*** شدر الهشاب ***

شدر الهشاب ..
اتشابا لي ضل السحاب
داير المطر ..
خايف اليباب ..
شاف ليه غيمه .. قال سراب .
ماظن تمطر كوم تراب ..
فجأة انهمر ..من غير حساب ..
بل الندى وعطر هضاب ..
بكت السماء..
رحل الرهاب
دنت الطيور من
الضباب ..
ركت تحت رسمت رحاب
رحل اليباس رحل الخراب ..
شدر الهشاب فرهد طرب
من تانى بى عودة الشباب
جدع صميغاتو ورقص..
رقصة غريب عاد للوطن بعد الغياب
********
سومــــا ... اسماء الجنيد مسقط
التحيه لكم جميعا يا صحاب بعد غياب

سوما
حمد الله على السلامة


ماكي طالباني حليفة..... وحات الله قاعد اطرب من صحي....وقت اقرا نضمك السمح دا... يا سمحة

استاذتنا اسماء
ما اعظم شدر الهشاب
احد العرافين به
معرفة رجل الغابات
الشاعر اخوانا
عبدالله جعفر غائب
منذ مدى طويله
ربنا يرده الى المنبر
والى السودان ليكمل
ما بدا فى مجال الغابات
عموم والهشاب خصوصا
عثمان احمد

Quote: جدع صميغاتو ورقص.. رقصة غريب عاد للوطن بعد الغياب

ما اروعك وابدعك يا سوما

Quote: شدر الهشاب فرهد طرب من تانى بى عودة الشباب

سومة شجرة المحنة

هذه الابيات صادفت هوى فى نفس الشفيف سمباتيكو
و وقعت نفس الموقع فى نفسى و أنا استف اشواقى
ميمماً وجهى نحو الوطن
نعود على وقع كلماتك الصادقة المبدعة المشحونة
بكل جميل ورثناه

اعشم ان تهبينى كلمات يكن لى زاد الرجوع
يحملننى و احملهن على اكون شنا و تكون عازة
طبقة تتوافق و نتوافق

سلمت لنا يا غالية

Quote: هذه الابيات صادفت هوى فى نفس الشفيف سمباتيكو و وقعت نفس الموقع فى نفسى و أنا استف اشواقى ميمماً وجهى نحو الوطن

الاخ العزيز نصار

تحياتي
دي عملتها كيف ؟
ورينا متين ماشي عشان نعمل ليك حفلة وداع في البالتوك
ارجو لك رحلة طيبة واجازة سعيدة بين الاهل والاحباب
وتحيات خاصة للأسرة الصغيرة

(فجأة انهمر ..من غير حساب ..)

و هكذا سوما .. تنهمر كالمطر فتنمو أشجار الهشاب و أشجار أخرى

فوق دربك

العزيز سمباتكو

هى قناعة وصلت اليها بعد تفكير و واقعية
توازن بين الفقد فى البعد و التلف فى القرب
لقد قضيت اكثر من نصف عمرى فى المنافى و لا اريد
ان تكون لي سكناً

فالنبدأ الاحتفاء فى بوستى بعنوان عائدون
و ننتقل الى البال طوك فى حينه
شايف الشباب عدا 3 محجمين عن ابداء الرأى
استحسانا او استهجانا
قبول بالفكرة او رفض
و انا الذى رأيت ان ابثهم
رغبتى و استأنث بآرائهم
و ازرع فيهم الرغبة فى العودة

Quote: اكون شنا

نصار أعمل ليها تنوين بالفتحتين ولا بتكون قاصدني

الغالية سوما
كبي لي تاني

البدر حبابك

لكن دى قلبت فيها الهوبة
علم و يعمل به مستقبلاً

اها الدورة دى عندى بوست ما حار ابداً
منتظرين طلتك
و يمكن نرجع سوى و ترتاح من هم البدو

شكرا لك سوما ،،
شكرا لهذا الطرب الجميل ،
عليك الله ما تغيبي ،،

حمد لله علي السلامه قريبتي
ليك وحشه
يعجبني في ماتكتبيه السهل الممتنع
ماتكتبيه يحمل في طياته ريحةالدعاش الجاي من قلب الوطن
يدخل جوه في اعماقي وينفض عني غبار الغربه وكتاحة الزمن

الله يديك العافيه وتسلمي قريبتي

استاذتنا الكبيرة سوما
كلماتك عذبة وشجية
كم فرحنا بعودتك
بالله عليك لا تطيلي علينا الغياب

سجيمان.. يا ألماك سجيمان وحات الله.. تسلم كتير يا عشا الضيفان ..وأنا بالحيل بضحك وبتفرق على هم الزايله أم قدود وقتين اقرالك بوست .. الله يفرحك ديمه إن شاء الله ويديك العافية يا رب.. شكرا يا قريب شكرا من الجوف..

