نتحمل ..نعديها خنق..!! زاهر بخيت الفكى

إتهدينا..
ما قادرين..
نشيل فوق الضهر حاجة..
كل الفينا..
يا ريس خلاص كِملت..
تشوف العين بصيرة..
معاها اليد قصيرة..
نحن بقينا..
لا قدرة ..يا والينا..
لا حيلة..
والفينا..
قسم بالله ..مكفينا..
جيوش..
من ذباب أخضر..حوالينا..
واقعة الحيطة..والمطبخ..
راكدة الموية..جوة الحوش..
فى الساحات..
والطرقات..
زقاقات الفريق الضيقة..
جوة بيوتنا بتجينا..
ما لقت الدريب مفتوح..
شان تمشيبوا لى برة..
زمااااان..
اتردمت مجارينا..
اتقفل القبيل مفتوح..
الحال صبح مفضوح..
كل الخلوق عارفانا..
من أول مطيرة تصُب..
وبرقاً فى سمانا..
يلوح..
تقيف طيارة الاغاثة تكُب..
ريحة الفيها..
فى أسواقنا..بكرة يفوح..
خريفنا الفات..
يا والينا..
فى غُرف الطوارى..
قلت كلام..فيهوا وعود..
تبنى سدود..
برضوا كبارى..
فيها مجارى..
للسيل البجيكم جارى..
بيها يمر..
ما نسينا..
جيتنا الليلة..تترجانا..
نتحمل..نعديها خنق..
والداخرنوا للزمن الصعيب..
تحت المطيرة غرق..

بلا أقنعة..
صحيفة الجريدة...

الاستاذ زاهر بخيت سلام،
وكل عام وأنت بألف خير،
والقابلة سنة بدون خنق .
......
حبينا فقط نسلم ونعيد عليك.