الزول اللذج

.. .........................

الزول اللذج شخصيه لم تحظى بالأهتمام الكافى من قبل الشعب السودانى بالرغم من إنتشار هذه الشخصيه فى كل حى وكل مدرسه وكل مكتب وكل وسيلة مواصلات من الرقشه وحتى باصات الوالى.
من ناحية الشكل غالباً مايكون الزول اللذج قصير القامه مائل للبدانه مكرش وقصير اليدين بصوره ملحوظه يتمطق حتى لو كان فمه خالياً من الطعام أجلح أو أصلع عندما يصل أعلى درجات اللذوجه.
يرتدى عراقى خفيف وسروال قصير وسفنجه على من يجده أن يقوم جارى .
هذا الشخص اللذج يعشق الأحتكاك الجسدى المباشر .
مستعد ان يسلم عليك عناقاً سبعه مرات فى اليوم قبل وبعد الأكل ولا يحاورك الا وهو وأضع يده القصيره على كتفك ويصافحك كل مايضحك.
الزول اللذج دائماً مايتربص بك وأنت خارج من البيت فبمجرد ماتفتح الباب تجده أمامك مكتمل اللذوجه كما قال الشاعر:

لقيتو لاذج منتظر ...
أجلح قصير من لذجتو..
نفس الملامح والسجم...
والجلحه ذاتا وكرشتو...

هذا اللذج له قدرة مذهله فى التنقل من مكان الى أخر بحثاً عن الشمار والإلتحام بالجماهير.
تجده أول الواصلين الى موقع الحدث وإذا تأخر لسبب قاهر يستعين بخاصية الإلتحام ويفج الجماهير حتى يقف فى الصف الأمامى وبعد ذلك يسأل من بجواره بعد ان يضع يده على كتفه : الحاصل شنو ياود العم؟.

لك كل الويل لو جلس الرجل اللذج بجوارك فى وسائل المواصلات وأنت تتصفح الجريده فسرعان مايضع راسه المجلح بينك وبين الصحيفه حتى تحس بأنفاسه تضغط على صدرك

........ ياأخونا ماتزح راسك دا شويه .
....... معليش ياأبن العم بس داير أشوف موضوع هيثم مصطفى دا وصل وين؟
...... طيب خلينى أتصفح الجريده وأديك ليها.
..... والله لو النفوس إطايبت الباص دا كلو ممكن يقرأ معانا.
..... ياأخى شيل الجريده خليتا ليك.
..... ياود العم ماتذعل الفقرا إتقاسمو النبقه.
..... ياأخى النبقه دى انا خليتا ليك.. فكنى يااخى.. دى بلوة شنو دى؟
يضحك اللذج بصوت متهدج وهو ممسك بكتفك البعيد ويضمك اليه وهو يقول ..... والله انت من ذعلك دا جعلى حر.

بالرغم من أنتشار هذه الشخصيه فى مجتمعنا السودانى فقد خلت المكتباتنا عن اى توثيق للزول اللذج وتم تجاهله تماماً من قبل شعراء الأغنيه السودانيه فى الوقت الذى إمتلأت فيه المكتبه السودانيه بالغناء للزول السمح الفات الكبار والقدرو ...... والزول الوسيم الفى طبعو دايماً هادى ..... وحتى الزول الخلف ميعادو غنوا ليهو يمه الزول مالو ما جا .... والمرضان غنوا ليهو سلامتك والألم بيزول وكفاره ليك يازول.

اليوم انا أقدم أسفى للزول اللذج للتجاهل الغير مقصود وأهدى له الكلمات التاليه وأخص بها اللذين بلغوا سبعه درجات بمقياس اللذوجه.

الزول اللذج دايماً سمين متمطق....
يقابلك منشتح ومرات يجيك متدردق...
فى عز الزحام تلقاهو فيك متلذق...
يتكل فى قفاك كتفاً متين متعشق...
.........

المهندس صلاح سالم محمد سعيد