إبني وزميلي في الرضاعة

أمبارح واحد من الأخوة الزملاء الخليجين الشغالين معانا بحكي لي عن برنامج شاهده في قناة بلادهم مفاده أن واحد إتصل بالشيخ أو المفتي والذي كان ضيف البرنامج وسأله السؤال التالي
يا شيخنا هل يجوز لي شرب لبن زوجتي؟؟؟
الإجابة نعم
التفسير أنه أذا كانت الزوجة مثقلة باللبن والطفل أخذ حاجته يصلح للأب أن يشرب حتى لا يؤذي هذا اللبن الفائض الزوجة

حقيقة أنا أستنكرت هذا الكلام ربما لجهل مني إن كان كلامهم صاح لأنني جد ما قدرت أستسيغه مما جعل الخليجي يضيف لي معلومة أن أي رجل لديه في لبن زوجته الربع أو الثلث على ما يظن
المهم فت منو وأنا أضحك وأستنكر قابلني واحد سيرلانكي شغال بغسل لينا الهدوم فتحدث لي بعربي مكسر قائلاً
ليش إنت يضحك؟؟؟
حكيت ليهو القصة قال لي
هذا كلام صحيح
بعد داك بديت أصدق المعلومة ولكن تبادرت لي الأسئلة التالي

ياربي فصالي حا يكون في عامين ولا أفطمني متين؟؟؟
طيب كل ما زوجتي تلد أخد لي إجازة سنتين بدون راتب عشان الرضاعة؟؟؟
هل الطفل دا يعتبر أخي في الرضاعة ولا زميل ساكت؟؟؟

أفيدوني يا أهل البورد أفادكم الله العلم بالشئ ولا الجهل به

الاستاذ بدرالدين التحايا

إبني وزميلي في الرضاعة


عندما طالعت العنوان تبادر الى ذهنى انه عنوان لموضوع كوميدى خاصة ان العنوان يندرج تحت باب الفتن
لكن اتضح انك تطلب فتوى مع تقديرى لك لكن هذا فى راى يدخل فى باب الفقه الانصرافى طول الجلباب وعرض المسواك

كم واحد بيرضع مع أبنه ؟؟

كم واحد عذب وقتل باسم الاسلام والاسلام برىء من القتل والتعذيب ؟؟

ما هى الحكم الشرعى فى حاكم حكم زمناً طويلاً باسم الدين وأرسل أبناءنا للحور العين ثم غير رايه فجاءة وأنزل فتوى جديده اكس بى

أنهم ماتوا فطيسة وان أساس الحقوق والواجبات هو المواطنة وليس الدين

ووووو ياصديقى خليها مستورة

واليك فتوى منى انا العبد الضعيف لو أستسغت شرب حليب الزوجة فافعل
وألا فعليك بحليب السعودية فانه كامل الدسم وشرعى ؟؟

بدر الدين
أيها الأخ العزيز
سؤالك يجعل الواحد يحك راسو لأكثر من مرة
هو طبعا طبيا ، لو الزوجة إشتكت من كثرة الحليب في ثديها ،، فهناك شفاط مخصوص لشفط اللبن خارجا رغم أنها عملية مؤلمة للأم
أما السؤال يكمن في : لو الزوجة لا تتحمل هذا الشفط الصناعي ،، و إضطر الزوج للرضاعة ،، فما هو حكم الدين ؟
حصيلتنا الفقهية لا ترقى إلى الإجابة ،، و لكنني أعتقد جازما بأن الغرض مادام يصب في صحة الأم و التخلص من الحليب ،، فإنه لا يضع الأب في نفس خانة الأخوة من الرضاع حتى لو تعددت رضعاته ،، لأن غرضه التخلص و عدم البلع،، أما لو كان طفلا قام بالرضاعة ،، فإن الغرض هو الإشباع و التغذية و النمو مما يجعله أخا لطفل المرضع من الرضاعة
غايتو ،، الأبو و الطفل ( قريب طافي ) يا أبو البدور
و الله أعلم

أنا عارف الإجابة لاكين ما بقولا .. وللا أحسن أقولا بي ضهرك يا البدري .. بعدين أنسعلك .. إت جربت لبن الجهال دا ؟.. سمعت بي النكتة بتاعة كلو ولا لبن التيمان؟ كان ما سمعتها يكون أحسن ..
البدري .. تاني ما تنوم بالنهار .... شفت الغربة والاغتراب بعملو شنو .. فوايد عظيمة .

الحبيب عبدالعزيز سلام
شايفك فطمتني من أول يوم الله يديك العافية لكن لبن السعودية بسوي لي الحيرقان

أبو جهينة يا أعز عزيز
سلام كتييييييييييييييييير
طيب مدام في شفاطة مافي داعي آخد إجازة بالخصم
لأنو لو قعدنا أنا والشافع نرضع البصرف علينا منو والله إلاّ كان صلاح إدريس ولا جمال الوالي
أنا غايتو بالنسبة لي الموضوع دا جديد عديل كدا أشكرك على الإجتهاد

أهل العوض والإشراق
سلام مدردم
النكتة أنا سمعتها الله يجازي محنك قربت تفطرني بالضحك
تحياتي وإعجابي

اجي يا الرجل الابله!!! عليك الله دا سؤال الزول يسالوا؟؟؟!! ما انت يا بدر اقصد العربي ما اكيد حلال لانه الزواج من بته او ابنه اساسا غير وارد وحرام

