عشت يا بدور .. لعنتك تلاحق البشير في نومو وصحيانو بقلم ستلان ماناسي

والله يا بدور عندما خيشتي الساحة السياسية بالعرض وقمتي بتعديل الدستور انا شخصيا فرحت تمام وتفاءلت خير كتير. لكن الجماعة التانين من الكتاب والعاملين محللين في اللنت شايفهم شنوا حربا شعوا عليك يا بدور. قالو بدرية سليمان متخصصة في تفصيل الدساتير الرجعية والقوانين القمعية وعندها خبرات مع الأنظمة الدكتاتورية من مايو الإشتراكية إلي يونيو الانقاذية وهي في النهاية ترزية شمولية وقانونية رجعية. وقالو اعتدت علي دستور 2005.
دستور 2005 فاقد الصلاحية ليهو سنين وبعدين قوانين الانقاذ شالت منو كل ايجابية.
انا زعلت وما قدرت استحمل كلامهم كلو كلو وقلت لازم ادافع عنك.
اقول ليهم يا شباب روقو المنقة وانتظروا نتايج تعديلات بدور. فانا متفايل بالتعديلات دي والله. فقل لي بربك من اسقط الديكتاتور نميري غير قوانين سبتمبر 1983 التي فصلتها بدور علي مقاس الديكتاتور وفرح بها واستبد وطغي وقتل عظماء الرجال بتهمة الردة. وبس بعد مرور شوية اشهر علي القوانين والشعب يركل الديكتاتور نميري ويعيد النظام الديموقراطي.
ودحين بدور خشت الساحة وجابت قوانين ازرط واضل من قوانين سبتمبر 83 وحققت للفرعون ما يزيد من طموحاتو وادتو سلطات لم يحلم بها اي دكتاتور في الزمن الحديث. هو صار الآمر والناهي في البلد والسودان تحول إلي دولة شمولية تخضع للريس ولا تحاسبه.
التعديلات لم تقف عند هذا الحد. هي عملت من الاجهزة الامنية والمليشيات قوة ضاربة, لا تحاسب علي غلطاتا, وعندها محاكمها الخاصة بيها وتعمل فينا الدايراهو بغير حساب وبدون مساءلة.
حتي الولاة قننت بدور تعيينهم بواسطة الفرعون.
بدور قامت شرحت ابعاد التعديلات للفرعون وقالت ليهو أها انا كل السلطات ختيتها تحت امرك يا مولاي. الفرعون المعروف بقلة عقله انتشا وقام رقص وهز صلبه فرحا بسلطاته الجديدة. وما كان عارف انو بلع الطعم. فزي ما اطاحت قوانين سبتمبر بنميري فتعديلات بدور ستطيح بالفرعون في القريب.
لعنة بدور حتضع نهاية للديكتاتور المستبد.
هو ما عارف انو المزايدة في القوانين القمعية تعجل بازالة النظام ومش الحفاظ عليهو. اللي حصل لاصحابو ناس شاوشيسكو ونول بوت وبنوشيه والقذافي ومبارك ينتظره.
ولعنة بدور ستحلق فوق راسو محل ما يشي لحد ما ينتفض الشعب ويؤسس النظام الجديد.