رسالة من جنجويدي زهجان للسادة الأمريكان

رسالة من جنجويدي زهجان للسادة الأمريكان
مشهد : حوار في منزل بسقف بلدي .
* أنت يا الشين الخبر شنو ؟ ! قالوا الأمم المتحدة وأمريكا والبريطانيين قالوا أهلنا كلهم جنجويد وقالت أن العرب دايرين يكتلو كل الزرقة فى دارفور ؟! وقالوا بعذبوهم ويخطفوهم!
* الشين : أنت عارف يا آدم أمريكا دايرة تعذب الناس في أبو غريب وتسلخهم أحياء وتحرقهم بالكهرباء وتقطع ( . . . . ) وناس العدل والمساواة في الغرب دايرين يعملوا نفس الشي ويتهمونا بيه ! أنت عارف أخر أخبار البلد الجابها لي ( أب كوافيت ) شنو ؟ ! كلام فظيع جداً يا آدم ..!
* قال موسي مختار عمل ليهو ( أبو غريب ) في ( مزبد ) وقال للمتمردين سلموني أي ( رويعي ) تقبضوه ، والكلام دا حتي الخواجات بعرفوه . . . والحبشي عبد القادر حمدان البشتغل للألمان زار السجن وقعد فيهو أيام وبعدها لاقى الأمريكان في هوبلي والطينة التشادية .
* آدم : لا حول ولا قوة إلا بالله . . أعوذ بالله ! . أنت الصحفيين ديل ما بجيبوا صور من أبو غريب دا بدل ما يجيبوا بتاع العراق . . أسمع يالشين قول لي ( أب كوافيت ) يجيب لي صور أن شاء الله بملايين الجنيهات أنا بدفعها !
* الشين : القروش في يا آدم وعندي ليك خبراً سمح بالحيل ، ناس أبوبكر حامد بتاعين الشعبي إضاربوا في بعضهم وقتلوا عيسي رابح في كمين وتلاتة من أهلو وطفر منهم ولد يقولوا ليهو هارون ومعاهو شنطة ( 200) ألف دولار شلناها منو وشرحناهو . . قال بدور يرجع كالقو !
* آدم : ول .. ول .. ول أنت ناس التمرد ديل بجيبوا القروش من وين ؟ ! ( 200) ألف دولار .. دي عليك الله بالسوداني كم ؟ !
* الشين : بالسوداني كم ؟ ! أنت حالتك يا آدم متعلم مهندس وفاهم ، نحن ما دايرين نشتغل بيها في السودان دايرين نضرب بيها الأمريكان عديل !
* آدم : أي والله الكلام داك القلنا تعملوا وما لقينا ليهو قروش !
* الشين : القروش دي جابوها ناس التمرد من ألمانيا . . قالوا في كنيسة أسمها ( الأنجلفكانية ) ولا ( الفنجكالية ) .. أصبر .. أصبر اسمها كاتبوا عندي في ورقة ؛! (ويخرج الشين ورقة مطبقة جيداً من كيس صغير ويقرأ فيها : الكنيسة ( الفنجل – كانية ) الألمانية وكنيسة ( سماريتا ) قسموا دعم بأوامر من وزير الدولة بالخارجية في 23/ نوفمبر / 2003 .. وقدره ( 12) مليون دولار .!
* آدم : والله أنتو ما جنجويد مغفلين ساكت بقيتوا مخابرات عديل ! الكلام دا لقيتو وين ؟!
* الشين : ال(12) مليون دولار كلها عند ( على الحاج ) و( عبد القادر حمدان ) والأولاد بتاعين التمرد في أوربا .. وقالوا ناس الشعبي ماعندهم فيها ولا شي ، حتي المحبوب عبد السلام زول ناس الشعبي في لندن قالوا ما بنديهو .. اليمشي لأهلو الجلابة ، وفي النهاية المحبوب ضرب تلفون لأصحابوا القدام في الحكومة وكلمهم بأي حاجة ورسلوا ليهو (15) ألف دولار مصاريف ليهو ولي نفرين من ناس الشعبي في لندن وواحد في جنيف !
