كيف تحمين/ تحمي نفسك و شركاءك من البمبان بعد بكره! بقلم عثمان محمد حسن

04:22 PM January, 29 2018

سودانيز اون لاين
عثمان محمد حسن-
مكتبتى
رابط مختصر

أدناه رسالة بعثت بها الطالبة/ نهى خيري إلى فيسبوك صحيفة (حريات).. و
أرجو نشرها لتعم الفائدة للمشاركين في مسيرة الأربعاء 31 يناير و أي
مسيرة قادمة:-

السلام عليكم
انا بدرس في كلية الصيدلة جامعة الخرطوم
و ح اتكلم بشكل مفصل شوية عن البمبان أو الغاز المسيل للدموع
(يمكن الكلام يكون جايط شوية استحملوني)

طول القرن الماضي كان في كم نوع من البمبان بيتم اختراعه وكل مرة بيكتشف
واحد احسن منه وكدا
أجد واحد و المستخدم حالياً بنقول ليهو CS gas
و CS دا اختصار لي اسم المادة الفعالة
O-chlorobenzylidene malonontrite
طبعاً الحاجة الممكن تكون ما واضحة انو المادة الفعالة دي اصلا ما غاز،
هي #حبيبات دقيقة بيتم تشتيتها او نقول اصطلاحا "تذويبها" في غاز اسمه
methylene chloride عشان يشيلها في الهواء
ومعاهم بيكون في مادة بتسخن عشان تقذف المكونات في اكبر مساحة ممكنة
1- المادة الفعالة بتعمل رد فعل تهيجي في الاغشية المخاطية والجلد و
بتشوش الرؤيا وتسيل الدموع و تصعب التنفس، الأعراض دي كلها مؤقتة و
مقدور_عليها جداً
2- البمبان ما بيقتل ليهو زول نصيح، إلا في حالة واحدة مسجلة، امرأة
فلسطينية اتوفت عشان اتعرضت ليهو بتراكيز كتيرة في فترات متقاربة والحاجة
دي ما بتحصل عندنا
3- البمبان ممكن يعمل مضاعفات مزمنة و خطيرة للناس العندهم أزمة أو مشاكل
في القلب، لو كان عندك واحد من الاتنين ديل ما تعلطي وتقولي إلا اطلع،
لأنك 100% ح تتعبي و تشغلي الناس بيك بدل ما يشتغلوا بالمظاهرة، ممكن
تساهمي بي افكار او نشر وعي او تنظيم.
4- الموية في الحقيقة كيميائيا ما فيها حاجة تتفاعل مع الCS وتزيد
مفعوله، الكنتة اننا بنستخدمها غلط، بنشيل كمية بسيطة ونفرك بيها وشوشنا
و نوزع الحبيبات و ندخلها جوة المسامات زيادة، زي لمن تشربي موية بعد
الشطة ما بتضيف حاجة من عندها لكن "بتعيد إحياء" المفعول
كمان لو غسلتي بي موية دافية، حتفتح المسامات وتزيد الطينة بلة.
لكن لو ما لقيتي غير موية باردة ممكن تغسلي بيها وشك لكن تميليهو عشان
الحبيبات جوة العيون مثلاً ما تجي في الخدود، غسلي عيونك من الداخل
للخارج و بكميات كبيرة وبعدين باقي وشك.
5- الكولا و الريحة و الخل اثبتوا نجاحهم حول العالم في تخفيف الاعراض،
مافي عليهم ابحاث علمية مثبتة لكن التجربة خير برهان وانا عن نفسي جربتهم
وكتير منكم جربوهم و أدوا أداء ممتاز.
6- قبل المظاهرة لازم يكون عندك كمامة طبية او اي قماشة تعمليها كمامة،
انقعيها بواحد من السوائل القلتهم فوق ديل عشان يغربلوا ليك هواء الشهيق
من حبيبات البمبان وشيلي معاك كولا باردة تقفل ليك المسامات. وغطي اكبر
كمية ممكنة من جلدك. اعرفي اتجاه الهواء عشان بعدين تتفادي اكبر كمية من
الغاز براحة من غير ما تتجاري في الحتة.
7- مهما حصل خليك في مكان مفتوح، لو تعبتي شدييييد ممكن تطلعي في مكان
#عالي لحدي ما الاعراض تخف وترجعي، غاز البمبان اتقل من الهواء. لو بلعتي
جزء كبير من الحبيبات ارغمي روحك على الاستفراغ بعدين اتمضمضي بي كولا
باردة و اشربي منها كتير.
لو البمبانة زاتها اتفكت جنبك زحي براحة وخليك على بعد آمن عشان غالباً
حتتنطط و تتجنن و ممكن تضربك في رجلك.
ما تشيلي تلفونك معاك المظاهرة، و ماااا تلبسي عدسات لاصقة.
8- بعد_المظاهرة ترجعي بيتكم وتستحمي كويس بالموية الباردة والصابون و
تغسلي اكسسواراتك و نضارتك و هدومك، حتى الملابس الداخلية، بالموية
والصابون ومن غيييير كلوركس (مبيض).
9- في ناس عندهم جينات وراثية بتخليهم ما يتأثروا بالمادة الفعالة، لو
لقينا ناس منكم بالطريقة دي، ممكن يفيدوا شديد في ارجاع البمبان مثلاً

10- آخر و أهم نقطة:
الذعر البيسببه البمبان مؤثر اكتر من تأثيره الفسيولوجي، الكنتة كلها
نفسية، والحاجة دي انا اتأكدت منها بالتجربة: أول مرة شربت فيها بمبان
كانت اصعب بكتير من تاني مرة، مع انو تاني مرة شربت بمبان اكتر و لمدة
طويلة جداً، ببساطة عشان تاني مرة كنت متوقعة بالضبط الحيحصل شنو، و
مستعدة نفسياً وعقلياً قبل ما اكون مستعدة بالكمامة والبيبسي...الخ
عشان كدا اهم حااجة الهدوء والثبات حتى لو كانت اول مظاهرة ليك، حتى لو
اتجرستي ما تظهري انك متجرسة، ثباتك بيثبت الناس الحوليك. #اتماسكوا و
مااا تتجاروا في الشارع بي ذعر...

إيدين بنيات الفريق قادرات على شوية بمبان!

منقول