Post: #1
Title: *** أم الزين ***
Author: soma
Date: 03-26-2004, 02:11 PM
Parent: #0
*** أم الزين ***
ضلاله بي طرقه
مشروره في حيطة
متكوله بي مرقه
رقراقا بيتاوق
بيناغم ألفرقه
حداها أم الزين
لابساها نص فتقه
بلامه في وجيها
ملتوقه بي لفقه
شايلالا خماره
في حليلة متحرقة
وقودا في اليدين
حازماه بي بتقه
جهالا بي غادي
تشابا في شفقه
تغنى وتهاتي
لصغيره بي رقه
تحجي يوماتى
خايفالو من شرقه
مقسومة في العينين
ما بتعرف ألمرقه
معيشة زى همين
تبداها بي طرقه
وحليلة في منقد
بصلاتها متفرقة
قفيفه مقدوده
مرقوعه بي ورقه
تتناول الفندك
تنادى للرفقة
كريمه أم الزين
بتقسم ألنبقه
حنينه للمسكين
تسقيه بالبقة
دمعاتها جوه العين
فرحانة مى حرقه
تلولى في الكرعين
ما بتعرف النقه
تحجي بالوالدين
لا صرخة لادقه
السمحة نواره
مرسومة ألخلقه
تتفقد ألجاره
بالنية مي زرقة
اسماء الجنيد
مسقط 26/3/2004
|
Post: #2
Title: Re: *** أم الزين ***
Author: سجيمان
Date: 03-26-2004, 02:16 PM
Parent: #1
وحات نضري وعافيتي..... نضم سمح سماحة سيدو
|
Post: #3
Title: Re: *** أم الزين ***
Author: haneena
Date: 03-26-2004, 02:30 PM
Parent: #2
يا حليل ناس ام الزين
يا تري من سيذكرها في إنقسام السلطة والثروة؟؟
شكرآ يا سوما علي القصيدة
وإحساسك بناس امالزين
شكرآ كتير
|
Post: #4
Title: Re: *** أم الزين ***
Author: Shinteer
Date: 03-26-2004, 02:30 PM
Parent: #2
Quote: حداها أم الزين
لابساها نص فتقه
بلامه في وجيها
ملتوقه بي لفقه |
لابساها نص فتقة .. لابساها نص فتقة .. لابساها
ده الكلام الـ بيدخل الراس والشرايين. تسلمي يا أسماء بت الجنيد وربنا يزيد من أمثالك. كلامك لوحة في متناول نواظر أمثالنا أبناء التي "لابساها نص فتقة". يديك العافية. وهذه البُلّامة .. مفردةٌ محببة إلى نفسي. الله يطراها بالخير.
|
Post: #5
Title: Re: *** أم الزين ***
Author: soma
Date: 03-26-2004, 10:22 PM
Parent: #4
سلااااااااااام يا سجيمان الفنان .. انت جد فنان بكل المقاييس والله .. مبدع وكلماتك من صميم البيئه والنكته بتفتش ليك ما بتفتش ليها هههههههههههه وده الجمال الفى روحك ..كتر خيرك كتير على الطله ياما سجيمان يا فنان..
***
حنينه يا حنينه حبابك وحباب اليوم السعيد اللينا جابك .. تسلمى يا غاليه على كل الجمال الفى سطورك والنابع من روحك الحلوه .. كتر الف الف خيرك
***
Shinteer
ود البلد ود الجروف والمطر .. ود القبيله المى كتر.. تسلم كتير يا عز بلدى ومقنع بنات عمى .. الله يكتر من امثالك انت والله .. البتحرك دواخلهم ام الزين وامثالها من امهات البلدالحنينات الكريمات زى مطر الدغش نازل غزير مليان برد..
احبتى لكم جميعا كل الود وشكرا بلا حدود
|
Post: #6
Title: Re: *** أم الزين ***
Author: أبوالريش
Date: 03-27-2004, 00:05 AM
Parent: #5
أســومـة،
سـلام كتيــر، ليك ولى كل الحـواليك..
شكـرا على هـذا السهل الممتنـــع.. حتى هـذه اللحظـة، كنت أظن أن لك نمط واحـد من الشعــر، ولكن ما شــاء الله، والحمـد لله الذى لم يحـد عطائك فى أى طــوق.
