*** رحيل ***

*** رحيل ***
مشيت بعيد من جنبنا ..
رحلت وراك
كل الدروب والامكنه
بارياك تفتش للحنان..
الكان معاك ساكن هنا
وللبسيمات المفرهده فى الديار..
اريجها عبق سوسنه
بى ضل كلامك يا ملك ..
يا زول مجرتق مننا
شلناك وديع متل الرضيع
ضلل بهاك يا ضلنا .
منانا نلقاك من زمان
قبال ميعاد بى كم سنه
شلناك وشاح فى كل صباح
شفناك عريس بى قلبنا..
لميت معاك كل الفرح
حتى الحرف رفرف دنا
رتل غناك المن صفاك
كل المشاعر المحزنه
عب النغم جدول طرب
شتل الحنين ساحات منا
لون بساط الكون خدار
فرهد جوار النيل سنا
ذكراك صبحت تنتظر
غنوات نشيلا ندندنا
نشوفا صورتك تبتسم
نرسم خطوط بى دمنا
لوحة وفا تفضل تعيد
ايامنا قربك يا جنا
ايامنا قربك يا جنا
سومــــــا
مسقط 28/6/2004

هذه القصيده سوف تغنى قريبا ان شاء الله من الرائع جدا ..
الاخ مصطفى السنى ..والحان الاخ الناير حسن من اعضاء فرقة عقد الجلاد سابقا..
التحيه لهما..

متذكره ؟؟؟
وفاكراها يا ست العيون المذهله
يافكره فينا مأصله
ياقمره عاوزين نوصله
نتشابى ما بنحصله
أشواقنا ليك بنرسله
فى غنوه أو كلمات غزل متواصله
ونتمنى قبال ما تصل أرواحنا تمشى تحصله.

.
.
.
دمتى أبدا سفيرة للجمال والحرف الندى.

سوما

(منانا نلقاك من زمان
قبال ميعاد بى كم سنه
شلناك وشاح فى كل صباح
شفناك عريس بى قلبنا..
لميت معاك كل الفرح
حتى الحرف رفرف دنا
رتل غناك المن صفاك
كل المشاعر المحزنه
عب النغم جدول طرب
شتل الحنين ساحات منا
لون بساط الكون خدار
فرهد جوار النيل سنا
ذكراك صبحت تنتظر
غنوات نشيلا ندندنا
نشوفا صورتك تبتسم
نرسم خطوط بى دمنا
لوحة وفا تفضل تعيد
ايامنا قربك يا جنا
ايامنا قربك يا جنا) ..

مررت بالقرب من هذا النبع الصافي .. و وقفت عند هذا الجدول ..
( تذكرت أيام سودان دريم القديمة .. و يالها من أيام ) ..
أرقدي عافية

سوما

Quote: هذه القصيده سوف تغنى قريبا ان شاء الله من الرائع جدا ..

الرائعة جدا انتي والله


امبارح كنت غرقان لي اضني فيكي في موقعك.....لكن اللنك بتاع القصائدالجديدة ما شغال يا سوما

والله يا سوما ما دام سجيمان قال انتٍ رائعة..
تبقي إنت حاجة تانية.. فوق حد الروعة

حاجة زي:

أجمل حقيقة
صاحية فى لحظة جنون
شاقة بين الليل طريقها
سارحة فى ضجة سكون

ويا مراسينا الغريقة
فى بحر سر العيون
و قِّفى الساعات دقيقة
و فجّرى العالم فنون

وها هي سوما تفجر العالم إبداعاً.. وبرحيلها هنا ترحل إليها المسافات والأفئدة
ويجيؤها الشفق..

وَالعَصَافِيرُ تَهجُرُ الأوكَارَا
وَدِيارٌ كَانَت قَدِيمًا دِيارَا
سَتَرَانَا، كَمَا نَرَاهَا، قِفَارَا

سَوفَ تَلهُوبِنا الحَياةُ وتَسخَر
فَتَعَالَ أُحِبُّكَ الآنَ أكثَر

..