أخوى المهندس .حبابك وحباب طلتك يا كريم.. والله يطراه بالخير أخونا عبد الله جعفر .. ويديه العافية ويرد غربتنا جميعا وننعم وسط أهلنا بى هشابنا ومطرنا .. أخوى عثمان التحية ليك كيمان ..كيمان ... وشكرا قيزان..

ود اهلى ود البطانة البكسرو الرقاب بلا جبخانه ..هيييييييع علا قول وسيم لوووول
تسلم يا بطحاني من قلب البلد والتحية ليك ما ليها حد .وشكرا بلا عدد...

نصار الحنين ود اهلى الغبش ..حبابك يا ضى البيوت .. وسعدت وفرحت زى يوم عرسك بى خبر رجعتك للبلد والأهل الحنان بعد غيبه .. وعفيت منها ست الحسن بت الأصول غزال البادية والبندر .. وزى ما قال ليك العزيز سمباتيكو .. دى دايره ليها وداع زى يوم احتفال العرس بى البال تولك .. بس الفرق هنا معانا ألحنينه المدام .. وبوجودها يتغير الطقس والأجواء عامة .. مش زى الكتاحه ألضربتنا يوم العرس وهى في المطار . من ما دخلت كراعها البلد خدرتها .. وخدارها باين وممتد برجوعكم للبلد سالمين وتمين بركة رب العرش العظيم .. والتحية ليكم هدية خروف تطفروه يوم وصولكم بالسلامة ..

اما سمباتيكو يا خوي يا نصار ما عارفين بقعد لمتين يقدم ويودع في عباد الله .. ويعقد ويبقى وزير ولووووووووول عليك يا بطحاني .. الهاشمية شايلاك لمتين ..دايرنك تصاب بالعدوى شويه ويوم يقولوا عندك شمارخطوبه ولا عرس ده يوم عيدنا وحديدنا .. مش تلقاك متصدى لكل خبر عرس ولا خطوبه وأنت أول المباركين ..اها نحن دايرن نرد ليك مباركتك دى .. نردها ليك كيف ومتين ؟ عمك جيلانى زاتووووووو قال داير بطحانيه تانى وعديلة زى عديلة نصار لوووووووووووووول الحق روحك ..حقك بروح ..ولا شن قولك يا نصار يا خوي..

أبو جهينة ..يا ابن عمى داود التحايا والأشواق بلا حدود .. كلامك دائما طالع من الجوف .. ويلامس كتير من أماكن الوجع.. أوجزت ووفيت وكفيت .. سلام ليك قدر محنة أهلنا الزمان .. والشكر ليك يا رمز الخوة والعرفان مطوق بي كل الحنان .. وتسلم يا ملك..

البد يرى ود الانصارى .. التحية ليك تجيك جااااااااااكه كداري .. بس زح البدو ديل من دربها أنعمنهم ما بفرزوها .. والمحنه والمطايبه ما بخبروها ..
تسلم يا سماحه ألفى الطبع شايل مساحه .. وفى الفهم سيد الرجاحة ..
البدرى التحية ليك جاياك براها .. شكرا مسقيه من ترعه..

ود قاسم .. سلام يا سقف الأهل... شكرا ليك انت يا حنين على الطلة والفقده يا ضونا.. وعبارتك ( عليك الله ما تغيبى دى) جد طالعه من الجوف .. وحسيتك واحد من الأهل لما تجى تسالم وتطايب وفى لحظات الوداع يقدموك عند الباب .. وفيها خسيمه زى خسيمتك ألحنينه دى.. عليك الله يا فلان ما تغيب .. ود قاسم شكرا لمة أهل تحت نيمه وقعده وونسه خاتيه النميمة .. حبابك من تانى يا رمز الخوة الحميمة..

