Post: #1
Title: *** لحن الخاطر ***
Author: soma
Date: 11-07-2005, 12:57 PM
Parent: #0
لحن الخاطر ..
مدفون جواك..
فى عمق الخاطر ..
لامى معاك ..
الريد الدافر..
بتهجاك..
واجمع فيك ..
بقدرة قادر ..
واستناك ..
افكر فيك..
لى يوم باكر
واترجاك ..
تشيلنى معاك .
غيما ماطر.
اتوه فى سماك ..
وليك اسافر ..
اعيش جواك..
الملم فيك
ونبضك طاهر..
اتمناك
اغنى معاك
لحنا عاطر
حروف منثوره..
درر وجواهر ..
وبيك اتحدى
قيس الشاعر ..
واحلم ديمة
باجمل حاضر ..
يحلق يرفرف ..
بى جناح طائر ..
يناجى الماضى..
ويفضل فاكر ..
كلمة رواها ..
البدر الدائر ..
عم شذاها ..
النسم الحائر..
يا يوم باكر .....
انت الامل
الاخضر ناضر
وانت الريد
الفيه بذاكر
وانت القلب
الكلو ازاهر
يا يوم باكر....
انت النيل
البجرى مشاعر..
وانت الحلم
الليه بخاطر
ادمر بيه
قيود وعساكر ..
اكسر تحته
الحظ العاثر..
وابدأ معاك
العمر الزاخر
بالافراح الليها بداية
ومن دون آخر ..
بالافراح الليها بداية
ومن دون آخر ..
***
اسماء الجنيد
مسقط
|
Post: #2
Title: Re: *** لحن الخاطر ***
Author: osly2
Date: 11-07-2005, 01:07 PM
Parent: #1
Quote: يا يوم باكر .....
انت الامل
الاخضر ناضر
وانت الريد
الفيه بذاكر
وانت القلب
الكلو ازاهر
يا يوم باكر....
انت النيل
البجرى مشاعر..
وانت الحلم
الليه بخاطر
ادمر بيه
قيود وعساكر .. |
اوع تطول
يا يوم باكر
انت الشمس الفينا بتشرق
تدفر فينا الغيم السادر
ومنك سومه بتبدا وضوها
تسجد فوق محراب الريد الطاهر
وتبدا معاك فى نسيج الكلمه
ونشرب نحنا رحيقا الفاخر
ونصبح فيها جروف تريانه
وتمسى معانا كلاما باهر
ما اروعك سوما
|
Post: #3
Title: Re: *** لحن الخاطر ***
Author: soma
Date: 11-07-2005, 01:46 PM
Parent: #2
اوسلى
اريتو حظى اخدر ديمه
شفت صباحك طرف الحله
شارى بهاك لى آخر الغيمه
لافح توبك جريد النخله
تلولى صغارنا تحت النيمه
مشتت فرحك بين ايدينا
شفيت الروح الديمه سقيمه
اوسلى يا شدر النخيل
وحات الله ما بقدر اجاريك
لكن بى فرحى بيك بحاول اباريك
امكن اقدر اصادفك مره واتبرك بيك
الابداع بادى منك ومنتهى بيك
لك المحنه حروف مجرتقه بى جريدنا الاخدر
ولك الامنيات النواضر
|
Post: #4
Title: Re: *** لحن الخاطر ***
Author: وفاء تاج الدين
Date: 11-07-2005, 02:00 PM
Parent: #1
الرائعة سوما ..جد ما أروعك وما أروع خواطرك
|
Post: #5
Title: Re: *** لحن الخاطر ***
Author: soma
Date: 11-07-2005, 02:13 PM
Parent: #4
الحبيبه وفاء تاج الدين
لك الاحترام محكر ضفتين
والمحنه غيمه ومطرتين
شكرا لا تكفى لى طلتك البهيه
شكرا ليك لمة اهل وجبنه متكيه
تسلمى حبيبه ..
|
Post: #8
Title: Re: *** لحن الخاطر ***
Author: munswor almophtah
Date: 11-07-2005, 03:11 PM
Parent: #5
بحرك حمر
وأصبح دافر
وبرقك قبلى
خريفك ماطر
زرعك فرهد
وردك عاطر
يومك رايع
وأروع باكر
عقلك ثاقب
وقلبك حاضر
ديمه متمتم
ودايما فاكر
صادق ومخلص
ودايما شاكر
نظمك راقى
وصفك شاعر
قولك راقص
ورسمك فاخر
جاذب دوما
شاغل حاير
بانى مواقف
مالئ دوائر
قولك شايق
شعرك زاهر
عسلك شارق
ضوك جاهر
ضوك بهرج
ضوى منابر
نقشك واضح
نحتك ظاهر
دايما ناصع
ودايما طاهر
منصور
|
Post: #6
Title: Re: *** لحن الخاطر ***
Author: ALHALAWI
Date: 11-07-2005, 02:28 PM
Parent: #1
Quote: حروف منثوره..
درر وجواهر ..
|
أسماء الرائعة
زي ما قلت بالضبط
|
Post: #7
Title: Re: *** لحن الخاطر ***
Author: ابو جهينة
Date: 11-07-2005, 03:02 PM
Parent: #6
أسمااااااااااااااااااااااااااااااااااااااااااء
كل سنة و إنت طيبة و الأسرة الكريمة
Quote: وليك اسافر ..
اعيش جواك..
الملم فيك |
يااااااااااااااه يا أسماء
في مقتل هذه الكلمات ...