سوما.......
معاك رجع الصفا الصداح
من الهجرة
وانكتبت علي الابواب
معاني النظرة لي بكره
همد موج الحزن في الروح
وغابت حرقه الزكرى
واصبح يقين معاك
هوى..الفه..وجمال فكرة

فراشتنا الجميلة : سوما

كل يوم تحلقين بنا الى عالم بنفسجي الألوان .. زاه وبهي ..
عالم تزينه أفراح الطفولة السمحة ..
عالم غارق في أصالة تعطرين بها دروب حياتنا .


عطر ربي دنياك برضاه ياسوما..
وخدر يراعك وعمرك الطويل باذنه تعالى .


خضر عطا المنان

دمتى أبدا سفيرة للجمال والحرف الندى.
*****
اخوى تاج السر ..
ودمت انت رمزا للاخوة ..
رمز للجمال .. يا سمح الخصال
بتعجبنى مداخلاتك دائما اخوى تاج السر ..
زيارتك لرحيل .. كملت جمالها وكستها من لون ضفاف النيل ..
تسلم اخوى تاج
والشكر ليك ضفاف ...

****
ابو جهينه يا موسوعتنا
حليل ايام سودان دريم ..
وذكرتنى برضو كلامك الجميل
الوشحتنى بيه فى كل قصيده وفى كل مداخله
ولم ولن انسى ابدا البوست الفردتو مساحه خضراء لاختك بت الجنيد..
ابو جهينه شكرا لمة اهل ..
****
سجيمان .. الزول السمح وفنان ..
حبابك يا جغمة العطشان ..
والله مبدع انت وزايد جمال .. واستراحاتك الجميله هى الواحه
البنغشاها من حين لاخر ..فى زمن الهجير
يديك العافيه يا دوك ..والله يفرحك زى ما بتفرحنا ..
والشكر ليك ابتسامات ..

*****
د/ معز
سلام يا شفيف ..
يا خدار قالد القيف
يا نغيمة ويا بسيمه
ويا مطيره حاضناها غيمه
.. لو كانت سوما .. فوق لحد الروعه ..
انت تكون شنو يا متواضع ؟؟
التحيه ليك قدر سماحتك
وقدر بشاشتك
وقدر تواضعك يا انسان
والشكر ليك
الحان ..
والود
نسمه...

****
وحيــــــــــــد يا وحيـــــــــد
الله عليك وعلى كلامك الفريــــــــد..
ورجع معاك انت
الفرح الكان مسافر
وشوقنا الديمه دافر
والحنين فى عيون مهاجر
والغويمات المواطر ..
تسلم يا وحيد الحرف المميز
والنغم المدوزن..
والفرح الملون ..
والشكر ليك .. نجمة .. نجمة
****

اخوى خضر الحنين
كلامك ديمه سمح وزين
يا ود رجال الدين
يعطر حياتك انت يا يابا بالسمح
ويلون ايامك بالنعيم
ويلفحك بالعافيه والطيبه
يا فخر بلدى الحبيبه
والتحيه ليك
حجاوى حنينه
ارقد عااااااااااااافيه

الأستاذة سوما ..

تهانينا القلبية بنجاحك وقبول قصيدة " رحيل " لتصبح لحنا يسمع ..

فأنا مازلت عند رأى .. قد آن الأوان لطباعة ديوانك الأول لأننى واثف من وجود مادة ذات ذوق خاص .. تذكرنا بأصلنا وأصولنا القديمة ..

وفقك الله .. ودمت دوما وأبدا الى الأمام ..

عمك العجوز ..
أرنست أرجانوس جبران

الأستاذة سوما ..

تهانينا القلبية بنجاحك وقبول قصيدة " رحيل " لتصبح لحنا يسمع ..

فأنا مازلت عند رأى .. قد آن الأوان لطباعة ديوانك الأول لأننى واثف من وجود مادة ذات ذوق خاص .. تذكرنا بأصلنا وأصولنا القديمة ..

وفقك الله .. ودمت دوما وأبدا الى الأمام ..

