خيبة أمل بقلم الأستاذة عفاف محمد عدنان – برلين – ألمانيا الإتحادية

خيبة أمل
بقلم الأستاذة عفاف محمد عدنان – برلين – ألمانيا الإتحادية

خلاص نقنع ..؟؟
نكسر كل أقلامنا ...نقطع باقى أوراقنا
نسلم روحنا للشيطان ...عشان يشبع ..
خلاص نقنع ؟؟
وننكر نظرة محزونة ...بتسأل عن رغيف وعلاج
بتسأل عن حقوق مهضومة ...ما بترجع...
عيون إغتالوا آمالا ....
خلاص نقنع ..؟
نكتل فرحة العشمان ...وما نفكر فى أى خلاص..
وننسى وجوه ...خلاص مات الأمل فيها
أمل بظهر جلى ولامع ...نطمسو بالخنوع والذل
عيون شفع ...خلاص نقنع ؟؟
نبطل فرجة فى الماضى ..بعد ما كنا معروفين
كرامتنا ومعزتنا ...لأ بتنقاس ولا بتنداس
بقينا اليوم نطاطى الراس ..
نسلم روحنا لى ناسا...ولا بتشوف ولا بتسمع ..
لا بتحمد ولا بتشبع ....لا بتشكر ولا بتقنع ...
ناس ملهية فى روحا ..
بتسرق حتى أحلامنا
... وتكسر كل مقاديفنا
عشان حبل الصبر نطويهو ويتقطع
عشان نركع؟ ...خلاص نقنع ؟؟
لا يا أوباش ...... ده ما بينفع
وراكم ...بى وراكم جد ...
حتبقى خطانا بس ....أسرع
وسوط صوتنا بنزيده وجع
وتتقفاك أنفاسنا وراك تتبع
ومابنرجع
وراك زي قدر مستعحل
كمان أسرع.......
وراك لما الظلام ده يزول ....
نبدده تب
لغاية ما الشمس تطلع
ووقتها مافي شيْ يشفع
تضوق الويل ... وكل الويل
الجرعتو أولادنا ... كمان أفظع