري كل السودان..وما في أروع من كدة. تحياتي وتقديري وإلى لقاء.

سوما
مرحب بيك
اثنى
تحياتى

ما اروع أن ينضم هذا الرجل الشامخ لأعضاء البورد عامة ولعضوية بورداب مسقط خاصة . صحيح كنا دوما في الكفة المرجح بها في جميع ضروب المعرفة ولكنا اليوم نقدم جهبزا يكفي وحدة لترجيح كفة مسقط في جميع محافل المعرفة وخاصة الادب فهو من الجيل الذى عاصر عمادة الدكتور عبد الله الطيب في جامعة الخرطوم عندما كانت المقولة السائدة وقتها ( الجامعة آداب وما عداها حرف ومهن)
تحية لك اخي بكري ابو بكر ليكون في استضافتنا الاخ الكريم الزاكي فنحن من اليوم في استضافته لنستمتع مما يقول .

لاشك ان الاخ الزاكي بمشغولياته بالشأن العام يصعب الحصول عليه في اى لحظة ليساهم بها معنا هنا في هذا البورد ولكن اخي الزاكي لابد من الاستجابة لهذا النداء ولو للحظات نقرا خلالها ما يسطره يراعك في اى من ضروب الادب .

تحية لجميع الاخوة بورداب مسقط والف مبروك .


لكم ودي

ألف مرحب بالأستاذ الزاكى عبد الحميد

حبابكم الاهل الحنان
اخوى حمزاوى سلام يا حنين
الشوق غيمه ومطرتين
كيفنك واريت حالك زين
تسلم انت يا ضى الاهل ركازة الوالدين
اخوى حمزاوى
اخونا الزاكى .. سماحتو ممتده ومشروره فى كل الساحات
فرحانين بيه كلنا
حبابو مرتين ...
حمزاوى شكرا لمة فرح

****
ود عكر حبابك انت نورت الدار يا كريم المقدار
حبابك انت واستاذك الزاكى
شكرا على الطله اخى ود عكر شكرا ضفاف

****
العمده قرشو فى دارنا?
اشرقت الانوار وهب النسيم العليل الجاى من تالا الاهل
الشوق منك وليك يا ضى شبابيك البلد
والله ليك وحشه قدر الكلام الفى الجوف .. مرتب بلا كتابةولا حروف ..
تسلم يا خوى على الطله
تسلم يا ود الفريق والحله
شكرا قرشو شكرا محنه

***
الاديب الكاتب المعتق
الاخ حامد بدوى
لك التحايا والتجله
وينك يا مبدع .. الزيك ما المفروض يختفى من الساحه
من حقنا عليك تواجدك دوما .. لكى تعم الفائده
وينهل من ينبوعك المميز جيل هذا اليوم التائه فى دروب عدم المعرفه
وجهل الكثير من مقومات الادب المميز
الاخ حامد ندرى انك مشغول .. لكن ما برضو طمعانين فى طلتك السمحه
شكرا قدر فرحتى بطلتك هنا ..

*****
ناااااااس الهااااام سلااااااام

هسه عليكم الله ما سمعتونى بى فوق ؟
لوم الشدر يا جيرانا
لكن والله يا جعفورى واحشنى موووت
وواحشانى خالتى ثوما .. لكن الله غالب يا ولدى
حقو هسه اشتكيكم لى جعفر ده .. غايتو آخر يوم لاقيتو فى النادى
ما قصر معاى تب .. الله يخليه ليكم
وشكرا يا بورداب يا معتقين على الكلام الزين
اها يا الهام رايك شنو نعمل لمة بورداب كبيره كده فى نهاية السنه دى وبداية سنة جديده
ما تقولى جايينا فى اول الشهر ده اخونا فضيلى جماع ..
واكيد بعدما جانا الزاكى اللمه بكون ليه نكهه خاصة زى ما قال اخونا قرشو الله يديه العافيه
شكرا ليكم من تانى ويلا ابقوا طلونا بالباب كمان

