Post: #1
Title: سعادة الدكتور أركانحرب جنجويد! بقلم أحمد الملك
Author: أحمد الملك
Date: 06-20-2017, 03:22 PM
02:22 PM June, 20 2017 سودانيز اون لاين
أحمد الملك-هولندا
مكتبتى
رابط مختصر
عاد فارس الى القرية بعد غياب إستمرّ عدة سنوات، كان يمشي بنشاط كعادته
رغم انّ وزنه ازداد كثيرا بصورة واضحة.
قال سليمان الاعرج ضاحكا: الزول دة كان مربوط وين سوى ليه فِقرة زي تور البلدية!
قال حاج النور وهو يصافحه: وين يا أخينا؟ عاينا في التلفزيون قلنا يمكن
عملوك مسعول كبير، وفتشنا الجرايد قلنا يمكن نلقى ليك تصريح ولا حاجة،
لكن لا حس ولا خبر الحكاية شنو؟ ولا زي ما الكيزان قالوا الوظيفة إبتلاء،
يمكن قلت: واذا بُليتم فإستتروا! ما عايز الناس تستفيد معاك!
في واحد قال لي الزول دة سافر العمرة وأنا قابلته منجعص في الجمعية ياكل
الكبسة ويلعب الحريق، وبأكل الكبسة بقى باب أربعة ضلف ما يمرقه!؟
لأ أنا مشيت الحوار؟
الحوار؟ دي بلد جديدة فتحت بدل ليبيا؟ ولا من الامتدادات الجديدة الجنب
مدني؟ وين من الكلاكلة؟
كلاكلة شنو؟ الحوار، ما سمعتو بمؤتمر الحوار المجتمعي؟
خمسة سنة حوار؟ تكون حليتو مشكلة فلسطين ومشكلة كوريا ونووي ايران وثقب
الأوزون، ورجعتو للنور الأحمر مرته، وحاربتو الكوليرا والطاعون والفجوة
الغذائية، وحليتو مشكلة مشروع الجزيرة ومشروع القاش، ورجعتو الجنوب
ووقفتوا الحرب في الغرب. !!
ضحك سليمان الاعرج وقال: والله ديل ما يقدروا يحلوا اي شئ غير سراويلهم!
قال حاج سعيد: كيف ياخي تقول كدة الزول مسكين تعبان ليه خمسة سنة عشانكم،
يحاور ويحاور لامن صوته راح، بدل ترحب وتضبح ليه تقول ليه سروال وبتاع!.!
انت ما شايفه بقى قدر ايه؟ تعبان شنو؟
يعني الناس دايرها تحل مشكلتك وتموت بالجوع؟ ما لازم الحوار يكون مصلّح
قالوا الاكل يجيهم من الفندق! وفارس كمان نفسه مفتوحة على الحوار! بعدين
فارس شديد دة النوع اليقعّد الضيوف في الصواني التعبانة، ويحجز صواني
الاكل الدسمة على جنبة لغاية الضيوف ياكلوا بعد داك يقعد ياكل برواقة!
قالوا الحكومة كانت عاملة حسابها الحوار يستمر سنة، لكن الظاهر جرّ شوية،
خمسة سنة ولي الليلة ما خلص!
غنى الاعرج بصوته الجميل: خمسة سنين معاك يا زينة الأيام ويا نوّارة الحلوين!
ضحك فارس وقال: الاعرج والله صوتك ما بطال لو مشيت لجنة النصوص كان أجازوه!
خلينا من لجنة النصوص السنة دي اصحابك ناس لجنة اللصوص، اللجنة الشعبية
تعّبوا الناس شديد، زولك شيخ علي عارف ظروف الناس والموسم التعبان بعد دة
جاب زيادة على ضرائب النخيل، وكت الناس احتجت قال دي اوامر عليا!.!
شيخ علي هو لسة ماسك في اللجنة الشعبية؟ قبل ما اسافر الحوار قال لي دي
آخر سنة لي في اللجنة حيعينوني وزير ولائي!
