*** ترتاره ***

الترتار او الترتاره .. ما زالت موجوده فى بعض حلالنا وقرآنا رغم الحضاره ..هى ذكريات طفولة اخوانا الصغار .. زى الآتيه اسماؤهم ..
وهم وفى زمناداك بتكون لكزس لى اب حراز او شبح لى ابو جهينه .. واكيد كانت لى بدر الدين شنا ليلى علوى فى زمانا ( تايوتا لاندكروزر) لانه البدرى ده طبعا لازم يكون عنده سيارة الدفع الرباعى نسبة لتروس الحلة فى الخريف ..
كدى النذكركم ترتارة يا اخوانا ونعيش لحظات مع طفولة اهلنا الكبار .. وان شاء الله تعجبكم ..

*** ترتاره ***
ترتاره ترتاره فى الحله والحاره ..
صوتك الرنان فى ترابنا طمباره ..
وراكى كوم شفع تشابا تتجارا ..
فرحانه بيك ديمه كانه طياره ..
قضيتى كم مرسال لى يمه والجاره ..
ما بتخذلى الاطفال ما بتصدمى الماره..
تقيفى لو فى الحا ل لا اماره لا شاره ..
بترولك افراحهم وانفاسهم ا لحاره ..
كم شلتى فى طيك اخبارك الساره..
معروفه بى جودك ما بتعرفى الضاره ..
متجمعين حولك صغارنا فى داره..
لامه ذكراهم فى ليلنا ونهارا ..
معروفه فى كل دار من كسلا لى بارا ..
موزونه من يومك ما خابره شتاره..
لا دراسه لا مرسوم.. طابعنو فى وزاره..
تتقبلى المشوار لو جيتى فى زياره..
تتبسمى وتجرى تقضيه نواره
تعودى لى دارك لو تهتى محتاره
لا خرطه فى دربك لا جواز.. ولا سفاره..
ولوفه معروفه فى فريقنا كيف باره ..
ترتاره ترتاره ..
حديده معكوفه وسلكه فرفاره ..
لا كلفه فى صناعتك لا هم ولا خساره ..
مجهودك الجبار كانه سياره ..
قراشك النيمه لا اوضه لا عماره..
ترتاره ترتاره حنينه من يومك
فى دنيا وداره ..
سومــــا
اسماء الجنيد
2/6/2004 مسقط

سوما الجميلة /
قمة فى الابداع

Quote: بترولك افراحهم وانفاسهم ا لحاره .. كم شلتى فى طيك اخبارك الساره..

عاودنى الحنين يا سوما
حبى وتقديرى
السمؤل

الرائعة ريـــــــــا سومة
نفسي انقطع من الجري وراها
تسلمي

kwar

الشاعرة المرهفة ( سوما )

التحية ليكي و لكل آل الجنيد

Quote: او شبح لى ابو جهينه

هي بالنسبة لي كانت الفرحة الدائمة .. و المتعة التي لا تضاههيها متعة .. و بها كانت تتم لقيا الصحاب و الأحباب .. و بها كنا ندور في الحلال و الأزقة و الشوارع .. ( نتشيطن ) هنا و هناك ..و نتسابق .. و نقضي بها المراسيل ..
كانت في مقام ( الشبح ) نتباهى بها أمام بنات الحلة و الحى ..
لله درك يا سوما فقد أرجعتينا إلى زمن الصبا .. تلك الأيام التي لن تعود ..
طبعتها لأقرأها على الصغيرات في البيت .. مع الشرح بالتفصيل طبعا
تسلمي

Quote: تتقبلى المشوار لو جيتى فى زياره.. تتبسمى وتجرى تقضيه نواره تعودى لى دارك لو تهتى محتاره لا خرطه فى دربك لا جواز.. ولا سفاره..

فيلم تراثي عميق يا سوما يحكي قصة زول كان طول النهار:
وسط الحلة يتجارى
ســـاكيلو ترتارة .


ما أروعك يا أصيلة. وأنت تعودينا الى محطات كادعفارالزمن
الردئ أن يدفنها الى الأبد .