تخريمه
مسؤول من الخير يا طه ..وين احمد العربى الزول الفنان ؟ تحياتنا ليه بالله
وقول ليه نحن دايرين نقلعك من بورداب الامارات .. ما يقوم ينط لى هسه واحد منهم..
نقول ليهم احمد ده ساكن فى البريمى .. والحدود الجغرافيه حدها العين ..
وان شاء الله عين الحسود فيها عود ..لكن جد هو زول مبدع ..الله يديه العافيه
شكرا ام وابو جعفر وشكرا قبلكم لى جعفر الشال اسم جد القبيله
***
بلدنا يا حبوبنا حبابك كتير وشوقنا احلا من موية الزير
لكن يا بلدى صورة الشافع الخاتيها دى ما مبالغه ههههه
مساااااااافه قعدت اتفرج فيها ..
شكرا ليك يا ذوق على الطله

***
شكرا جزيلا الاخ الطيب شيقوق
حقيقى كفيت ووفيت .. وبعد كلامك عن اخونا الزاكى ما بقول شىء
غير انى ابشرك بى انه فعلا الاخ الزاكى وعدنا بان يشارك معانا ويتحفنا بمكنوناته دوما
وكعهدنا به دائما عند وعده وكريم لدرجة انه نشفق عليه من الارهاق والتعب .. الله يديه الصحه والعافيه
شكرا مره اخرى ..
***
اخوى محمد عيد الله
والف مرحب بيك انت معانا هنا
شكرا على الطله والف شكر على ترحيبك معانا بالاخ الزاكى
شكرا عيد الله شكرا قطوف

ايها الشاب الهميم شكرا على ترحيبك ولك من التقدير بقدر ما تبذله من جهد لراحة الآخرين. أنت رائع حقاً. لك شكري ثانية...

أيها الباسق قامة وخلقاً ومحتدا لك شكري على ترحيبك بي. إن وجود أمثالك في مجتمع الجالية في مسقط يبعد عنهم هاجس الوحدة وألم الغربة..فأحبوك لأنك تترع دنياواتهم بصفاءات تجتذبهم إليك ملاذا من الصهد والهجير. الروائية السودانية العالمية ليلى أبو العلا وزوجهانادر يقرئانك السلام ويشكرانك على حسن الوفادة إبان زيارتهما للنادي مؤخرا..تحياتي وإلى لقاء..

العزيز بلدي يا حبوب
لك شكري وتقديري على ترحيبك بي. وإلى لقاء تحياتي

لو الزاكى ود حاجه منى يكون فعلا اضافة حقيقية للبورد...
والدته كانت صديقة عزيزة للوالدة عليهما رحمة الله...
و بعدين نسيتى حاجه مهمة جدا يا اخت سوما... و هى أنو الزاكى كان ممكن
يكون نجم السودان الأول فى كرة القدم لولا تعرضة للكسر فى أحدى المباريات
مع فريق الرد ستار برابطة الامتداد....
ده لو كان الزاكى الذى أعنيه...
و لو لم يكن له التحية أيضا

حباب القرضابى
حبابك معتقه بى ريحة الامات الذكرتهن فوق
ربنا يرحم الوالده ان شاء الله .. ويديك العافيه
معلومة الكوره دى جديده عليناوالله ..
لكن بجيب ليك خبرها الليله ان شاء الله
وبتمنى ايضا انه اخونا الزاكى يتمكن من الدخول للبورد
والرد على كل الاخوه المرحبين

