آيه طـفلتي....زوجـه!

هذا البوست أفتحه مواصله لبوست مني عوض خـوجلي حـبوبه..والذي فتحه أخي وزميلي
العزيز علي عبـد الرحيم..نسأل الله له كـل الشفاء..بعـد ان تم عقـد قران آيه ابنتي..

سأرد هنا علي كل من جاءني مهنئا.. ولم يمكنني الوقت من الرد علي تهنئتهم العزيزه
قبل ذهاب البوسـت الي الأرشيف..

كل سـنه وانتو طـيبين..

مني

الاستاذة منى
تحياتى
والف مبروك لى ايه وبيت مال وعيال

Quote: الاستاذة منى تحياتى والف مبروك لى ايه وبيت مال وعيال

نهنئك ان شـاء الله بكل مايفرحـك ..

الليل أنا وآيه اتقابلنا بعـد أربعه أيام في ورشـه عمل..

قلت ليها ياحبيبتي انتي واحشاني موت ..ردت لي بإنها كمان مشتاقه لي..
وزادت ..ماما أنا بحبك كتير..

كـلما اتصلت بآيه وكلما اتصلت هي بي..تسابقت الأسئله ووصلت لطرف لساني..
الا انني الجم الكثير منها..فآية كبرت وصـارت لها حياه لها قـدسية خـصـوصيتها..
أنهي حـديثي معهاقائله

I love you habibti, please remember I am here for you
whenever you need me

شـكرا أخي وليـد 500 أقـدر جـدا حضـورك هنا للتهنئه..

مني

الأخت منى

سلاماً من الله عليك

الف مبروك وجعلها الله زوجة صالحة كما امها حفظها الله

خالص الود...

سلامات
وعوافي
الاخت العزيزة ..
مني ..
وها الاعوام طوت "صحائف احزانها" واقترب مهرجان الحصاد "والاشجار القوية تستعد لموسم الثمار" كل قد تلفحت بثوب كفاحها ..
كل زهرة توشحت بالعبير .. كل نسمة توجهت بالعديل والزين ..
الف مبروك لي آية .. وربنا يجعل حياتها كلها سعادة وافراح ..
ممتن لافراحك يامني ..

تسلم ود رمليه وعقبال مانفرح معاك بفرحـك..

تذكرني كلمة الحصـاد بمشـوار عمرنا آيه وانا ونومها في صـدري وايقاظي لها وانا أغني
لها لتستيقظ.. ثم كلماتهاالنعسانه تخرج حـرفها في كسل فتقول.. ماما ممكن أنوم شـويه
كمان?
أحـن عليها وأكره المدارس..فيها ايه لو عملوها من عشرة ونص بـدل 9 ??!!
تذكرني كلمة الحصـاد بشنطه بنيه ومعاهازمزمية..وفي القـدم حـذاء صغير كثيرا ما
احتضنته في حب رغم الطـين الذي يلصق فيه..فقط لأن حبيبتي ترتديه..

حصاد عمر فيه فسحه لجنينة الحيوان.. وقراءة قصه قبل النوم.. وذهاب للسينما.. وغسيل
شعر وحمام قبل النوم..فيه ماما بطـني بتوجـعني.. وماما أنا جـعانه..وماما انا بحبك..

آيه كبرت واتزوجـت!

يسعـدك ربنا في حياتك يابنت قلبي وكبدي..

ويسعدك ويديك الفي مرادك كله ياود رمليه

وجـعل الله أيامك كلها فرحـه وسـرور

سـألت آيه ان كانت تحتاج شيئا..
ردت بلا وتبعتا بشـكرا ماما..
هي وبودي عايزين يعملوا حاجاتهم بطـريقتهم..
ربنا يوفقهم ويسعـدهم..

ويسعـدك انت كما أخي مجاهد عبدالله ..

شـكرا علي تهنئتك المفرحـة..

من أمس بدأت اجازات الأعياد..

في كل عيـد نحتفل آيه وانا بمقدم الأعياد..الإستعداد للأعياد فرح..
والفرح ان لم يأت من نفسه نصـنعه نحن...

أحتفل بالأعياد هذه السنه بشـكل مختلف..تختفي تفاصيل الاستعدادت بشكلها القـديم...
احتفظ أنا ببعضها لنفسي..وبعضها لآية وبودي ونفسي ..

ونصنع احتفالات من شكل آخـر..صغير ومرح كعمرهما..

شـكرا أخي تهنئتك تعني لي الكثير ولقد أسعـدتنا تماما

Quote: وان شاء الله تلقي عروس زي آية تقول ليك ماعايزة مهر ولا شيلة...

Quote: ما شاء الله عليها...ربنا يحفظها الف الف مبروك وربنا يبارك عليهم عبد المطلب خضر عبد المطلب

شـكرا ياعبـد المطلب ود جـعفر عبـد المطلب..

الليله مشينا كلنا..أخـواتي ومجـدي وأنا لآيه..
فتحوا لينا الباب ..ومعاه انفتح باب من مشاعر حلوة ماليها أول ولا آخر..
الإتنين حـلوين شـديد.... ربي يحفظهم ويسعـدهم..

آيه ورتني حاجات اشترتها من السوق وكـانت فرحانه بيها جـدا..
حاجات مافيها دهب ولا من محلات غاليه..لكن كانت مفرحاها..
أنا كمان فرحت معاها..

ربنا يبارك فيك ياعبـد المطلب ويديك الفي مرادك ...

Quote: (وان شاء الله تلقي عروس زي آية تقول ليك ماعايزة مهر ولا شيلة...)

Quote: (طـبعا آية متحجبة..والفسـتان شـوية قصـير)

Quote: معليش يا منى,أخوك برلوم فى المنبر , وما بعرف أعمل الحركة بتاعة (َQuote) دى. كل ما أعملها يجينى الكلام بلغة هيروغليفية! عشان كدة كلامك ده عملت ليه نسخcopy-paste المهم:ما عندك آية تانية؟ أو حتى لو نستنسخ الموجودة! بنت بالمواصفات الذكرتيها دى ما بتتلقى بى هينة, خاصة قصة الشيلة دى! وكمان أمها منى! مباركات مليونية وتحياتى. عزان سعيد

تسلم كتير عـزان..متأكـده في كتير زي آيه الجميله..بس!!

حقيقي موضـوع الزواج لا يحتاج لكل المصاريف التي تطلب من اسرة العروسـة او العريس!
وقضيه شـراء ملابس للزواج قضيه خـاصه للغايه... ولا يعني احضارها في حقائب بالسبة لي
الا شكل من التباهي الذي لا معني له!!

وهذا لا يعني بأي حال انني ضـد شراء ملابس هـديه للعروسه.. بل يعني انه ان كان في امكانيه
شـراء فانها يجب ان تؤدي بهدوء ودون مبالغه حـتي لا تنتشر مثل هـذه الممارسات وتسود وتصير
هي المقياس لجودة ماركة الزوج!

وربما ناقشنا معا مثل هـذه الأشياء في بوست آخـر..

كـل سنه وانت طـيب عزان ..وأسعدتني جـدا مباركتك..

مرحب بيك أخي برسـي..

أول مرة أبقي نسيبة..والحمـدلله زوج آيه مابيعرف عربي علشان يضحك من وراي ويستبـدل نسيبة "بمصيبه"!!

قررت أن أنظر لنفسي بعين الرضا اليوم من باب التغيير!
يعني مثلا.. كان ممكن أكون زي ناس غيري كتيره..وأقـول بتي لازم يجيبوا ليها كـده وكده..
وهي ما اقل من فلانه.. بالعكس أحـسن من فلانه.
.
أو علي الأقل من زمان اربيها علي انه الواحدة لازم عريسها يقدرها بالمال!
لم أفعل..شـخصيتي وتربيتي ذاتها لم تكن كذلك .. ولم يحـدث علي الاطلاق في حياتي أو حياة
اخـواتي ان تدخل ابي او امي في المهر وماشابه.. بالنسبة لي ..لا مهر ولا دهب الا ماكان
رمزا صغيرا.. ولا شيله كالدكان..

فكيف اطـالب ابنتي بأشياء لم أفعلها?

ياواخـد القرد علي ماله..يروح المال ويفضل القرد علي حاله!

لكن برضه في رأيي نعمل حسابنا قدر مابنقدر علشان ماناخـد قرد من جميع الوجوه!

شـكرا أخي ابراهيم برسي ..تهنئتك أسعـدتنا كثيرا..

الشقيقة منى وطفلتها الزوجة
هكذا حال الأم يا شقيتى
مهما نكبر وتجرى بنا السنين
سنظل أطفالا فى عيونها
أمنياتى الصادقة لها بحياة زوجية سعيدة
تحياتى لك ولها

الاخت العزيزة منى

سلامات

والف مبروك للابنة العروس اية بزواج سعيد
وبالرفاء والبنين.

هشام هباني

أهلا هشام هباني كيف حـالك انت?

نفسي في فرح كبير ياهشام يلم سـودانيز أونلاين دي كلها..نفرح فيه باولادنامع بعض..
طـبعا يكون في السودان!

شـكرا كبيرة علي تهنئتك..ربنا يفرحـك بأولادك ويخليكم لبعض ..

كـلامك صح يا ياسر أخـوي..

الليلة الكريسماس..زمان كان آية تقعـد تفتح الهدايا.. ونتفرج سـوا علي الافلام..
ولما يقرب العيـد نمشي السوق نتسوق مع بعض... نتشاكل ونتصالح في السوق..هي تكون
عايزه حـاجة أنا شايفاها مامناسبة..ولا انا تعبت وهي لسه..وفجـأة ألقاها عروسة!
أيام بتجري من عمرنا ياياسر..

ربنا يسعـدك..وتجينا يوم تكلمنا بأفراحك وازغرد ليك زغـرودة طـويلة..

Quote: مبروك الى ابنتكم آيه و ربنا يسعدها و..نسأل الله عاجل الشفاء الى الزميل الكريم علي عبد الرحيم

متشكرة جدا علي المباركات أخي مبارك كنه ..ويارب يجي يوم قريب نسمع فيه بمناسبة
مفرحـاك ونجي نهنيك بيها..

وكمان ربنا يشفي علي الراجل الضاحك ويقومه طـيب لنفسه واسرته واحبابه..آمين..

الزواج في سن صغيرة له جوانب سلبية وله جـوانب اخري ايجابية جميله ..
السلبيه تكمن في احتمال تعطيل تأكيد الذات العملية والطموحات والنضج بشكل عام..
الايجابية تكمن في ان تحقيق رغبة الفرد وتقسيمه لأولوياته حسب مايرغب هـو تحقيق أيضا
للطموح..ومن التجربه يستطيع ان يقرر ثم ماذا بعـد..

وفي عالم يري في سـيره الصاروخي ان الزواج لم يعد سببا لعيش الرجـل مع المرأه سـويا..
تصبح رغبة من هي في الثامنه عشر ومن يماثلها عمرا في الزواج.. رغبة تحتاج للدعم وتقديم
التسهيلات الممكنه..حتي ونحن نفضل تأجيلها لسن أكبر!

تحياتي وتقديري لك..

يا مني يا بت عوض خوجلي
يعني هسع كبرت اية والله عجزنا نحن؟
لأني ما قادر اصدق انو اسم اية يجي بعدها كلمة زوجة!

مبروك من كل قلبي يا مني
ومن ربت مثل اية يحق لها النوم ملئ جفونها
ووتحية خاصة لاية وزوجهاواخري لمحبوبتي الحاجة جارة

خال اية
شمس الدين السنوسي

نوم شـنو ياشمس الدين أخوي?

جبت ليك بني آدم في الدنيا دي تنسي الراحة تماما!

لو معاك في البيت تقلق..لو طلعوا تقلق..اها كيف يبقي الحال لو مشوا في بيت تاني?
صحيح أنا بعرفها هي كويس.. لكن ما بعرفه هو كويس زيها!

اول امس جاتني مس كول من آيه الصباح بدري شـديد..ماطـبيعتها تعمل مس كول..ولا تضرب
6 صباحا..خلاص انا قلت في مصيبة!
قعـدت اضرب تلفونها يدخل في الأنسر مشين ..وبودي زوجها تلفونه قافله!
خلاص انا اتجننت وضغطي هبط والشيطان ابتدا يلعب بي..

ياربي حصل ليها حاجه?
يكونو اتشاكلوا?
إمكن قتلها?

وكل مايطلع سؤال زي ده في راسي أضرب تاني والقي الحال ياهو نفس الحال..
لغاية ماسيادتها صحت من النوم في الضهر..واتضـح انها داست الزرار وهي نايمة.. وطـبعا
خاتاه في السايلانت..

أنا ما ارتحت الا بعد ما مشيت ليها بالليل في بيتها وشفتهم الإتنين!

ياحليل الراحه..

تسلم شمس الدين لكن بت اختك اتزوجت فعلا..

أمـك جـارة في الخرطـوم كلمتها بالتلفون بسلامك..وبتسلم عليك كتير

آية بنت الربيع عروسة؟!
يا الف الف مبروك،،
كيف انا ما شفت الكلام ده؟
بي الهناء و المحبة يعيشو،،

شكلي متلومة لوم شديد!
كيف ما مرّ علي بوست زي ده؟

خالتو مني لك العتبي،،
و الفرح الكبير يعم الجميع،،
ليها بوسة فرحة،،

خالتو مني لك العتبي،،
و الفرح الكبير يعم الجميع،،
ليها بوسة فرحة،،



تصـدقي سـوميتا حبيبتي آية بقت زوجـة?!

قابلتنا في باب شـقتها وهي ترتدي جينز وبلوفر..
بـدت لي أجمل من أي وقت سابق..
شـعرهاالبني منسـدل علي كتفيها وفي وجهها يشـع نور الدنيا كله..
قلت لها..

انتي جميلة خالص حبيبتي..

ردت في فرح وخجل..

شـكرا مامي!

أفتقدها كثيرا واتذكر لحظات "تـدللها علي" ..احن كثيرا لتلك التفاصيل
الغارقة في الفرح...وأشتاق لجلستها بجانبي..إحتلالها لأشيائي..ثم قبلاتها
التي يعقبها طـلب منها!