بت امى ألحنينه بت جزيرتنا .. سلام يا قريبه من وسط الأهل.. التحايا ليك تجيك هابه من كل القبل.. تغشاك وتلفحك بى توب المحنه والعافية..
ليك وحشة قدر حجى الحبوبات وغنى ألامات .. وتسلمي يا ست البنيات ..
بت الجزيرة شكرا قصب سكر محروق من الجنيد ( والله المحروق ده حلو بشكل يا بت الجزيرة.. أحلا من السكر زاتو لو وول ) بس اندسي تحت نيمه من نهى وكوضمى لوول
شكرا يا حبيبه وتسلمي ..

حمزاوى الحنين .. والله أنا سعدت وطربت لي جيتك وطلتك .. بشوفك جاى من فوق الحيطة ماشى وتسالم وتطايب لما دخلت الحوش .. وقعدتك في طرف العنقريب ..جاى تسالم رغم الجري والمشغوليات .. وان شاء الله ينفعك فنجان جبنتنا .. شكرا ليك حمزاوى فرحة أهل يوم العيد وقدح فطور ولبس جديد ..

احبتى كم اسعدتنى طلتكم جميعا .. التحية لكم مقنعه بى خصالنا السمحة وتسلموااااا

soma

الحاضرة دائما
افتقدناك كثيرا وكثيرا

غايتو البورد بقى دكان ود البصير (الزمان)

راجين منك المزيد من القصايد

تسلمي وعودا حميدا



جمال

loooooooooool@Soma@Sympatico

ياهو زاتو يا سومة
اصلنا سمباتكو دا دايرين فيهو هو و حسن ست يوم
او قولى يومين عشان نرد ليهم الجميل

اها يا سومة عزومة المراكبية دى خليها انا ما
جايكم هناك الخروف دا ح انطه كيف؟ لووووووووول
اضبحي لينا قصيدة فهي اثمن من خروف و لا تصيب بالكلسترول
لوووووووول و نزليها مع السيرة الماخمج ديك فى السايت
بتاعك

يديك العافية و محمد و البطل

اخى المرهف والشاعر صاحب الحرف المميز .. اخوى جمـــال .. حبابك وحباب اليوم السعيد اللينا جابك. والله طلتك اسعدت هشابنا وزاد رقيصو وفرحو من تانى .. شكرا ليك اخى جمال على جمال كلماتك التى عدتها فيك ..وانت ياك انت الانسان الشفيف المتواضع ..
** لو البورد بقى دكان ود البصير والله دى برضو بشاره .. على الاقل الونسه حنينه والناس عفويه حد الطيبه والاخلاق الكريمه ..واختلاف الاراء عندهم مزحه وضحكه من الجوف.. وبتفرقو وهم ضاحكين وراجين اللمه الجايه بفارغ الصبر.. ربنا يلمنا فى ساعة خير .. وافتقدت مشاركاتك الجميله .. يا ريت تعود من تانى ... وشكرا اخى جمال على طلتك ....


اخى العزيز نصار .. حبابك من تانى ..
عارف سمباتيكو ده مقدور عليه ..خلونى انا بى جاى قريبه بزن فى راسو لمن اسفرو ليكم شايل شنطة العروس ومحنن من هنا لكسب الزمن ..لوول اما حسن ستوت ده يا نصار يا خوى .. الفصاحه براها ما مخلياه يرك فى الواطه دى .. ووحات الخوة بقع وقعه الله لا وراك .. دايرين لينا شايقيه من طرف البحر تجيه شايله التمر والككر .. وتقعدو فى بطن الواطه دى لوووول حسن .. هسه كلامى ده بجيبو ليكم ناطى .. اما جيتك والله حبابك وخروف شنو البتطفرو لى فى بلد الجبال دى .. والله خرفانهم زاتها تلقها لابسه طاقيه اجارك الله .. نحن دايرين خروف من الزريبه لا بعرف طياره ولا طبيبه .. مش زى بهايمهم دى .. سايقين خرفانهم وبهايمهم الشكيه لى الله كل مره لى عياده وساقينهامضاد حيوى لوووول...
واما القصيده بتاعتك يا عريس انت وست الحسن ..كده اديتنى الاذن بى صوره واضحه .. وبى عين قويه اقوم الليله وحات خوتكم وانزلها فىالموقع .. انت كويسه معاك .. لكن حسن سته وسمباتيكو بتمسكهم ام هلا هلا الليله..باقى نصيبهم فيها سمح بالحيل لوووووول وما خفى اعظم .. تحياتى لكم جميعا ..

