*** الدنيا حر ***

*** الدنيا حر ***


03-03-2004, 09:58 PM


  » http://sudaneseonline.com/cgi-bin/sdb/2bb.cgi?seq=msg&board=75&msg=1134258012&rn=0


Post: #1
Title: *** الدنيا حر ***
Author: soma
Date: 03-03-2004, 09:58 PM

الدنيا حر***
لمن تكون صافى المطر
تسقى الحنين غيمات ضهر
تجنى الأمر آخر العكر..
مافى مفر .. ما الدنيا حر..
حين تنشتل في قيف بحر
للموج رفيق للطين وزر
ما تفتكر صفق الشدر
عايش معاك فصل العمر
ما الدنيا حر..
لازم يجف لونو السمح
يصبح كتر ..
والضل يهيم تارك الشدر
واقف حزين نصو انشطر
يمكن يعود بعد الفجر
وامكن يكون مر وعبر
ما الدنيا حر ..
لمن تلم نصين شتر
تغزل خيوط صبحت وتر
ما تفتكر نسجك غنا
لحنك عطر..
ما الدنيا حر
وكيف تنتصر وانت النفر
وسط الجيوش جاتك دفر
مزروع دريبك شوك سدر
طعناتو في نص الضهر
والدنيا حر ..
وكتين يفيض شوقك دفر
ضامى الخدار حزمة زهر
ضافر النخيل جرتق نضر
ما تفتكر الكون حضر
والنيل طمح غطى الصخر
ما الدنيا حر ..
وكتين تصوم كايس الفطر
عز الهجير ريقك حجر
ما تنتظر فجر القدر
ما قال صبر
لكن صبر لمن فتر
ما الدنيا حر ..
ما الدنيا حر
الدنيا حر

أسماء الجنيد مسقط

Post: #2
Title: Re: *** الدنيا حر ***
Author: نصار
Date: 03-03-2004, 10:15 PM
Parent: #1

المبدعة دوما اسماء

حمد الله بسلامة العودة الظافر
و زى عادتك ما بتجى ايدك فاضية

للحر هناك نفس فعل البرد هنا
الحر الرمز حاصل علينا
و البرد يقتل فينا ابا ذر

شكرا على الكلام المعبر عننا

Post: #3
Title: Re: *** الدنيا حر ***
Author: سمندلاوى
Date: 03-03-2004, 10:55 PM
Parent: #1

يامرح ومرح البورد
نورتى ياسوما والبركة فى الطلة
وينك انتى الطال غيابك
تحياتى
بكرى

Post: #4
Title: Re: *** الدنيا حر ***
Author: soma
Date: 04-03-2004, 11:45 AM
Parent: #3

نصار الرصين حبابك يا ضل الاهل .. التحيه ليك ياشدر الهشاب ..يا غيم بلدنا يا سحاب ..رغم الغيبه عنكم ولكنكم فى البال .. افتقدكم جميعا اخوان اعزاء واخوات حنينات .. يا ريت نتلم ونجتمع فى رحاب الوود والاحترام.. التحيه للمدام ..
الحر الاتفرض علينا بنبرد جوفنامنه بى الشوق الفى حشانا .. وربنا يلم شملنا جميعا ويدفيكم من بردكم القارس ويضللنا بى نفس الاهل بعد غيابنا الطال ..



ود الاهل الحنين بكرى حبابك يا عشا البايتات .. يا مقنع الامات .. البورد منور بيك يا ابو الفن يا معتق بوطينتك وباصالتك المعروفه بيك ومعروف بيها ..
الشوق ليكم ممتد والله وفايتكم بى هناك .. كتر خيركم كتير واتمنى ان اكون دائما عند حسن ظنكم بقدر وقفتكم معاى... وتسلموا كتير يا جزور الوطن..

Post: #5
Title: Re: *** الدنيا حر ***
Author: bamseka
Date: 04-03-2004, 12:57 PM
Parent: #4


سومه
صاحبت اليراع الذهبي
في كل حين إلى آخر حين ننظر إلى عناوينك التي ترسليها نتسرع شوقاً لنعبر حول كتاباتك وحرفكم التي نتأملها حرفاً حرفا... لك ياصاحبة الكلم والمقال الملهم اسماء التحايا .. والاحترام

Post: #6
Title: Re: *** الدنيا حر ***
Author: Abd-Elrhman sorkati
Date: 04-03-2004, 01:03 PM
Parent: #1

Quote: والضل يهيم تارك الشدر
واقف حزين نصو انشطر
يمكن يعود بعد الفجر
وامكن يكون مر وعبر
ما الدنيا حر ..