تسـلمي حـبيبتي سـوميتا..وعقبال مايتحقق ليك كـل البتتمنيه..

ماما مني

الغالية منى خوجلي
سلامي وإحترامي

مبروووووووووووووووووووووك زواج الأمورة آية
وربنا يسعدها مع زوجها ويسعدك إنتي بهما الإتنين

الغريبة أول يوم أقرأ البوست دا
وفرحت فرحت فرحت شديد

تحياتي ليك يا الغالية

الاخت / منى خوجلى
الف الف مبروك وانشاء الله بيت مال وعيال

احمــد خضــر

مبرررررررووووووووك
الغالية مــنـى
يازولة ما كبرنا وبقينا جلاكين
( عايز اعمل فيها دفعتك وكده)
الف الف الف مبروك وتم الأفراح بالخير
وتكون بخيته عليهووبخيت عليها
والوا العالم بالزرية الصالحة ومبدعة
وتمتد افراحكم طول العمر
مودتي

السني عوض خـوجلي..

ولما يجي العيـد بيتغير الفسـتان أبو كرانيش...
والشراب الملون والحـذاء ابو فيونكة..
توك الشعر الفراشات..
وضفاير الشعر الطويلة..

كـله بيتغير .. لأنه آية كبرت واتزوجـت..

لكن حـبي ليها مااتغير..ولا شـوقي ليها..
وهي دائما في خيالي زي طعم اللبن الرضعته من صـدري عندها..
ولما اشتاق ليها واتذكر أصابع كفها الصغير وجميل..
بشوف معاه برضه أصابع جميلة لإمرأة جميلة مازالت طـفلة..

تسلم السني.. كـل سنة وانت واسرتك بخير..

Quote: الف الف مبروك وانشاء الله بيت مال وعيال

يبارك ليك خطـواتك ويسعـد أيامك وأيام من تحب....

أقول لما شـفت عبـد الرحيم.. قلت الزول ده كويتي ولا مصري ولا باكستاني?

ممكن بسهولة تنسبه لأي من الجنسيات دي..لكن بودي ما بيعرف ولا كلمه عربية غير ان شـاءالله
ونعم..يجلس امامك وبأدب شـديد..ولا يتحدث الا اذا سأل!!
ماذا يعمل وماذا يـدرس?
سـألناه من كل هـذه الأشياء..قالت لي أسرتي ان عـدم سـودانيته.. ليست سببا علي الرفض علي
الإطـلاق فهو مسلم وقـد حـسن اسلامه..كما انه يعمل ومسئول في تصرفاته ويسـتطيعوا أن يكملوا
تعليمهم معا..وكانت موافقة والدها أيضا ودعمه لهـذا الزواج من أول بدايةالفكره سبب لأن اغير
فكرتي ..
ومع إصرار آية أيضـا وافقت ... كانت تلك حياتها هي..وليس السـوداني دائما هو الأفضل..
وربما كانت فكرتي عن السوداني فكرة قديمة كماقيل لي ...

شـكرا علي تهنئتك لنا أخـي أحمـد خـدر

Quote: مبروووووووووووووووووووووك زواج الأمورة آية وربنا يسعدها مع زوجها ويسعدك إنتي بهما الإتنين

العزيز بـدرنا..منور دايما بيوتنا ..

عقبـال كـده أولادك مايفرحـوك ويفرحـونا بحتقيق النجاح في اي مجـال يختاروه لنفسهم..

وتصـبح قضية الخيارات محـور صراع بينا وبين ابناءنا..الا فيما نـدر..
وكلما بعـدنا من "الأنا" ومانريده من أبناءنا.. كلما تمكنا أن نخلق شـكل من التوازن في
علاقتنا بهم وبالتالي السعاده..السعاده التي أقصـدها هنا ليست في طـبلة او رقصة في حفلة
أو شكر الغير..بل في الرضاء بأننا قمنا بما يجب القيام به نحـوهم.. وفي رؤيتهم هم يسعون
لإنجاح خـياراتهم..

رغباتنا في شكل مستقبلنا العلمي..ثم الاجتماعي ربما كانا أكـبر محك في اختبارات الدنيا لنا..
عنـدما جـاء عبد الرحيم (بودي) الي منزلنا متقـدما لزواج بآيه..(كنت قـد قررت سلفا قبل
وصوله أن أرفضه) والسبب انه من جـنسية واصل محتلف!!
ضـاعت مني لحظتها كل أفكاري عن حـقوق البشر والتساوي بينهم..

ترددي الاساسي في كـل القصة صغر عمرهما..ثم جـنسيته التي جمعت ثلاثة اجناس مختلفة..ثم خـوفي
من مظهره الديني الشـديد..وأصبحت هذه القضية من أكثر النقط المحسوبه عليه.. خـاصة مع انتشار ظاهرة الأسلمة هنا التي تؤدي في أغلب وقتها الي انتشار الارهاب..

عبـدالرحيم كان قـد أشهر اسلامه حـوالي عامين قبل أن يقابل آيه..وهـذه من ناحية نقطـه تحسب له..أي انه اسلم من أجـل الإسـلام في حـد ذاته..

ماكان ومازال يخيفني في اسلامه هو عـدم قراءته للعربيه..من لم يقرأ كيف كان المجتمع العربي
ساعة نزول القرآن الكريم ..ويفهم عادات المجتمع آنذاك من مصار مختلفة وبالعربي الغير مترجم..
تضيع عليه كثير من الحقائق.. وقـد تغيب عنه بسبب الذين يـدعون أشياء في الإسـلام ويصـبغون عليه اللون الإرهابي..

أكمل في المساهمةالقادمة ..

تسلم بدرنا ويحفظـك الله لنفسك وأسرتك ولينا..

مبروك منى وربي يسعدهم
ويعيشوا زمان أحلى

الزيزة/منى خوجلي

تهانينا....

Quote: العزيزة/منى خوجلي تهانينا....

آيه حفظـها الله تعلمت ان تؤدي واجباتها تجاه اسرتها...
بعـد صـلاة العيـد مع زوجها وزيارة اسرته جاءت لمنزل الخليفة ثم زارت
خـالتها...
آية تذكرني بزوجات من أجيال تكبرها..تحرص علي السؤال وعلي المجاملة!

شـكرا الشفيع شوشتا علي تهنئتك..وكل سنة وانت طـيب...

مني

العزيزة منى
الف مبروك وربنا اسعدهم ويرزقهم زرية
صالحة......
وما تنسى توريها العصيدة والقراصة
بعملوها كيف

آية قالت عملت شعرية الليلة براها..
قلت ليها اشتريتي السمنة من وين?
قالت سمنه لشنو!

تكون عملتها بشنو ياعلي الحسن?
كل سنة وانت طيب..

خرجت يدي من قلبي تتلمس طريقها لوجهها الجميل..
قلت في شـوق ملهوف..
حبيبتي..وحشتيني!

ردت في صوت وديع..
وانت كمان ياماما وشحتيني..

هكذا ترهقني اشواقي لها..روحي ذات الثماني عشر ربيعا..

Quote: مبروك منى وربي يسعدهم ويعيشوا زمان أحلى

تمرا..ربنا يبارك فيك وفي أسرتك...

إن شاء الله ايام طيبة وهنية يا منى

وحياة سعيدة ومديدة لآية

وعقبال كل البنيات والوليدات

الأخت مني

جعله الله زواجا مباركا..تهانينا لك ولهما وللأسرة الكريمة ودعواتنا الصادقة لهما بدوام التوفيق....ألف مبروك

الزاكي عبد الله

مرحب الزاكي أخـوي.. يسعـدك الخالق وتفرح بأسرتك دايما..
أهـديك صـورة آية قبل.سنوات قليلة...

Quote: إن شاء الله ايام طيبة وهنية يا منى وحياة سعيدة ومديدة لآية

جـاء صوتها عبر الهاتف واضح النبرات متزن رغم طـفولته..
يبدو أنني قـد أصبحت طـفلتها!

سألتني في حنان بلهجة سـودانية حلوة..
كيفك أمي?

أهلا حبيبتي اناكويسة.. انت كيف?

الحمـد لله كويسين..

أسمعي أمي..أنا وعبـدالرحيم دايرين نعزمك سفر للسودان!

تعزموني كيف يعني مافاهمة?

نشتري ليك التذكرة هـدية..

أولادي حلوين موش?
شكرتهم وقلت ليهم بأقبل هـديتهم لما يتخرجـوا من الجامعة!

شكرا أبوذر بابكر..
أسعـدتني بوجودك الجميل..عقبال فرحك بأحبائك يارب >>

الف الف مبروك للابنة ايه يا مني وعقبال من تكوني حبوبة .. الله يديكم العافية ويحفظكم

Quote: الف الف مبروك للابنة ايه يا مني وعقبال من تكوني حبوبة .. الله يديكم العافية ويحفظكم

تولوس ...أبقي حبوبة دي انا ماعارفة تكون كيف بالنسبة لي..
أعتقـد اني "كإمرأة" أو ربما "أنثي" قد أخاف هذه التجربة خـاصة مع مفهومنا عن الحبوبة ..
وشكلها ومسئولياتها والتوقعات لهذه المسئوليات..

يعني مثلا اتخيل منظر آية جاياني كده بطفل حلو ودمه خفيف ...ولا حتي شين وبكاي..وقالت
ياماما عايزاك تربيه معاي انا عايزه أمشي الجامعة..
حقيقي أنا هأكون فرحانة جـدا بالبيبي ..
بس مالدرجـة اني أتحمل مسئوليته كاملة.. وخاصة والعياذ بالله لو كان طـفل بكاي زي مصطـفي
ولـد منال ...ده كان افقر عيل في الدنيا.....ومازال!

كمان أنا ماحافظة غير الحجاوي البتخوف..وهم ذاتهم حجـوتين بس..
يعني حبوبه فشنك..

بعدين الأهم من ده كله والأنا قاعدة من قبيل ألف وأدور ماعايزة اقوله..
كلمة حبوبة بتعجـز شـديـد!

تسلم تولوس .. ويارب أولادك يكبروا ناجحين ويكونوا ليك كل السعادة..

ألف مليون مبرووووووك أختي منى لزواج الإبنة آية
ما شاء الله يار يت كل الناس تعمل زيكم

حفظها الله وزوجها وبارك لهما وجمع بينهما في خير

ورقهما الذرية الصالحة البارّة

ألف ألف مبروك

وعقبال ما تفرحي بأحفادك عمراً طويلاً يتملأه الفرحة والهناء والسعادة والرخاء ورضوان من الله

تحياتي كمال

Quote: ألف مليون مبرووووووك أختي منى لزواج الإبنة آية ما شاء الله يار يت كل الناس تعمل زيكم

تتبارك أيامك وأعمالك أخي كمال (Frankly)..قول آمين

أنا طـبعا عارفة طـريقة آية في التعامل مع الحاجات.. وعارفة انها عنيدة اذا اصرت
علي حـاجة..علشان كده لما كانت بتعاند في حاجة.. كنت بعصلج في الأول.. وبعد شـويه بصهين..
بقول بكره براها تغير رأيها!

كتير كـانت بتغير رأيها الا في حاجتين ..

الحجاب والزواج..
لم أتدخل في الأول بمحاولة المنع ..كنت اخاف عليها فقط من التطرف في ارتداءه..كما اني كنت
اظن انها مرحلة قد تستمر بعدها في ارتداءه أو تتخلي عنه...فأكثرت من حـديثي معها عن الدين المعاملة وعن عاقبة التطـرف..

خليك معاناوإحنا بنكمل الكلام..

الف مبروك لي للابنة آية يا منى..
وربنا يجعلو عامر مودات..


البت دي موش قبل يومين انتي قتي وصلت 18 سنة..
طيب موش تصبروا تاني سنتين تلاتة..

بورتينا عديل كده..

شـكرا دكين علي التهنئة اللطيفة..

آية قالت عايزة تتزوج!
يابت الناس الكلام ده بدري عليه..

قالت لأ..هي عايزة تتزوج صغيرة وتجيب عيال كتار
تعملي بيهم شنو ياآية?
أحبهم

آيه جميلة بطريقتها الخاصة في التفكير...

تحسم اشيائها دون تردد..
وأري فيها قوه من شكل مختلف..أعتقـد ان نشأتها هنا مع خلفيتها الأسريه السودانية قد
أثر فيها..

Quote: بورتينا عديل كده..

عقبالك..لو بقيت زي آية مابتتردد.. بتتزوج وبتعيش كويس

Quote: ألف مبروك للعرسان...وإن شاء الله بيت مال وعيال...آمين Rashid Elhag

بعد زواج آية وذهابها للإقامة مع زوجها..أحسست ومازلت بفراغ عظـيم..

والإحساس هنا ليس نتيجة عـدم وجـودها معي فقط..بل نتيجـة معرفة ان آية مشروع حـياتي
الماضي والحالي حتي أمسي ..مشروع أصبح له صبغة اخري.. وربما دخل في مصب "مشروعهما"
هم فقط ..ويعني هذا ان العلاقهالمباشرة بيني وبينها دخل فيها طـرف آخـر أصبح هو في
محك العلاقة الأوليه المباشرة معها بحكم الزواج..

وأصبحت انا عمليا في مرحلة مابعد الزواج والانفصال الجسـدي الطرف الثاني..وبالتالي أصبح
من واجبي أن اتعامل مع هذا الشكل الجـديد.. وابدأ في التفكير في المرحلة الثانية من
مشروعي الأول ثم تبني مشروع جـديـد..

والمشاريع كثيرة احتاج فقط ان افكر فيها مليا..

شـكرا أخي راشـد الحاج..أدام الله المودة بيننا جميعا..حضورك اسعدني كثيرا

الاخت منى

الف مبروك للابنة آية مع دعواتنا القلبيه لها بعمر سعيد مع زوجها
ومبروك ليك ام العروس فما اجمل ان نجنى ثمرة ما زرعناه

تقبلى محبتى ودامت ايامكم افراحا

ألف مبروك استاذة منى وإن شاء الله تفرحي بأولاد أولادا يارب.

عنـدما سألت اسرتي آية عن الهـدايا التي ترغبها في بيتها ردت..

محتاجة حماصة عيش وآيةقرآنيه أعلقهاعلي الحيطـة!