لانه حقيقى عنده مشكله فنيه فى الدخول للبورد ..
ياكافى البلا نكون سحرناه انا والبدرى ؟
القرضابى ما عندك لينا قرض نبخبر بيه البوست ده ..
عشان اخونا الزاكى يجينا داخل
وصيه وامانه فى رقبتى ..جاتنى هسه بالاميل من الاخ الزاكى ..بسلم عليكم كلكم وبتشكر كتير كتير.. وبقول ليكم ان شاء الله يجيكم بالدرب ..
الاخ بكرى رسلت ليك فى الاميل بالنسبه للباسوورد للاخ الزاكى .. اتمنى ان تتمكن من حل المشكله ..او تغييير الباسورد وارساله مباشره للاخ الزاكى فى اميله الخاص الرسلتو ليك
وشكرا يا سيد الدار
شكر للجميع
والف شكر ليك اخونا القرضابى

اخوى القرضابى
اها جيتك صاده بالخبر البشاره
ياخوى الزاكى ياهو زاتووو صاحبك واخوك
وبسلممممممممممممم عليك سلام الاهل الحنان
وبقول ليك بتمنى ادخل سريع البورد واقالدكم من طرف
شفتو يا اهلنا البوست ده لم الاحبه والاهل كيفن ؟
اها يا قرضابى انت برضو انا طالباك بشاره
لكن والله بشارتك لى لمتكم وفرحتكم انت ورفيق عمرك ..
والذكريات الحنينه.. يعنى خبر الكوره طلع صاح
يديك الف عافيه ..

عزيزي القرضابي
لك شكري الكثير وود لا يبين له ساحل ولا ضفاف. نعم أنا الزاكي ود حاجة منى. رحمة الله عليها وعلى والدتك كانتا مثالاَ رائعاً للغيرية التي بها اكتسب السودان تفرده وتميزه..اعتقد المباراة كانت مع فريق الدينمو يوم كسرت رجلي ولكن لم تعد الذاكرة أهلاً بالثقة أرجوك زودني بالتفاصيل..لك ودي يا صديقي وإلى لقاء عبر البريد الاليكتروني إن شئت..لك التقدير كله.

شكرا سوما على استقدام الزاكي الرائع الذي حتما
سيكون ركيزة من ركائز البورد بعلمه وثقافته إضافة طبعا
لدماثة الخلق وحس الفكاهة المتخفي خلف الجدية الصارمة
زاملت الزاكي بشركة تنمية نفط عمان لخمس سنوات كان
خلالها خير عون لي وأنا في بداية حياتي في دنيا الغربة.
وأنضم إلى بدرالدين وطه في حرارة الترحيب به وأبصم كما
بصم بدر الدين بأنه سيكون إضافة ثرة هنا.

مرحبا أبو الزيك وشكرا سومةمرة أخرى
على هذا الجهد
ولكم جميعا السلام والقيام وكل المحبة.

دالــي

صديقي العمر دالي
لك كثير شكري على ترحيبك بي. إن القاسم المشترك بينك وبين أناس رائعين كالراحل المقيم الرائع الفنان مصطفى سيد أحمدوالأستاذ الموسيقار الكبير يوسف الموصلي والفنان الرائع حمزة سليمان يجعلني-كلما رأيتك أو سمعتك-أبحر في دنياوات كثر لا تعرف إلا الصبابات والألحان ملائكية الترانيم وما يوالف بين الضحكة ورحيق الشاي..لك شكري وتقديري

الشاعرة سوما
وافر الشكر على تزكيتك ومساعدتك لي-والشكر بالطبع موصول لسيد الدار الباشمهندس بكري-واسال الله أن أكون عند حسن الظن لا سيما أن للمنبر مبدعيه وأنت منهم. فلك الله وأنت تجدلين ذؤابات الحرف وتشكلين من صلصاله أغنيات تثمر وعداً بالفرح الغيداق في دواخل إنسان السودان المتعطش دوماً لنمنمة القوافي... فهي التي تطعمه إن جاع وهي التي ترويه إن عطش وهي التي تطمئنه من الخوف إن كثرت هواجسه وغاض الرّواء وهي من قبل ومن بعد ملاذ بوحه الشفيف..

