الحضر حضر وما حضر المال سدر بقلم شوقي بدرى

هذا ما تقوله الانقاذ الآن بعد تأكد لها بانه ليس عندها في ,,حرارة ,, الانتخابات سوي احزاب الفكة والمؤلفة قلوبهم . وبالرغم من النقارة والمداعي الذين اخرجوهم . والمداعي في السودان هم من يخرجون لدعوة الناس لحولية زواج او مناسبة . وهم من الجنسين . الحوار بمن حضر

المثل مناسبته كانت في رفاعة العظيمة . فالقوافل التي تاتي من البطانة وحتي من اثيوبيا . وكانت تنزل حمولتها في رفاعة وقد تواصل البضائع الي الجزيرة والعاصمة او المدن الاخري . وتعود الناس علي حلب النوق التي في القافلة . واصحاب الجمال يكونون في حالة نشوي عند الوصول ويقولون البل ورد والمال برد . فقد تتعرض القافلة لنهب او ينكسر احد الجمال.

ولكن في يوم لم يكن هنالك الكثير من من استفادوا من تلك المنحة وطالبوا الخبير ان ينتظر الآخرين . فقال ,, الحضر حضر والما حضر المال سدر,, . بمعني ان الجمال ذاهبة . والخبير لم يكن محتاجا للناس . ولكن الانقاذ تتعلق الآن بزبد البحر . وتريد ان تحس بشعور الجمالة وتأتي الانتخابات والحواور ويبرد المال ، اقل شئ لخمسة سنوات جديدة .

لقد بدا عندنا اخيرا ادب الاعتراف بالذنب . ولكن ببعض الحياء والرياء . البشير يشتكي لطوب الارض من ان امريكا قد خدعتهم وانهم قد نفذوا كل طلبات امريكا . ولقد فصلوا الجنوب ، وباعوا رفاقهم . وقوش كان عامل ابونيه لواشنطون . وسلمهم حتي شهادات ميلاد المطلوبين . وفرش البحر طحينة للمخابرات الامريكية . ولكن لا قروش ادوهم ولا اكل شبعوهم .

البشير معروف زول علي قدر حاله . حملة الجوازات الغربية والشهادات العليا ماعارفين قوانين اللعبة . السادات كان فلاح مسكين وتفكيرة محدود . اعطي حتي حياته للامريكان . بدون مقابل . وكان يقول بالمفتوح وهو مشروق ومخلوع ,, صديقي كيسنجر . ونسي ان امريكا تقول بالمفتوح انها دولة عظمي وليس عندها اصدقاء دائمين ، فقط مصالح دائمة . ولقد قالوا هذا لبريطانيا التي يتكلمون بلغتها . كيسنجركان ينظر الي السادات والاكبر من السادات وكأنه لا شئ .

نيكسون لم يحترم حتي قوانين بلاده . وكانت فضيحة ووتر قيت . وطرد نيكسون من الرئاسة . هل كان البشير يتوقع ان امريكا قد نست المسيرات ,, امريكا لك قد تسلحنا وامريكا لمي جدادك . وامريكا روسيا قد دنا عذابها .....الخ متي نسي الامريكان قتل احد رجالهم ؟. لقد توج البشير قتل غرانفيل بتهريب القتلة بطريقة صبيانية . وكمان متوقع يعفوا ليه الديون ويرفعوا اسمهم من قائمة الدول الراعية للارهاب . وكمان يكملوا جميلهم ويقولوا للامم المتحدة تلغي كل قراراتها ويعفي البشير وبقية مجرمي الحرب من ملاحقة المحكمة الدولية . هي الامم المتحدة دي شلة كيزان ؟؟

