Post: #1
Title: شوف جنس البذار دا....... هسه دى بيرموها؟؟
Author: صلاح سالم محمد سعيد
Date: 04-12-2014, 10:44 PM
....
بلاعه فى نص السوق العربى كل واحد يجى ماشى جنبها ينطها بطريقه (فل اوتوماتك) بدون اى مجهود او إستياء. لدرجة الشعور بالإلفه بين الماره والبلاعه.
فجأة جات الحلوة قاشره معطره... تمشى الهوينه كأنما خلفها موسيقى حالمه... وقلوب الناس وراها كل خطوه معاها آها... وكل آها... معاها خطوه... وتانى خطوه...وتانى آها.. وبعد خطوه....
(ورووب كك روووب) الحلوة جوه البلاعه .
شعرت بألم فظيع فى الأنكل لما شفت أنكل الحميله بينزف بس قلت فى سرى مافى مشكله طالما انها ماحاترفع كورنر ولا عندها نيه تشوت فى مرمى جمعه جينارو.... المهم سلامة الشاسى.... وهو شاسى نصاح ... البت ما مصبوبه فى فالب حبوبتى سعيده...
الله يرحم جدى المحظوظ ود المحظوظه .
مافى زول مد يد المساعده.الناس ماشه زى ما قالت الأنقاذ.
... نهاراً نركض ناكل بوش ونرش الحوش ونرجع نرقد...
قام اخوك ياالسمحه متحزم ومتلزم جارى على السماحه المجدوعه دى... قلت امكن تبقى الشهامه صداقه ... وتبقى الصداقه قرابه ونكسب الودين.
وعلى قدر الشوق ما يمد.. مديت يدى... وعينكم ماتشوف الا النور .
قامت البت تردح..
...... القال ليك تمسكنى منو؟ ماتبطل خفة الرجال الكبار دى...
هسه ماخجلان من شيبك الشين دا؟ ياضقل يامعوج ياباقى الضلع..
....... يابت الناس انا عايز اساعدك.
...... تساعد منو بى بنطلونك الداقى سيستم دا؟
أمشى شوف ليك شغله يامان وأعمل ليك أستايل.
إتلفتا يمين وشمال بحثاً عن المساعده ...
مافى زول هببو لى.....
فجأة ظهر شاب طويل مفتل لابس قميص فوق صرتو وقف جنبى وقال لى :
....... واحد صفر يامان.
....... قلت فى نفسى برضو احسن من 2\0 وفليق الحكم.
جات حاجه عجوزة وقفت وغزت كوعا وقالت لى بذعل:
...... هسه لو وفرت مروتك وشلت لى القفه دى مش كان أحسن من المرمطه ؟ وللا شفت الفرسه النضيفه دى قمت تتكبكب... ومشت قبل ماأرد.
صاحب رقشه وقف وقال لى :
........ يافرده قوم جارى الطاره مدردق عليك.
واحدة وداعيه قالت لى:
........ دى عين والله تعال اشرب القهوة وارمى بياضك النشوف الحاصل ليك شنو ياود أمى.
موظف قديم عاين لى بإذدراء وتمتم: يعنى هى براها الواقعه فى بلاعه؟
وأحد من الرفاق وقف إتآمل الموقف وبعد تحليل دقيق قال لى:
...... أسف الموقف دا خارج النظريه.
شيخ من أنصار السنه وقف يخطب:
.......هذا رجس من عمل الشيطان.. ياعبد الله... تختلى بإمرأة فى جوف الأرض! وأنتم ياعباد الله كيف ترضون ذلك؟ أليس فيكم رجل رشيد؟
...... وأحد شماسى رد عليهو : ياعمك فكنا من المكنه دى الجكسويه فحطت قبيل فى التوسان دييييك.
نظرت للتوسان... ام شاسى نايمه فى كتف صاحب التوسان تتبسم وانا قاعد فى البلاعه.
( المهندس صلاح سالم محمد سعيد)
|
Post: #2
Title: Re: شوف جنس البذار دا....... هسه دى بيرموها؟؟
Author: رشا سالم
Date: 04-14-2014, 08:27 AM
Parent: #1
هههههههههههههههههه
دي سمحة شديد
|
|