الشاعرة سوما
وافر الشكر على تزكيتك ومساعدتك لي-والشكر بالطبع موصول لسيد الدار الباشمهندس بكري-واسال الله أن أكون عند حسن الظن لا سيما أن للمنبر مبدعيه وأنت منهم. فلك الله وأنت تجدلين ذؤابات الحرف وتشكلين من صلصاله أغنيات تثمر وعداً بالفرح الغيداق في دواخل إنسان السودان المتعطش دوماً لنمنمة القوافي... فهي التي تطعمه إن جاع وهي التي ترويه إن عطش وهي التي تطمئنه من الخوف إن كثرت هواجسه وغاض الرّواء وهي من قبل ومن بعد ملاذ بوحه الشفيف..

الشاعرة سوما
وافر الشكر على تزكيتك ومساعدتك لي-والشكر بالطبع موصول لسيد الدار الباشمهندس بكري-واسال الله أن أكون عند حسن الظن لا سيما أن للمنبر مبدعيه وأنت منهم. فلك الله وأنت تجدلين ذؤابات الحرف وتشكلين من صلصاله أغنيات تثمر وعداً بالفرح الغيداق في دواخل إنسان السودان المتعطش دوماً لنمنمة القوافي... فهي التي تطعمه إن جاع وهي التي ترويه إن عطش وهي التي تطمئنه من الخوف إن كثرت هواجسه وغاض الرّواء وهي من قبل ومن بعد ملاذ بوحه الشفيف..

لا اله الا الله محمدن رسول الله
علي اليمين لو ما بحب بدر الدين كان كرهتك حياتك يا ابو صلعة--شوف بالله --
اصبر لي يومين تلاتة يازيكو
بعدين يا بدر الدين انت لسه حريف بيت كلاوي ؟؟؟؟؟؟؟

يا اخي أصلو ما معقول؟ والله يا البدر عملت فايدة كبيرة خلاص. الزول دة لي كمين سنة ما لامي فيه. عووضة أصبر لي شويةوبجيك راجع. يا اخي دي مناسبة تستحق التقدير. لك تقديري يا صديقي وكثير احترامي وإلى لقاء..

Quote: فهو من قامات سونا والبجي من سونا تفسحلو المنتديات..

والبجي من سوما وبداري نفسحلو في المجلس

ومرحبتين حباب الزاكي

ياربي إخلاص نمر لسع في سونا ولا راحت وين

ألعزيز الغالي المسافر
لك شكري وتقديري على الترحيب. سوف أسال بعض الزملاء عن اخلاص نمر وأجيئك بالخبر اليقين. لك شكري ثانية وإلى لقاء في القريب العاجل..

عمو عثمان عووضة
سلامي وإحترامي وإشتياقي

Quote: علي اليمين لو ما بحب بدر الدين كان كرهتك حياتك يا ابو صلعة

صلعة صباحاً؟؟؟ أشكرك يا جميل وشوقي ليك طال

Quote: بعدين يا بدر الدين انت لسه حريف بيت كلاوي ؟؟؟؟؟؟؟

طبعاً لسة يعني عامل فيها ما (حارفني)؟؟؟
أنا سعيد سعادة كبيرة لأنو اصحابي طلعوا اصحاب

أستاذي العزيز ..

عشانك بكسر العزلة الإختيارية .. وأرحب بيك
...
وفي إنتظار أول قطراتك

عبدالرحمن

الشاب المميز عبد الرحمن..
أنا سعيد جداًً لأنك كسرت العزلة ليستفيد منك الآخرون من المعجبين بكتاباتك ففيها الكثير والكثير من الضن. كأنني بالروائية ليلى أبو العلا كانت تقصدك حين قالت في محاضرتها في النادي أكتب ودع الآخرين يقيمون عملك..فاتحفنا ياصديقي ولا تضن. لك ودي وإلى لقاء..

