Post: #1
Title: عاجل : المناضلة مريم عزالدين صديق تتحدث اليكم من الخرطوم**
Author: خضر عطا المنان
Date: 12-04-2004, 11:43 PM
عن تفاصيل وظروف اعتقالها
وعن حقيقة ما جرى لها كاملا
ستتحدث اليكم بعد قليل المناضلة وزميلتنا
بالمنبر الحر ( مريم عزالدين صديق )
مباشرة من الخرطوم
فلنحييها جميعا أولا .
ثم نستمع اليها شخصيا من هناك.
لكم محبتي جميعا.
خضر عطاالمنان
|
Post: #2
Title: Re: عاجل : المناضلة مريم عزالدين صديق تتحدث اليكم من الخرطوم**
Author: lana mahdi
Date: 12-04-2004, 11:44 PM
Parent: #1
فى الانتظار
شكرا
|
Post: #3
Title: Re: عاجل : المناضلة مريم عزالدين صديق تتحدث اليكم من الخرطوم**
Author: قلقو
Date: 12-04-2004, 11:49 PM
Parent: #2
اهلا بالمناضلة مريم..
ولى قدام.
|
Post: #4
Title: Re: عاجل : المناضلة مريم عزالدين صديق تتحدث اليكم من الخرطوم**
Author: زهرة حيدر ادريس
Date: 12-05-2004, 00:06 AM
Parent: #3
مريم
المعتقلات يا عزيزتي لا تزيد الثوار الى صمودا
منك التحايا لرفقاء الدرب في المعتقلات في الاراضي اريتري
الصامدين
عوض بوب .. امير بابكر ... مجدي سيد احمد ... حسام النميري ... الصادق بشارة ... ياسر ود الشيخ ... وبقية عقد الشرف و الصمود
لكم جميعا انحنائنا في زمن انحت فيه القامات للاقزام ، لكم انحنائي وانا اشعر بالشموخ بكم
زهرة
|
Post: #5
Title: Re: عاجل : المناضلة مريم عزالدين صديق تتحدث اليكم من الخرطوم**
Author: خضر عطا المنان
Date: 12-05-2004, 00:57 AM
Parent: #4
مريم: أزيك يا أستاذ.. أنا مريم من الخرطوم
مريم عز الدين شخصيا .. يامرحب بيك..والف حمد لله على السلامة ..
وطبعا انتو القابضين على الجمر يا مريم في الداخل .
مريم : والله يا استاذ يعني الواحد ماعارف يقول ليك شنو .. طبعا قريت البوست بتاعك
القيم .. قريت كل المداخلات من اخواتي واخواني كلهم وانا بشكرهم كلهم .. فأنا حقيقة عاجزة عن الشكر .. وبالمناسبة ومن خلال سياق البوست العملتو انت كانت قرايتك من البداية صحيحة مية في المية .. انو كان كل أسئلتهم محورهاالاساسي المناضل عبد العزيز خالد فعلا .
لا .. يا ستي .. نحن ماعملنا اكتر من واجبنا..بس بصراحة كل الناس هنا في لهف شديد
عايزة تعرف ـ منك انتي شخصيا ومباشرة ـ تفاصيل وحقيقةما جرى وليه؟؟ وكيف ؟؟؟
وعشان شنو ؟؟.......الى اخر تلك الأسئلة ؟؟؟؟؟؟؟.
مريم : انا أقول ليك ياأستاذ الحصل كلو ..
يا ريت ... أتفضلي
مريم : الواقع انو الجماعة ديل حملة عبد العزيز خالد في الداخل هنا عاملة ليهم ازعاج وقلق شديد جدا.. ودي حكاية بقت حديث الشارع هنا .. وواضح انو حكاية وصول القضية دي
للشارع هي اقلقت منامن ..
أخت مريم طبعاياريت نبدأ كيف حصلت عملية اعتقالك وما تبعها من تفاصيل حتى اطلاق سراحك؟
مريم : ايوا .. الجماعة ديل جوني في البيت يوم الخميس الفات .. وما لقوني لاني ما كنت موجودة .. رجعوا واتصلو هاتفيا وما لقوني برضو .. بعدين واضح زي ماقالوا لي عند التحقيق انو جيتم البيت دي كانت عشان الاعتقال بعدين شافوها شوية يمكن تكون محرجة امام الأهل وكدا .. فانتظروني يوم السبت في المكتب داخل المستشفى .. وهناك كان معاهم المرة دي أمر مكتوب من الجهات المعنية باعتقالي .. بعدين قاموا اتعهدوا لرئيسي المباشر في المكتب انو حناخدها وان شاء الله ترجع ليكم حالا ..