ضحكنا جميعا من بسـاطة طلباتها..وطلبت منها أختي ان تعيـد التفكير ثم تخبرهم بما تريـد..
أعتقد لو ان آية كانت في السودان.. كـان يكون لها لستة طلبات مختلفة..
فأغلبنا هناك يتزوج حسب منطق ومظاهر المجتمع حتي مع التدين..وكثيرا ماتكون ثقافاتنا أقـوي
في رسوخها وتحكمها فينا أكثر من الدين..
وهذه النقطة بالتحديد كانت مثار نقاش طـويل ومستفيض بيني وبين آية..ينتهي غالبا بحسمها
للنقاش بأن هذا ثقافة وليس دين!

Quote: ألف مبروك استاذة منى وإن شاء الله تفرحي بأولاد أولادا يارب.

شكرا راكوبة ربنا يهنيك..
مالك بتغيب عن سودانيزاونلاين?

صـباحكم شـهد جميعا..

سـعيـدة للغايه بمباركتكم وجـودكم هنا..وسأرجع لكم واحـد واحـد
تعبيرا عن تقـديري وحـرصا مني علي أن تقوي أواصر الموده بيننا..

فقط أستأذنكم في ان أكمل تقديري لتهنئه أعزائي في البوست الآخـر
الذي ذهب للأرشفه..

مع حـبي..

مني

أتقبلها محبتك ومعها تهنئتك الرقيقة بفرح غير محدود حسن الجيلي أخـوي..

الأبناء نعمة من عنـدالله سـبحانه تعالي..حياه تخرج من قلب حياة لتمتد قصة الخلق الي
ماشاء الله ..
تدهشني تفاصيل حياة الإنسان منذ ميلاده..عشت الدهشة منذ حملي بآية.. ورؤية حركتها في
رحمي حـتي ولادتها..ثم النظر بحنان متمعن للخطوط الدقيقة في يدها الورديه الناعمة..
وقدم تظن نفسك جارحها إن امسكتها!

سقيتها من وريدي الذي ضخ حبه لبنا في صـدري.. فعرفت بغريزتها كيف تصل بفمها الصغير له
فرضعت وارتاحت ونامت كالملاك ..
لم يذهب غذاء ثديي الي معدتها فقط..بل الي روحها وعقلها أيضا..الحمـدلله كثيرا..

Quote: تقبلى محبتى ودامت ايامكم افراحا

وربنا يجعل أيامك كلها فرح بنفسك وبمن تحب حسن أخـوي..

شفت حسن الجيلي أخـوي لما تكون عايز تزرع في الأرض موش بتتأكد انه كل شي موجود وملائم
للبذرة علشان تنبت زرعة?

وموش بتقعد تسقيها من حبك زي مابتسقيها موية وتغذيها بالسماد?
وتقعـد تراقبها لغاية ماتكبر?
وأثناء كده ..ممكن الزرعة تكبر ببطء أو تكبر سريع..وممكن تمر عليها أيام تذبل..
وتحزن انت لحالها وتكتئب ..وتبذل مجهود خرافي علشان ذبولها يروح..
ولما تفرهـد الزرعة وترقص أوراقها.. تفرح الدنيا كلها وتقعد انت سعيـد تعاين ليها..
وتصلي علي النبي ..وتشكر ربنا كتير وانت لسه مستمر في العناية بالزرعة..

صدقت حين قلت

Quote: الاخت منى ومبروك ليك ام العروس فما اجمل ان نجنى ثمرة ما زرعناه تقبلى محبتى ودامت ايامكم افراحا

تسلم وربنا يهنيك بكل من تحب وتعيش وتشوف زرعاتك بتكبر وتملا الدنيا فرح

العزيزة منى خوجلى

كل الامنيات الطيبات لاية العروس بحياة سعيدة

وبالرفاه والبنين ....


وبسعدك بيها يا رب

ويسعـدك انت كمان يالفاتح بالنجاح والحب والإستقرار..

العلاقة بيننا وبين ابناءنا علاقة غريبة ومعقدة احيانا..
التعقيد فيها ناتج من مشاعرنا كأمهات وآباء وشكل الوصاوية والتي نراها "حماية"..
وبين مشاعرهم وهم يقبلون بمشاعرنا في حـدود رغبتهم هم لهذه المشاعر..والتي تنتج
آراء من جانبنا قد يتقبلونها هم او يرفضونها وسط رضاءنا أو غضبنا...

وفي الغرب تتشكل شخصية اطفالنا بشكل فيه ابعاد استقلالية اكثر.. واعتماد علي تحليل
منهم يبني عليه قبول او رفض لما نقوله..
والوضع معهم عندما يكبروا قليلا لا يحتمل معه حديث مثل انا أمك اوأبوك وأفهم احسن منك
وأعرف أين هي مصلحتك..بل هو موقف قائم علي منطق اقناعهم هم حسب منطق العقل والعصر...

Quote: كل الامنيات الطيبات لاية العروس بحياة سعيدة

شـكرا الفاتح خليك معانا في فرحنا

Quote: آيه طـفلتي....زوجـه!

امضاء: وانا مني خوجلي حبوبة السنة الجاية زي الوقت دة انشاء الله ....

Quote: وانا مني خوجلي حبوبة السنة الجاية زي الوقت دة انشاء الله ....

عارف يا أبو بكر ... أنا بقعـد كده مرات اتخيل اني فعلا حـبوبه..أو بمعني أدق ..
بتخيل انه آيو جابت بيبي..أقول ياربي هايشبهها هي ولا هايشبه بودي?

طـبعا الإتنين حلوين شـديد في رأيي.. لكن لو البيبي اخـذ منهم الإتنين بيكون ماشاء الله
عليه للأبـد..
ولو طلع بيبي هادئ زي ما آية كانت هادية.. باخـدوا منهم عـديل وبنسي مليخ الأكتاف القاعدة
اقوله ده ..والكلام الفاضي التاني بتاع عايزة ارتاح..وأقعـد اليوم كله أحبه واشتري ليه في
الحاجات وانومه في صـدري..
أخلق معاه حـياه خضرا وجميلة..ومع أول ضحكة بصوت تطلع منه اتولد أنا ذاتي من جـديـد!

تسلم أبوبكر عقبال ما قريب تستقبلوا أول حـفيـد ..

Quote: الاخت العزيزة منى ،، الف مبروك للابنة آية ،، وبالهناء والسعادة والرفاه والبنين وألف مبروك لأم أية ورينا يحضرك زواج احفاده شرووم

نحتفل بأعياد ميلاد أطفالنا بكل الشقاوة التي نحبها والتي نظن انهم يحبونها ..فنحضر
الحلويات والمأكولات وربما الأراجوزات والحاوي..
حـتي يفاجئونك بأنهم لا يرغبون في مثل هـذه الإحتفالات ..ويفضلون أخـذ المال والإحتفال
بطريقتهم الخاصة!
وفجـأة أيضـا.. تلاحظ قرارات أخـري تتعلق بالدراسه واتجاهاتها..الملبس..
ثم فجـأه يعلنون لك رغبتهم في الزواج!

شـكرا شـرووم تكرم خـال آيه..

Quote: ألف مبروك للعرسان مع تمنياتي بحياة رغيدة بأذن الله لهم و لك يا أخت مني خالد عبد الله محمود

شـكرا ياخـالد عقبال فرحك بكـل ماتتمني..

بودي حافظ كلمة خالتو بس ومعاها امكن خمسة كلمات تانية عربية ..
آية طـبعا بتتكلم عربي سـوداني كـويس جـدا ودلوقتي بتعلم فيه شـويه
كلام..

والله يا منى لا يسعنا إلا ان ندعو لها من القلب

بأن يسعدها وأن يرزقها بنين وبنات وحفدة ....

وأن يطيل الله عمرك حتى ترين أبناء أبنائها وحفدتهم ...

وبما انك لا زلت صغيرة فلا يسعنا إلا أن نقول لك عقبالك

انت ذاتك.......وربنا يسعدكم جميعا.....

Quote: والله يا منى لا يسعنا إلا ان ندعو لها من القلب بأن يسعدها وأن يرزقها بنين وبنات وحفدة .... وأن يطيل الله عمرك حتى ترين أبناء أبنائها وحفدتهم ...

شـكرا فاروق وعقبال بناتك..

عندما حـدثت تفجيرات لندن قبل عامين..كانت لآية آراء قوية ضـدها..
وآية تميز جـدا بين الإسلام كدين سـلم ..وبين العنف والإرهاب الذي أصبح مهددا لكل البشر..
تنامت في لندن موجـة التدين لأسباب كثيرة..بعضها يري في الدين رجوعا للحق..بعضها يري فيه
تعويضا عن الاحساس بالضعف نتيجة اصباغ العديد صفة الإرهاب علي كل المسلمين..وعجز الدولة
عن تقديم مواقف سياسية ترضيهم وخاصة في العراق..
الإحساس بالإنتماء لدين واحـد اصبح طريقا للقوة ولتبني "هوية" ترضي طـموحات ابناء المهاجرين..

لم يخيفني الحجاب في حـد ذاته.. لكن كنت أخاف أن تكون آيه قـد تبنته تحت ضـغوط في المدرسة
او وسط اصدقائها..علي الرغم من اننا في اسرتنا ننقسم بين من يرتدي الحجاب بشكله المعروف
ومن لا يرتديه..
كثر نقاشي مع آية عن الحجاب واسباب ارتداءها له ..وكان نقاشا ممتعا ومتعبا في ذات الوقت!

حليك معانا يا فاروق ...

ألـــ مبروووووووك ـــف

الاخت الكريمة منى ... تهانينا الحارة لك وللامورة آية ولزوجها الكريم ولكافة افراد الاسرة ..



ود الباوقة

Quote: الاخت الكريمة منى ... تهانينا الحارة لك وللامورة آية ولزوجها الكريم ولكافة افراد الاسرة .. ود الباوقة

كلما فكرنا ..أي عمر نعشقه أكثر في أبناءنا.. نجـد ان كل مرحلة كل عمر له جماله وفرحـه.. وربما اختلفت درجة الجمال حسب تجربتنا الشخصية في الإمومة والأبوة لهم..

أفرح كثيرا بالسنوات الأولي لميلاد آيه..واستمتعت بكـل لحظة عشتها معها..
ربمالأنها أول تجربة أمومة فعليا بالنسبة لي..كلمة قطـعة مني لا تشرح نفسها بما يكفي علي الرغم من صـدقها وبلاغتها..

شكرا أخي ود الباوقة علي المباركة..ربنا يسعـدك بأسرتك

Quote: ألـــ مبروووووووك ـــف

شـكرا الصـحافة ..أسعـدني حضورك هنا..

سألتني احـدي الصديقات عن الذي يجعلني أرضي بزواج آية في هذه السن الصغيرة..
يصـعب جـدا الرد علي هذه الأسئلة بالشكل الذي يرضـيأو يقنع السائل..
جيل آية أولاد وبنات لهم قناعاتهم الخاصة والتي لا تتغير الا بالاقناع..
وآية لها فكرتها التي إقتنعت هي بها..
في السودان عملية الإقناع قد تأخـذ.شـكل الفرض فيصبح الأمر نهيا بالقوة..
أو ممارسة الضغوط المستمرة حـتي يضطر الفرد ان يتخلي عن قناعاته..ويتبني قناعات الآخرين..
نحن أيضا هنا لنا طـريقة تفكير مختلفة لحـد ما عن طـريقة تفكيرنا السودانية داخل الوطن..
ففي مثل حالة آية وحالتي أنا أمها..كان يجب علي بعد أن ناقشتها وافهمتها بوجـة نظري ..
أن اقبل مارغبته هي..الحياه حياتها هي ..ولا املك غير النصـح..

خليك معانا يالصـحافة...

1000 مبرووووووووك يا مني


اسعـــد الله ايامك ..






* ما عندك بنت تانية !!


منعم

مفاجئة لذيذة شديد !!

ألفين مبروك يا مني ... ربنا يسعد آية ويحقق أمانيها ... وعقبال "اللي في بالي"

أميرة

مفاجئة لذيذة شديد !!



أميرة حـبي.أنا..واحشاني موت..وعارفاكي غاطسة في المذاكرة علي الآخـر علشان كده ما
بزعجـك..
شفتي يا أميرة البيت بقي فاضي علي بشكل فظيع... آية وصاحباتها كانو عاملين للبيت روح!!

خلاص لما تفكري ترجعي مصر وريني..أنا طولت شـديد منها ووحشتني خالص... وكمان ماتنسي برنامجنا سوا..

عقبال مانفرح معاك بالدكتوراة وبعدها اي حاجة تتمنيها حبيبتي..

Quote: 1000 مبرووووووووك يا مني اسعـــد الله ايامك .. * ما عندك بنت تانية !! منعم

أيوه يا منعم عنـدي آيات وعمرها 10 سنوات..لكن مختلفة من آية..
قالت آية عبيطة علشان ما طالبت بمهر كبير فيه مؤخـر كبير..
وقالت العايز يخطبها.. يدفع ليها رسوم الدراسة كاملة..ومصاريفها..
ويجهز البيت لغاية ما هي تخلص قرايتها..

أها عنـدك عريس مستعـد?

عقبال مانفرح معاك بفرحـك ونبارك ليك ان شاء الله

أختي العزيزة مُنى
تحاياي والتّهاني

تمُر أيّام وتتعدّى ...
شُفتي الايّام بتمر سريع كيف ؟
ربّنا يجعله زواج مبارك ويهنّيها وزوجها
وتسعدي بأحفادك من آية ..




أصدق التّهاني والوُد

Quote: مني عوض خـوجلي حـبوبه.

Quote: آيه طـفلتي....زوجـه!

Quote: العَيْـشُ مَاضٍ فَأَكْـرِمْ وَالِدَيْـكَ بِـهِ والأُمُّ أَوْلَـى بِـإِكْـرَامٍ وَإِحْـسَـانِ وَحَسْبُهَا الحَمْـلُ وَالإِرْضَـاعُ تُدْمِنُـهُ أَمْـرَانِ بِالفَضْـلِ نَـالاَ كُلَّ إِنْسَـانِ

مبروووك لايه وربنا يبارك ليها و يسعدها ......
وأيه هي العبره ... و الأماره ... و العلامه .... والمعجزه .......