محمــد عثمـان أبو الريش
|
Post: #7
Title: Re: *** أم الزين ***
Author: soma
Date: 03-27-2004, 07:11 AM
Parent: #6
محمدعثمان .. حباب الطله يا ود الشمال .
غيبه طويله .. سلامات واريت حالك زين..
تسلم يا ضل الاهل..وكتر الف خيرك على كلامك النابع منك بصدق كما عهدتك دوما ..الاخ الصديق .. حقيقه وقفتكم معى هى القنديل فى هذا الدرب الطويل .. التحيه ليك اخى ابو الريش قدر دعوات اهلنا الحنينه
وشكرا بلا حدود..
|
Post: #8
Title: Re: *** أم الزين ***
Author: Habib_bldo
Date: 03-27-2004, 08:32 AM
Parent: #7
إبداع عديل يا أختي وزي ما قال سجيمان
كلام سمح زي سيدو
وأم الزين أكيد نموذج لأمي وأمك وأماتنا كلهن
الله يديهن الصحة والعافية
|
Post: #9
Title: Re: *** أم الزين ***
Author: ابو جهينة
Date: 03-27-2004, 08:36 AM
Parent: #8
سوما أم كلاما زين و نضما زين
تحية و تقدير
تحياتي للأسرة الكريمة
|
Post: #10
Title: Re: *** أم الزين ***
Author: soma
Date: 03-27-2004, 10:58 AM
Parent: #9
حبيب بلدو .. وحبيب اهلو .. ود الاهل الحنان وعشا الضيفان ..كسوة العارى والحفيان .. يديك الف عافيه يا ركازة الحبان..
تسلم على الطله اخى الكريم وكتر خيرك على كلامك السمح يا سمح النيه .. وربنا يخلى لينا اماتنا وحبوباتنا الحنينات الكلهن ام الزين.. شكرا حبيب بلدو شكرا غزير..
***
ابو جهينه يا شدر النخيل.. يا صافى يا نيل..يا الفى الصفات دايما نبيل..
غيبه طويله يا اخو البنات .. يا مقنع الامات.. يا عشا البايتات ..
سلامى لى كل العقاب بدون فرز .. والتحيه ليك ولى طلتك الجميله يا ابن بلدى الاصيل ...
|
Post: #11
Title: Re: *** أم الزين ***
Author: Raja
Date: 03-27-2004, 05:57 PM
Parent: #1
الرائعة سوما..
التحية لأم الزين
ولنعمة
ولنورا
ولعلوية
ولـ..
و....
................
والتحية ليك ولكلماتك اللولي..
|
Post: #12
Title: Re: *** أم الزين ***
Author: soma
Date: 03-27-2004, 09:17 PM
Parent: #11
وتسلمى انتى يا رجاء الحبيبه الحنينه وجد اسعدتنى طلتك.. وبى زيارتك ديمه البوست بنور .. الله ينور ايامك ويسعدك يا رب ..
ويديم لينا امهاتنا امات الزين يا رب... تسلمى
|
Post: #13
Title: Re: *** أم الزين ***
Author: maia
Date: 03-27-2004, 09:24 PM
Parent: #1
الجميلة اسماء الجنيد
سلمتي وسلمت ام الزين
|
Post: #14
Title: Re: *** أم الزين ***
Author: Hisham Amin
Date: 03-28-2004, 11:11 AM
Parent: #1
عارفة يا الرابعة ذكرتى مصطفى سيد احمد وعم عبد الرحيم
ورجعتينى لايام زمان وذكرتنى برقة القلب الكانت مالية كل السودان
لكن يا حليل ايام زمان
ويا سوما
بتخيل كدة
انك فى قلوب كل الناس
يا الرابعة مرسومة
ويديك ويدى اهل كل البيت يا ستنا العافية
هشام
|
Post: #15
Title: Re: *** أم الزين ***
Author: ايهاب
Date: 03-28-2004, 11:44 AM
Parent: #14
جميله يا سومه ام الزين الجابتك لينا بعد الغبيه
يسلم لسانك وتسلم ام الزين و الزين زاتوو
loOoOOoOOOoOoOooOoOoOoLZ
|
Post: #16
Title: Re: *** أم الزين ***
Author: abuguta
Date: 03-28-2004, 12:56 PM
Parent: #15
سوما ياسوما
مالية هدوما
خاتية اللومة
اختك التومة
قصائدك مرسومة
زى الدرة منظومة
تشبه زهرة روما
وحدائقة الحكومة
الفى الجنيد معلومة
|
Post: #17
Title: Re: *** أم الزين ***
Author: Al-Shaygi
Date: 03-28-2004, 01:19 PM
Parent: #1
سووومااااا بت البالتوك
البنيه الرقيقة زات الحس الراقي
والله وحشنا شعرك الجميل الذي يعطينا الأمل دائماً بأن المرأة السودانية مازالت تنجب النجباء والعباقرة حتى في زمن الجفاف والهوان
دائماً أدعو لك بالتوفيق والنجاح
وها أنت تصعدين في همة وكبرياء إلى آفاق المجد والعلا
فلا تنقطعي عن حوش عم بكري ودايماً آنسي غربتنا بحلو الكلام
عمك الشايقي المن زمن البالتوك.