هناك طبعا بدا التحقيق معاي .. في الأول كان معاي طبيعيين وقالوا لي انتو البتعملو
فيهو دا بضر بالبلد وما صاح .. وانتو عارفين انو دا ممكن يكون ليهو تأثير مباشر على مفاوضات السلام الجاريةحاليا سواء مع ناس التجمع في القاهرة اومحادثات نيروبي او نيفاشا.. ودي كلها عمليةجارية في صالح البلد زي ماعارفين ..
ياريت تحكي لينا ـ أخت مريم ـ كيف كان الجو اثناء الاستجواب وكم استغرق من وكت معاك ؟؟
مريم : زي ماقلت ليك كانت بداية عادية .. طبعا حاولو يعني باساليبهم المعروفة ديك .. شوية شوية دخلو معاي في تهديدات وعد ووعيد .. وانهم هم عارفين اني انا عضو نشط في حملةاطلاق سراح عبد العزيز خالد .. وانو اذا ما وقفتو البتعملو فيهو حيكون لينامعاكم كلام تاني .....الخ .
المهم بقيت في سين وجيم تقريبا 3 ساعات متواصلة .. وطبعا فتحو محضر باسمي عندهم
وقالوا لازم نحن نرجعك مكتبك ولكن مش عشانك انتي ولكن عشان وعدنا وتعهدنا لريئس مكتبك
في المستشفى ..
طيب أخت مريم يعني كان اطلاق سراحك عشان بس وعدهم لرئيس مكتبك واللا ما لقو حاجة ضدك مثلا ؟؟ بصراحة كدا ؟
لا أبدا يااستاذ .. هم عارفين انو انا فعلا من النشطين الفاعلين في موضوع عبد العزيز خالد .. وفعلا لو ما تعهدهم لرئيس مكتبي ماكانو ناوين أبدا يطلقوا سراحي ..
وقالو لي انو انتي الان لازم تعرفي انو نحن عندنا الحق في اعتقالك في اي لحظة
لو مشيتو في الطريق دا .. وانتي من اليوم حتكوني مراقبة .. ونحنا بنقول ليك
بصراحةاعملي حسابك .. وحكاية عبد العزيز خالد لازم تنسوها .. لانو هو الان القانون
البقول فيهو رايو مش انتو في الشارع .
نواصل الحوار ..............
|
Post: #6
Title: كلام محل نظر يا مريم!
Author: lana mahdi
Date: 12-05-2004, 01:01 AM
Parent: #1
| Quote: وفعلا لو ما تعهدهم لرئيس مكتبي ماكانو ناوين أبدا يطلقوا سراحي |
ديل
لا ذمة
لا عهد
يا مريم
وليس لهذا أطلقوا سراحك
هم" نايمين على راى"
وستتكرر تلكم الاستدعاءات و هاتيك الاستجوابات!!!
|
Post: #7
Title: Re: كلام محل نظر يا مريم!
Author: Abdel Aati
Date: 12-05-2004, 01:08 AM
Parent: #6
التحية للمناضلة مريم وكل المناضلات والمناضلين
التحية للعميد عبدالعزيز خالد في نعتقله
التحية لكل المعتقلين في سجون ومعتقلات النظام
التحية للمعتقلين في سجون ارتريا وسجونالمعارضة في ارتريا
|
Post: #8
Title: Re: كلام محل نظر يا مريم!
Author: Kostawi
Date: 12-05-2004, 01:18 AM
Parent: #7
مريم السمحة
|
Post: #9
Title: Re: كلام محل نظر يا مريم!
Author: Abubaker Kameir
Date: 12-05-2004, 01:46 AM
Parent: #8
التحية للاستاذة مريم و التحية لعبدالعزيز خالد و سلطة الجبهة الا اسلامية
البغيضة زائلة لامحالة حتي و لو طال الزمن
|
Post: #10
Title: Re: كلام محل نظر يا مريم!