Quote: مبروووك لايه وربنا يبارك ليها و يسعدها ...... وأيه هي العبره ... و الأماره ... و العلامه .... والمعجزه ....... مرحب بيك أخي محمـد عثمان طه

..

مر مايقارب العام منذ أن بدأت آية في حضـور صلاة الجمعة بالجامع بإنتظـام.
أنا عن نفسي أصلي بالمنزل ولا أذهب للجامع الا فيما نـدر..
ومن ضمن مانـدر اصرار آية في ذلك اليوم لأن أذهب معهالأحـد الجـوامع في غرب لنـدن..
ذهبت معها لأري مالذي يجـذب الكثير من ابناءنا للجـوامع..فلقد سمعت كثيرا عن حلقات يتم التجنيد فيهالأبناءنا..وكثيرا ماينتج عنها الخليات الإرهابية..وكررت الذهاب.. ولم يكن في ذلك الجامع الذي يقصده أغلب ابناء الجالية العربية من شمال افريقيا اي شكل من اشكال الحلقات خلاف بعض الجـوامع الأخري..
ذهبت معها ومعي شـقيقتي ماجـدة وإستمتعنا بأداء الفريضة وسط جـو روحاني مريح..

جـد آية والد والدها رحمه الله الفكي عبـدالرازق الزين بانقا صـالح (جبل اللقمة) كان رجـل
دين صالح وقضي عمره إماما بالجـامع..وجـدها والد أمها خليفة الخلفاء الصالح عوض خـوجلي..
فليس غريبا إذا توجهات آية الدينية واصرارها علي أداء فريضة الجمعة بالجامع..
أسأل الله ان يحفظ آية في حياتها وفي ايمانها.. وان يثبته دائما كما يحب هو الخالق سـبحانه
وتعالي..

وان يحفظـك أنت اخي محمـد عثمان ويفرحـك بأسرتك..

Quote: تمُر أيّام وتتعدّى ... شُفتي الايّام بتمر سريع كيف ؟ ربّنا يجعله زواج مبارك ويهنّيها وزوجها وتسعدي بأحفادك من آية ..

وآية لما تتصل بالتلفون بتكون متقمصة دور زوله مسئولة...ست بيت يعني..

إتصلت قبل شـوية يالؤي علشان تطـمئن علي وتشوفني أكلت ولا لأ..بتي حـلوة موش?
أول حاجة سألتني بطـريقة الخليفة عوض خـوجلي..

كيفنك?!

وبعد ونسة شـوية.. قالت لي انها وبودي جـايني يوم الخميس...وهايبيتو معاي
سـألت آية...

أعمل ليكم أكل شـنو?

أي أكـل سـوداني ياماما بس ماكسرة وملاح!

أنا عارفة بودي جـنو ملوخية ولا أظنه مابيعرف غيرها..لكن آية قالت عايزين ياكلوا فول
وطـعمية!

أنا بعمل طـعمية رهيبة جـدا تحبو تجـو تعشوا معانا يوم الخميس?

عقبال فرحـك يالؤي ياجميل...

منى الحبيبة العزيزة -

سلام وأفراح دائمة -وسعادة ومودة تزيد كل صباح !

وزغرودة للحلوة اية-

ومليون مبروك وربنا يسعدهم ويخليكم لبعض .

ملحوظة : دحين كان قتيلى ما كنت نطيت البحر دا وجيت زغردت للعروس !

وتحياتى للوالدة جارة .

ست البنات

Quote: منى الحبيبة العزيزة - سلام وأفراح دائمة -وسعادة ومودة تزيد كل صباح ! وزغرودة للحلوة اية- ومليون مبروك وربنا يسعدهم ويخليكم لبعض

سـتوته حبيبتي..

طـولتي شـديييييد من خيتك مون..الشي شنو?
عايني ياستوته.. آية قالت لي شـنو اليوم داك..

ماما في بتين في لنـدن عايزاك تتبنيهم..

بنات شنو ياآية?

والله ياماما بنات مسكينات واحـدة عمرها 13 وواحـدة 16 ..بنات يتيمات وكويسات بس...
محتاجين اسرة دائمة..
وممكن ياماما يعيشوا معاكي ويسكنوا في أوضتي..وماتشيلي هم مصاريفهم..لأنه الحكومة بتصرف عليهم ..هم بس متاجين لأم!

شـرحت لآية انه علي الرغم من رغبتي في التبني..الا أن تبني بنات في هذا العمر سيجلب مشاكل
اكثر مما تتخيل..
لن اتمكن من تربيتهم من جـديـد..وان حـدث واعترضت علي اي تصرف فإن العواقب قد ترتد علي بشكل سلبي..كما ان سنهم خطرة وتطلب مني مجهودات فوق طاقتي لاأدري ان كنت استطيع معهاان اقوم بواجبي نحوهم كما أتمني أم لا..

حاورتني آية كثيرا ثم اقتنعت بوجـة نظري..لم تفكر هي في ابعاد الموضـوع كما فكرت أنا..
لذلك لم يصعب علي اقناعها..
خـتمت حـديثي بحل رأيته في طاقتي..بأن استقبلهم في اجازات نهاية الإسبوع والاجازات الأخري متي
ما أمكن..

اسعـدني كثير قلب آية الكبير واحساسها بأطفال كتب عليهم الزمن العيش في غربة!

موش قلت ليك آية كبرت سـتوته حبيبتي?

صورتك جميلة شـديد...

من أعمق مجاري الفرح عندي أهني وافراحكم تسعدنا ... مليون مبروووووك لكافة آل خوجلي ولآية التمنيات بالسعادة أبدآ وبالرفاء وبالبنين ولك خالص المنى منى عوض خوجلي وعقبال الفرح المنتظر.

Quote: من أعمق مجاري الفرح عندي أهني وافراحكم تسعدنا ... مليون مبروووووك لكافة آل خوجلي ولآية التمنيات بالسعادة أبدآ وبالرفاء وبالبنين ولك خالص المنى منى عوض خوجلي وعقبال الفرح المنتظر.

تسلم الرفاعي وربنا يسعدك زي ما اسعدتنا بتهنئتك ..

كنت قد بدأت حـوارا في احـد البوستات مع بعض الزملاء عن التقدمية والظلامية..والسبب حجاب آية
وعـدم ارتدائي انا أمها للحجاب..

اري التعريف بالتقدمية والظلامية (الحجاب) هنا تعريف عاجز أو ناقص أو قاصر ..فلا الحجاب دليل
علي الظلامية ولا عـدم ارتداء الحجاب كافي لأن أكون تقدمية..
أعتقد ان التقدمية افكار مع السلوك وفي الإثنين اري ابنتي وانا تقدميات..
حرية الإختيار وتركها للآخرين هي التقدمية.. والقدرة علي الإختيار هي أيضا التقدمية ..

وأحترم انا خيارات آية مادامت سـلمية ومظمئنة وناتجة من قناعاتها هي..

شكرا الرفاعي أخـوي

ألف مبروك لاية الحسن والجمال
وعقبال لكل شباب امتدادنا الحبيب
والتهنئة موصولة لكل الاسرة
عصام على مربع 14

Quote: ألف مبروك لاية الحسن والجمال وعقبال لكل شباب امتدادنا الحبيب والتهنئة موصولة لكل الاسرة عصام على مربع 14

وكان نفسي ياعصـام أحمد زواج بت أختك "آية" يكون زي عيـد ميلادها الأول.. في خيمة أمام
البيت في الإمتداد..كنت بتكون بتحضر ليه معانا موش?


ربما يكون بعدنا عن الإمتداد أمرا ابعد من كلمة الحزن..كنتاود لآية ان تعرف اين قضيت عمري
وفي أي وسط تربيت..وتشوف حاجة التومة وحاجة رغية..

وتمشي لعم عبدالله تدخل بيتهم بدون استئذان.. وتلعب مع عيال آمال.. وتتعشي عنـد القسمة..
وتعدي الميدان وتمشي لخالي محمـد..

وكنت عايزاكم ياخيلان آية تنظموا الخيمة للعقـد..وتقدموا الفواكة والحلويات والمشروبات للضيوف..وآية تتعلم وسطكم حب اكتر وموده أعظم!

لكن الحمـدلله برضه احنا قادرين نتعارف ونتواصل ونتمسك بمحبتنا وبجيرتنا ..

سـلام ليك خال آية ولكل ناس الإمتداد..

Quote: Sabah Hussein الف مبروك لآيه وبيت مال وعيال . رغم انه التانيه دى مافى ليها داعى. وعقبال آلآء بتـى انشاءالله. عـندى بت راسها حـجر اقول ليها دايرك تعرسى بدرى . قالت الأ بعد تخلص الجامعه . انا طبعا عايزها تعرس وبعدها بى شهر واحد اناكمان اعرس عشان ماابقى حبوبه . الف مبروك للعروسة وامنياتى بحياة زوجية سعيدة .. وعقبال تفرحى بذريتها يامنى خوجلى ..واسف ان اتيت متاخرا الى هنا ..فلم ارى البوست الى الآن .. الف مبروك مرة اخرى وربنا يجعل حياتكم كلها افراح

صـبوحه..

أنا كنت عايزه آيه تخلص قرايتها في الأول بعدين تفكر في العرس..

زمان أهلنا يقولوا لينا العلم سـلاح.. وكل امتحان فتره ومع ظهور النتائج بنظموا ليك
حـوليه بارتي.. البوفيه فيها صـنفين بس (فته ولقيمات)!!

أما نجاح آخـر سنه.. فهو بارتي كبير جـدا..فبجانب الجيران والأحبه.. هناك قبيلة الشايقيه
يأتون للمباركه والمشاركه في بارتي الحوليه الذي تزيـد وترتفع ايقاعاته بوصـول فرقة شباب
الختميه الجميله..
ومع اختفاء البارتيهات الدينيه في بلد البارتيهات الديسـكوتيه .. تتقلص فكرة "العلم سـلام"
من ناحية "استعجال"..ويحل محله عايزة اتزوج وبعـدين اخلص..وسـلاح ايه ياماما?
انتي لسه متأثره بثقافة الحروب!!

شـكرا صبوحـة حـبيبتي.. وعقبال ماربنا يكرمك بكل ماتتمنيه..وينجح مقاصـد بنتك الجميله كيفما
كان شـكلها..

مني

مبروك يا مني لاية
ونتمني لها حياة زوجية سعيدة...

الف مبروك لايه

ولام ايه

Quote: الف مبروك لايه ولام ايه

آية وبودي جـوني امس وبايتين معاي ..

قالوا لي تعالي نلعب كونكان 14 وشايلين كوتشينة ناقصة..قلت ليهم يفتح الله!

اتونسنا كتير واتفرجنا علي التلفزيون مع العشا وضـحكنا كتير..
من أمس انا بضحك..
عارف يا أوسلي أحسن حاجة في الدنيا شنو?
تشوف الناس وخاصة اولادك فرحانين ..ضحكتهم بالدنيا..

شـكرا أوسلي 2

Quote: مبروك يا مني لاية ونتمني لها حياة زوجية سعيدة...

تسـلم كرمه...عقبال ماتفرح بتعليم ولدك ونجاحه وكمان عرسه..

شـكرا علي التهنئة اللطـيفة...وربنا يخليك دائما معانا..

Quote: العزيزة منى خوجلى دا اول بوست ادخلو بعد فترة غياب والف مبروك وعقبال لماتفرحى بى اولاد اية وبى المناسبة بقى عليكى لقب حبوبة ومحبوبة . ودمتى ali elhassan

وعقبال ماأفرح بيك ياعلي الحسن وأشوفك سعيـد ومتهني بأي حاجة بتتمناها..


والتقدمية سـلوك مستمر..لا يقف عنـد المظاهر..عندما يطالبنا الدين بإحترام رغبات الآخرين.. وبالأمانة.. وبمراعاة الشعور.. وبعدم ايذاء الآخرين..تكون هذه تقدمية..
فهل تنادي "التقدمية" في جـوهرها بغير ذلك?

علينا أن نراجـع مفاهيمنا ونعيـد صياغتها في عقولنا حتي نقدم خيرا لمجتماتنا.. ونساهم في
ارسـاء مبادئ وقيم عالية..

شـكرا علي الحسن الجميل ومبروك تاني لفرح

Quote:
Kul alTahani for the happy marriage of your daughter. Beit ilm, mal, wa Iyal in sha Allah.
Unquote

I thought to use Dr. Mahgoub Altigani's beautiful greetings. He had sent it to me in a similar occasion
Mabrook Ya Omm Aya...!

mohamed elgadi
Magda, Sarra, and Nahid

تعيشى كمان
يا منى ..
وتشوفى بت آيه
عروس متوجه بى
ضل ضراك الوريف !
ألف مبروك لينا كلنا..
مامون

بسم الله الرحمن الرحيم



عزيزتي مني

الف مبروك..ربنا يسعدهم ويهنيهم ببعض

وعقبال ماتعرسي لي بنتها انشاء الله



حاتم هاشم

و كبرتينا يا منى إنتي و آية ..
غايتو الله كريم علينا .

و مبروك لآية و ليك ..
الله يوفقها و يسعدها .
و يزيد أفراحك بيها .
بس ما تخليها تعملك حبوبة .. أوعك .

ألف مبروك لآية يا منى
وعقبال ما تفرحي بأولادها كمان
أدام الله أفراحك

الاخت منى ألف مبروك للابنة آية.