|
Post: #18
Title: Re: *** أم الزين ***
Author: حمزاوي
Date: 03-28-2004, 01:54 PM
Parent: #1
سلام من عيال ام الزين
كريمة أم الزين بتقسم النبقه
رهيبه يا سوما
المصيبة ما خلو ليها حتى النبقه
|
Post: #19
Title: Re: *** أم الزين ***
Author: ebrahim_ali
Date: 03-28-2004, 04:43 PM
Parent: #18
العزيزة سوما تحياتي وسلام كثيف من هنا لحدي هناك في الشرق النديان (بالمناسبة قابلت إحدى أخواتك في مواصلات رفاعة مدني بالشرق ومعها إحدى قريباتكم) الخالق الناظر سبحان من أبدع لكي ولها ألف تحية وسلام .
قصيدة أم الزين دي دخلتها أول مادخلت لأنو أتوقعت كلاماً جميلاً وحضوراً أنيقاً فكنتي أنتي الكاتبة الشاعرة بت الجنيد وإسم جدي الزين عشان ما ترددت أبداً في الدخول والاستمتاع بروائع الخلابة وين مسجلة غايب تام ومرة رسلنا السلام مع الحاج شنا إنشاء الله يكون وصله دي اليومين مشغووووووووووول .
|
Post: #20
Title: Re: *** أم الزين ***
Author: soma
Date: 03-29-2004, 08:20 AM
Parent: #19
سلام من تانى .. مايا حبابك يا رقيقة المشاعر يا وديعة .. شرفتي أم الزين بزيارتك يا غالية
تسلمي وتسلم كل أمهاتنا أمات الزين
شكرا مايا والشوق ليك دفر..
***
هشام الحنين
حباب أخونا وضلنا .. وحباب البجمع شملنا..
حليلك أنت يا بذرة الطيبين .. ود الجروف والطين..
ألرحمه الواسعة للراحل المقيم مصطفى.. أنشودة البلد المحكر في الجوف والمقل
طول مافى متلك يا هشام ..السودان بى خيرو وبتعود أيام زمان .. مدام موجودة وعايشه وسطنا أم الزين أم الملايين أم طبعا حنين..
يديك ألف عافيه يا صافى النية ..
وتسلم اخو البنات ..
***
وتسلم أنت يا إيهاب ود عمى السني
التحية ليك وللعم الغالي والمدام وكل الأهل
شكرا إيهاب على ألطله ألجميله
***
أبو قوته
سلام ياخويا خاتى اللوم
سلام ود البادية والخرتوم
كلامك زى الدرر منضوم
لبستو وشاح ..
من الفرح حماني النوم
سلام من تانى زينة شباب القوم
اخى الحنين أبو قوته جيتك مى في بوست والله .. جيتك بالدرب وقعدتك في العنقريب وشرابك لى قهوتنا في ألعصريه ولمة أهل وقلوة أم الزين .. شرفنا بالحيل .. شكرا ليك متل ونستك الغنا .. ومتل لولاي أم الزين للجنا ..