Author: خضر عطا المنان
Date: 12-05-2004, 01:52 AM
Parent: #8
وتواصل الاخت مريم حديثها :
زي ماقلت ليك واضح من تفاصيل ما جرى معاي انو وصول قضية عبدالعزيز خالد للشارع مخوفاهم لحد بعيد .. لانو زي ما عارف الرأي العام فعلا بكون تأثيرو قوي وبشكل عليهم ضغط كبير .. وبعدين هم كانو واضح بقرو كل البتكتبوه انتو في المنبر خاصة ما تعلق
بعبد العزيز خالد ،، وبالمناسبة دي انا قريت حوارك معاه وكان فعلا يعني ممتاز وخلانا وكل الناس يسمعوا الحاصل ليهو على لسانو هو لانو كان هنا داير لغط كبير حولو ..
وبرضو لقيتو نازل في سودانايل ..
أخت مريم لو رجعنا لموضوع عتقالك ..
مريم : نعم .. طبعا هم بفتكرو انهم بالأساليب دي ممكن يوقفوا الحملة دي .. لكن بالجد
المسألة اتسعت شديد .. وناس الأمن شايفين الامر مقرب يفلت من يدهم خاصة في أركان النقاشات داخل الجامعات .. لا وحتى الشارع .. يعني تقدر تقول انو زي في نوع من التنسيق بين مختلف التيارات والقوى والطلاب ديل والشارع .. ودي حكاية مزعجةزي ماقلت ليك بالنسبة ليهم.
وكان من ضمن الاسئلة : ماهي علاقتك بقضية عبد العزيز خالد ؟؟
وبماانهم فعلا بقرو كل مايكتب عنو ربطو بيني وبين كلام كتبو الاسمو حنين دا في المنبر
وقال انك /انتم بتدعو لعقيدة عبدالعزيز خالد.. عشان كدا كان السؤال دا .
وخلال التحقيق كانوا مصرين على انو انا عضو في التحالف الوطني وانا في تنظيم عبدالعزيزخالد رغم اني حاولت اوضح ليهم بأنو اناكنت .. ولكن قبل الانقسامات الحصلت
في التنظيم .
وانا اقول ليك بصراحة الحاجة الضربتني حقيقة هي موضوع كلام حنين دا وطبعا مشاركتي الفعلية في الحملة .. لكن الشي الهم عارفنو وبحاولو يقللو من تأثيرو هو انو ماانا
براي الشغالة في حملة اطلاق سراح عبد العزيز خالد ..وانو ا لشارع كلو الليلة متضامن
مع الحملة .. وواضح انو هم شايفين انو كل يوم الحملة ماشة في توسع يعني بدأت في العاصمة والليلة في الاقاليم .. وطبعا انت شفت البوست النزلتو انا بتاع القوى السياسية في كسلا.. يعني القضية ماها حكاية الخرطوم بس زي ماهم برضو بحاولو احيانا
يوحو للناس بيها.. واقول ليك بصراحة الاقاليم متحركة بقوة في الاتجاه دا.
واقول ليك كمان هم كل همهم الان وقف الحملة بأي شكل من الاشكال,
ونواصل الحوار ............
|
Post: #11
Title: Re: كلام محل نظر يا مريم!
Author: شمهروش
Date: 12-05-2004, 02:04 AM
Parent: #10
Quote: ديل
لا ذمة
لا عهد
يا مريم
وليس لهذا أطلقوا سراحك
هم" نايمين على راى"
وستتكرر تلكم الاستدعاءات و هاتيك الاستجوابات!!! |
الاخت لنا اذا كان سيدك يستثمر الان مع حكومة الجبهة
تاكدي انهم لن يصنعوا من مريم بطلة ولا حتى عبد العزيز خالد
فقط من يصنع ابطال ونضال الورق هو خضر عطا المنان
بورشة نجارته بكوبنهاجن
فقد باركت الولايات المتحدة كل خطوات حكومة الانقاذ
يعني بالعربي نحنا رحنا في الرجلين
تحياتي الي نجار المناضلين اصحاب السجن خمسة نجوم
ولموزين افراس لترحيل جنابوا الحياني بي كابو
|
Post: #12
Title: Re: عاجل : المناضلة مريم عزالدين صديق تتحدث اليكم من الخرطوم**
Author: lana mahdi
Date: 12-05-2004, 02:07 AM
Parent: #1
| Quote: الاخت لنا اذا كان سيدك يستثمر الان مع حكومة الجبهة |
الاخ شمهروش اطالبك فورا بسحب كلمة "سيدك" هذه و لا تجنح ابدا للاستفزاز فهو درب سهل لكنه زلق
واذا احببت نقاشا موضوعيا و محترما فاهلا
والا
فلا
|
Post: #13
Title: Re: عاجل : المناضلة مريم عزالدين صديق تتحدث اليكم من الخرطوم**
Author: Hussein Mallasi
Date: 12-05-2004, 03:37 AM
Parent: #12
الاخ خضر؛
سلامات و كل سنة و انت طيب؛ و لو انها متأخرة جداً
لا اعرف لماذا لا تقوم الاخت مريم - و حمدالله على السلامة يا مريم -
بانزال بوست بنفسها تتحدث فيه عن تجربة الاعتقال و ما جرى لها
خلال تلك الفترة؛ ما دامت تتمتع بعضوية البورد مثلنا.