الف مليون مبروك للمرة التانية مع اني زعلان جدا لاني كنت بأعتقد ان اهل العروس مفروض يدوهم الخبر بدري شوية وفرحان لانها تزوجت بالرغم من انو بدري شوية لكن خير البر عاجله

كنت مبرمج علي الاحتفال بعيد الميلاد السنة دي في بروكسل ودعوة العام الماضي مازالت قائمة دا اذا ما عملتيها وسافرت السودان فجأة زي المرة الفاتت

تحياتي ..وعذرا مرة تانية للتأخير

Quote: الف مليون مبروك للمرة التانية مع اني زعلان جدا لاني كنت بأعتقد ان اهل العروس مفروض يدوهم الخبر بدري شوية وفرحان لانها تزوجت بالرغم من انو بدري شوية لكن خير البر عاجله

عاين ياياسر...عيـد ميلادك في شهر 7 من أس اتذكره مش تستني لمانذكرك وبعـدين في خـبر مهم يهمك ويهم أصحابنا الهنا ديل كلهم..
اسمعه كويس عشان ماتجي بكره تقول ما كلمتيني..
في عريس اتقـدم لبت آية لما ربنا يخلقها بإذن الله ..يعني لو ربنا خلقها السنة الجاية بيكون هو أكبر منها امكن بتلاته او اربعة سنين..
المهم ابو العريس مننا هنا في سـودانيزاون لاين...ودي صـورة العريس




بس في مشكلة ياياسر
لو آية اول مولود ليها كان ولد نعمل شـنو?

.

Quote: الاخت منى ألف مبروك للابنة آية

إزيك يا سيف جبريل.. كيف حالك?

أسه لو الله حيانا..بنحتفل بعيـد ميلاد آية التسعتاشر ولا كيف?

الليلة آية وبودي بايتين معاي.. وآية فرحانة شـديد علشان عملت ليها الأكل البتحبه!

شـكرا سيف..شـكرا خال آية..إن شاء الله أيامك كلها أفراح..

مني

Quote: ألف مبروك لآية يا منى وعقبال ما تفرحي بأولادها كمان أدام الله أفراحك

تسلمي.أختي مي...

ربنا يديم ليك الأفراح ويحقق ليك كل أمانيك..

تري..ان دفع الرجل أي قدر من المال كمهر ..واشتري أرطـالا كثيرة من الذهب..هل يضيف هذا
لقيمة آية كإنسان.. وكإمرأة.. وكزوجة?

هل يضيف له هو قيمة حقيقية لإنسانيته.. ورجـولته.. وتقديره للمسئولية كزوج?
لا أعتقـد ان المال يضيف قيمة أخلاقية وانسانية لأي انسان..

المال وسيلة للعيش ولنا حظوظـنا المختلفة فيه..
الصحة والطـموح والتفاهم والمسئولية هم الأسـاس لنجاح علاقة الزواج..

Quote: و كبرتينا يا منى إنتي و آية .. غايتو الله كريم علينا . و مبروك لآية و ليك .. الله يوفقها و يسعدها . و يزيد أفراحك بيها . بس ما تخليها تعملك حبوبة .. أوعك .

عماد انت ماكبرت انت لسة زول يونج وديسنت..
آية وبودي جـوني وباتو معاي يوم الخميس..
يوم الجمعة الصباح آية جات ختت راسها في صـدري ..عايزة تتدلع شـوية زي زمان..

ماما مش انتي بتحبينى?

أيوة حبيبتي جـدا!

زاد دلالها وهي ترفع بصرها لبودي وحالها يوحي بمشـروع إغاظة له..
ناديته حيث نجلس علي الكنبة... فجـلس علي يميني بينما آية علي شـمالي..
إحتضنته وانا أقول..

أحبك انت ايضا بودي كما احب آية..

وكانت قبلته علي خـدي فرح من طـعم آخـر..فيه رضاء وتفاؤل وحنان..

شـكرا عماد..ربنا يخليك لأسـرتك ولنا

Quote: الف مبروك..ربنا يسعدهم ويهنيهم ببعض وعقبال ماتعرسي لي بنتها انشاء الله

تشـكرات كثيرات أخي حاتم هاشم علي تهنئتك وعلي الأماني الجميلة..

طـلبت مني زوجـة اخي ان اتبني ابنتها عائشة ذات الأربع سنوات..وكنت لا افترق عنها أثناء
تواجدي وتواجدهم في الخرطـوم..
بالطـبع فكرة جميلة.. وخاصة انه عيوشة طـفلة روحها حـلوة والأهم من كـدة ابنة أخي..
سـرحت مع الفكرة قليلا ..ورأيتها في خيالي وقد أصبحت طالبة جميلة في المرحلة الثانوية..
ترسل ضفائر شعرها السوداء يمينا وشمالا..
فجـأة.. يأتيني تلفون من قاهرة المعز لتطلب مني أمها أن أرجـعها لها!
وعنـدما وصل خيالي الي هـذه النقطة..اخبرت زوجـة اخي بالرفض لعرضها المغري بالتبني... شارحة
لها مخاوفي...

تسلم ونسأل الله أن يسعدنا جميعا في ياراتنا وأمنياتنا...

Quote: تعيشى كمان يا منى .. وتشوفى بت آيه عروس متوجه بى ضل ضراك الوريف ! ألف مبروك لينا كلنا.. مامون

يبارك فيك مامون خـال آية..

فكرتي قبل زواج آية من أجـنبي.. كان فيها تردد وخـوف..حتي أنا ماكنت ارضي بالزواج من غير سـوداني!!

الخوف اعتقد ناتج من احساس بأننا قد بدأنا فعلا بالتخلي عن جزء من الوطن..وقطعا يصـدمنا مثل
هذا الإحساس كثيرا ويخيفنا.. فهويتنا الأولي هي الوطن الذي بعدنا عنه بأجسادنا..

فمن ناحية الزواج من أجنبي .. يعني اطـفال من اجنبي وبالتالي نصف انتماء سـوداني..المنطق
يقول ذلك الا ربما في حالات نادرة ..
ونخاف نحن.. حتي ونحن نحمل جـنسيات أجنبية ضياع الوطن من أبناءنا ومن أبنائهم>>

تسلم أبو الطـيب

Quote: Mabrook Ya Omm Aya...!

شـفت يادكتور البنات بيكبروا سريع كيف?
مبروك زواج الأمورة وربنا يسعدها ويسعدكم انتو بيها...

كان نفسي أحضر اللمة في الخرطـوم واشوف ماجـدة والتي زينب وباقي الأسرة
لكن ربنا ماكتبها لينا..

ربنا يسعد أبنائنا جميعا فسعادتهم هي غايتنا..

الأخت الحبيبة منى

سلامات .. ومليار مبرووووووووووووك

تتذكري في بوست آية في الثامنة عشرة
قلت ليك استعدي يا منى عشان تبقي حبوبة
اهو الحلم يتحق رويداً رويداً .. وبعد كده جهّزي نفسك
لي حكاوي .. فاطنة السمحة .. وحسن الشاطر
وللا انتي يا منى حا تكوني حبوبة مودرن وحكاويك حا تكون
من النت .. ودريم ..

لالالالا عارفك اصيلة وبت بلد و(سمحة زي فاطنة) ..
وحكاويك ياها حكاوي حبوباتنا الحنان


ربنا يهنيهم يا منى ويرزقهما الوليدات والبنيات

أختى العزيزة أم آيــــة


أحلى الأماني وأجمل التهاني وأطيب التبريكات

كل الحب والتقدير والمودة والإحترام لإبنتي آية ومستقبل مشرق إشراقة قلبها الجميل إن شاء الله .

وأنا أقول ( آية إبنتي أم ) " إن شاء الله ".

Quote: كل الحب والتقدير والمودة والإحترام لإبنتي آية ومستقبل مشرق إشراقة قلبها الجميل إن شاء الله . وأنا أقول ( آية إبنتي أم ) " إن شاء الله ".

عماد..

آية قالت ليك..
ليه ياخالو ماجيت حضرت العقـد?

لما بودي وآية يكونوا ماشيين الخرطوم بيـدوك خبر تقابلهم هناك..

يـديك واسرتك الصحة والسعادة..

Quote: اهو الحلم يتحق رويداً رويداً .. وبعد كده جهّزي نفسك لي حكاوي .. فاطنة السمحة .. وحسن الشاطر وللا انتي يا منى حا تكوني حبوبة مودرن وحكاويك حا تكون من النت .. ودريم ..

شفت يا أمير أخـوي..
أنا حافظة حكايات بتخوف..وبحب لما أحكيها أعاين ليهم وأشـوف أثرها عليهم...مديحة قالت
انا عنـدي ميول عـدوانية..لكن الكلام ده ما حقيقي او هكذا أظن أنا..أنا بس بحبهم لما يخافوا
يجوا يـدسـوا فيني وأنا احضنهم شـديد..شـفت لحظة حضن اي طـفل هي لحظة خلق واحياء لكل المشاعرالجميلة..

علي فكرة..
أنا فاقـدة عادل فقاد شـديد هنا..عندك أخباره?
وكمان حاولت أنزل ليك صور معتصم واطفاله في بوست لحظة...بس اكتشفت لازم أصغرهم ..

عقبال نفرح بكل أطـفالك..يديك العافية ويقدرك دائما علي الأحسن..

سيدتى
مبروك لآيه وانشالله تعيش سعيدة
هشام كمال

خـلاص اعتمدنا الخميس والجمعة لآية وبودي..

يبـدأ يوم الخميس بالطبخ ..وعلي الأغلب بكون سألتهم عايزين ياكلوا شنو علشان احضره ليهم..

وغالبا الخميس والجمعة ديل بيكونو الأيام الوحيدات للطبخ بالنسبة لي..باقي الأيام انا براي..
وانا لنفسي اصلو مابطبخ... اي حاجة تـدخل المعدة خلاص كفاية..جبنة بيضا ولا صفرا..فول ولا شـوربه..مامهم...ويوم السبت بنكون كلنا مع ماما جـارة..

آية وبودي بيجوا يوم الخميس بالليل..بعـد 9..يخلصوا اشغالهم بعدين يجـوا..
آية بتتصل من السكة وتقول لي ياماما هنصلك بعـد ربع ساعة..طـوالي انا أحضر السفرة وابدأ
ادفي الشوربة..وأقطع السلطة الخضرا..

نكمل الخميس والجمعة بعـد شوية..

Quote: سيدتى مبروك لآيه وانشالله تعيش سعيدة هشام كمال

شـكرا ياهشام..ربنا ينجح اعمالك الفنية كلها وتسعـد وتنتج دايما فن جميل..

بالعديل و الزين
و آية الإبنة الصالحة (تستاهل كل خير)
وعقبال تشوفي وليدات وليداتها
والله يقدرك على (الوحدة)

.

ألف ألف مبروك لآية يا منى

والتهنئة الحارة لكم

وصادق المحبة

القوالب الجاهزة أو الإطار الضيق يخنق الوعي..
وهكذا تبدو مقاييسنا المحددة في عـديد من الإمور المختلفة..
وعندما نأتي لتربية الأبناء ...كثيرا ماتقفز هذه المقاييس الي قراراتنا.. وتتحكم في شكل
علاقتنا مع ابنائنا..
نظن نحن بما ورثناه في تنشئتنا.. ان ما ورثناه هو دائماالأمثل.. ونتمسك به خاصة ان سمعنا
المديح عليه من آخرين حـتي وان لم يكن يوافق عليه ابناءنا!
نردد لهم اننا نفهم أحسن..وتقديرنا للإمور فيه عقل اكبر..ثم نؤكد في ثقة تامة ان مانقرره
لهم عواقبه ايجابية دائما..
ونحن بالطبع نكون هنا صادقين تماما فيما ندعي او نقول بصـدق عن انفسـنا..
وقد يكون ما نصدقه حقيقه في كثير من جـزئياته..إلا انه ليس دائما الحقيقة او الصـدق بالنسبة لأبناءنا..
أبناءنا جيل متفتح ويعقل الحقيقة وفق نشأته هو.. وقطعا "نشأته" ليست مطابقة لنا..جيل ابناءنا
له شخصية قد تصدمك بقوتها ...او معرفتها.. او اصرارها.. او طريقة تقديرها للإمور.. او كل هذا مجتمعا..

والصـدمة لا تعني الفجيعة حتي وان كان احساسنا مفجوع..الصـدمة تعني الوعي بالإختلافات بيننا..
وتنبه لأهمية الإقتراب من ابناءنا للفهم أكثر..

Quote: ألف ألف مبروك لآية يا منى والتهنئة الحارة لكم وصادق المحبة

شـكرا يادكتور معز بخيت علي مباركتك ..أسعـدتني كثيرا..

مبروك لآية... ربنا يسعدها ويسعدك

في هذه الأيام الحديث يدور عن (الحبوبة في زمن العولمة) والحبوبة الاستايل،،، وفي ظل الحبوبة التي تعمل وتقود السيارة ومستقلة عالاخر وأحفادهاالمشتاقيين لبصماتها واسهاماتها ،،، ترى ماذا يكون تصورك؟؟ بالطبع الأباء لهم رؤيتهم للأشياء دون تدخل كما ذكرت ولكن الأسرة الممتدة تجعل أيادينا تمتد بيضاء من غير سوء ومشاعرنا أكبر... ودمتم شلال حب ومودة..

الف مبروك لاية وربنا يديم
عليك الافراح يامنى

يا سلااااااام يا استاذة
خبر جميل بشكل !!1 ألف تحية وتهنئة ومبروك لآية ولك وللناس كلها
عاطر تحياتنا من الخرطوم بحري كمان

Quote: يا سلااااااام يا استاذة خبر جميل بشكل !!1 ألف تحية وتهنئة ومبروك لآية ولك وللناس كلها عاطر تحياتنا من الخرطوم بحري كمان

نمت بيني وبين آية بعد زواجها صـداقة من نوع جـديد..ليست كصداقتنا السابقة..هي صـداقة امرأتين..نحكي ونعلق وتضحك علي مانقوله..
ويطول الحديث بيننا ونتعرف علي بعضنا أكثر.. تحكي هي عن مواقف سابقة جرت بينا.. وأذكرها
انا بأخري..تعلو ضحكاتنا فتقول حبيبتي وهي مستمرة في الضحك..

آه يابطـني..ماما كفايه ضحكتيني كتير..

ثم اسمع بودي يسألها...بتضحكوا كتير كده في شنو?

أقول لها.. خلاص حبيبتي أمشي اتونسي مع بودي..وانهي المكالمة وقلبي مطـمئن علي صغيرتي!


مرحب كتير استاذ ابوالباشا..أسعـدتنا جدا ..ربنا يهنيك بكل البتحبهم..

وتحيات كتيرة ليك ولأهل بحري ولكل أهلي فيها

لغاية ما أرجـع ليكم..