Quote: صديقي البدر ما أن أسمع صوتك عبر الأثير حتى يتنامى في داخلي حب يسربلني زهواًً يمتشق من غمد الزمن كبرياء ويعتمر قلنسوة فارس الحوبة.إبداعك يا صديقي يجعلك ملكا لغيرك وإن كنت في الربع الخالي..يا صديقي لعلك لا تدري أن صوتك من على البعد يطمئن أذني كقميص يوسف بين مقلتي يعقوب فارتد به بصيراً بعد أن أعماه الحزن على وليده-فأقول الدنيا ما زالت بخير بوجود أمثالك..فأنت وأمثالك يا صديقي الغد المشرق الذي به يتجدد الدهر ويستعيد به الزمن صباه الجميل..فتعود العصافير الملونة ترنق فوق سنابل القمح مغردة من جديد..دعني بالله عليك استشرف بك أملاً كطلع نضيد..

البدرى اخوى نضم الزاكى دا شهادة تقدير تنزلها فى السيى فى على ضمانتى دا نضم جامعة الخرطوم وجامعة سونا وجامعة الإمتداد
الزاكى كسب للمنبر ما بعده كسب شكرا سوما
جنى

الغالي جني
سلامي وإحترامي

Quote: البدرى اخوى نضم الزاكى دا شهادة تقدير تنزلها فى السيى فى على ضمانتى

أنزلها في (السي في) و (السي دي) إت آجنا ديل أخترعهون شوايقه؟؟؟
بالمناسبة ضمانتك ماها هينة تب عندي وشهادة الأستاذ الزاكي ما داير البسها حسي مخليها للعيد
تسلم ياجني

حباب الزاكي....

عزيزي سجيمان
كلمتان أراقتا علي ذوباً خرافياً من حميمية أشبه ما تكون بماء بارد أخذ بقسطاط -في يوم قائظ- من قربة-لا شرقية ولا غربية-علقت في شعبة راكوبة يغازلها الهمبريب مدغدغاً شعيرات حبالها المهترئة كذؤابات البرم يوم يجتاحه النيل في نفرته وازوراره...لك تقديري.

مرحبا والف مرحب بضيفنا صاحب الكلمه المتفرده والتعبير الشفيف الاستاذ الزاكى ..
شرفت بوستيك ..ضيوفك واكل الاصدقاء فى انتظارك ..

***
الاخ العزيز دالى الحبوب كيفنك واريت حالك زين
شكرا ليك بلا حدود على الطله والكلام الجميل زى دواخلك
شكرا اخوى دالى وربنا يجازيك بالخير ان شاء الله ..

***
الاخ الكريم عثمان عووضه حبابك ومرحبتين بيك ...

****
المسافر .. التحايا ليك من هسه لا باااااااكر وبعد باااااكر
شوقنا ليك ديمه كاسر ..
يا حنين يا البتجبر الخاطر
يديك الف عافيه ويعمعمك بالسعاده
قول آميــــــن
شكرا اخوى شكر نوار... وضحكة صغار
****
هلا بالرحامبى هلا وحبابك واليوم السعيد الليله جابك
شكرا ضحى وفرحه صفا و الباقى على امانيك ...
****
سلام جنى
شكرا ليك انت على الطله ..
مش بالله المفروض البدرى يبروز الكلام ده فى اطار ويختو قدام عينه كل مره يرفع راسو ويشوفو
حبابك جنى من تانى وكتر الف خيرك ..

الأخ الزاكي عبد الحميد

مرحبا بك إضافة ثرة لهذا المنبر الوطن..طالعني وجهك الباش في البوست الذي أتعرض فيه لموضوع الجالية والجباية..هذا الصباح..حقيقة إندهشت ..ما الذي جاء بهذا الوجه السمح لشخص إسمه الزاكي ووضعه في بوست صاحب وجه عابس اخر إسمه الزاكي..ولكن بطل العجب عندما قرأت هذا البوست الذي يرحب بك....وبعدين إسم الزاكي دا ما أظن يكون صدفه...أدينا معلومات زياده عنك عشأن نأترك..يمكن تكون من آل الزاكي المنتشرين في كل أصقاع السودان....مرحبا بك ولك كل الود