قال سلمان الاعرج: انا قلت ليه خلاص مادام مرشحنك لمنصب كبير، خلّي
اللجنة الشعبية، قال لي الناس ديل ما عندهم راي واحد، ولموا الخلق من
الدنيا دي كلها جابوهم الحوار دايرين يقسموا معاهم السلطة والثروة، لو
أدو كل زول من الخلق الجابوهم ديل وظيفة، أنا مخزنجي في المجلس ما
بلقاها، عشان كدة لو ما ضمنت الوزارة ما بفرط في اللجنة الشعبية، الناس
حيقولو عليّ الطمع ودّر ما جمع! وأنا الحمدلله ما زول طمّاع!!!
أها ووصلتو لي شنو في الحوار؟ وهسع انتوا متذكرين المشاكل البديتو تحلوها
قبل خمسة سنة؟
لأ خلاص المشاكل كلها اتحلت وهسع بس منتظرين تشكيل الحكومة!
سجمنا يعني هسع مافي حكومة في البلد؟
ضحك سليمان وقال: في ذمتك دة حال بلد فيه حكومة، ديل عصابة عايشين
بالسرقة والقلع من الناس.
واهم مقررات الحوار شنو؟
حيعينوا رئيس وزراء!
كويس، يعني الزمن دة كله الوزراء ديل كانوا مطلوقين ساكت بدون رئيس؟
لأ، دة كان شغل الريس! لكن ناس الحوار قالوا الشغل كتر على الريس، لازم
يكون في زول تاني يساعده في تحمل الأعباء الوظيفية!
حلوة الأعباء الوظيفية دي ، الظاهر دي المرقت بيها من مؤتمر الحوار!
الريس مسكين ما فضي من السفر، عشان يغيظ اوكامبو، أي فاتحة ولا طهور في
أي محل في الدنيا يركب طوالي، لامن الطيارة مكنتها خفّت، في سنة واحدة
عمروها ستة مرات!
يعني هسع حيتفرغ بعد عيّن رئيس وزراء للفاتحات والكرامات، يعني حيسوي
ليه فقرة زي فقرتك دي السيف ما يرميها.
دي يمكن سعادة الكُبُر!
سعادة شنو؟ قالوا نميري مرة قابله في فاتحة، سأله قال ليه: مسعول من
الخير ترابي وين؟ الريس قال ليه ترابي في السجن. قال للريس اوع تخليه
يمرق! لو مرق يخليك زيي كدة من فاتحة لي فاتحة!!
وما مرقت ليك بحاجة انشاءالله نائب في البرلمان ولا عقيد أركانحرب جنجويد؟
رئيس الجنجويد قالوا بقى دكتور!
ما شاءالله زمان قالوا كان بتاع حمير، هسع يعالج الناس!
لأ مش دكتور بتاع الناس، دكتور في الجامعة.
ماشاءالله يدرّس الاولاد، الريس كمان عنده برضه دكتوراة كان ما نخاف الكضب.
لأ الريس عنده ماجستير.
والماجستير اقوى ولا الدكتوراة
الدكتوراة
يعني رئيس الجنجويد بقى اعلى من الريس؟!
دة دكتوراة فخري ساكت، يعني نوع من التكريم زي ما بيقولو في التلفزيون،
تقديرا لجهوده المخلصة!
وهو اخلص في شنو؟ في الكتل؟
ياحاج سعيد انت الليلة داير تجيب لينا مصيبة الظاهر بأسئلتك الابت تخلص دي!
بصق شيخ النور وقال: ووصلت متين؟ الليلة ما سمعنا صفارة وصول البص!
انا جيت يوم الجمعة الاسبوع الفات، كنت تعبان نمت شوية!!
أسبوع نائم، تعبان من السفر ولا من الحوار؟
الجماعة طلبوا مني اعمل تقرير عن ناس المؤتمر الوطني هنا، قالوا ناس
الحزب كرّهوا الناس في الحكومة!
يعني بقيت جاسوس على ناسك؟!
ودة داير ليه تقرير ما الناس كلها عارفة ان جماعتك حرامية سرقوا الدنيا
كلها باعوها.
احتمال يعملوني معتمد لو الأمور مشت كويس!!
زمان وعدوك بالوزارة عملوك مُنسق شرطة شعبية! هسع وعدوك بي معتمد معناها
حيعينوك مراسلة في المجلس!
للحصول على نسخ بي دي اف من بعض اصداراتي رجاء زيارة صفحتي
https://www.facebook.com/ortoot؟ref=aymt_homepage_panel
|
|