عمك العجوز ..
أرنست أرجانوس جبران

ريـــــــــــا
انتي عارفة من روعة القصيدة ..
قربت انسبها الى نفس ولكن في اخر لحظة
اتذكرت اني مابعرف عربي كويس .
لوووووووووووووول
تسلمي لينا ياوحتنا في مرأف غربتنا .
واكرر الدعوة للقاء القريب في البال .
وسلامي لابو محمد والاولاد .

عمى الحنيــــــــــن ارنستو
وينك يا رجل يا ما عجوز..
والله الشوق ليك مكحل بالدميعات الحنان زيك ..
ليك وحشه يا عمو قدر سماحتك والله ..
وليك موده واحترام خاص جدا
حاولت كم مره ارد على رسالتك لى فى بريد الموقع ..لكن فشلت نسبة لجهلى التام بتكنلوجية الزمن المشاتر .
لك العتبى يا عمنا يا غالى حتى ترضى ..
احب ابشرك ..
اولا رحيل دى الاغنيه التاله بالنسبه للاخ مصطفى السنى ليغنيها
ده غير الموجود عنده ومدكنه للزمن يفاجئنا بيه ..لووول ما يسمعنا ولا يشوفنا الزول الحنين ده ..
تانيا اخونا عاصم البنا برضو غنا ..واخونا سيف الجامعه .. والاخ ضياء الطاهر ..والاخت صاحبة الصوت المميز شاديه ربنا يحفظها .. برضو غنت مجموعه .. التحيه لهم جميعا
وده غير القصائد اللسه ما اتلحنت ..
منها مجموعه لحنت منها واحده مع استاذنا محمد وردى ..له التحيه والتقدير.
ولك انت عمى العجوز الامنيات الجميلات بالسعاده والسرور..
اما طباعة الديوان باذن الله ح تكون فى القريب العاجل ..واول نسخه تجيك طايره جوا باذن الله .. دعواتك معانا يا حنين ..
سعدت جدا لطلتك اليوم والله يا عجوز .. واطمانيت الحمد لله انك بالف خير ..
لك كل الشكر ..
والود نخيل ..

****

مسؤب .. الاخ عادل .. تحايا واحترام
لوووووووووووووووووووول . طبعا ضحكت كده فى كلامك كميات .. و اتذكرت ونسات البال تولك
وذكرتنى اخونا مستر آرمى الله يطراه بالخير ..
قال مره فى حصة العربى ..
قام ليك عليه استاذ اللغه العربيه .. وجاط فيه فى موضوع لغه ..
بعد شويه قال ليه اعمل ليك شنو انا .. حا تجيب لى عربى من وين انت ..
حاتورثو لى من منو ؟ لوووووول .. ونفعته الحاجه دى وعتقدتو من جلده سخنه فى زمنو داك ..
شكر اخى عادل شكرا بحر ..ونحن فى انتظار جلساتك الفنيه وفى شوق كتير لها ..
تحياتى لشاعرنا النوبى الاصيل .. محمد مختار عبدون ..
وكل سنه وانتو طيبين

الأستاذة الكريمة والرقيقة جدا ..
سوما ..

أشكرك على كلماتك العميقة والتى تخاطب الفؤاد مباشرة .. دون المرور " بزواقيق " أو " حارات " التملق أو الخداع ..

فالتهنئة من القلب أيضا على ما ذكرتيه من أخبار ألحان أشعارك والملحنين الأفاضل .. فهل أطمع بأن أقتنى بعضا من تلك " ألاشرطة " الى أن يطل ديوانك بصفحاته المضيئة ..؟؟ ..

ولك منى أغلى وأعلى احترام..
مع شكرى وتقديرى ..
عمك العجوز ..
أرنست أرجانوس جبران

Quote: رحلت وراك كل الدروب والامكنه بارياك تفتش للحنان.. الكان معاك ساكن هنا وللبسيمات المفرهده فى الديار.. اريجها عبق سوسنه بى ضل كلامك يا ملك .. يا زول مجرتق مننا شلناك وديع متل الرضيع ضلل بهاك يا ضلنا . منانا نلقاك من زمان

سوما:
إيتها الرائعة ..والمسافرة في دواخلنا ..القا ..وجمالا.. وشعرا ..ونثرا..