الزاكي عبد الله الزاكي

الأخ العزيز الزاكي
أكتب لك وإليك تشدني قوة خفية. أهي جاذبية الجذور؟ فعليها عقدت أملي. أنا ياسيدي الزاكي عبد الحميد أحمد عبد الحميد. الوالد من قرية اسمها أوروبي والوالدة الحاجة منى عبد الله علي من قرية اسمها سوري: هما يا سيدي قريتان تبدآن صباحهما بغناء السواقي إلى أن يلبسهما الليل. قريتان يحتضنهما النيل بحميمية ودفء رغم قواه المنهكة بطول رحيله اللاهث شمالاً...القريتان على بعد بضعة كيلومترات جنوبي دنقلا..ألا هل بلغت اللهم فأشهد..لك ودي بلا حدود...

صديق العمر جني
لك ودي وتقديري..
كلامك يا سيدي قلبي كان إلى قبوله أسرع من عيني لقراءته..وأجمل الحديث ما كان القلب إلى قبوله أسرع من الأذن إلى سماعه..هو حلم جميل له بقية لا محالة.. فبالله عليك لا تضن علي..ذكرني بالامتداد وأهله..

مرحبا بك
الاستاذ والكاتب
الزاكى عبد الحميد
نتمنى لك اقامة طيبة
شكرا لك سوما

سوما الراقية واديبة
ياخى معليش ياخ بدر الدين ضللني انا قايل البوست حقو -- امسحيها لي في عمتي دي ( العين بالكسرة وليس بي حسين) وكان عمتي ماشالت تمي الباقي في عمة الزاكي واحتياط برضو ممكن تستعيني بي شعر بدر الدين لانو برضو بقى قطن

سجيمان اهلين حبابك
حمد الله على السلامه
اها رجعت من السودان
شايفااااك محكر مع ستات الشاى
ايامك والله .. ان شاء الله الاهل خليتم طيبين
شكرا للطله يا سى جى تسلم
***
الاخ الزاكى عبد الله الزاكى ..
مرحب حبابك وشكرا لترحيبك الحار
وان شاء الله تطلعوا اولاد عم
اصلو الدنيا دى ضيقه ونفوس اهلنا اكبر من مساحة الوطن الجغرافيه
بالمحنه .. الزاكى عبد الحميد بكون اخوك لزم ..مش ود عم بس
شكرا ليك
****
الشاعر المرهف ود بلدى
نورت والله ونورت مرتين
الشوق ليك نيلين
شاعرنا عبد المنعم الحنين
وينك طالت الغيبه
وطولنا من سماع ابداعاتك الاصيله
تسلم يا ود الاصول
وشكرا ليك حروف وخدار جروف
***
الزول السمح عثمان عووضه
صباحك لمة اهل وجبنه متكيه...
هسه عليك الله العمه دى بتستاهل يمسحو فيها لوم ؟
حاشاك اللوم يا ود القبائل
طلتك مرتين نورت الدار يا زين
شكرا فنجان قهوة و دعوات طيبين

عزيزي الاستاذ عبد المنعم سيد أحمد
لك الشكر الكثير على ترحيبك بي يا سيدي..بكم تطيب الإقامة وتتأرج بعبق أناس أنت منهم..لك شكري ثانية وفي التواصل تلقيح للعقول..

السمح يجيب السمح....
مرحباً بك ...
والف شكر لسوما وبكري...

أنور

انور
ألف شكر على الترحيب يا رائع.
الزاكي


قرض
شكراً لك أيها الكاتب المميز. أين أنت وأين كتاباتك التي ظلت تزين جريدة الخرطوم في المهجر. بالله لا تبخل بها على البورداب فهم بحاجة لمتنفس. لك ودي
الزاكي..