تسلمي يا سومة

Post: #7
Title: Re: *** الدنيا حر ***
Author: Elmosley
Date: 04-03-2004, 01:16 PM
Parent: #1

الف حمد لله علي عودتك الجميلة بهذا الجمال

Post: #8
Title: Re: *** الدنيا حر ***
Author: الارباب
Date: 04-03-2004, 05:15 PM
Parent: #1


الرائعة اسماء الدنيا حر فصول الاحساس والدنيا حر***
لمن تكون صافى المطر
تسقى الحنين غيمات ضهر
تجنى الأمر آخر العكر..
مافى مفر .. ما الدنيا حر..
حين تنشتل في قيف بحر
وفصول الاحساس تتبدل تقربنا من عودة فراشتك الزاهية وصافى المطروغيمات الضهر وبراعم خضر صفق الشدر متجدد طول الدهر
نورتى البورد وجبتى فصل الفراش والغيمات
رائعة تعيش الزول فصل من فصول العمر ووقفة احساس انا ما ناقد لكن احساسى
ونتوقع منك المزيدمن الابداع

Post: #9
Title: Re: *** الدنيا حر ***
Author: منصوري
Date: 05-03-2004, 04:50 AM
Parent: #1

تمام يا اسماء

Post: #10
Title: Re: *** الدنيا حر ***
Author: بدرالدين شنا
Date: 05-03-2004, 05:10 AM
Parent: #1

الصديقة العزيزة سوما سلااااااااااااام
إنتي يا سوما قصيدتك دي سياسية؟؟؟
لأن بعض الأحيان القى لي قصيدة فيها (شمس وخريف وشجر) أدخل فيها يقولوا لي دي سياسية والشمس تعني (الصباح الجديد) والخريف (إنتظار القادم) وحاجات زي دي دحين كان قصيدتك دي فيها سياسة كلميني عشان أنا عندي أطفال بربي فيهم

الدنيا حر
كفاية أر

Post: #11
Title: Re: *** الدنيا حر ***
Author: soma
Date: 15-03-2004, 07:21 AM
Parent: #10

سلام بامسيكا.. وينك ؟ ووين ألحى بيك ..إن شاء الله عافيه
تسلم أنت يا ألكلك ذوق ..ربنا يديك ألفى مرادك إن شاء الله ..ويخليك اخو حنين وسند يا ود القبائل ..
سعيدة جدا بطلتك اليوم والله يا بامسيكا والحمد لله البقيت طيب ..
التحية ليك قدر كلامك الجميل .يا غنوة من لحن البلد..

****

الأخ الكريم عبد الرحمن سوركتى
حبابك وحباب طلتك يا ود البلد
سعدت جدا بزيارتك وتوقيعك الذي ترك أثرا عميقا في نفسي..
لك التحية قدر فرحتي بطلتك ويديك ألف ألف عافيه..
وتسلم أنت إن شاء الله..

*****

أستاذنا جميل الوجدان .. جميل الدواخل ..
الرائع موصلى .. تسلم كتير ..وسعدت أيضا بشوفتك بعد غياب طال .. أتمنى اسمع عنك كل كل خير ... التحايا من خلالك للدكتور مبيوع

******

الارباب يا شفيف..
سلام بكل لغة أهلنا ألحنينه..
حبابك عشره ومرحب بالسلام. وسلام كتير لا بنكتب لا بترسم..
التحية ليك قدر الجمال ألفى سطورك . وقدر الجمال ألفى دواخلك
افتقدت إبداعاتك ألمدهشه.. يا ريت تعود من تانى وتلون سمانا بغيومك الرويانه.. يا ازرق
تسلم يا أرباب ويسلم إبداعك المتدفق .. ربنا يحفظك ويديك ألف عافيه ..ما تحرمنا من طيوفك..

******
حباب منصورى
تسلم يا صافى النية وربنا يديك قدرها ويخدر ضراعك يا كريم الخصال ..

******
البدرى الحنين .. ليك التحية ود امى ألحنينه
فاقدنك بشدة والله .. كيفك يا حاج ؟ حاج دى لايقه عليك والله ..
إن شاء الله تكون يا البد يرى بألف ألف عافيه ربنا يخليك ويخلى ليك وليداتك وتربيهم إن شاء الله في عز الخريف .. لا حر لا أ ر..
انت هسه ألقال ليك سياسية منو ؟ أكيد ده الرحمابى .. خوفك وبعد هو هههههههههههه
اقعد انت صدق لى في كلام ناس الرحمابى وأنسا ونسة ود الصادق الله يديه العافية
تحياتي ليهم جميعا
وأركز يا ود الحلاوى وخت جمبك هبابه بس من طرف الحر ..

******
اخوتى جميعا .. اعتذر لكم عن تأخير الرد وأرجو منكم السماح للتأخير .. ليس تجاهلا يعلم الله ولكنها ظروف الحياة الرتيبة .. وحبيت أطايبكم بي مهله وبدون استعجال .. والحمد لله ربنا هونها .. سلامي واحترامي..وشكري وتقديري .. لكم جميعا

Post: #12
Title: Re: *** الدنيا حر ***
Author: Raja
Date: 18-03-2004, 04:30 PM
Parent: #1


سوما..

الحر ده يطلع فووووق


Post: #13
Title: Re: *** الدنيا حر ***
Author: بلدى يا حبوب
Date: 18-03-2004, 05:23 PM
Parent: #1

سومة
يا سلام عليك يا رائعة
ربنا يديك الصحة
تحياتى

Post: #14
Title: Re: *** الدنيا حر ***
Author: soma
Date: 18-03-2004, 07:05 PM
Parent: #13

رجــــــــــــــــــــاء يا حنينه ..انتى الديمه فووووق ان شاء الله فى العلالى . يديك الصحه ويعلى مقامك ..
الشوق ليك طال والله .. تسلمى يا ست الكل ..
*****
بلدى يا حبوب
حبابك يا عشا البايتات.. حبااااااابك يا مقنع الامات ..
تسلم انت ان شاء الله وينور دربك ويديك الف عافيه يارب..
الف شكر على طلتك الجميله يا واد البلد..