أوضاعنا تحت السيطرة..!! زاهر بخيت الفكى

يا ساكن الخرطوم...
أرقد قفا..
أنسى الهموم..
اتهنأ بالجو الجميل..
الغيم والسحابة الممطرة..
ما تنزعج..
من مطرة جاتك جوة بيتك..
أو فى ضرا..
أو حتى ..فى وسط البيوت..
السيل جرى..
شال الشجيرة السمحة ديك..
والمزيرة..
الخلوة فى حلة ورا..
والمدرسة ..
لا خلى كرسى ولا كتاب..
لا مسطرة..
حتى المقابر حاصرة...
فيها الشواهد بعثرة..
صوت الضفادع..
فى الميادين ..
والموية راكدة..بلا حراك..
طُحلُب تخين..
شوفوها كيف متغيرة..
فيها أشكال من ذباب..
ناموس عجيب..
هل يا ترى..؟
أُنثاهُ ناقل للمرض..؟
أهل العلوم والدكترة..
قالوا المفيد..
هذا البعوض من نوع فريد..
أُنثاهُ ماتت من زمااان..
عايش وحيد..
ما منوا خوف..
واوضاعنا تحت السيطرة...
والضفدعة..
أكلوها بس..
من غير شمار..
فلفل وحبة كسبرة..
مشوية أو مقلية..صاح..
هى شهية..
وجبة غنية..
ما أحلاها..طازجة محمرة..
فيها البروتين..العجيب..
لا لحمة تانى..
ولا حليب..
ما دام ضفادعك وافرة..
واوضاعنا تحت السيطرة..


بلا أقنعة...
صحيفة الجريدة السودانية...