لعلها من علامات الساعة و إنشقاق القمر أن تتجرأ
سوما على دعوة بدر الدين شنا للترحيب بالزاكي و لا
تفكر في دعوة محسوبكم محمد قرض ... و رغما من أنني
في الأصل لا أحتاج لدعوة و لا يحزنون للترحيب بالأديب
الأريب الزاكي ، إلا أن الخرف حينما يصيب النسوان ، يفعل
بهن ما فعله بالحبوبة سوما ...

الزاكي ...
مرحبا بك و أنت الأديب الضخم الذي حرك سكون مسقط
لتشع ألقا و إبداعا في ضروب الفن و الثقافة و العلم
و المعرفة ...
بس ما كان من الأول كده تقوم تنزل صورتك (مستعجل مالك)!!!
محسوبك قرض 5 سنوات خدمة في المنتدى ده و لا تحلم الحسان الغيد
فيه برؤية صورتي البهية رغما عن ولعهن و ولهن الشديد بي ..
كان يجدر بك أخي الزاكي أن تتريث يا ريس حتى يشطح خيال المنتدى
في رسم ملامح لك من وحي كتاباتكم و مداخلاتكم ، لا تمت لطلعتكم الزاهية
بصلة ، ثم تفاجئ الجميع بوجه القمر طالع يا زيكو !!!

انوررررررررررر الحنين
الشوق قمر دورين
كيفك يا ود الاهل المأصلين
تسلم انت يا يابا ياسمح ود السمحين ...

****
قرض الناس قرض
الخرف منو فينا عليك الله ؟؟
هسه الكلام الفوق ده مو كلام خرف يا جد جدود ناس القضارف
انا لو بقيت حبوبه ..انت تبقى شنو ؟(( درويش))لوووووووووولين
عارف يا قرض انت قالو نديدك عبد الله فرحين لووول
كدى اسال ناس طارق ..ولا اقول ليك طارق ده صغير وجاهل بالنسبه ليك
يا دوب يعرف ناس اشول لوول
انت الحاجات البنعزمك ليها بالباب ما بتجيها ..
هسه وقدام الناس ديل ..جاينا فضيلى وكتيابى و. ..ايــــــــــك
احسن ليك تعال من علالى صور دى واحضر السمح
غايتو احمد سيدك الله اداك لسان ..الله يكفينا شره
قرض شكرا ليك بعد العوا والهرجى ده ..شكرا ليك للطله
والطله المهترشه اسمح من السكات يا العشا
حبابك ياجدنا ..

مرحب بالاستاذ الاديب / الزاكى عبد الحميد

وقطعا يعتبر الاستاذ/ الزاكى اضافة ثرة للمنبر ونامل ان يسممح وقتة

بالمساهمة لاعادة المنبر لعهدة الذهبى ..........


والشكر للاستاذة / سوما

معاوية الطيب

الأستاذ معاوية
لك تحياتي ووافر شكري على ترحيبك بي. في البورد أقلام نتشرف بأن نقرأ لها وهي تكتب عن وطن حدادي مدادي نحن مسكونين بعشقه حتى قمة الرأس. فليتهم يستجيبوا لطلبك وطلبي ويتحفوننا بكل ما هو جميل..فنحن شعب جميل يحب الجمال في كل حرف كتب أو قيل..
لك ودي وتقديري
الزاكي

ألف مرحب بالأستاذ الأديب المبدع الزاكى عبد الحميد ... فقد عرفناه شديد الإهتمام بالأدب والشعر والفن فى ربوع النادى السودانى بمسقط
ونرجو أن يمتد صوته عبر الأثير لكل السودانيين فى هذا المنبر الرحب ... وشكرا لبكرى