التحية ليك ود القبيلة ألمننا .. والشكر ليك من هناااااااااااااااااااك لي هنا
***
عمى الشايقى ود الخدار والنيل
ود النخيلو بشيل
سلام جاييك دافر سيل
ماسك دربو وقاصدك انت عديل
يطايبك ينحني ويميل
حبابك عمى الشايقى الحنين .. وحبابك يا ضل الأهل .. غيبه طويله اسعدتنى طلتك ألجميله يا مقنعنا ودخرى الحوبه.. التحية ليك قدر طيبتك ألجواك وقدر كلامك السمح
والتحية ليك مجرتقه بى جريد وسيموتا صاراها أم الزين .... تسلم عمى الرزين..
***
حمزاااااااااااوى .. ود أم الزين حبابك سيد السمح مو شين..
حبابك يا غرة الوالدين ..
اخى حمزاوى أم الزين ليها الله .. ولينا الله ..بى دعوات ناس أم الزين ينجمع شملنا ونقعد هناك تحت نيمه وننسى ألغربه أللئيمه..
شكرا خدار حمزاوى على ألطله الخدراء ..
***
إبراهيم ود على .. حباب ود ألحله والفريق.. ود البفكو الريق وقت الحاره عند الضيق..
كيفنك واريت حالك زين .. السلام ليك مكوم في الدريب يغشاك وين ما تغيب.. والتحية ليك ولى أهلنا وجدنا الزين وأم الزين ..
ذكرتني الشرق والأهل والمعدية .. تسلم كتير يا صاااااااااافى النية
الاخ إبراهيم سلامك وصل وتسلم من كل بلا يا رب .. وربنا يوفقك ويسهل دربك ..
اخى إبراهيم شكرا دعاش
احبتى لكم منى جميعا كل الود والتحايا ألعطره وشكرا بلا حدود يا كنوز الجدود
|
Post: #21
Title: Re: *** أم الزين ***
Author: Al-Shaygi
Date: 03-29-2004, 09:26 AM
Parent: #1
والله يا سوما يا بتي كلامك يسحر عديل ويرم عضام عمك المتهالكة،،،
نسيت شيبي وقمت أعرض ،، لقيت نفسي متكي فوق المكتب وإيدي في ضهري ما قادره تسنده...
والأعجب فراشتك أم جنحين لا بتكل ولا بتمل وديمه ترفرف كايسه الزهور المتفتحة،،،
الله يديك العافية وإلى مزيد من الإبداع ...
عاد المره دي ما بقدر أقول عمك ويمكن جدك الشايقي تكون أقرب لواقع الحال وعمر الزمان ..
...
|
Post: #22
Title: Re: *** أم الزين ***
Author: soma
Date: 03-29-2004, 09:56 AM
Parent: #21
عمى الحنين .. وجدى الرزين .. اب كلاما رصين .. حبابك بى روحك الشابه وقلبك الصافى ..وحبابك بى طيبتك السمحه وطبعك المافى ..
البركه فى فرحتك وعرضتك .. والبركه الشفناك من خلال سطورك يا يابا.. وان شاء الله تتم الشوفه وسط اهلنا وفى اللمه .. فى قعدة عصريه ولا ونسه ضحويه فى ضل الضحى وهمبريب الصباح ومطايبة اهلنا من فوق الحيطه والقلوب ملتحمه رغم الجدران الفاصله..
تسلم كتير يا شايقى من وسط الاهل .. يا ركازة بلدى الحبيب
وشكرا محفوفه بى خدار كل الجروف عبر نيلنا الخالد ..
والتحيه ليك بلا حدود ..
|
Post: #23
Title: Re: *** أم الزين ***
Author: الجندرية
Date: 03-29-2004, 10:06 AM
Parent: #1
سوما الزينة ام قولاً زين
جيدن جيتي
|
Post: #24
Title: Re: *** أم الزين ***
Author: soma
Date: 03-29-2004, 10:23 AM
Parent: #23
الجندريه البت الفنجريه
حبابك يا غاليه درة بنات بلدى
عارفه يا الجندريه كلمة جيدن جيتى دى .. اللـــــــــــــــــــــه لها وقع وطعم خاص فى نفسى ..فيها كم هاااااااااااائل من حنان اهلنا فى الغرب المشبع بالطيبه والنفس الدافىء ..