___
|
Post: #14
Title: Re: عاجل : المناضلة مريم عزالدين صديق تتحدث اليكم من الخرطوم**
Author: Hussein Mallasi
Date: 12-05-2004, 03:41 AM
Parent: #13
اوليست الاخت مريم عزالدين صديق؛ عضواً بهذا البورد ؟؟
|
Post: #15
Title: Re: عاجل : المناضلة مريم عزالدين صديق تتحدث اليكم من الخرطوم**
Author: خضر عطا المنان
Date: 12-05-2004, 03:42 AM
Parent: #12
وتواصل الأخت مريم حديثها :
الواقع ان حملة عبدالعزيز خالد يمكن روادها عبر مواقع الانترنت يكونوا محدودين مقارنة بالشارع هناوالمدن والاقاليم .. وهم من ضمن التهديدات الصريحةـ أثناء التحقيق معاي ـ انو انتي يا مريم لازم توقفي نشاطك الخاص بالحملة دي والا نحنا حنرجع ليك تاني ..
هنا عندهم نوعين من التعامل مع معارضينم : اما استدعاء ودا بتم بدون أي اذن قانوني
أو رسمي في كتير من الأحيان ..اواعتقال ودا في الغالب بكون باذن من جهاز الأمن نفسو .. فهم الظاهر كانوا ساعين في البداية لاعتقالي بس كدا يعني ممكن تقول يكون اعتقال من البيت وبدون اذن رسمي وهناك يتم الاستجواب .. لكن عدم وجودي في البيت وزي ماقلت ليك حكاية الاهل دي خلتم يرجعو ويطلعو الاذن ويجوني في المكتب .
وبعد ما انتهو من استجوابي ونحن في طريق العودة للمكتب قالوا لي بنوع من الاستفزاز انو حيكون بيناتنا لقاءات تانية وحنشوف !! يا انتو وقفتو العبث البتعملو فيهو دا
يا نحنا بعد داك بنعمل شغلنا!!!.
طبعا في النهاية انا بكرر شكري ليك يااستاذ خضر .. وان شاء الله نكون على اتصال ..
وقبل ما انسى سلم لي كتير على كل اخ وأخت وكل الوقفو معاي واشكرم كتير كتير ..
وقول ليهم ان شاء الله يوم شكركم مايجي ..
و بتقول ليكم كلكم مريم في النهاية ياها مريم.. والحق هو البنتصر ..
وفي رعاية الله .
** ** ** **
أنتهي حواري مع هذه الرائعة ممن يرفعن الرأس ـ وما أكثرهن ـ من بنات حواء في بلادي .
وان كان لي من تعليق ـ في هذاالمقام ـ هو ان في وطني من أمثال مريم ما لا تستطيع كل وسائل القمع الانقاذية أسكاتهن أبدا..
فأمنا( السودان ) هذه الجاثية على ركبتيها اليوم .. غدا ترفع هامتها فوق أعالي السموات وتتسامى فوق رأس الشمس عزا وشموخا ورفعة .
والى لقاء آخر مع مناضل أو مناضلة من أولئك القابضين على الجمر هناك في الداخل .
لكم محبتي بلا حدود ودون استثناء .
خضر عطا المنان
|
Post: #17
Title: Re: عاجل : المناضلة مريم عزالدين صديق تتحدث اليكم من الخرطوم**
Author: خضر عطا المنان
Date: 12-05-2004, 03:56 AM
Parent: #15
أحبتي :
شكرا ليكم كلكم وبالتأكيد سأعود الى مداخلاتكم لاحقا .
وللأخ الكريم ملاسي :
نعم الأخت مريم هي واحدة من الاعضاء الجدد في هذا المنبر لكن عندها
مشكلة تقنية بحتة حيث يصعب عليها تماما الدخول حتى الأن كماقالت .