الفنان الرائع Kh Abboud

شكراً على ترحيبك بي يا صديقي. النادي السوداني بمسقط الذي تتحدث عنه يا سيدي لما كان يحقق ما حققه من نجاح لولا وجود أناس غيريين مثلكم يعملون في صمت ومن خلف الكواليس لإعلاء الوجه المشرق لعزة في دنيا الاغتراب كما لك ماض-يا سيدي- تتحدث عنه مجلة الصبيان بلسان يلهج بالشكر وبالثناء كما ينتحب في نفس الوقت حزناً على ما آلت إليه بعد أن كانت قبلة الصبيان والصبايا والكبار قبلهم. لك يا صديقي- ولصديقك الرائع الفنان شرحبيل-الاحترام وقوفاُوالتجلة انحناءة لكل إسهاماتكماالتي تحتل في أفئدتنا حيزا كبيراً من التقدير والعرفان.
لك ودي
الزاكي

الاخ معاويه الطيب
مرحب حبابك
والف شكر ليك على الطله
الاستاذ الزاكى حقيقى اضافه للبورد ومحتاجين كثير جدا لامثاله
هؤلاء الذين يحملون الوطن فى حدقات العيون
لهم ولك التحيه والتقدير
شكرا بلا حدود

مرحب بالأستاذ الزاكي

إقامة طيبة إن شاء الله،،

شكرا الأخت سومة على هذه الإضافة الطيبة،،

الأخ وليد
لك ألف شكر على كلماتك الطيبة وأرجو التواصل.
الزاكي

الاستاذ الذاكي
تحيه خاصه لك
فانت اضافه حقيقيه لهذا المقام وتحيه لبكري لاتحته الفرصه
لنا بلقاءك علي هذا المنبر فمرحب بيك ونورت البورد





ودي واحترامي

مرحب حباب الاهل
الاخ وليد طه ..حبابك وانت جى شايل مع حجا الاهل
شكرا ليك انت على الطله وكلامك الزين للاخ الزاكى
الاخ الزاكى مكسب للجميع فى حوش بكرى .كما انه مكسب لنادى الجاليه بمسقط
ربنا يديه العافيه ان شاء الله
شكرا ليك اخى وليك شكرا قطرات الندى

أيها الفنان القامة..
لك ودي ووافر شكري ليس على ترحيبك بي فحسب وإنمالكل الجهود المقدرة التي تجسدها فرشاتك فرحاً في عيون أطفال النادي السوداني بمسقط .بكم يا سيدي ينمو الفرح أينما حللتم..وما أجمل الإنسان الذي يلازمه الفرح ليسربل به الآخرين. على أمل التواصل أقول إلى لقاء.
الزاكي

بمناسبة الفرشاه والاطفال والالوان
لك التحيه ايها الفنان التشكيلي المكتشف



وطبعا الاستاذ الزاكي ياجماعه عندو مقدره في التلوين
عاليه وله التحيه

اهلا الزاكي
انا ذاتي جديده لكن برحب بيك

سلام يا اهلنا

الاخوان الاعزاء

kh_abboud

الاخ احمدالعربى.. الاخ احمد كنت بسأل منك ..ان شاء الله تكون بخير

الاخت انعام عبد الحفيظ

حبابكم جميعا وشكرا على المرور والمشاركه

شكراً إنعام وأنا بدوري أرحب بك متمنياً لك طيب التواصل مع أهلك عبر الاثير.
تحياتي
الزاكي

اهلا ومرحبا بالاخ الاديب الزاكى
شكرآ سوما السلطنة
تشاركك الإسم سلطانة بيتي
و أشاركك أنا حب المديح
مرحبتين تلاتة بالضيف الاخ الاديب الزاكى

الأستاذ الطيب
لك كل الود والتقدير ووافر الشكر على ترحيبك بي. دعواتنا لك بالتوفيق في مساعيك الأكاديمية والحياتية عموماً..لك ودي من قبل ومن بعد..
الزاكي

الاخت سوما انا بخير
ولك ودي واحترامي
ويا ريت نعرف اخبارك
تحيه تاني الاستاذ الذاكي



وللمتداخلين ود واحترام