تسلمى يا الجندريه الجيتك ديمه غزيره وغنيه..
|
Post: #25
Title: Re: *** أم الزين ***
Author: ebrahim_ali
Date: 03-29-2004, 10:30 AM
Parent: #24
سوما بت الحلة والجيران
فراشة البورد المافيها كلام
نضميك دائماً سمح بالحيل
الليلة جابت ليها خبراً زين
ومعها ظهر أبوحراز الماهو شين
تحياتي لك أيتها القامة السامقة وأيتها الابنوسة المتوهجة دوماً التي تنشر عطرها للجميع بصدق وشفافية تحسدين عليها .
|
Post: #26
Title: Re: *** أم الزين ***
Author: Rawia
Date: 03-29-2004, 04:45 PM
Parent: #1
up
|
Post: #27
Title: Re: *** أم الزين ***
Author: Ehab Eltayeb
Date: 03-30-2004, 03:40 AM
Parent: #1
سوما:
لقد اضاءت دواخلنا حروفك الوضاءة.
و زيدينا شعرا زيدينا ,فنحن من رواد بستانك المزدان بكل الالوان والزهور.
لك التقدير مع تحياتى..
|
Post: #28
Title: Re: *** أم الزين ***
Author: soma
Date: 03-30-2004, 06:53 AM
Parent: #27
راويه حبابك اتفضلى لى داخل .. اسعدتنى الطله وان شاء الله انتى ديمه فى العلالى ..وتسلمى يا غاليه ..
ايهاب ود الطيب .. سلام يا ود العم .. ود البفرجو الهم .. ود الجود والكرم ..
شرفت ونورت .. وبى كلامك السمح زغردت بالفرح كل الدواخل .. يديك العافيه يا ود الطيب ود بذرة الطيبين ..
والشكر ليك ملون بكل الوان الطيف ..
|
Post: #29
Title: Re: *** أم الزين ***
Author: بدرالدين شنا
Date: 03-30-2004, 09:30 AM
Parent: #1
على حسب معرفتي التامة بالأخت سوما عن قرب وبعد أن دخلت بيتها وأكلت طعامها فأقر وأعلن للملأ أن سوما هي أم الزين تلك المرأة التي تجود بالميجود كريمة .. شوشة .. كنانة حروفها في الشعر هي نفس الكنانة التي تتميز بها مجلسها الحنين والريدة والغبش والتقابة والورتابة والويقود والطايوقة
ربنا يديها العافية
إنتي يا سوما القصيدة رقيقونة كدي فتقة واحدة ولا شنو؟؟؟
يعني الواحد عشان يقراها إلاَّ ربط
(على وزن التوب الربط)
|
Post: #30
Title: Re: *** أم الزين ***
Author: soma
Date: 03-30-2004, 12:00 PM
Parent: #29
وانت حاج الزين ....يا بدر الدين الحنين .. اصلو حاج بدر الدين دى تقيله فى المطايبه .. زى تقلة الخواجه العيفه المكوم جمبك داك ..على قولك الخواجه العيفه ..كل ما اتذكر الكلام ده اقعد اضحك براى ..
تسلم يا بدر الدين ودناس امى عشة الحنين .. انا لا بلحقك فى الجود ولا بحصلك فى المحنه .. الله يعلم انت دميعاتك فى طرف عويناتك .. وشهودى ناس الرحمابى وود الجنيد .. وناااااااس كتااااااااااار
ربنا يديك قدر نيتك يا صافى النيه .. ويقرب المسافات ويجيبك لينا هنا قريب ..نحن لاقينك وين يا عشى البايتات .. البايتات ديل طبعا ناس سعديه ههههههههه بدر الدين انا لو زدت فى الكتابه بجررررر فى الكلام لمن اصل الجنيد الحله .. اها رايك شنو نتم الباقى بالتلفون ..ودعتك الله والرسول
|
Post: #31
Title: Re: *** أم الزين ***
Author: waleed500
Date: 03-31-2004, 10:08 AM
Parent: #30
هل هذه أنتي حقا...
هل هو حلم أم سراب...
ما أجمل أن تعود مياه أقلامنا... لمعانقة الورق..
يحق لي أن أرقص بخطرة و غرور... فرحا و سرور
اهلا بالزوله الزين ام الزين اخت الزين
|
|