عذيقها المرجب وجذيلها المحكك/ صلاح سعيد

........ .....

...... مهند ونور.....

دخلت المستشفى منطط عيونى ولسانى يلهج بالدعاء لصديقى العريس والأسئله تتراقص فى رأسى بعد ان علمت أنه تعرض لحادث وهو فى طريقه للفندق لقضاء شهر العسل.
وكعادة اهلنا السودانيين الطيبين وجدت حشود من الجيران و اهل العريس والعروس جوار غرفة العنايه المكثفه يدعون الله سراً وجهراً لصديقى المصاب.
حاولت الأقتراب أكثر من اهل الوجعه والمكابرين لعلى أعلم ملابسات الحادث ووضع العروس الصحى ولكنى لم احصل على اى معلومه بين الوجوه المترقبه المتجهمه .
عندها توجهت مباشرة الى والد العريس.
...... أنشاالله كفاره ياحاج

...... كفر الله سيئاتك ياولدى

...... انشاالله بسيطه

...... هى لو كانت بسيطه كنا وصلنا الأنعاش ياولدى يس ربنا يستر

...... انشالله العروس ما عندها عوجه؟

...... أهى ديك واقفه زى الشيطان .
قالها بغضب شديد وهو ينظر شذراً ناحية العروس.

أختلست النظر بطريقه دياميه كرباويه ناحية العروس بيضاء بغير سوء , مربوعه ,مدغلبه تزن أكثر من 80 كيلو بقليل لو كانت عضاما دقاق , مصابه بقطع عرضى أعلى الحاجب الايسر وكدمه بسيطه ناحية اعلى الجبهه .

خزنت المعلومات السابقه سريعاً ثم وجهت وجهى ناحية أبو العريس لكى أسأل السؤال المفصلى.

...... أها الحادث دا حصل وين وكيف؟ فبل أن أتلقى الأجابه كان أبو العريس قد سبقنى لأستقبال بعض المكابرين الجدد.
هنا تحفزت كل قرون الاستشعار الشماريه بداخلى وتحركت الى المنطقه المظلمه خلف ام العريس وملت نحوها بزاويه منفرجه حتى تكون كلماتها فى خط مستقيم جهة أذنى اليمنى.
..... بالله دا كان لذومو شنو؟ كان ماقلة أدب بنات أخر زمن؟ ماترانا ولدنا وليداتنا ديل كلهم وربيناهم حصل يوم عملنا جنس الخمج دا !!!
هنا تيقنت أن الجمله القادمه تحمل جميع الأجابات التى أبحث عنها ولكن أخت العريس خيبت أمالى عندما همست لامها
...... هسه ياأمى دا وفتو؟ الناس فى شنو وأنتى فى شنو؟ كدى خلينا نطمئن عليهو فى الأول وبعدين قولى العايزاهو.
كدت ان أخنق أخت العريس بعيونى ولكنى ابتعدت عندما أمرتنى عينها الغاضبه بالأبتعاد من قفا النسوان.
تحركت حركه جمباوبه فى اتجاه العروس وامها وابوها المنعزلين عن الجميع... عسى ان أت بقيس من الشمار أو شئ من هدى .

...... دا كلو منك قاعد تدلع فيها لمن وشنا بقى زى السمسمه قدام الناس.
......ياوليه أخجلى منى انا ؟ وللا من المسلسلات التركيه الفاتحاها لى بناتك الليل والنهار عامله راسك القدر اللدايه دا.
...... هو لو ما المسلسلات دى كنت صبرت على العيشه معاك يالمسيخ الممصمص عديم الرومانسيه.
....... الرومانسيه !!!؟ الله يرحم ابوك الكان بياكل الأيسكريم يالعيش ... يا وليه ماحرام عليك توصى بتك القدر البقره دى تشترط على ود الناس يشيلا من الريسبشن لحدى غرفة النوم!!! أها رماها ليك على وشها ووقع المسكين كسر تلاته ضلع وشقا حوضو .

..... والله ياأبوى انا ماإشترطت عليهو يشيلنى بس مديت ليهو يدى قام قال لى انا جذيلها الشنو كده مابعرف وحاجه كده المحكك وقام شالنى واريتو ماشالنى.

..... والله بتى ماتقيله هو براهو المرخرخ ماتراهو مهند لابى نور 290 حلقه شفتو وقع فد يوم.

...... طيب يافصيحه جاء الدور عليك انتى وبتك نور تلبوا الجذيل المرخرخ دا سته شهور لحدى مايفكوا منو الجبص