رسالة الي السيد والي البحر الأحمر بقلم أنس حسن النور علي

01:55 PM August, 08 2018

سودانيز اون لاين
أنس حسن النور علي-
مكتبتى
رابط مختصر

على الرغم من مشغولياتك الكتيرة أرجو أن تمنحنى فرصة وتقرأ رسالتى هذه فأنا يا سيدي الوالي محتاج لرأيكم في هذا الموقف الذى أنا فيه ، أنا إبنك (أ/ح/ن/ع ) شاب سودانى خريج إحدى كليات البحر الاحمر الجامعية النظرية ، تخرجت في العام 2017 وعملت بمراكز طباعة عدة والا فالعمل في الطباعة غير مجذي لأني (عامل) فقط والآن عاطلاً رغم الجهد الشديد الذى بذلته من أجل إيجاد وظيفه (في أى حته( عملت خلال تلك الفترة في شتى المهن الهامشية حتى أقوم بتوفير ضروريات الحياة لي ولأسرتي إذ أننى أكبر أبنائها: عملت كعامل (طلبة) ، وعدة أشغال هامشية أخرى
إلى أن أخبرني ذات مرة – وقتها - أحد أصدقائي أن (الدرداقات بتجيب قروش كويسة) فقمت بتوفير بعض القريشات أشتريت بيها (درداقة) أحمل عليها الأغراض التى يشتريها المواطنين من السوق وقد كان العائد منها (مش بطال) يكفي بالكاد لسد رمق الأسرة وقضاء حاجاتها الضرورية، إلى أن قررت المحلية أن تسحب مننا الدرداقات وتؤجرها لنا لقاء مبلغ زهيد !
وهنا قررت أن أهاجر .. أطلع من البلد بأى صورة فبلد لا تجد للخريج وظيفة ثم تحاربه إن أراد (لقيط رزقو) في عمل شريف غير جديرة بالبقاء فيها !.. ودى قصة طويلة .. المهم لقيت شباب كتار زيي كده طلعوا طافشين معاي من البلد .. دلوني علي طريقة للخروج بس بجد حاجة أنا مجبور عليها بطرحه لاحقاً .. المهم مرات مرات ألاقي شغل في عمارة .. عتالي في السوق حاجات كده !
المهم في الموضوع الشباب اغلبم بيحلموا بالهجرة إلى كندا أو أستراليا لأنو قالوا ناس البلاد دى عاوزين أجانب بشرط إنو يكونوا شباب وصحتهم عال العال ..
أها مسألة السفر والهجرة دى عاوزه ليها قروش .. معظم الشباب ديل يا سيدي الوالي عشان يوفرو ليهم قروش يهاجروا بيها قامو باعوا الكلي بتاعتهم .. وهنا بالمناسبة يا سيدي الوالي (سوق الكلى) شغال شغل شديد والسماسرة السودانيين بتاعين الكلي أكتر من سماسرة العربات والعقارات في الخرطوم، تلقاهم قاعدين قدام المستشفيات بتاعت نقل الكلي عشان يصطادوا الناس العاوزه تبيع، وكمان في (قهوة) معروفه كل المرتادين ليها هم يا سمسارة كلي يا ناس عاوزة تبيع ..
بالمناسبة الناس العاوزة تشتري اغلبهم برضو سودانيين ! يا جايين من دول ثانية،ومعاهم قرايبهم المرضانين، وعاوزين ليهم كلي (كويسة ! (
أنا بكتب ليك يا سيدي الوالي في الرسالة دى عشان أنا قررتا أبيع كليتى ..
واحد من السماسرة لقي ليا زبون، وعملنا الفحوصات اللازمة، لكن والله يا سيدي الوالي أنا بينى وبينك (ملاوز) شديد ..ونفسياتي كعبة شديد ..
من جهة المبلغ كبير وممكن لو قبضتا القروش، وما لقيت طريقة هاجرتا، أجى أشتري بيهو (ركشة) أو (أمجاد) أو أي حاجة نعيش منها، خاصة وأن أسرتي اصبحت حالتها صعبة.
ومن جهة تانية، مرات بتحصل مقالب والزول ما يدوهو قروشو، وكليتو تروح (شمار في مرقة (
بالله يا سيدي الوالي ورينى أعمل شنو؟


رسالة من خريج

[email protected]

phone : 00249919887222 - 002490124635959