يا فراشة
تحياتى
دائما انتى مبدعة

سومة الله يديك العافية

اذن شنو يا اصيلة انشري و لنا الشرف
الزي منو السيرته سومة شجرة المحنة
و اخت الرجال خزانة الاصالة و سمحة العبارة

غايتو الجماعة لو ما اتحركوا بعد دا كله
تكون حكاية

و الله ضحكت ضحك ما حصل قريب دا
خروفكم البى ممرضته و طيارته
دا الله بينا و بينه


الله يديك العافية

الشاعرة الكبيرة/ سوما.

أنا أحد المعجبين بكتاباتك الشعرية الجميلة المعبرة. أنها فعلاً استراحة لي من عناء العراك السياسي والفكري بالنسبة لي في البورد. شكراً لكي .

دينق.

غاليتي سومااااااااا...
ليك وحشه والله يا حبيبه..
وعارفه مقصره معاك شديد..بس انتي في البال طوالي والله
.
.

طلت حروفك تبعث فينا البهجه من تاني..
يديك العافيه يا سحابة الخير


كل الحب
ليون

فوق ، ودام الجمال عنواناً لهذا المكان الجميل

سلاااااااااام الرائع جدا حمزه سليمان
التحيه انت والله المبدع .. آخر مره التقيتك فى البالتولك كنت حقيقة قمه فى الجمال .. تسلم كتير وربنا يجمعنا بيك قريب ان شاء الله ..رجاء لا تحرمنا طلتك فى غرف البالتولك يا شفيف..
الاخ حمزه شكرا قدر فنك وابداعك ...

****
حباب نصار والله نورت لى البوست ده بوجودك يا مطر فى عز الجفاف ..
والبركه فى ضحكتك والله .. حبابك من تانى
****
اخى العزيز دينق .. شكرا ليك انت على طلتك البهيه والله .. وكلامك المطر الرزاز .. كان كالدعاش .. فى زمن الهجير..
وكلامك اسعدنى وكان لى استراحه حقيقه من حر الغربه وبعد المسافه من البلد الام والاهل الحنان ...
دينق شكرا ليك مطايبة اهل بعد فراق دام طويلا...

***
الغاليه جدا ليون الحنينه .. ليك وحشه وشوق لا يوصف والله .. حاشاك اللوم يا حبيبه..
ربنا يجمعنا قريب ويسعدنى بى لقياك يا حنينه .. تحياتى من خلالك للاهل .. والف شكر على طلتك الحلوه اليوم بعد غياب دام طويلا .. شكرا بكل الاوان الحب ..

****
الاخ العزيز جدا لؤى لك سلامى واحترامى .. وشكرا لاهتمامك يا ابن بلدى الهمام ..
حقيقة عاجزه عن شكرك ..
وشكرا لكلماتك الجميله يا جميل الدواخل .. وحبااااااااااااابك فى كل مكان وزمان
لؤى شكرا مارقه من الجوف .. ومحفوفه بى كل جمال الحروف ..
احيانا تضيق العباره اخى لؤى

الرائعة جدّاً سوما
طابت أوقاتك

Quote: احيانا تضيق العباره اخى لؤى

تضيق العبارة ؟؟
كيف وكلماتك تظلّل سماواتنا كالغمام وحروفك تتشتّت علينا كحبّات المطر ؟؟

Quote: سلام اغرف من بحر الكلام اغلَى الحروف انسج سلام في ثوب موشح بالمحنة والوئام واقلع من قيف الجرف شتلات غرام اجدع في الثوب القبيل ارسم طيور فوق الغمام حاضنه الحنين .. حاضنة الوله شوق وابتسام.. وارسل تحايا معبقة بالمشاعر والهيام مليانه بي ريق الاهل نفس الاهل بتقول كلام وتقول سلام

تحايا معبّقة بالمشاعر
والسلام

Quote: فجأة انهمر ..من غير حساب .. بل الندى وعطر هضاب .. بكت السماء.. رحل الرهاب دنت الطيور من الضباب .. ركت تحت رسمت رحاب

سوما:
عدت وفي معيتك الدرر والسهل الممتنع..
يا1000 مرحبا بيك.. وبي ابداعاتك ..
تحياتى ,,,

سوما .. أذكر أنه كان موضوع بحث تخرجى من الجامعة شجرة الهشاب .. لكنها المرة الأولى أكتشف عطر هذه الشجرة .. شكرا لأبداعك و أقول كما قال شيخى سجيمان