بدر الدين

سلام
ياخوي الوكرك في حكاية اللبن دي شنو وخلاص يعني بس ياهو دا الداير الفتوي ياخوي الله يستر عليك من الغربة ويرجعك بالسلامة لي وليداتك وهناك سوي الداير تسوى انشءالله تشربو زبادي وحماعة الفتاوي جاهزين هنا حسب الطلب

يديك العافية ياجميل

عبدالله جعفر

الحقيقة ...........
والله الموضوع ده انا سمعتو كتير جداً .........
وفعلا فى ناس ما ناقشة أبو النوم ........ فى الخليج وغيره
لكن المواضيع من (( النوع )) ده بالذات كثيرة عند اخواننا الخليجيين .
المهم انا عارف الفتوى ، وهى باختصار وحبة تفكير :

شرط ادخال من رضع من ثذى أنثى فى عملية الاخوة والبنوة من الرضاعة هى :
1. انو الانسان البيرضع ده يكون الحليب ده هو غذاؤة .
2. انبثاقاً ــ حلوة الكلمة دى ــ من النقطة اعلاه لازم يكون عمره اقل من سنتين .
3. انو يكون الراضع ده راضع عشان هو جعان ... مش عشان هو .... !
4. لازم يرضع 5 رضعات مُشبعات ... وبالتالى لازم يكون ده غذاؤة الوحيد ... وكده رجعنا للنقطة الأولى ... والدجاجة أول ولا البيضة ؟

الخالة دوما سلام (ما تقولي لي يخلخل ضروسك) يا دوما
أن ما سعلتك من الزواج أنا سؤالي أرضع ولا يفتح الله
يديكي العافية

صديقي الحميم القريب إلى قلبي عبدالله جعفر تحيات رمضانيات
والله فعلاً أنا الوكرني في البكان دا شنو؟؟؟
لكن دي الغربة قاتلها الله دي رضعتنا الذل والعذاب
كدي شوف لي طريقة إن شاء الله رضعة واحدة

الغالي تميم سلام وترحيب
والله بي شروطك دي حرمتني وصررت الزوجة فت مرة مني (بتعرف الصرار يا تميم)؟؟؟
تحياتي النواضر

يا بدرنا يا غايتو أنا بشوف انو في ضروره لاستخدام التكنولوجيا يعني تكون رضاعه آليه على وزن الزراعه الآليه لشفط اللبن بعدين البشربوا منو ما بنختلف و القصه كان مشت تمنه و بوكس تمانيه و سبعين أها بقى مشروع تجاري لأنو يا بدر بجنس خشومنا الكبار ديل و سنوننا الشينات دي كان دخلنا في الموضوع ده تاني الشافع ده الا يكوس ليهو بوش،،
بعدين الزماله دي عرفناها في الكوره و العسكريه و الكتشينه و السياسه... يعني بعدين أولادك ديل تكون داير تتكلم معاهم تقول ليهم الزملاء و الزميلات،،، ولا يا زميل جيب مويه لي أعمامك ديل

بدر الحسن

الحا بتاعة الحسن دى عليها ضمه، يعنى عليها قلده، وسلام، يعنى ما تقوم تقراها بالفتحة زى ما فى سيدى الحسن، الحا تتنطق زى ماهى فى حقه، الحقة بتاعة ودعمارى

كدى نرجع تانى للموضوع، وقبل ما ندخل فى الحليب وحلة كوكو، يا انت يا اهل العوض بالله مخسمين وملزمين والقطاعة بس لو ما رسلتو لى النكتة الضحكتو فيها دى، والله تتوارى لى قدامى هسه، بتاعة كل شى الا لبن التيمان، الماسنجر بالله، وحأدعو ليكم فى صلاة التهجد

بالنسبة للبن يا بدر، الإجابة هى انه ممكن تشرب، وممكن تعمل روب وزبادى، وجبنة، بس ما تكتر الكمون والملح

وبالهنا والشفا

ياسر المحجوب من العيوب سلام وحب شديد
يازول إنت ليك اللبن وأنا لي الإبتسامة التي زرعتها بمداخلتك الرائعة .. ياخي إنت مبدع
بعدين ياخي أنا بخاف من التكنلوجيا دي لأنه قالوا في أجهزة للحليب لمن تشغلها كان ما ملأت الجردل ما بتقيف


الشوق مطر ليك يا المطر
النكتة بطرفكم طالع المسنجر
بالله لمن تمشي السودان تحياتي للرائع خالك/عمك النعيم
وكل سنة وإنت طيب وتمشي وترضع (ترجع) بالسلامة

بدر الدين السمح
والله دخلت البوست ده ستة مرات في كل مرة أكتب رد أمسحو
إنت يا بدر الحكاية شنو، يا بدر ما تهبشونا بي الأخبار العجيبة دي نحن برانا مهبوشين نقوم نجلط في الكلام
قال رضاعة قال الله يجازي محنك يا بدر

حبيبي ونور عيني خالد
سلام وإرتياح

الله يهديك يا خالد وحاول ما تجلط مش عشاني بس عشان رمضان واللي في بطنك
يعني الموضوع قلت لي كل يوم تعاين فيهو تضحك وتمشي وتجيهو راضع
لك خالص تحياتي

عم بدر الدين
يعني شنو زميلي دي ماتقول اخي عديل
كل سنه وانت طيب

أستاذي موصلي
سلااااااااااااام
كدي خلينا نرضع أول وبعد داك بنتفق في قصة الخوة والزمالة دي
سعدت بمداخلتك لك الود