Quote: في هذه الأيام الحديث يدور عن (الحبوبة في زمن العولمة) والحبوبة الاستايل،،، وفي ظل الحبوبة التي تعمل وتقود السيارة ومستقلة عالاخر وأحفادهاالمشتاقيين لبصماتها واسهاماتها ،،، ترى ماذا يكون تصورك؟؟ بالطبع الأباء لهم رؤيتهم للأشياء دون تدخل كما ذكرت ولكن الأسرة الممتدة تجعل أيادينا تمتد بيضاء من غير سوء ومشاعرنا أكبر... ودمتم شلال حب ومودة..

ولما ربنا يرزق آية بطـفل..الحكايات هاتكون بالباور بوينت Power Point..
علشان نضيف ليها 'أثر ما' سـوداني..
وبعدين الحجوة بيكون فيها خيال علمي ..وهم اصلهم أطـفال الزمن ده والزمن الجاي
مابينفع معاهم اي خيال ما يكون علمي!
ومرات كده بتخيل إني قاعدة أحكي لطـفل آيه 'لما يجي' حكاية بنات الشيخ الأغبش
الإتقلبو كـدايس!
يقوم هو ولا هي يسـألني اسئلة كثيرة اطـول من الحكاية نفسها لما اتحرج واتضايق..
بعدين في الآخر يقول لي حكايتك ماعنـدها معني وانتي مملة you are boring!
أصلو دي أجيال مابتعرف تجمل كلامهاولا تجامل!!

شـكرا نون حبيبتي..يهنيك المولي ويسعدك

Quote: بالعديل و الزين و آية الإبنة الصالحة (تستاهل كل خير) وعقبال تشوفي وليدات وليداتها والله يقدرك على (الوحدة)

آية وبودي كانوا معاي الخميس والجمعة...
بودي رجـع لينا بعـد صلاة الجمعة وبعـد الوليمة زي ماهو بيسمي الأكـل..
سمعني الكلام العربي الحفظه..

آيه تسأله..
لو زول قال ليك كيف حالك..ترد عليه بشنو?
كويس الحمـد لله..إنت كيف?

اتفضل أدخل..
شـكرا جـزيلا..

والدروس كتيرة..آية متفسحة في بودي!

بعـد ما ضحكنا كتير قمنا رقصنا انا وآية..بس هو أبي يرقص!
ربنا يا أبي عزالدين يسـعدك بأسرتك ويسعـدهم بيك ..
ونكون كلنا مع بعض دايما..

أوبي عزالدين..

قلتو ماشين تعرسـوا لي عمر لما يبقي 14 سنة?

Quote: بالعديل و الزين و آية الإبنة الصالحة (تستاهل كل خير) وعقبال تشوفي وليدات وليداتها والله يقدرك على (الوحدة)

المشكلة ما بتكون احنا عايزين شـنو القضية في هم دايرين شنو ..
الحياة الزجية لأجيال أبناءنا مافيها تعقدات حياتنا..
يعني مجتمع يصر علي ادارة حياتهم بدلا عنهم مافي..ضغوط اقتصادية شكلها مختلف..تنظيم حياتهم له ايقاع عملي أكثر..

وفعلا الوحـده صـعبة لكن آيه الحمدلله ما بعيده..

ربنا يسعدهم.. ويكبر ليك عمر نفرح ونبارك ليكم نجاحه

ألف مليون مبروك يا منى ..
و لك أن تفخري بمجهودك الذي أثمر ..
أتمنى لها و لك كل حياة حلوة و جميلة ..

وأنا وآية أمس كان عنـدنا ونسة لذيذة جـدا..
قطعنا فيها في"الرجال" وضحكنا شـديد!
في ناس كده كلامهم واحد..كان من افريقيا ولا من أروبا
وكمان تصرفاتهم!
الحكاية دي من شنو محمد إبراهيم قرض?

Quote: ألف مليون مبروك يا منى .. و لك أن تفخري بمجهودك الذي أثمر .. أتمنى لها و لك كل حياة حلوة و جميلة ..

ربنا يسعدك بأسرتك ويفرح أيامك

اخت الشهيد.. نجدد الحب والتجلة والتهنئة لكم وللعروسة أية وعريسها.. إضافة قوية للمسيرة الكبرى نحو سودان جديد وأجيال اكثر عطاءا ووعدا.. بهم نمد اعناقنا نحو المستقبل.. ونتمدد فى ساحات الوطن .. لهم نحيا وبهم تستمر المسيرة..

نورالدين منان والاسرة

مبروك لآيتك وعريسها يا منى ..
كل الأماني بالتوفيق في زواجها ودراستها..

وبنيّه إتربّت في كل هذا الحب..ستكون على ما يرام..
يحفظها ويغطيها ليك..

Quote: وبنيّه إتربّت في كل هذا الحب..ستكون على ما يرام.. يحفظها ويغطيها ليك..

نجوانا الحلوة..
أمس آية وبودي بالمسا كانوا متشاكلين وضربوا لي تلفون..
عارفة السبب شنو?

بودي قعد يلعب في البلاي ستيشن وحماها تلعب معاه!
وأنا عملت فيها ام فالحة عايزه تصلح..وتقنعه اللعب يكون مقسم وقته بينهم..
"ويخلي بتي" تلعب معاه..حركات زي دي يعني£

شوفتي حبيبتي... قلت لآية خلاص اديني اكلمه..بس حبيبي رفع السماعة وقال لي
بلهجة واضحة..

مشتاقين كالتو هبيبتي..

وانا نسيت كلامي العايزه اقوله وقعدت اضحك!

أولادي حلوين موش??

يارب نبارك ليك كل مايفرحك..تسلمي

شـكرا أخي سعادة السفير منان علي تهنئتك اللطيفة..
فكرت بأن غـدا يوم الحب..ياتري أعمل شنو لبودي وآية?

اشتري زهور وأمشي ليهم?
ولا أعزمهم عشا في مطـعم?
ولا أعزمهم عشا في البيت?
زمان الواحد كان بيجيب وردة واحـدة حمرا وخلاص..
ولا بالكتير شوية قروش تاخدها آية وتطلع مع صاحباتها لسينما
ولا مطعم..
اسه شـوف جنس الحالة دي!

لكن أنا عندي فكرة..أعمل نفسي ناسية..إيه رأيك?

تحياتي للأسرة

منوني الحبيبة

لك كل الود والفرح الكبير

بفرحة الجميلة آية ،،

إن شالله تشوفي اولادها كمان

الله يهنئها يارب ،،

واكيد طالعة لأمها ،،

ذات الروح الجميلة ،،

متيييييييييييييين

Quote: ود

بنتي زوجة

أنا بقرانه ،،،،


محبتي الكبيرة ،،،،

Quote: متيييييييييييييين بنتي زوجة أنا بقرانه ،،،،

عقبال اولادك خـلودتي حبيبتي..

آية بقت شيطانة خـلودتي..عارفة عملت شنو?

دست وصلات البلاي ستيشن play station من بودي..علشان هو مابيديها فرصة تلعب معاه فيها!
وهو بعد مارجـع من الشغل جري علشان يبدا اللعب لكن مافي طريقة..في حاجات اساسية ناقصة..
كمان آية كانت مافي..انتظرها لما رجعت سألها..وطبعا نكرت..وطبعا هو برضه ماصدقها..
المهم جاري التفاوض علي تقسيم وقت اللعب بينهم حسب اوقاتهم الفاضية علشان الحاجات الناقصة
تظهر.. وطبعا التقسيم هايكون زي ماقسموا هم بينهم شغل البيت من طـبخ وغسيل ومكوي وغسيل
عـده ونظافة..

تفتكري هي دست الحاجات وين?

تسلمي خـلودتي

شـكرا اخوي محمد عبدالله هارون
نهنيك بالسمح ان شاء الله...

كل ما اشتاق لآية ارجـع للألبوم واتفرج علي صورها..


ممكن تتفرج معاي?

الف مبرووووك وتهانينا القلبية

إخيتي مني بت خوقلي

ربنا يكمل سعادتك بحصاد سنين مثمر

ويا سعادته ويا هناءه !!!!

بـ أم زوجة مثل " مني خوجلي "

مليارات المباركات لكِ ولهما

اللهم بارك لهما وبارك وفيهما
اللهم أجعل دارهم دار سعد
اللهم أرزقهم الذرية الصالحة
اللهم أجعلهم من البارين بوالديهم

آمين أمين

إسماعيل حميم

شفت ياسماعين اخوي..

أنا مرات كده بتجيني أفكار نظام معاكسة..
أقول اعمل فيها نسيبة مهمة ولها وقارها..
فاهم قصـدي..زي النسابة الزمان ديلك..
تكون الواحدة ماليه المكان بصحتها الجسـدية وكمان النظرية..
والأخيرة دي من نظرات العيون..البتكون متفحصة ومتجولة بتركيز علي العريس الغلبان..
وتنتهي فجأة برسالة ذات معني تصل له سـريعا ...يفهمها في الحال فيرخي جفونه علي عيونه
وهو ينكس رأسه قليلا..بينما يداه لا تكفان عن حماية بعضهما بالفرك المستمر!

ولا كمان اكون زي ماري منيب اشهر حماه..أخوف العريس كده من غير سبب مقنع للغير لكن مقنع
للحماه..
لكن المشكلة ..افكاري دي مابتستمر معاي اكتر من دقايق بكون نسيت فيها في اساسا جات في
راسي ليه..
وأول ما أشوف آية وبودي تصبح مشاريعي كلها ضحك ولعب معاهم!

يارب ياسماعين.. اولادك يكبروا كـده وينجحوا ويعرسوا ويجيبو ليك عيال يعضوك زي عضة ولدك
ليك اليوم داك>>

شكرا بشري سليمان..

عارف من يوم تهنئتك ومعاها الكسرات والحلويات وصلونا وإحنا نزداد عرضا!
وانا وآيه ماعارفين نتخلص من الوزن ده كيف مع انه الطرق معروفه..
نبطل أكل..
عارف... أنا جـد جد محتفظة لسه ببعض الحلويات والفواكه من عقـد آيه..تذكار!!

تسلم بشري وأسعد الله اوقاتك..

مبــــــ1000ــــــــروك لآيه يا مني ....

وربنا يديم ليكم الافراح...

خالص ودي وتهاني,,,,,

مبرول
بالرفاه والبنين والبنات
ودوام النعم

بالامس ظننت ان آية طفلة وديعة بريئة تمتاز بإمارات طفولة عجيبة وحينما تداخلت الام منى خوجلي في أحد بوستاتي أهديت الطفلة آية صورة طير الجنة وصوت ذلك الطائر الذي يوقظنا في الفجر. ولكي تبقى كذلك أهدي لطفلتنا العروس هذا الصوت مجدداً  وذلك الطائر حتى تظل آية تحمل إمارات البراءة في ناظرينا وهي بالكاد كذلك بالرغم اننا لم نراها  ومبروك لديكما الأم منى والابنة آية.

ومبروك لك يا آية

 

 

الاخت العزيزة منى

سلامات

والف مبروك للابنة العروس اية بزواج سعيد
وبالرفاء والبنين.

well done both
my sinecure congratulations to
you
aya
and her husband
well done grandma

lol
dr mustafa

Quote: والف مبروك للابنة العروس اية بزواج سعيد وبالرفاء والبنين.

لم تتصل بي آية اول أمس..ولم اتصل أنا لأنني فكرت بترك بعض المساحة لها
وعنـدما اتصلت بالأمس قالت..
وحشتيني ماما..
طيب حبيبتي..ليه أمس ما اتصلتي?
ردت..
جيت من بره تعبانه ونمت..ثم أضافت..
أوعي تفتكري ياماما اني مامشتاقة ليك لأني ما إتصلت بيك..
I love you mama



شـكرا دكتور مصطفي مني ومن آيه..يسعـدنا وجـودك دائما

وياعثمان محمدين .. آية مازالت طفلة لكنها طفله ناضجة..لها رؤيه عميقة للأشياء..
مازالت بالطبع شقية.. لكن شقاوة غير شقاوة ماكدونالد وكانتكي..
لا تأكل عنـدهم آية الآن فاللحم ليس حلال..

أسعد كثيرا عثمان عندما يطول ويتعمق الوداد بيننا.. وفيه تفاصيل مراحل من العمر..
عيـد ميلاد آيه وديك بيأذن كوكو كوكو...وضحكتها الصافية وهي تنادي صـديقاتها للإستماع اليه
وهي منتشية من كل الحب الذي هـديتموه لها..
احـداث تجعلني ابتسم من قلبي لوجودي معكم هنا..



شـكرا علي الببغاء الجميل ..وآذن الديك.. والشاشة المتحركة وشكرا أكثر علي كلمات التهنئة..

ربنا يسعدك والأسـرة..

Quote: مبروك بالرفاه والبنين والبنات ودوام النعم

المسافر..الولد الحلو شـديد ده ولدك?
ربنا يحفظه ليك ويكبره وينجح خطواته..

أولادنا نعمة من ربنا وحياه ليها معني مختلف..
وكل مرحلة في حياتنا يزداد جمال وجودهم حتي يصيروا هم كل شـئ..
و نصير نحن بعدهم في المقدمة التي لا يوجـد بها سـوانا!
في مرحلة..تصير كل الحلوي في المنزل..مهما كثرت.. من نصيبهم هم فقط !
وفي مرحلة اخري.. تصير ممتلكاتك من عطور وربما ملابس.. وأحيانا أحذية.. ممتلكاتهم
هم وعليك البحث عنها في غرفهم عند الرغبة في الإستعمال..

ثم تسمعهم وانت جالس يتبادولون الدعوات والعزومات فتسمعهم يقـولون..
ممكن يوم السبت تجي بيتي?
لم يعد بيتنا..بل بيتهم!

ومع كل ذلك هم نور الروح..

شـكرا المسافر علي المباركة اللطيفة..عقبال نبارك ليك كل ما تتمني..

Quote: مبــــــ1000ــــــــروك لآيه يا مني .... وربنا يديم ليكم الافراح... خالص ودي وتهاني,,,,,

شـفت يا ايهاب خميسي ده باااايخ!!