أتخيل المحبوبة في الخيال .. في الخيال فقط .. عايشة جواى .. ثم أعيش جواها و أنا محلق نحوها بكل الطرق .. ثم ألملم صورتها في ذاكرتي المتعبة من كثرة الشوق و الهجر و طول الغياب .. اللملمة بالمعنى العريض .. لملمة كل الكلمات و اللوم و العتاب و كلمات الحب و الهيام و وووووووو ..
سوما ..
حاولت ألملم ما قدرت .. ممكن تلملمي معاى ؟
شكرا لهذا اللحن الخاطر .. و خاطر اللحن ..
و عشان خاطرك يا سوما .. بسامحك لأنك أيقظت عشرات أسباب اللملمة
أرقدي عافية
أخوك
جلال
|
Post: #10
Title: Re: *** لحن الخاطر ***
Author: soma
Date: 11-07-2005, 03:18 PM
Parent: #7
اخوى الحلاوى
ود القبائل المى كتر
العيد مبارك عليك
علينا وعليك يتبارك
العفو لله والرسول
ربى يسعدك ويهنيك
ويعليك فوق المابيك
ويحقق كل الفى مرادك
شكرا الحلاوى .. شكرا اردب
***
جلال الحنين
الشوق نيلين
والمحنه غيمتين
تضللنا وتذكرناريحة اهلنا
لانك صادق.. ولانك وفى ..بتمرق منك السماحه معتقه
والفرحه مجرتقه.. والذكرى معطره ..
لملم لينا منها نفحات خلينا النفرشها فى الساحات
حجى الوالدين وغنا الامات
اخوى جلال
العيد مبارك عليك
ربى يسعدك ويهنيك
السعاده تبقالك هدم
والعافيه تبقالك وزير طول الطريق
تحياتى للعقاب
شكرا قدر فرحى بيك يا ضلنا ..
|
Post: #9
Title: Re: *** لحن الخاطر ***
Author: إيمان صالح
Date: 11-07-2005, 03:12 PM
Parent: #1
انتي ياست البنات لي حدهن
العيد مبارك عليكي
وكلامك سمح بالحيل ياالسمحة وزينة
وان شاء الله افراحك ماليها اخر
ايمان
|
Post: #11
Title: Re: *** لحن الخاطر ***
Author: soma
Date: 11-07-2005, 11:36 PM
Parent: #9
العيد مبارك عليك اخوى منصور ..
ان شاء الله ديمه خاطرك مجبور..
وللحوبه مدخور..
وبى سمح الصفات مذكور..
وضيك يشاقق بلاد وبحور..
يا الضى يا قبلة بنات الحور..
من امس بجى اتاوق وامشى
من سماحة نضميك الفارى جناحو
بلملم زى اخوى جلال فى عقاب الكلام
فشان الاقيك واسلم عليك
لانه الكلام كمل عندك ..
و غلبنى البقولو ..
يا سيد القول.. ود الاصول..
ربى يديك الفى مرادك
يخدر دربك
ويسهل امرك
ويسعدك زى ما اسعدتنى بى زيارتك السمحه
اخوى منصور شكرا قدر هرجك الزين وكلامك الرصين..
****
ايمان الغاليه
سلام يا بنية من بطن الاهل
يا سمحه وين ما تقبل
وحنينه فى كل محل
كل سنه وانتى طيبه
ربنا يحقق كل الامانى يا احلا امانى
العفو والعافيه
شكرا امانى على الكلام البشرح الصدر
شكرا نوار يا نواره
|
Post: #12
Title: Re: *** لحن الخاطر ***
Author: لؤى
Date: 11-08-2005, 02:29 AM
Parent: #1
سوما الرائعة
كلّ سنة وإنتي طيبة
وربّنا يحقّق أمانيك
ويعيد عليك العيد والسعادة رفيقة خطواتك
Quote:
يا يوم باكر....
انت النيل
البجرى مشاعر..
|
يلاّ لوّني أيامنا بحروفك البهيجة ..
وُدّيـــــ
انا في البعيد مشتاق لهمسة من الوطن يانسمة
[email protected]
|
Post: #13
Title: Re: *** لحن الخاطر ***
Author: adil amin
Date: 11-08-2005, 02:41 AM
Parent: #1
بين الليلة
وبين يوم باكر
شتلة الفة
وومضة خاطر
مع تحياتي للاخت اسماء والاخوان والتهنئة بالعيد السعيد
|
Post: #14
Title: Re: *** لحن الخاطر ***
Author: soma
Date: 11-08-2005, 12:15 PM
Parent: #13
لؤى يا ضى الفريق
حبابك انت يا الضلاله وقت الضيق
العيد مبارك عليك.. علينا وعليك يتبارك
العفو لله والرسول
شكرا ليك يا لؤى الفنان يا مرهف
كلامك دائما ليه مكانه فى الوجدان
شكرا لا تكفى يا اصيل
***
الاستاذ الفنان
الاخ الصديق عادل امين
والله ليك وحشه كبيره
اتمنى ان تكون دوما بالف خير
اشتقنا لى طلاتك وكتاباتك المثمره الشيقه
كل سنه وانت طيب
ربنا يحقق كل امانيك قادر يا كريم
شكرا على الطله اخى عادل ...شكرا نواااااار
|
Post: #15
Title: Re: *** لحن الخاطر ***
Author: Elmosley
Date: 11-08-2005, 05:09 PM
Parent: #14
شكرا ياسومه
نص فيه عاطفة دفاقة
|
|