Post: #1
Title: ضي الرموش بقلم صديق ابوفواز
Author: صديق ابوفواز
Date: 01-23-2015, 04:05 PM
صديق أبوفواز - يناير2015م
بحسك يا حلم ضواي
تناديني !
واحسك جايا بي جرتق أمل
تغطيني !
تفرهدي تاني من جواي
تشيليني !
من وهدة زمن غدار
تغيثني !
وبي زغرودة فرح تايه
تصحيني !
أقوم مخلوع ..
تمسكي إيدي ..
تسوقيني !
أكون ما شايف السكة ..
تضوي الشمعة ..
بي رموشك تقوديني !
------
مستنيكي يا ضي الرموش
عشان باكر تتاتيني ...
تخلي غيابك المجنون
تطلي علي تواسيني ...
وترفعي صوتك المبحوح
ومن صمتك تهامسيني ...
تجري النمة في القيفة
ومن الهدام تعالجيني ...
تهتفي بي أحلامك الخامدة
ومن حمى السكّات الحار تغسليني ...
ومن وجع خوفا معشش من زمان
تسلي السيف وتحميني ...
ترجعي ليا إيقاعي
وتردي ليا أصواتي
وتمشي معايا من تاني
عشان ما استنطق أشعاري
وعشان ما استرجع ألحاني
---------
ولا الشوق البيضوي هداي
بفارقني ،،،
ولا القرب البهدي مناي
بواسيني ،،،
ولا البعد السكن جواي
بنسيني ،،،
ولا النسمة البتبكي معاي
بترويني ،،،
ولا الحلوة البسوقها معاي
بتكفيني ،،،
ولا النغم البرن غناي
بيطربني ،،،
ولا كل مزامير الكذب والزيف
بتقدر تمحو عبراتي ،،،
"أبوفواز يناير 2015"
مكتبة الطاهر ساتي
|
|