ياخي اذا بقيتوا خونة وبعتوا البلد وقسمتوها ، اقله كان تقبضوا الثمن اول . طلعتونا خونة ومرتشين وجبانين . لكن مافي لزوم تطلعونا هبل واغبياء . قالوا السعيد البشوف في غيروا . كيسنجر كتب في كتابه ان السادات صرح فجأة بانه ذاهب الي اسرائيل . واندهش حتي الاسرائليون . وقال كيسنجر ان السادات بعد ان رجع طالبهم بالثمن . وقال كيسنجر ان الانسان لا يدفع لشي قد تحصل عليه . ولكن اذا كان السادات قد لوح لهم ، لكانوا قد اعطوه كل ما يطلب . هذه النظرية تعرفها حتي بائعات الهوي . لقد قال عثمان دقنه لصديقه شيخ اور الذي وضعه في غار ، ووعد بمساعدته للذهاب الي الحجاز واتي له بالجنود . وقال عثمان دقنه هازئا ,, انشاء الله يا شيخ اور ما تكون بعتني رخيص ,,

البشير باع الجنوب رخيص جدا . قالوا في حرامية سرقوا حصان سريع وادوه لي واحد منهم يبيعوا في السوق . المشتري مسك الحرامي قدح وقال يجرب الحصان . وعيك انطلق ولم يرجع . لمن رجع ،اخوانوا سالوه بعته بي كم ؟ قال ليهم بي راس مالوا والقدح ده ربح . البشير حتي القدح ما لقاه . كتل مليونين من اهلنا من الجانبين . وبعدين لفوا ليه العلم السوا لينا حمال عبد الناصر ذي الزول الكاتلو تيبي . وخالو ضبح وعرض . الحمد لله جماعتنا بقوا يقولوا غلطنا .

البشير الذي اعترف بانه خدع بواسطة الامريكان وضيع الجنوب ،يقول الحوار بمن حضر , وان نداء السودان واعلان باريس خلفهم امريكا واسرائيل . امريكا اسرائيل بقت ذي ميرغني المامون واحمد حسن جمعة . زمان في الاذاعة المذيع قال توفيت والده الفنان ميرغني المامون واحمد حسن جمعة . آسف ... والدة الفنان ميرغني المامون واحمد حسن جمعة . والمرة التالتة صدقت معاه .

طيب انت امريكا دي كسرتوا ليها تلج القطب الشمالي كلة . واديتوها تصريح لبناء سفارة اكبر من العباسية . وكنتوا قافلين ليها شارع الله . والمسلمين كانوا بيمشوا في بلدهم بطريقة اضانك وينا ؟؟ المعارضة لو اتعاونت معاهم هل هذا تعدي علي حقوق الانقاذ . نعم الانقاذ دفعت لامريكا بكرامة البلد ووحدتها وسيادتها . وبي خشمكم البياكل الرز باللبن والباسطة . ما قلتوا كنتوا ساكتين وانتو عارفين جنود الامم المتحدة يقومون باغتصاب السودانيات . بعد ده فضل ليكم شراب السجاير .

الصادق قال انه خدع لانه مارس حسن النية . هذه اكبر محنة في الدنيا . الناس ديل غشوك ونسيبك كان معاك في الحكومة وسجنوك . وحكوا عنك كل ما هو قبيح . وكانت اتفاقات كثيرة شي نعرفه وشي بيغبانا . وحمده في بطنه ، لكن المعروف هو اتفاق القاهره الذي ارجع الصادق الي السودان وتبعته تصليحات وتوضيبات وشوية حلاقة بقطعية وتربيت علي الظهر . وكان اتفاق جيبوتي . وانحنا لحد دلوكت مافاهمين ليه جبوتي ؟ يطرشنا لا سمعنا زول مشي شهر عسل لجبوتي ولا انسان اتخرج من جبوتي ولا زول جاب شيلتو من جبوتي ولا مغترب في مطار الخرطوم جايي من جبوتي . ولا يوم سمعنا بلاعب كرة من جبوتي . ولا حتي مباراة شطرنج . وبعدين اتفاق حي الملازمين القبل ما ينهضم اكله . البشير ما قلب . والصادق اتمحن اكتر من النشال النشلوه . وبعدين ادوه عطية مزين وشالوا حسوا علي زعم انهم قد اشتروه . وطلعن ملاليم في بيت قطبي المهدي في اكتر منها .

