*** ضى القمر ***

سلام احبتى اعود لكم من جديد بعد غيبة بالجد اشتقت ليكم كلكم واتمنى ان نتواصل معا على دروب المحبة والسلام ولكم جميعا منى عاطر التحايا والود ..
وبعودتى اليكم هذه القصيدة عن بنت بلدنا الاصيله دوما بعنوان ضى القمر ..اتمنى ان تنال رضاكم والف شكر..

ضى القمر
يا بنيه يا ضى القمر ..
يا واحة فى شمسا وحر ..
يا كلمة ما انكتبت شعر ..
ويا نغمة ما دقاك وتر..
يا احن من كل البشر ..
يا بنية يا نور البصر..
طليتى زى وهج البدر..
ضويتى ساحات السمر
ناديتى نجمات الفجر..
سقيتى ارواحانا العطر..
بسيمتك الكاسية الثغر ..
لهيجك الناعم درر..
مشيكى فى الواطة بيسر ..
بناجى اغصان الشدر
ويحاكى غيمات الضهر
يا بنية يا دغش المطر
جواك انفاس الزهر
شايلاه للماشى وعبر
حاضناه طفلا فى حكر..
يا لينة يا طين البحر..
لا لايه ليلك ما فتر..
ضوايا ضوك كم بهر..
غنايا صوتك كم سحر
صوفية نبراتك ذكر
شاشايا شيشك يا بكر
حورية عينيك الحور
نوريه نوارك نضر ..
بدوية مضمورة الخصر
معجونه بى عنبر ندر
فطينة فكرك من فكر
حاشاكى من كلمة بطر ..
وحشاكى مبروم زى كور..
اديبة غضيتى النظر.
وفية وعدك زى نذر..
حنينة عطفك منهمر
يا ناعمة يا ضل الضحى
يا ناعسة يا نسمة عصر
سامحينا وصفك مختصر
منك بنطمع فى العذر
حافظك القادر قدر ..
من كل حاسد ومن كفر
ومن كل لله ما ذكر
يا بنية يا آية وصور
يا بنية يا ضى القمر
يا بنية يا ضى القمر
اسماء صديق الطيب الجنيد
مسقط سلطنة عمان
21/1/2003

العزيزة سوما

الف حمدا لله على سلامتك وعودتك الميمونة والله كان ليك وحشة ما ليها حد والبورد كان مظلم بدونك

رائعة بت البلد وهى دوما بت بلدناالتى نعول عليها وهى التى تهدينا الفأل والامل فى الحياة

قصيدة رائعة جدا كعادتك وكما عهدناك تأتينا بالدرر فتهانينا وامنياتنا بمزيد من العطاء ..

مع تحياتى

العزيزه سوما
تظل كلماتك دوما متجدده تحمل نسمات
تخالج الوجدان لتزيل عنه اتربة الغربه تكتسب
النفس انتعاش يعيد لها التوازن والحيويه دمتى
لنا بروائعك الزكيه و دمنا لك بحمل الاحترام والتقدير

الغاليه سوما...
ليك وحشه والله..فقدنا كلماتك الرقيقه وحضورك الجميل..
ما تحرمينا من لوحاتك الشعريه..
والف شكر ليك يا قشطه...


كل الود

ليون

هلا هلا دا الكلام ياسوما يارائعة
وواحشانا جد . لى قدام

يا بنيه يا ضى القمر ..
يا واحة فى شمسا وحر ..
يا كلمة ما انكتبت شعر ..
ويا نغمة ما دقاك وتر..
يا احن من كل البشر ..
يا بنية يا نور البصر..
طليتى زى وهج البدر..
ضويتى ساحات السمر
ناديتى نجمات الفجر..
سقيتى ارواحانا العطر
العزيزه / اسماء
نتلهف معانى الكلم حين يخط يراعك السمهرى اجمل التعابيرالباهية المقال حقا انتى تحفة شعرية غنية المعانى تمتلكين باعا ملهم التعبير من حيث اللغة العربية وفقك الله ورعاك مع خالص تحياتىوتقديرى

العزيزه الاخت الفاضله / اسماء
لك الاحترام والتقدير وراجيا لك كل التوفيق والنجاح وشكرا على
كلاماتك الراقيه ربنا يحفظك

الاخ العزيز عمدتنا العظيم قرشو .. تسلم يا ابن العم وكل سنه وانت طيب وربنا يحقق احلامكم كلها يا رب
وكتر خيرك على الكلمات الجميلة وتعبيرك المتفرد دوما على كل بوست .لك كل الاحترام واللتقدير ودمت لنا اخ كما عهدناك ..



اخى العزيز صادوح ..اولا تحية واحترام وفرصة سعيده لى ان التقيك اخى الكريم
لك كل التحايا العطره والشكر الجزيل على لطافة كلماتك ورقة اسلوبك واتمنى ان اكون دوما عند حسن ظنكم اكرر شكرى وتقديرى ..


الحبيبة الغالية ليون .. ان شاء الله ما تشوفى وحش يا حبيبة .. تسلمى كتير وكل سنة وانتى طيبه بالعام الجديد ربنا يحقق كل احلامك يا رب .. الف شكر على كلماتك الحلوة فى القصيدة ..وان شاء الله ربنا ما يحرمنا من بعض .. تحياتى ...



الفنان المبدع صاحب الصوت المتفرد الطاهر .. تسلم اخى العزيز والف شكر على كلماتك الظريفه ..ربنا يقدرنا على ارضاء الجميع ان شاء الله ..


اخى العزيز بامسيكا .. كيفك واخبارك .. جد غيبة طويلة ..اتمنى ان تكون بصحة جيده .. كالعادة اخى بامسيكا تمطرنى بعاطر كلماتك وثناءك ..وتخجلنى بحق وحقيقة .. فكم تكون سعادتى حين اجدكم جميعا حولى تشدون من ازرى لمواصلة المشوار .. تسلم يا بامسيكا كتير وربنا يقدرنا على جزاك .شكر بلا حدود ..ولك كل التحايا والاحترام ..


اخى العزيز جدا عمر .. اهلا حبابك بعد غيبة فى البورد .. اتمنى لك كل الصحة والعافيه
لا اقدر على شكرك .. فقط اتمنى من الله ان يعطيك قدر ما تعطى .ويمتعك بموفور الصحة والعافية يا رب.. ودعواتك يا حاج .تسلم دوما
احبتى جميعا لكم كل الشكر والتقدير الى ما لا نهاية
ولكم كل الود