Post: #1
Title: *** سلام من البلد ***
Author: soma
Date: 04-21-2006, 06:55 AM
التحيه للجميع والسلام لكم بعد غيبه طويله ما بالخاطر
بمحنة اهلنا الهناك وبنفسهم وقلوبهم العامره حنيه
سلام من البلد
سلام..
اغرف من بحر الكلام ..
اغلا الحروف انسج سلام...
فى ثوب موشح بالمحنه والوئام....
واقلع من قيف الجرف شتلات غرام ...
اجدع فى الثوب القبيل ...
ارسم طيور.. فوق الغمام ...
حاضنه الحنين .. حاضنه الوله ..
شوق وابتسام ...
وارسل تحايا معبقه بالمشاعر والهيام ...
مليانه بى ريق الاهل..
نفس الاهل بتقول كلام ....وتقول سلام
من الشرق... اهل الدرق ..
شوقا الف .. طبعا ولف..
مرحب دبايوا يا كرام ..
من الغرب اهل الطرب
اهلا حبابكم باحترام ...
من الشمال صفق الشدر ...
صوت الوتر... ريحة التمر..
تقلد تطايب فى انسجام ...
ومن الجنوب نغما طروب..
سكسك يكشكش فى فرح ...
يجرى ويجوب..
كل الشوارع والدروب ...
و يقول سلام بدل الحروب ...
ومن البطانه الداره بالضرع الحلوب
بيتين شعر تصدح تدوب ...
جنيات تدوبى .. تسرح.. تنم
ترسم جمال ساعة الغروب
واقيف هناك وسط الاهل ..
و ريحة البخور.. اكتب سطور ..
تعبر جبال تعبر بحور ..
تحمل تحايا من شهور زى دهور ...
من قلبا سعيد مليان سرور ..
مليان حبور...
لى ناس عزاز قلوبا نور ..
ووجوها نور ...
ضيا متل بدر البدور...
ولهيجا زى نفس الزهور ...
اتمنى من ربى الشكور ...
يصل السلام مرسال محبه ..
ولى الاحبه ..الف ورده ...
و زحمة من باقات عطور ...
ا لف ورده وزحمة من باقات عطور ..
اسماء الجنيد مسقط
|
Post: #2
Title: Re: *** سلام من البلد ***
Author: bayan
Date: 04-21-2006, 07:25 AM
Parent: #1
| Quote: لف ورده وزحمة من باقات عطور .. |
وانتى ليك اجمل كلام
وليك احلى الورود
ليك وحشة ليه ما ظاهرة؟
|
Post: #3
Title: Re: *** سلام من البلد ***
Author: Tumadir
Date: 04-21-2006, 08:03 AM
Parent: #2
سوووووووووووومة
الجميلة "ام حنتن مرسومة"
الف مرحب بعودتك
واظنك كنتى مشغولة بالاحتفاء بى وبى سمية حسن
اشكر لك تلك الحفاوة ولن انسى تلك الليلة الحلوة التى قضيناها فى منلكما العامر انتى "وسى الجنيد"
ولن انسى ايضا حضورك لوداعى فى المطار
الناس هنا يعرفونك شاعرة رقيقة ..وانا اعرفك الآن انسانة بقلب كبير ووجه باش ..و"ست بيت ممتازة"
اكلك طاعم..وبيتك مفتوح للفرح والناس..
لك محبتى يا سمسم..
ولصديقاتك صديقاتى اصدقائك اصدقائى ..كل الشوق والفقد للمتكم الحلوة فى مسقط
متعكم الله بالافراح والسعادة...
|
Post: #6
Title: Re: *** سلام من البلد ***
Author: soma
Date: 04-21-2006, 12:55 PM
Parent: #3
تمااااضر
يااللــــــــــه على الزمن الكعب
ابدا ما متخيله ارجع تانى واكتب ليك واقالدك عبر الكى بورد
بعدما كنتى بلحمك وشحمك وروحك الحلوة بينا ووسط دارنا المتواضعه
وفرحنا بيك وطرنا فرح و و و كل الحاجات الجميله العملناها مع بعض
ما متخيله الحاجات دى تبقى ذكرى وتطوف اللحظات الرائعه بروعتك
تطوف وتمر زى البرق وتتركنا لوحدتنا الزمان ..
لكن املنا كبير فى رجعتك تانى والمره الجايه دى بى مهله وقعاد فى السهله
كانت ايام الواحد ما بقدر يعبر عنها لحظات نحتت فى الذاكره
وخلدت فى تاريخ حياتنا.. ولى هسه بنرص ونعيد فى ترتيب حكاياتك الممتعه
وقفشاتك الما مكرره وظرافتك البتشبهك براك ..
يديك الف عافيه يا الحديقه التحيه ليك قدر الفرح الزرعتيه جوانا
والتحيه ليك قدر الابتسامات الوزعتيها بدون تمييز او تحديد
ونشوفك قريب ان شاء الله .. التحايا عبرك لكل المعاك
شكر تماضر شكرا لمة زى لمتنا القبيل
|
Post: #5
Title: Re: *** سلام من البلد ***
Author: soma
Date: 04-21-2006, 12:09 PM
Parent: #4
سلاااام اهلى الطيبين
دكتورتنا بيااااااااان سلام بالاحضان
والله مشتاقين يا حنينه
الشوق نوار جنينه
تقولى شنو زحمة الايام بعدتنى عنكم شويه
لكن يعلم الله محكرين فى القليب وما ناسياكم تب
تسلمى بيان الحبيبه وشكرا قدر سماحتك ..
|
Post: #7
Title: Re: *** سلام من البلد ***
Author: soma
Date: 04-21-2006, 01:01 PM
Parent: #4
لؤى الضى حبابك وحباب الطلة البهيه
طلتك براها روعه يا الضى ما محتاج انك تتكلم ولا تقول
الاحساس واصل يابا
يديك الف عافيه وليك كل السلام الفى القلوب
شكرا يا الضى شكرا قدر فرحنا بيك
وتسلم من تانى
|
Post: #8
Title: Re: *** سلام من البلد ***
Author: قرشـــو
Date: 04-24-2006, 08:10 AM
Parent: #1
شاعرتنا العزيزة الغالية سومه
الف اهلا بى رجوعك يا ستى والعود احمد
افتقدناك كثيرا وغيابك دوما يترك فراغا
نحنُّ دوما الى الشعر الرقيق الذى يصور لنا الوطن
وانتى دوما تحملين الوطن فى أحرفك الندية
انتاج آخر يزخر وطنية ورقة وعذوبة
واقيف هناك وسط الاهل ..
و ريحة البخور.. اكتب سطور ..
تعبر جبال تعبر بحور ..
تحمل تحايا من شهور زى دهور ...
من قلبا سعيد مليان سرور ..
مليان حبور...
لى ناس عزاز قلوبا نور ..
ووجوها نور ...
ما اجمل كلماتك عزيزتى وما اسعدنا بها دوما
نرجو ان لا تغيبى عزيزتى عنا
|
|
