الرئيس يتحسر بقلم سعيد عبدالله سعيد شاهين

12:56 PM December, 07 2018

سودانيز اون لاين
سعيد عبدالله سعيد شاهين-
مكتبتى
رابط مختصر

البشير لمواطني نيالا

*ياسلام على نيالا المضيافة.

قعدت فيها اسبوع

في نهاية السبعينيات

لمن كان السودان

بي خيرو*

السؤال لسيادة الرئيس الذى حكمنا 30 سنه وقبلها زى ماقال بعضمة لسانه لما كان السودان بخيرو

يعنى كان فيه مشروع الجزيره وهيئة الموانى البحريه والسكه حديد وسودانير ومحالج القطن

والنقل النهرى والمخازن والمهمات والنقل الميكانيكى وخط هيثرو واملاك فى مختلف انحاء العالم

طيب خيرات السودان الكان بخيروا لما زرت نيالا وقلت كلامك ده كان برضو فيه {بمبو} عارف بمبو دى وين طيب اقول ليك لاننا اولاد الخرطوم بمبو كانت فى الركن الشمالى الغربى لعمارة الشيخ مصطفى الامين الجديده وكان فيها الايسكريم والكابتشينو والباستورما بالبيض ....ما قلتو علمتونا ناكل ....يا من اتيتم {بعقد} قاع المدينه هذا القاع الذى منح السودان رجال خالى العقد النفسيه كاملى الدسم للبناء والعطاء اللاء محدود مش من الذين {تعقدوا }من وجود حديقة الحيوان وكانت تسمى جنينة النزهة

بنسالك وانت المسؤول الاول فى البلد اليوم وقمت بانقلاب سميتو الانقاذ اين هذه الخيرات

بعد الاجابه على هذه الاسئله واعادتها لاهلها

بعد داك فكر فى الترشيح

هل تعلم سيدى الرئيس انه بحسرتك هذه قد نعيت السودان رسميا وعلى اعلى مستوى

مستوى رئيس جمهوريه الذى يتحسر على السودان عندما كان نفس الرئيس ضابطا فى القوات المسلحه عندما كان للقوات المسلحه هيبتها التى مرغتها يا سيادة الرئيس المشير المتحسر عندما منحت رتبة فريق للمدعو حمدتى الذى لا يعرف حتى اين تقع الكليه الحربيه وبعدها صار يمنح الرتب لمن يريد

ونحن بنفس حسرة الرئيس نقول حليل السودان فى سبعيناته كان فيه رئيس له هيبه وشنه ورنه ومن ضمن ميزاته عدم هز مؤخرته ولكن هز اى يد وقطعها تمتد للمال العام ورفض ان يمنح بيت كموظف حكومه لانه ما انجب وادى الاولويه للانجبوا عشان اولادم ما يتشردوا وبنى مسجد النيلين ما سماهو باسم ابوه وانت بنيت مسجد خمسه نجوم فى كافورى

اها الحساب ولد ورينا مسجد كافورى اتبنى كيف وعلى حساب منو مسجد النيلين اتبنى كيف وعلى حساب منو

اى انقاذ اتيت به يا من اهلكت الحرث والنسل

سؤوالنا الاخير وعليه نعاهدك بان نرشحك رئيسا السؤوال هو ماهو الانجاز الحقيقى الوحيد الذى قدمته للسودان طيلة ال 30 عام فترة حكمك

ولاننا شعب طيب وما طماعين بس انجاز واحد عملتو غير انجاز فصل الجنوب وتقديمك كاول رئيس سودانى للمثول امام محكمة الجنايات الدوليه فى لاهاي وهذا انجاز لم يسبقك عليه احد خلاف هذين الانجازين

سيدى الرئيس اقسم لك ان اكون اول المصوتين لك اذا اخبرتنى انا الغبيان الجاحد عن انجاز واحد طيلة ال 30 عام الماضيه

بس بصدقك لو قلت لى اهديتكم اكبر صدمه فى حياتكم عزو حبيبى

عمر البشير دا زول معتوه وقواه العقلية ليست جيدة
فهو غير مؤاخذ
الكلام فينا نحن الشعب البيحكمنا واحد مجنون ونحن ساكتين

( الكلام فينا نحن الشعب البيحكمنا واحد مجنون ونحن ساكتين )

• ياما سكتنا !! ،، ويما حنسكت !! ،، ويما حنسكت !!

• علينا وعلى الأعداء !!!!

• انشاء الله الدولار يصل مليون جنيه سوداني !!

• وانشاء الله حبة الرغيفة تكون بمبلغ عشرين جنيه سوداني !!

• وانشاء الله الخراب والدمار طوبه طوبه !!

• وانشاء الله الفساد والتراجع بمثل أعواد الراكوبة !!

• بس كيتاً على المعارضة السودانية والمعارضين ،، وكيتاً على الأحزاب السودانية ،، وكيتاً على أهل التمرد المكروهين ،، وكيتاً على نظام الانقاذ المشئوم الممقوت المكروه !!

• مليون مصيبة على البشير ونظامه ،، ومليون مصيبة على الأحزاب السودانية ،، ومليون مصيبة على المعارضة والمعارضين السودانيين !!!