وهذا ما لزم توضيحه لكل من يخطر بباله هذا السؤال المنطقي أخي ملاسي .
ولك شكري .
خضر عطا المنان
|
Post: #16
Title: Re: عاجل : المناضلة مريم عزالدين صديق تتحدث اليكم من الخرطوم**
Author: samwal ebrahiem
Date: 12-05-2004, 03:50 AM
Parent: #1
المناضلة : مريم عزالدين
لك التحية والتقدير على الصمود
وهكذا انتم يا احفاد مهيرة
والف حمدالله على السلامة
الصحفي الجدير خضر
شكرا كثيرا يا خضر
شكرا جميلا على نقل الاحداث
هوائيا
|
Post: #18
Title: Re: عاجل : المناضلة مريم عزالدين صديق تتحدث اليكم من الخرطوم**
Author: خضر عطا المنان
Date: 12-05-2004, 06:48 AM
Parent: #16
أحبتي :
تلميذتي النجبية : لنامهدي
قلقو
زهرة حيدر ادريس
عادل عبد العاطي
كوستاوي
أبوبكر كمير
السموأل ابراهيم
لكم التحية جميعا على ما تفضلتم به من تداخلات ..
وما أود أن أشير اليه هنا فقط هو ان الأخت المناضلة
مريم عزالدين صديق أكدت بأنها متابعة تماما لكل
ما كتب ويكتب منذ لحظة اعتقالها وحتى الان ..
بجانب أنها ـ كما قالت تلميذتي النجيبة لنا
مهدي ـ تتوقع في اية لحظةأن تعتقل أو يتم استدعاؤها.
لذا أكرر لها من هنا التحية الخالصة .. ولا شك أن نبرات
صوتها كانت توحي ـ وبقوة ـ بنوع من التحدي الذي لا تخطئه
الأذن أبدا.
خضر عطا المنان
|
Post: #19
Title: Re: عاجل : المناضلة مريم عزالدين صديق تتحدث اليكم من الخرطوم**
Author: Elkalakla_sanga3at
Date: 12-05-2004, 12:53 PM
Parent: #18
مريم لي قدام
و ماينوم
|
Post: #20
Title: Re: عاجل : المناضلة مريم عزالدين صديق تتحدث اليكم من الخرطوم**
Author: عبد المنعم سيد احمد
Date: 12-05-2004, 01:26 PM
Parent: #19
نحى صمود الاخت مريم
فى وجه الجلاد
والتحية لك.. فخرنا واعتزازنا
والتحية لك مناضل من اجل الحرية
|
Post: #21
Title: Re: عاجل : المناضلة مريم عزالدين صديق تتحدث اليكم من الخرطوم**
Author: كبسيبة
Date: 12-06-2004, 00:44 AM
Parent: #1
أختنا: مريم حمد لله على السلامة ويديك ألف عافية
وتسلم أخونا خضر
|
Post: #22
Title: Re: عاجل : المناضلة مريم عزالدين صديق تتحدث اليكم من الخرطوم**
Author: خالد
Date: 12-06-2004, 03:12 AM
Parent: #21
والله يا خضر بتتكلم عن واقع تاني ؟؟؟؟؟؟؟؟؟؟؟؟؟؟؟؟؟؟
كيف يتهموها بانها من التحالف ولو التحالف اصلا مشكلة ما كان الحكومة ادتهم منزل واستقبل وفد مقدمتهم كويس جدا وفي صالة كبار الزوار والقائد بتكلم بالموبايل وساكن في شقة واكلوا (Home delivery ) يعني بس دي كيف بعدين انا ما بهتر لكن التحالف الجناح الاول ما عندو مشكلة مع الحكومة عشان يا خضر يكون مشكلة السودان كلها في شخص او شخصين من التحالف ده لو افترضنا اصلا انوا عبد العزيز خالد هو الاول ؟
بنقول للاخت مريم بركة الربنا فك حبسك من الجماعة بتاعين التعهدات ديل !!!
وواصل اخي خضر نضالك الـ (سوداتلي) ده
|
Post: #23
Title: Re: عاجل : المناضلة مريم عزالدين صديق تتحدث اليكم من الخرطوم**
Author: خضر عطا المنان
Date: 12-06-2004, 03:55 AM
Parent: #22
أحبتي :
الكلاكلة صنقعت
عبد المنعم سيدأحمد
كبسيبة
تحياتي لكم.. ويديكم الف عافية وعافية.
خضر عطا المنان
|
|