آية وبودي عندهم ضيوف في بيتهم بايتين معاهم.. وماهايقدروا يجوا يبيتوا معاي..
وأنا ما مبسوطة.. لأنه خلال الإسبوع مابيكون في وقت نتقابل فيه التلاته!

لكن برضه نعاين للجانب الحلو..

ماطبخت الليلة وبكره مابحتاج أطبخ..جنس كسل!

شـكرا يا ايهاب ربنا يحفظك ويسعدك...

ست الحبايب يا حبيبة


ياحنينة وكلك طيبة ألف مبروك فرح الصغيرة آية بيت سعادة وهناء يارب

كل سـنة وجميعكم بخير وكما تتمنون..





آيه في 1991

يا حبوبة مبروك

عمرها كم الان

تسلمي يا حبيبة

بقي نشوفك انتي عروسة قريب يلا

Quote: عمرها كم الان

She is eighteen habibti

كيفك طـوفي?
طبعا امس كان الخميس..يوم اسرتي الصغيرة أولادي يعني..
بس آيه قضت وقت كتير تتكلم فيه مع صاحباتها..
بكرة زواج واحـدة صاحبتها والإستعدادات علي قدم وساق..
بس أكتر حاجة استغربت ليها لما قالت لي..
ماما أنا بكرة ماشية السوق اشتري فستان سهرة ..علشان كده ماهأقدر اقعـد معاك بكره الجمعة..

طبعا ياطوفي حبيبتي استغربت جدا..لأنه آية مابتلبس فساتين ..ممكن بنطلونات وبلوزات طـويلة
أو عبايات..

فستان تعملي بيه شنو ياآية?

ألبسه ياماما!

لكن يا آية انتي مش محجبة? فساتين السوق كلها مابتنفع معاك!

آية قالت هاتشتري فستان سهرة بدون أكمام..
وأصلو الحكاية الحفلة نساء بس..
بيكونوا لابسين لبس السهرة تحت العباية..ولما يقعدوا مع بعضهم بيطلعوا العبايات ومادام
مفيش رجال مابيكون في مشكلة..

شكرا طـوفي ويارب تفرحي بأولادك ودائما سعيدة

منى
مبروك العيد
ومبروك الجديد
ومبروك لينا وجودك هنا
لك ود كبير
ولايه ايه
احترامي
وودي
نورالهادي

تهانينا لآية ولك ولزوجها وجيمع الأهل والأحباب والأصدقاء بمناسبة الزواج السعيد.

ثم تهانينا لك ولجميع زوارك ههنا بالأعياد جميعها، سائلين الله أن تعود علي آية وعليك وعلى الجميع وقد حل الفرح الآتي مكان أحزان هذا الزمان المحتشد بالحياة القلقة، ليكمل أفراحك ويزيدها ويزيدك وآية ألقاً فوق ألق.

Quote: تهانينا لآية ولك ولزوجها وجيمع الأهل والأحباب والأصدقاء بمناسبة الزواج السعيد. ثم تهانينا لك ولجميع زوارك ههنا بالأعياد جميعها، سائلين الله أن تعود علي آية وعليك وعلى الجميع وقد حل الفرح الآتي مكان أحزان هذا الزمان المحتشد بالحياة القلقة، ليكمل أفراحك ويزيدها ويزيدك وآية ألقاً فوق ألق.

آمين دكتور حيـد ويسعـد بأبنائك وزوجتك وتشوفهم دائما سـعداء..آمين



ماما جـارة جات من السودان آية وبودي جـو علشان يحضنوها ويفرحـوا بيها..
قضينا يوم السبت بالمساء في ضحك وونسة ومامعروف مين بيتكلم ومين بيسمع..
وكمان المسجل شغال..
بودي وآيه كان معاهم واحـد صاحبهم..طبعا مشيت أنا حضرت ليهم العشاء والحلويات..وهم قاعدين مبسوطين باللمه..

ماما جارة قالت لي بقيتي نسيبه جـد جد!!

Quote: منى مبروك العيد ومبروك الجديد ومبروك لينا وجودك هنا لك ود كبير ولايه ايه احترامي وودي نورالهادي

يوم الخميس الفات آية جاتني وهي في طريقها للكلية..
بعد ما اتونست ..اعتذرت بانها ماراجعة للبيتان معاي..

ليه حبيبتي؟

علشان بكره الصباح صاحبتي ماشيه معاي الجامع عايزه تشهر اسلامها

منو فينا ياربي أم التاني؟

ربنا يحفظك يا آية
انا بحبك شديد


ربنا يخلي ليك أولادك يا نور ويفرحك بيهم

مهم كبر الولد او كبرت البنت فانهما يبقيان
ذلك الطفل او تلك الطفلة حتي ولو بلغا من
العمر عتيا

الف مبروك مرة اخري حيث قمت بالتهنئة
في بوست سابق

الاخت العزيزة منى عوض خوجلى
الف مبروك خلت العنوان السابق مجرد مزحة
الفى مبروك مجددا لابنتك آية
وعقبال ما نشوفك حبوبة بالجد قريبا
ضياء الدين ميرغنى

أنا زمان قلت ليك عشان تبقي حبوبة

لازم تغيري اسمك من منى الى (بت المنى)

لها ولك الأماني العذبة
.
.
أحر التهاني القلبية.،

شمس التهاني اشرقت انوارها
ونسيم روضات المسرة فاح
فاذا الليالي تكرمت بحضوركم
تمت السرور وعمت الافراح
العزيزة منى
تهاني القلبية لك ولصغيرتك اية
وبيت مال عيال
وكل سنة وانت طيبة
وانشاء الله اية تبقي
حبة رشاد وتملأ البلاد
قولي امين..
حليمة

Quote: شمس التهاني اشرقت انوارها ونسيم روضات المسرة فاح فاذا الليالي تكرمت بحضوركم تمت السرور وعمت الافراح العزيزة منى تهاني القلبية لك ولصغيرتك اية وبيت مال عيال وكل سنة وانت طيبة وانشاء الله اية تبقي حبة رشاد وتملأ البلاد قولي امين.. حليمة

ليما الوعد..
ايه رأيك في بوست عن قوة شخصية أبناءنا والعمليه في طريقة افكارهم?
يارب تفرجي بأسرتك كلها ويفرحوا بيك..



آيه وبودي يوقعون علي اوراق عقد القران ومعهم المأذون..

شكرا حبيبتي

شكرا أخي اسماعيل وراق ..ربنا يسعـد أيامك وايام البتحبهم



آية وانا والمأذون يوم عقد القران..

فاروق ..اسم مني ده احسن حاجه فيه بينفع لكل المراحل بما فيها مرحلة الحبوبة..
المشكلة مافي الإسم..المشكلة فيني أنا!
لأني مرات بشعر بنفسي أصغر من آية وبودي..
في الأول هو كان ماعارف يتصرف معاي كيف لما أهظر معاهم..تلقاه مسكين ماعارف يعمل شنو معاي..
آية تعاين ليه وتعاين لي وتضحك..
لما آية ربنا يديها بيبي بإذن الله..هاعلمه يتكلم "شـايقي" وأجنن ليك أمه وأبوه..



شـكرا فاروق تسلم لينا كلنا

Quote: الاخت العزيزة منى عوض خوجلى الف مبروك خلت العنوان السابق مجرد مزحة الفى مبروك مجددا لابنتك آية وعقبال ما نشوفك حبوبة بالجد قريبا ضياء الدين ميرغنى

الليلة عيدميلاد بودي زوج آيه



Happy Birthday Boody

الليله يبقي عمره 19 سنه ... أكير من آية بشهرين..
الاجيال الجديدة تري اي فرق في العمر يتعدي العام بين الأزواج فرق غير ايجابي..
شكل تحمل المسئوليات والأوليات عندهم مختلف.. وما اراه أنا اساسي يروه هم شيء لآ معني له..
تعجبني طريقتهم العملية في النظر للأشياء والتعامل معها..



تسلم ضياء…ربنا يفرحك بكل ما تتمني

مهم كبر الولد او كبرت البنت فانهما يبقيان
ذلك الطفل او تلك الطفلة حتي ولو بلغا من
العمر عتيا

الف مبروك مرة اخري حيث قمت بالتهنئة
في بوست سابق

كلامك صح عمر علي
انا مرات بنسي انه آيه اتزوجت وبقت ليها حياه مختلفه
تكن انا ماقادرة اشوفها زوله كبيرة لسه..مرات أحب اسألها سؤال أقوم اتذكر في آخر لحظه انو مالمفروض أسأل كتير..
آيه لسة بالنسبه لي طفله تاكل البطة في البحيرة .. ترقص بطفولة.. وتفرح بمصروف نهاية الاسبوع وبماكدونالد وببيرجر كينج..



شكرا يا عمر علي تهنئتك مرتين...
فرحنا في المرتين و نفرح في أي مرة نشوفك فيها تاني..ربنا يسعدك وأسرتك وكل من تحب..

الاستاذة Muna
الف الف مبروك ..
وربنا يديك العافية وتفرحى باولاد اية..

عوض حمزة

مني

أيه طفلتي زوجه

خفتي من اسع يا حبوبه ( الكبر جا)


ربي يسعدها ان شاء الله ويخليك ليها

Quote: أنا ما ارتحت الا بعد ما مشيت ليها بالليل في بيتها وشفتهم الإتنين!

داير اقول ليك "نسيبة السواد"، تانى قتّ كدى انّبارك أول.


مبروك عرس البنية...

وانشالله بيت مال وعيال....

وربنا يهدّى سرهم.....

وينجّى العريس من الكتابة....

والزيارات الليلية......

الأخت منى
تحياتى
شكرا على كلامك الجميل البهناك . .
بالمناسبة : بقيت أعرف أعمل (Quote) !
والدليل :

Quote: آية قالت عملت شعرية الليلة براها.. قلت ليها اشتريتي السمنة من وين? قالت سمنه لشنو! تكون عملتها بشنو ياعلي الحسن? كل سنة وانت طيب..

عاد ده سؤال يا منى . .
ده جيل ما بتحير . .
أكيد ( سيحت ) الزبدة !

فعلا ياعزان مابيتحير..بيجري يشتري الأكل جاهز!
اسه لما اسألهم نفسهم ياكلوا شنوا يقولوا لي ماتطبخي بنجيب بيتزا..
أنا مابحب البيتزا بصر اطبخ..معقولة الناس تاكل طوالي بره?!
من اقول مصرة طـوالي هو يقول ملوخيه..وهي تقول مكرونه بالباشميل!



تسلم عزان

Quote: داير اقول ليك "نسيبة السواد"، تانى قتّ كدى انّبارك أول. مبروك عرس البنية... وانشالله بيت مال وعيال.... وربنا يهدّى سرهم..... وينجّى العريس من الكتابة.... والزيارات الليلية......4

أهلا تبارك..
اول مرة قريت كلامك ضحكت كتير..اتخيلت نفسي كده بتدخل في كل حاجه وعامله زيارات هحوميه عليهم..
لكن عارف يا تبارك..احنا اتربينا بطريقه أنا شايفاها شويه غريبه..
عيب تمشي زيارات بدون سبب..عيب تمشي لنسابتك بدون سبب..واذا مشيت تخفف من قعدتك..
حاجه غريبه.. مع انه أزواج أخواتي بالنسبه لوالدي ووالدتي زي أخواني بالضبط ..والبساط أحمدي
لكن كان دابما في حدود في المشي لبيوتهم..هم دايما البيجو..
أنا واخده من أهلي نفس الطبع..آيه وبودي هم البيجو عندي باستمرار ويبيتوا معاي خميس وجمعه..
أنا مشيت بيتهم مرتين بس!
علي كل حال مضطره أمشي يوم أبيت معاهم.. لأنهم مصرين أمشي أقعد معاهم كام يوم!



شكرا علي مباركتك..أسعدتني كثير..

مرحب تبارك ..
شوف نحنا ربونا كده تربيه غريبه..عيب تمشي عند الناس!
أسه مابنمشي عند الناس الا في الشديد القوي..

داير اقول ليك "نسيبة السواد"، تانى قتّ كدى انّبارك أول.


مبروك عرس البنية...

وانشالله بيت مال وعيال....

وربنا يهدّى سرهم.....

وينجّى العريس من الكتابة....

والزيارات الليلية......

وعلي الرغم من انه بيت بتي مابيت ناس أغراب..لكن انا لسه بتعامل بنفس الحساسيه..
تصدق رغم التحانيس بخجل أمشي هناك?
بس كويس هم خميس وجمعه بيبيتوا معاي..وكلنا يوم السبت في البيت الكبير..زي زمان ماكنا
بنعمل في السودان..
عارف زمان كنت ساكنه بورتسودان لمدة 4 سنوات...
أمي بعد تحانيس.زارتني مره واحده بس..ووالدي زارني برضه مره واحده وقد نهار يوم واحد بس..
في رأيهم عيب تمشي عند النسابه بدون سبب..ولما يكون في سبب..يبقي الزيارة لازم تكون خفيفه!
ودلوقتي ازواج أخواتي مابيغيبوا من البيت الكبير ..أمي أمهم..علي الرغم من قلة زياراتها
لهم في بيوتهم..

وأنا خلاص برضه طبعي كده..أسه انا مشيت لآيه في بيتا مرتين بس لغاية دلوقتي..آيه بتحنسني
أمشي أقعد معاها يومين..إمكن امشي وامكن اقول لأ عيب..ده بيت نسابه!

يارب تفرح بنفسك وأسرتك وحبايبك كلهم دايما..



اسعدتني تهنئتك وأضحكتني كلماتك كثيرا..شكرا

Quote: مني أيه طفلتي زوجه خفتي من اسع يا حبوبه ( الكبر جا) ربي يسعدها ان شاء الله ويخليك ليها

شكرا يا سيف ..ربنا يسعدك بأولادك

الأخت منى خوجلي ، أولا مبارك هذا الزواج وجعله الله زيجة خير وبركة ومتعك الله وبهج عينيك ببنتك ، وتمر الأيام سريعا وأنا كنت أظن نفسي ما زلت شابا يافعا ولكن أدركت هذه الحقيقة مرارا وتكرارا عندما يقوم لي أحدهم في الحافلة حالفا بالله " تعال اقعد يا خال " وكنت لحظتها اغتاظ جدا من قيام أحدهم إلى بحجة أنني أكبره سنا ، ولكن أدركت تماما ماتفعله"كريت في القرض تجده في جلدها" فهذا ماكنا نفعله بمن يكبرنا سنا في ا لسبعينات والثمانينات من القرن الفائت هاهي الكرة ترتد إلينا في ملعبنا....

