من الفكى المالى إسحق لهشام المجمر: إثين دافنين ليك عمل

قبل عدة ايام جاءتنى مس كول من شخص ارى رقمه لأول مرة و الرقم نفسه رقم دولة لا أعرفها ولكنى قدرت أن تكون بالشمال الافريقى إذ يبدأ الرقم ب 22+ . أهملت الاتصال بإعتبار أننى لا أعرف شخصا بتلك الجهات وربما أتصل الشخص عن طريق الخطأ وخاصة أنه لم يعاود الإتصال.

صباح امس عاود هذا الشخص الاتصال مرة و مرتين وثلاثة. أخيرا قمت بالإتصال به رد على صوت جهورى فخيم قائلا: أنا شيخ الاسلام اسحق من دولة مالى وهى كما تعلم دولة اسلامية كبيرة. رأيت فى المنام أن شخصين قد دسا لك عملا وهذا العمل سوف يسبب لك تدميرا كبيرا. وبما أنى لآ اؤمن بمثل هذه الاشياء كنت قؤيبا من انهاء المكالمة ولكن شئ ما حثنى على الاستمرار فقلت له ومن هما الشخصان. قال لى لا داعى لذكر الاسماء الآن ولكن ربما تعرفهما فيما بعد. كان يتحدث بعربية فصحى بائنة ولكن بلهجة غرب افريقية.

قال لى المهم الآن ايقاف هذا العمل لانه إنشاء الله سوف يدمرك تدميرا شديد إن لم توقفه( لاحظو إنشاء الله دى)

قلت له : وكيف نوقف هذا العمل؟

قال: نوقفه ان شاء الله بس لدى شرطين اولهما "سرى" بينى و بينك و الثانى أن تذبح ثلاثة بقرات كبيرات مكتملات وإن كنت لا تستطيع شراء هذا البقر فى البلد الذى تقيم به ارسل لى الفلوس وسوف اقوم انا بالذبح نيابة عنك.

إلى هنا قلت له : مع السلامة الآن و سوف اعود لك مرة أخرى عندما يسمح الوقت لأنى مشغول الآن.

عاود هو بعدها الاتصال مرتين ولم ارد عليه.

أها يا أخوانا وبما أنى معمول لى عمل وثابت وخبروا جه من مالى كان يجب أن أتساءل منو ياربى العامل العمله ده وداير يدمرنى؟
قلت فى نفسى النسوان أكيد. اها معقول يكون المرة وأمها؟ لالالا المرة طيبة وامها اطيب و متدينة وحاجة و ما بتعمل كلام زى ده.

اها منو لكن تانى المرتين الممكن اتلمو ويعملو الشغل ده؟

يكونو من ناس المنبر؟

وامكن رجال حد عارف الزمن ده الرجال ممكن يعملو شنو؟

اها يا أخوانا ساعدونى على معرفة الشخصيتين ديل لأنى ما عندى تمن البقر.

امكن يكونو اتنين مريخاب؟

بالمناسبة الفكى ده رقمو معاى

سوف أعطيه للذى يرغب فى فك العمل وعمل العمل

والكايسها ليها عرس

و الكايس ليهو ولادة

وكل الحوجات الاخرى

سوف اكون الوكيل الحصرى لهذا الفكى فى منطقة الخليج

الشرط ان ترسلو لى اولا ثمن التلات بقرات

إزيك يا هشام ..

Quote: من الفكى المالى إسحق لهشام المجمر: إثين دافنين ليك عمل

أنا هسي إفتكرتو مالي يعني فاينانشيال
قلت كمان الفقرا بقو تخصصات

Quote: قال لى المهم الآن ايقاف هذا العمل لانه إنشاء الله سوف يدمرك تدميرا شديد إن لم توقفه

يا زول انت اصلو عملت شنو في دنيتك الفانية دي بيستاهل قدر دا

_____
خلي صحبتك لجنى تنفعك

Quote: أنا هسي إفتكرتو مالي يعني فاينانشيال قلت كمان الفقرا بقو تخصصات

لا يا تيسير هو فعلا مالى

ثمن تلات بقرات ولسه الشرط السرى ما سمعتو

تخريمة: كيفك يا تيسير و كيف اهلك وابوظبى

Quote: امكن يكونو اتنين مريخاب؟

مجمر

من ناحية ديل اطامن خالص
ما شمو الهواء الا امس
لكن ممكن عاوزين قروشك للتفاوض

ياخوى دا زول حرامى,,ما دام ما بتؤمن بالشغلات دى
(قل لا يصيبنا الا ما كتب الله لنا)

حسين ملاسى

تحياتى

Quote: يا زول انت اصلو عملت شنو في دنيتك الفانية دي بيستاهل قدر دا

ما اكتر من عملتك الأخيرة

فرصة مش

الحمد لله الما كتلت ليك كلبتين في حياتك!

http://sudanile.com/news3.html

Quote: ياخوى دا زول حرامى,,ما دام ما بتؤمن بالشغلات دى (قل لا يصيبنا الا ما كتب الله لنا)

ابوقوتة

سلام

صدقت انا عرفت انو حرامى من الأول

وسوف انشر رقمو هنا للجميع

بس كدى نشوف اصحاب العمل اول