اختلافنا مع علي محمود حسنين بدا بالتصرف العشوائي . ولقد استلم 800 دولار في واشنطون من اليد الي اليد . في الديمقراطية مافي عصر . كل شئ يستلم بلجنة وبتوثيق بغض النظر اذا كان دولار او مليون دولار . اراد دكتور محمد جميل ان يتبرع بالف دولار . وصرخ محجوب شريف طيب الله ثراة ونحن في هولندة وكان حياته معرضة للخطر . ورفض ان يستلم المبلغ للنفاج بدون شهود وتوثيق . غلطة الصادق انه بالرغم من انه يعرف اساليب الكيزان وقبحهم ، الا انه تصرف بطريقة خاطئة . مما جعل امثال كرتي يصفة بما لا يقوله السوقة .

عندما فشل انقلاب خالد الكد في سنة1965كتبت الميثاق ان الانقلاب شيوعي . وذهب طه الكد غاضبا الي الاستاذ الصادق عبد الله عبد الماجد وهو اشرف الاخوان . واستفسر عن وصف الانقلاب بالشيوعي وطه وخالد من الاخوان . ورد الاستاذ الصادق ,, ما هو السياسة كدة .. واستغل قرابة خالد مع عبد الخالق محجوب وجوار خالد لاحمد سليمان .عضو اللجنة المركزية للحزب الشيوعي والانقاذي فيما بعد . وهذه معلومات يعرفها الصادق عن الكيزان . والصادق يعرف الكيزان احسن من الجميع . ويعرف انهم يمتازون بالحقد والخسة وحب الاذي . الا من رحم ربي .

ما دام الصادق اعترف في انه راجل غفلة ويتصرف بطيب نية ، ويمكن ان يلدغ من الجحر الواحد عشرات المرات . فيجب ان يترك قيادة الحزب . لانه فشل . وليعترف بكل الغلطات التي اوردتنا مورد الهلاك . اولها اصراره علي رئاسة حزب الامة وهو دون الثلاثين. وان يكون رئيس وزراء وهو في الثلاثين . والخبره لايمكن ان تزرع مثل الكلي والقلب في هذه الايام ، بل تكتسب بالممارسة .

ده كله حننساه ومستعدين نقتنع بكلام الصادق . والمؤمن صديق . بس يبعدنا من الترابي . اخبرني من حضر ان النميري قال للبشير اوعك تفك الترابي . تفك الترابي ،حتبقي ذي كدة حايم ببيوت العزاء لمقابلة الناس .

واذا لم يستطع الصادق ان يقتنع بأن اصفيائه واحبابه الذين كان يشاهد معهم دائما ، واعني الكيزان ، فليفكرفي مقدار اللؤم الذي قلوبهم الآن . وهم لايفرحون لاطلاق سراح 20 من الاسري . لم يهمهم بؤس حال الاسري ووالداتهم واطفالهم واهلهم . ورفضوا ان يكون اطلاق سراح هؤلاء المساكين الذين خدعوا وحاربوا لصالح الانقاذ، بواسطة السائحين . دنيا

كركاسة

كل ما تكتم نسمع الكلام عن توحيد اهل القبلة . ما كل المسلمين اهل القبلة. والا لما كانوا مسلمين . هي يقصدون مكة والكعبة ؟؟ ام انهم لايزالون في اولي القبلتين ، القدس الشريف . ام القبلة بالنسبة لهم هي البنك . وما هي علامة او وسم اهل القبلة . البنعرفوا عن الكيبزان هو الوزن الزائد والملافح والسكسوكة والعربات الفارهة والعطور والكلام المنمق والعبارات الممجوجة . المره دي حيعرفوا بعض كيف . ولا بطريقة ,,يعلم الله بنعرفكم وبتعرفونا .,,

مكتبة شوقى بدرى(shawgi badri)