وفي هذا العيد كان عمي يمزح معي بأنه لن يزوج بنته لأحد إلا بعد إجراء اختبارين أوليين :
- أن يتوضأ العريس جالسا على ركبتيه .
- وأن يلبس بنطاله واقفا على رجل واحدة .

فتبرع أحد اخوتنا باجراء هذه التجربة فوقع أثناء وضوئه فقال أجرب الثانية فقال له عمنا " زمنك فات وغنايك مات " ، ولكن كل هذا كان من قبيل المزاح والنكتة فالحياة قيمتها في أن نستثمر أوقاتها وأنا منذ الآن خططت لاستثمار خريف عمري في اشياء كتبتها بخط يدي وآمل أن يأتي هذا الخريف وأنا وأنتم في صحة وعافية ... فالعمر قيمته في أن نعيشه كبشر حقيقيين نفرح لما يفرح ونبكي لما يبكي ...... وهكذا تستمر الحياة ...

وكل عام وانتم بخير ..

Quote: الأخت منى خوجلي ، أولا مبارك هذا الزواج وجعله الله زيجة خير وبركة ومتعك الله وبهج عينيك ببنتك ، وتمر الأيام سريعا وأنا كنت أظن نفسي ما زلت شابا يافعا ولكن أدركت هذه الحقيقة مرارا وتكرارا عندما يقوم لي أحدهم في الحافلة حالفا بالله " تعال اقعد يا خال " وكنت لحظتها اغتاظ جدا من قيام أحدهم إلى بحجة أنني أكبره سنا ، ولكن أدركت تماما ماتفعله"كريت في القرض تجده في جلدها" فهذا ماكنا نفعله بمن يكبرنا سنا في ا لسبعينات والثمانينات من القرن الفائت هاهي الكرة ترتد إلينا في ملعبنا.... وفي هذا العيد كان عمي يمزح معي بأنه لن يزوج بنته لأحد إلا بعد إجراء اختبارين أوليين : - أن يتوضأ العريس جالسا على ركبتيه . - وأن يلبس بنطاله واقفا على رجل واحدة . فتبرع أحد اخوتنا باجراء هذه التجربة فوقع أثناء وضوئه فقال أجرب الثانية فقال له عمنا " زمنك فات وغنايك مات " ، ولكن كل هذا كان من قبيل المزاح والنكتة فالحياة قيمتها في أن نستثمر أوقاتها وأنا منذ الآن خططت لاستثمار خريف عمري في اشياء كتبتها بخط يدي وآمل أن يأتي هذا الخريف وأنا وأنتم في صحة وعافية ... فالعمر قيمته في أن نعيشه كبشر حقيقيين نفرح لما يفرح ونبكي لما يبكي ...... وهكذا تستمر الحياة ... وكل عام وانتم بخير ..

العمر بيجري يا أنور الطيب..
يجري وانت غافل..ولا انت ما مهتم..
ونحنا ناس متخصصين في الندم علي مافاتنا..
عارف..أي حاجه حلوه تلقاها حصلت زمان...وتلقي انها ساعة ماكانت بتحصل انت ما كان عندك
احساس قوي بروحها وأهميتها!
لكن التحسر علي العمر مابيرجعه.. ومافي طريقه تحس بالحياه أحسن غير انك تستثمر اللحظه
وتعيشها لو قدرت بقوه احساس من تيقن أن أي لحظه بتمر ما بترجع..




فكرتك للكتابه لخريف العمر فكره جميله.. ومتأكده نتيجتها بعدين هاتملاك رضاء وراحه..
وهتقول ساعتها..لقد فعلت بحياتي أشياء كثيره..ووثقت لها في تجاربي التي أهديها للأنسانيه..
وما خلقني الله الا لأتركها تتحدث عني عندما أذهب..

شكرا أنور ..شكرا علي التهنئه وعلي المساهمه الرفيعه..

Quote: الاستاذة Muna الف الف مبروك .. وربنا يديك العافية وتفرحى باولاد اية.. عوض حمزة

تسلم عوض حمزه أخوي..

اول امس يوم 12 مارس كان يد ميلاد بودي..انا عيد ميلادي بعده بيوم 13 مارس..
قلت ليه انت اكبر مني بيوم..يا انا.. اصغر منك بيوم!
الولد اتهجم وقعد يضحك ..

أنا خفت يكون افتكرني قاصده فعلا أصغر نفسي..خليته نادي آية حكي ليها وهو ميت علي نفسه من الضحك..وهي كمان قعدت تضحك..وقعدت انا ذاتي أضحك

اخليهم في الضحك.. وفي نفسي قلت ليهم..

أما صحيح عيال!



ربنا يسعدك عوض وينور ليك طريقك

Quote: الاستاذة Muna الف الف مبروك .. وربنا يديك العافية وتفرحى باولاد اية.. عوض حمزة

إزيك يا عوض حمزه..
انت ليه مابتجي الويب كتير?
يارب نبارك ليك كل مايفرحك.
.وعلي فكره..
أي حاجه تفرحك بتفرحنا..



شكرا أخوي عوض علي تهنئتك اللطيفه

منى يا حبيبة ..
ألف ألف مبروك لآية وزوجها
وربنا يسعدهم ويهنيهم ببعض ..

وعقبال ما تشوفي أطفال طِفلتك .. يا أحلى ( حبّوبة)

منمن

يعنى حالفة ماتجيبى لينا صورة آية وعريسها.. ياخ ؟!!

منى

أولاد بنات أخواتي الكبار قبل عشرة سنين كانوا بنادوني

(جدو فاروق) قامت أم ناصر نهرتهم ليك نهرة لمن أنا ذاتي

خفت ... ياأولاد جد شنو الفالقننا بيها حسع ده شكل جدو ...

قالوا ليها طيب نقول شنو ياخالتو؟؟؟ قالت ليهم قولوا خالو...

قالوا ليها لكن ماما بتقول يا خال ... فأسقط في يدها ... قالت

ليهم خلاص قولوا بابا فاروق ....

وبس من يوم داك وأنا بابا فاروق !!!

حسع انت تمنعي منعا باتا أي واحد يقول حبوبة

حتى أولاد آية ذاتهم !!!!!!!!

أستاذة منى كل سنة وانتى والأسرة بألف خير وعافية

ألف مبروك لآية وربنا يتمم بخير

دمتى
وليد طه

أم العروس 00 منى

ألف مبروك 00 ألف مبروك 00 ألف مبروك 00 ألف مبروك
وهكذا الحياة تداهمناولا تكتفي بنهب طفولتنا بل حتى تأخذ طفولة
بناتنا وأبنائنا في غفلة منا 00

نتمنى لها بقلوب صادقة وأكف تتضرع للمولى عز وجل في هذه
الأيام المباركات أن تنعم بالسعادة والأستقرار في عش ذهبي أبدي
وأن يرزقها الله بالبنين والبنات ويملاء دنياها فرحا وسعادة دائمة

مبروووك لآية .. وأجمل المنى لها بحياة زوجية سعيدة
موفقة ..

منى
..
آلاف التباريك
لآية...
محفوفة بأزهى
الدعوات
بحياة مليئة
بالحب والهناء




دمتي..

الف مبروك يا استاذة مني
ليك و لي اية بنتك
و انشاء الله حبوبة

و كل سنة و انت بخير

ألف مبروك لآية يا منى ..
ربنا يهنيهم ويسعدهم ..

ماشاءالله

ألــ1000ـــف مبروك يا منى

وألف مبروك لآية العسولة

وبيت مال وعيال

العزيزة منى خوجلي


أهنئ نفسي قبلك بزواج أبنتنا الأميرة الحلوة آية . خبير سعيد ومحزن في آنٍ واحد .

سعداء جداً بزواجها وتعساء أكثر بفراقها .

( يا حبوبه السنون وقعت ولا لسه )


لك ودي . وســلام .

All praise is due to Allah
Thank you very much for congratulating us.
Your presence here made us extremely happy
We really appreciate and will never forget it
Salam

Aya and Budy as mama calls him

للأم آيــة
وللبنت المنى
دمتم نصا ولحن
ولنا الغناء
نورالهادي

الف الف مبروك مرة ثانية يا منى
وربنا يسعدها ويهنيها
وعقبال ما تبقى حبوبة بالجد جد

محبتى ..

منى الحبيبة
مليون مبروك للحبوبة الحبيبة آية و لزوجها المحظوظ
دي لآية
ودي لزوجها
وديل ليكي

سلام يا منى وألف ألف ألف مبروك لآية وبيت مال وعيال

انشاء الله دايماً الأفراح عامرة في بيتك

salma subhi

مبروك يا منى لبنيتك، نتمنّى ليها بيت جميل
بعدين ما تهرشي من كلمة "حبوبة"
المفردة دي ومعاها "جدي" أهم مرتكزات ثقافتنا السودانية
وتاني مبروك وبخيت

نفرح بآيه وانشاء الله ربنا ابارك ليها في زواجها ويهنيك بيها

تحياتي

امين

بالأصالة عن نفسي وبالنيابة عن أخي عزيز أحمد كامل يوسف
نسجل حضورنا هنا مهنئين للأبنة آية وعريسها بودي..
وبالرفاه والبنين وإن شاء الله تشوفي أولاد أولادهم.. آمين

لآي ولزوجهاه احلى المنى بكل جميل ورائع وللماما الجميلة مديد العمر وموفور الصحة وراحة البال
جنى

جينا نسلم علي نسابة ولدي

مبروك يا منى لاية
وعقبالي ان شاء الله




ايمان

الف مبروك لآية وانشاء الله بيت مال وعيال

أصيــل

منى يا عزيزة..

مليون مبروك لبتنا آية..








وربي يهنيها مع عريسها..

طــبعــا أنـــا جــايي الطــيـش في البوسـت الفرايحي ده بوست بتي

الأمورة آيــــه و كنت دائم السؤال عنها في كثير من مداخلاتنا كيف لا

وهي بنيتنا وبما انه أدرجنا اسمنا متاخرا فيستحسن نجمل كلامنا

بالسؤال عن آية وزوجها وعساهم طيبين وتفرحي بالأحفاد ياستي منى .



لـــك مني كـــل الــــود




صــــــلاح واســــــبه

الف الف مبروك وبيت مال وعيال

بس ماتنسي تخلي لينا واحده لصفصف (مصطفى)



اسف لعدم رؤيتي للبوست الاول وللتاخير في البوست دا وانت ادرى عندما الواحد يكون في حضن الام



ابومصطفى

منى..

البوست ده لي فترة شايفاه ..و كلما ما أقول أجي أفتحو..ما ألقاه..و المواضيع في الصفحة الأولى ما شاء الله!

أها الليلة قمت فتحتو..

و (اتهجمت) أنا كنت قايلة العنوان من النوع (الفشينك)..

بعدين و أنا بقرأ في كلامك في البوست ده اتذكرت اني شفت عنوان منى خوجلي حبوبة..و كنت فاهمة انو (حبوبة) الإتنين بتكتبوا نفس الشي..و النطق و المعنى مختلف!!

غايتو يا منى..أنا لسة بلملم في الدهشة اللي اتشتتت هنا..و سامحيني..

هي آية بت متين؟

هو انت ذاتك بت متين؟

ما شاء الله ما شاء الله ما شاء الله..

يا ربي يحرسك و يحرس آية من العين..

و يسعدكم كل يوم و كل لحظة..و تشوفي أولادها و أحفادها يا رب..

و الله فرحانة ليها شديد..و فرحانة ليك انت أكتر..لأنو رغم انو بعادها عنك ما ساهل..

لكن كده انت مطمئنة عليها..خاصة و انها ما شاء الله شكلها لقت انسان أخلاقو حلوة و دينو قوي

و ديل في الغربة عملة نادرة!


الله يحفظكم يا رب..و مية مليون مبروك..

منى..

البوست ده لي فترة شايفاه ..و كلما ما أقول أجي أفتحو..ما ألقاه..و المواضيع في الصفحة الأولى ما شاء الله!

أها الليلة قمت فتحتو..

و (اتهجمت) أنا كنت قايلة العنوان من النوع (الفشينك)..

بعدين و أنا بقرأ في كلامك في البوست ده اتذكرت اني شفت عنوان منى خوجلي حبوبة..و كنت فاهمة انو (حبوبة) الإتنين بتكتبوا نفس الشي..و النطق و المعنى مختلف!!

غايتو يا منى..أنا لسة بلملم في الدهشة اللي اتشتتت هنا..و سامحيني..

هي آية بت متين؟

هو انت ذاتك بت متين؟

ما شاء الله ما شاء الله ما شاء الله..

يا ربي يحرسك و يحرس آية من العين..

و يسعدكم كل يوم و كل لحظة..و تشوفي أولادها و أحفادها يا رب..

و الله فرحانة ليها شديد..و فرحانة ليك انت أكتر..لأنو رغم انو بعادها عنك ما ساهل..

لكن كده انت مطمئنة عليها..خاصة و انها ما شاء الله شكلها لقت انسان أخلاقو حلوة و دينو قوي

و ديل في الغربة عملة نادرة!


الله يحفظكم يا رب..و مية مليون مبروك..

Quote: آيه طـفلتي....زوجـه!

الف الف الف مبروك يا حبيبة الكل وربنا يطول في عمرك وتشوفي

أحفادك كمان بتزوجوا وبرضوا ساتظلي مني خوجلي بإبتسامتك الرائعة

التي تعودنا عليها ( مش صورة قرد ) يعني المنبر ناقص . كما تقبلي

مباركة زوجتي ( أم أحمد ) صديقتك الجديدة وربنا يديم المعروف بيننا .

الحبيبة منى

الف مبروك لاية..

رقبناها هنا و هى تكبر
.
.

عيد ميلاد عام بعد عام
.
.

و ها هى اليوم زوجة

الف مبروك لك و لها

كل الحب

غادة