* آدم : إنت يالشين ناس أبوبكر حامد ديل ما كانوا إخوان مسلمين لكن صحي .. الضاق لقمة السعر ما بخليها ! الناس ديل قلبوا مع الكفار عديل !
* الشين : يا باشمهندس كدي النشوف شغلنا الفات مات والليلة الحكومة دي ما عندها أي علاقة بيننا وقبال أسبوع التمرد ( ختف ) قريب الاربعين ولد وبت من ( زيد الوجع ) والحلال الجنبها والحكومة ما عملت لينا أي حاجة ! والتمرد ( ختف ) التلاتين راعي من العرب ودخل بيهم وادي هور وناس قالوا فايت بيهم لأبوغريب بتاع موسي مختار !
* آدم : كان كدي نمشي نداوس جوة ونخلي القعاد هنا ! نحن ما رجال والله كان قعدنا ! * الشين : تمشي كيف ووين .. الحكومة ذاتها ما بتخليك .. نحن دايرين شغل جديد !
* آدم : أكان علي الشغل الجديد نبدأ فيهو طوالي !! ال(200) ألف دولار وين ؟! إن شاء الله جبتها معاك !
* الشين : ال(200) ألف دولار معاي في شنطة الحديد دي ..تسمع في حسك ، أفتحها وشوفها كان داير ..( آدم يذهب ويفتح الشنطة ويقلب النقود !)
* آدم : تمام .. القروش دي حا نوديها لي عطوة في أمريكا ولي عبد الحميد في استراليا ولي مبيوع في أثينا ونقول ليهو شوف ليك أي طريقة خش بيها لي ( إيطاليا )!
* الشين : وناس لندن حيدوهم منو ؟!
* آدم : ناس لندن ولا دايرين منهم أي حاجة .. بس ينقشوا لينا من التمرد ويكشفوا كل الأسرار والعلاقات مع المخابرات الألمانية والأمريكية و يصوراو لينا أبو غريب وإن شاء الله نديهم نص المبلغ ، نوصلوا ليهم بي طريق مبيوع وبعد كدا الحكومة السودانية حاتديهم بي طريقتها .. ما عندنا شغلة بيهم !
* الشين : والقروش دي تمشي برة السودان كيف ؟!
* آدم : كيف ..؟! ( الحياة دروبها وساع ) يالشين !! ( بتاً بي الله ) نطلعها بي أرتريا العاجباهم دي زاتها ! وأولاد الحلال كتار ، ومن ارتريا تمشي القروش لأمريكا وأستراليا وأثيوبيا !
* آدم : ( يعتدل في جلستة ويتحدث في خطة العمل ) :
* عطوة في أمريكا بعرف الحركة الانفصالية بتاعت ولاية تكساس ! في واحد منهم طلع من السجن وعمل فيها مجنون لكنه عاقل وأنصح مني ومنك !
* الحركة دي يا الشين عندها مطالب من سنة 1812إنو تكساس جمهورية مستقلة عن أمريكا ومن سنة 1812 أعدت لي نفسها ميثاق وبرنامج عمل لكن الحكومة لعبتها صاح واشترتهم واحد . . . واحد ، والما قدرت تشتريهم سجنتو وكتلتو في السجن !
* في 1995 ظهرت الحركة للمرة الثانية وطالبت بتقرير المصير وكونت حزب سياسي سري وحددت سنة 2005م لأعلان الظهور . . كل الحانعملوا . أنو نديهم ( 40) ألف دولار مقابل تعجيل الاعلان ونقول ليهم ( 60 ألف دولار ) بعد الاعلان للوقت داك الله كريم والموجوعين من أمريكا كتار !
* وندي ( 10 ) ألف دولار لثلاثة صحفين (2) في الجرائد وواحد في القضائية بتاعت فوكس او أي واحد عشان ( يريح ) اخبارهم لمدة شهر ونشتغل مع الامريكان بنفس طريقتهم ، أنت عارف يا آدم أنو الناس ديل بدفعوا دفع تقيل للأمم المتحدة والفضائيات والجرائد في موضوع دارفور عشان يجرجروا حكومة السودان لتنازلات تانية .. لأنوا موضوع السلام في الجنوب الحكومة نجحت فيهو !