لك مودتي .

خضر عطا المنان

السلام يا اهلى الكرام ورمضان كريم .. تصوموا وتفطروا على الف .. الف خير
وربنا يعودوا علينا ان شاء الله بالخير والبركه ..والامن والسلام والمحبه ..
وربنا ينقى النفوس ويقربا .. قادر يا كريم آميــــــــــــــن

السمؤل الحنين ..انت دائما حنين وجواك حنيتك اهلك والله
يديك العافيه يا الضرا الخاتى الشرا..
تسلم وربنا يمتعك بالصحه والعافيه ..وكل سنه وانت طير ورمضان كريم
التحايا ليك يا سمؤل قدر حنينك يا كريم الخصال ..

****
اخوى عادل اخو ريـــا ..
التحايا والاحترام يا كريم .. الشوق ليك جارى زى الترتاره وزى جريتك وراها .. وبفتش عليك فى كل غرف البال يا اخو البنيات..
والله افتقدناك .. وغرف اللشعر والفكر والادب افتقدتك وافتقدت تنظيمك وضيوفك المميزين .. وهمتك وجهدك المثمر المقدر ..
عود من تانى اخونا العزيز .. لا اسكت الله لك حسا ..التحيه عبرك لى شاعرنا النوبى الاصيل .. محمد مختار عبدون ..
والف الف شكر على الطله ..ورمضان كريم عليكم ..تصوموا وتفطروا على الف خير ان شاء الله ..

*****

ابو جهينه يا بحر الاهل .. تسقى من طرف لا بتكل ولا بتمل ..
التحيه ليك يا رجل يا موسوعه .. ..يا قبلة اهلنا السمحين.. تسلم يا الحنين
عجبنى جدا اهتمام وطباعتك للقصيده .. لكى تقراها للصغيرات فى البيت .. مع الشرح لهم
من اصلك يا تيراب الجدود .. ربنا يخليهن ليك ويخليك ليهن .. ويربوا فى عزكم ان شاء الله
ويكبرن ويبقن لينا ضى زى ضى ابوهن
ابو جهينه الشكر ليك قدر سماحتك ..

****

اخوى الحنين خضر عطا المنان
رمضان كريم وكل سنه وانت طيب
حبابك وحباب نضميك وهرجك المن نص البيوت المضرضره حنين ومحنه
بوجودكم انتو يا اخوى تب ما بنطفى بريق اهلنا ولا بتنقلع جزورهم الخدرا..
ربنا يغزرنا ويعمرنا بيكم ..وبى وليداتكم واحفادكم يا ركازتنا وضلالتنا ..
اخوى خضر .. الله يخدر دربك ويعمر عمرك .. وينور حياتك..
التحيه والشكر ليك دعوات فى الشهر السمح ده ..

سوما سلام
بس سؤال صغير انتي الكتبتي البوست الحلم بتاع رجوع سودانيين المهجر قبل سنتين ولا تشابه اسماء فقط ؟

لو انتي يا ريت تعيديهو تاني عشان يتواصل الحلم السوداني

صـــديقتي ســـوما..حبابك
لقد قرأني صــديقي أبوجهينة تماما.. و أضيف لا زال في جــوانا ذلك الحنين الســرمدي للمراسيل و الترتارات .. نعم كانت طاقة من تأسيس معني الحياة .. و السير في دروبها .. طبعا ما ح نكب الجرسة و نقول بقينا ترتارات في ايد الدنيا .. و لكن برضك ح نفرح لذكرى الترتارة..
و دمت
كبر

الشفيفة ريـــا
والله مابعدني عن لمتكم الحلوة وامسياتكم الرائعة
سوي الترحال والجرى وراء الدنيا المابتتلحج ..
وقريب انشاء الرحمن في ندوة ولقاء كبيـــــر علي النت .
يالله شدي حيلك وخليكي جاهزة .
لهذا اللقاء .. وعلي فكرة هيكون لقاء نوبي مشترك
اتعلمي الرطانة من هسع . لووووووو.
تحياتي لاسرتك الكريمة

لك أيتها الفراشة
ندى الحقول
ورحيق الأزمنة الناضرة..
ولك التحية
أيتها الشاعرة القمر..