فلتحلق فراشت روحك الجميلة ..علي سماوات حزننا.. فتهطل بها امطار الفرح.. ونشوة الابداع...

مع خالص الود.. وتحياتي للاسرة,,

ايهاب العم الحنين ..
سلامى واحترامى لك فى كل لحظه وانت تسعدنى وتنفحنى باريج كلامك..
الشكر ليك دائما محكر فوق
ربنا يسعدك دائما ويعطر ايامك بالفرح
ويتوجك بالسعاده ..زى ما متوجنى بريق حروفك يا حنين
الشكر والتقدير لك بستان كلام
والود ورود..

مرحب من تانى عمى الحنين ارنستو ..
حبابك انت وحباب جياتك لينا السمحه ..
غاااااالى والطلب رخيص يا عمو ..
ارسل ليك كل الحاجات الاتسجلت واتغنت .. بصراحه معاى اغانى مصطفى السنى فقط .. اما تسجيل لى باقى الاخوه حتى اللحظه ما عندى ..
منتظرين يسجلوه رسمى وبعدها الشريط يكون ملك لى اى زول ..
لكن برسل ليك تسجيل بى صوتى لبعض القصائد .. عيديه عشان خاطرك الغالى
وعشان طلتك علينا بعد غياب ..
ارجو انك ترسل لى عنوان الخاص فى البريد الاتى ..
[email protected]
ولك شكرى وتقديرى

سوما
{شتل الحنين ساحات منا }
شفتي متلازمة الحنين هذه هي التي تورطني دائمآ من زمن { السواقي النائحة عز الليل حنين الدنيا ممزوج في بكاها }طينتنا عجنت من حب وحنان وحنين ، ولذلك كلما كحلت العيون قصيد موشى بالحنين حتى يتسع بؤبؤها ، وينفتح القلب على مصراعيه.
الجمال الفوق أغرانا بالإستزادة فهل دليتينا على موقعك؟

سوما الزولة أنيقة الكلمات وأنيقة الاحساس
ما بنقدر نقول كلام سمح زي الشعراء السبقونا فقط نعبر عن إندهاشي من شجن الرحيل وروعة القصيدة الأغنية

هل من مذيد ؟؟



سوما ..

الينا بالمذيد ...



بروفنا المعز .. كيفك يا جميل ..
قلت مناسبة الواحد يسلم عليك.

ابو ساندرا ود امى ..
انت زاتك ما حنين ..
اهلنا الغبش يا ابو ساندرا ياخوى
رضعان من حكر المحنه
ومفطوم بى تمرات من شدرة الطيبه
دميعتنا فى طرف عينا
بتسبقنا جاريه قبال نقالد .. كان فى السلام كان فى الوداع
فى الفرح وفى الحزن
ربنا يعمر قلوبنا حنيه ..
والزايله دى ما فيها غير الكلمه الطيبه ..
والمحنه مى بقروش على قول حبوبه
ابو ساندرا حبابك من تانى .. واليك بالموقع
www.soomat.com

حبيب البلد
وحبيب الاهل كلهم
حبابك انت يا الحنين
كيفنك واريت حالك زين
يديك الف عافيه ويعطر ايامك بالافراح بركة الايام المباركه فى الشهر المبارك
وكل سنه وانت طيب ..
شكرا على الطله
يا ود الفريق والحله..
والود .. محنه ..

سامو تومى الملازمنى فى اسمى ..
حبابك يا ضل الاهل
اها خلاص اتنازلت ولا الاتفاقيه نفعت معاك ..
تسلم يا ذوق على الطله
وكل سنه وانت بالف خير
وشكرا جدول محنه ..

اليكم اخوتى جميعا الموقع وان شاء الله المقام يطيب ليكم
اتفضلوا لا داخل ..
www.soomat.com[/B]