* ال(50) ألف دولار التانية برضو ما حاتمرق من الشغل في أمريكا وكندا كمان ،
* أولاً مقاطعة كويبك الكندية عندها استفتاء للانفصال عن كندا سنة (2006) لازم ندفع لمراكز استطلاع رأي عام عشان تعمل استطلاعات مستعجلة تقول فيها إنو الاستفتاء حيكون لمصلحة الانفصال .. والكلام دا حيكيف الفرنسيين جداً .. إنت عارف طبعاً مقاطعة كويبك أصلاً فرنسية وكل الفيها من جذور فرنسية واللغة الاولي فيها فرنسية .. ومواقف الولاية السياسية مع فرنسا.!
* وتاني لازم ندعم أنصار البيئة في ( ألسكا ) عشان يعملوا اعتصام من أجل أيقاف التنقيب عن النفط لأنو في القانون الامريكي ألسكا كلها محمية طبيعية !
* ولازم تجيب بتاعين ( البيئة ) من النوع المتطرف والمنظمات الارهابية المتسببة في حرق المجمعات السكنية حول المحميات في البحيرات العظمي ناس البيئة بتاعين السخانة والإشتباكات !
* أمريكا عندها إرهابيين أمريكان وممكن نسوطها من جوة بالدولار بس. لغاية ما عمكم بن لأدن زاتو يحتار وراسو يضرب أو يقول ديل منو ياربي ؟!
* والله يا الشين لو عندى مليون دولار كنت حا اشتري صور الفيديو بتاعت تعذيب السود في سجون كلفورنيا وادفع للمحطات كلها عشان تنشرها ! وكان مانشرتها .. العالم دا مفتوح وقنوات أوربا موجودة !
* يا اخوي أمريكا دي كان ما فيها ( شق ) ما بتقول ( طق ) .. وحسع امريكا قالت ( كع ) عديل موش (طق) !
* فضلت (100) ألف دولار جزء منها يمشي لاستراليا لدعم حزب الاستقلال الاسترالي اعلامياً ومادياً لأنو الحزب دا بيفتكر إنواستراليا عندها مقومات تطور أكثر من امريكا وبريطانيا ويرى انو استراليا ممكن تشق عصا الطاعة الأمريكية وتتحالف مع شرق آسيا والدول البترولية وتعمل حلف عسكري مع أوربا والناس الفضلوا من عدم الانحياز ! والشغل دا كلو عارفو عبد المجيد لأنو قاعد في استراليا ومعرس استرالية من الحزب نفسه .
* ( مبيوع ) يخشي إيطاليا ويبتدي لينا علاقة مع المافيا !
* الشين : عمليات اغتيال ؟ !
* آدم : اغتيال شنو يالشين ! هو الموت دا إلا بالقتل ! أنت ممكن تقتل الزول اعلامياً وتحرقوا سياسياً !
* آدم : ناس المافيا يساعدونا في الدخول للجرائد والفضائيات ويساعدونا على تهريب اشرطة الفيديو والقروش وسرقة الملفات .. حتي القرصنة في الكمبيوتر يساعدونا عليها ! عشان لو لقينا قروش نكون جاهزين !
* الشين : هلا .. هلا يا آدم الدواس حلاتو بالغبينة ، أمريكا دي بدور تحرق أهلنا في دارفور وتمرق سالمة ؟، والله إلا كان نعمل ليها جنجويد فرع واشنطن وخلي ناس الكونجرس يدوا ناس الزرقة عضوية معاهم في المجلس !
* آدم : يالشين نبدأ من حسع موش بكرة أنا بمرق اشوف محمود طاهر عشان أسافر في أول طيارة لي ارتريا بجوازي التشادي واعمل التحويلات هناك وقول لي لأب كوافيت ، كتر لينا من دولارات التمرد عشان يفهمو حاجة !
عبد الله موسى عجبنا
الخرطوم
6/5/2004
[email protected]