معز

الرائعة
سوما
لك عاطر التحايا
والله الترتارة دى
كنا دايرنها تترترلنا البدرى ده
وتوصلوا لينا فى الحصاحيصا
لكم ما باليد حيلة
ما تقولى حلتن ما بعيدة مننا
تسلمى يا بت بلدى يا سودانية يا اصيلة
تقبلى تحيات العروسة
كل الود

سلامات
وعوافي
قصيدة تساقط ضوءا من ماضي غبُره تراب الحاضر بفعل الحديث...
حتي الالعاب طالتها لوازم التغيير فاضحت الترتاره رمز لماض عتيق وجميل
شكرا سوما ارجعتيني اليوم نيف وعشرون عاما...حين كنت من فحول المترترين في الحلة وكم سافرت بالترتار في ربوع مدينتي رفاعة وكلها ايام سجلتها الذاكرة بحروف من دموع ومازال الاشتهاء والركوض نحوها يهزني ايما اهتزاز..ايام النقاء والصفاء والود النبيل..
سلمتي ياصديقة

يا سلاااام عليك يا سوما

حقيقي جميله شديد

ومعبره

وحنينه جنس محنه

السمؤل الحنين عذرا والله .. الكى بورد ولولوت الاصابع بسابقن فى الترتاره .. والخطا المطبعى لخبط صباحى وانا جايه اطلكم ..
كل سنه وانت طيب يا حنين ورمضان كريم والعافيه تبقالك رفيق طول الطريق ..

عارف يا السمؤل هسه لو كنت صايمه كان اشتغلتونى وقلتو ما صايمه ومتجرسه ..عشان كده ما شافت كويس لووووووووووول ..
عذرا عزيزى مره اخرى على الخطا المطبعى ولك العتبى ولدواخلك الحنينه ..
وتحياتى لك

Quote: اخوى الحنين خضر عطا المنان رمضان كريم وكل سنه وانت طيب الله يخدر دربك ويعمر عمرك .. وينور حياتك.. التحيه والشكر ليك دعوات فى الشهر السمح ده ..

فراشتنا الجملية : سوما

شكرا للدعوات الصالحات مع تباشير هذا الشهر الفضيل
ومبارك عليك وتصومي وتفطري على خير
وكل سنة وانتي والعيال والكل هناك وجميع أهلنا
الغبش الغلابة في وطننا الحبيب بألف صحة ومليون عافية .

وهناك مني تحية صادقة اليك في بوست ( جيتي انتي))
ردا لبعض بعض مما غمرتني به من مشاعر اخوية كم اجلها
واقدرها من شاعرة بقامتك تنثر الرياحين والفل والياسمين
والقرنفل فوق دروبنا صباح مساء .

خضر عطا المنان

الرائعه المرهفه الشفيفه سوما

حليل ترتار وقيره
جري ولمة بطان فوق الدميره

تقريبا مقاطع للأغنيه طنبور قديمه بس أخوك ما قديم

شكرا علي اتحافك لنا أيتها الرائعه بهذا المندثر من ذاكرة الخراب
ترتار وقيره وشليل وام العلب وكل العاب الطفوله بنشاطها وحيويتا وبراءتها

طارق ع الأحمدي

****
محمد ود العمده .. سلام يا العشا ..
حباب طلتك وجيتك لينا يا كريم
اما بالنسبه لحلم السودانيين ورجعتهم ..
دى ما انا للاسف والله .. لكن بحاول افتشوا ليك ..ويا ريت الاخوه والاخوات المتداخلين ..لو عتروا فيه يجيبوا لينا ..
شكرا ليك رجعة اهل يا ود العمده وتسلم ..

*****
الاخو الصديق الوفى .. كبر ..
تكبر وتكتر ايامك السمحه انت يا يابا ..
حاجاتنا القديمه سم