كلِّم السودان ����� �������� ���
����� �������� ���

كلِّم السودان


03-19-2004, 07:24 AM


  » http://sudaneseonline.com/cgi-bin/sdb/2bb.cgi?seq=msg&board=65&msg=1137368788&rn=0


Post: #1
Title: كلِّم السودان
Author: بدرالدين شنا
Date: 03-19-2004, 07:24 AM

كدي يا أخوانا شوفوا معاي المعادلة دي
زمان لمن كان الإتصال عبر الكبانية والتلفونات البدوروها زي الساقية كان الخبر عبرها بكون ليه ضجة وربكة في الحالتين إن كان الخبر حزين أو مفرح يعني لمن يقول ليك (كلِّم السودان) (كلِّم سنار) (معاك الدمازين) لمن ترجف وتستتعدل في وقفتك أو قعدتك وأذكر هنا موقف حدث عندنا في القرى حيث تم الإتصال بأحد رجال حلتنا في تلفون (القنطرة) وهو التلفون الوحيد في ذلك الوقت فعندما أخطروه بأن فلان توفى إلى رحمة مولاه وضع السماعة في مقعدها وقال للمتصل الفاتحة على روح المتوفي وهو لا يدري أنه بذلك قد قطع الإتصال
أما الآن ومع ثورة المعلومات والموبايلات فصار الخبر صغير الأهمية موازياً لصغر الموبايل
يعني تتصل باي شخص في الموبايل تقول ليهو فلان توفي يقول ليك
ياااااااااااااخي ؟؟؟

Post: #2
Title: Re: كلِّم السودان
Author: Hussein Mallasi
Date: 03-19-2004, 11:28 AM
Parent: #1

Quote: وضع السماعة في مقعدها وقال للمتصل الفاتحة على روح المتوفي وهو لا يدري أنه بذلك قد قطع الإتصال

اخونا حاج البدري

تحيات و اشواق

نحنا صاحبنا كان بيدرس تربية في جامعة الخرطوم ... مرة كان قاعد في مكتب احد المشرفين

فضرب التلفون ... و كان المتحدث عايز واحدة زميلاتهم .... اها صاحبنا دا برضو خت السماعة في

مقعدها و مشى نادى البت .... لمن جات و لقت السماعة في مقعدها و المكتب فاضى اسقط في يدها ....

و لى الليلة تسيء الظن به .....

Post: #3
Title: كلمني حاول حس بي
Author: توما
Date: 03-19-2004, 06:20 PM
Parent: #1

لووووول
كلمني حاول حس بي
كلم علويه جارتنا تكلم ليك سنجه وابيي وحلفا والسودان كلو
ولا محتاج تلفون ذاتو..علويه للشمار الطارئ علي وزن النقل الطارئ..هو بالله النقل الطارئ خلوه ليه كلو من انجاض دي..
طبعا اساسي خليت الموضوع الاساسي الجايه ليهو
ملاسي ما تفتكر انو عطانه ما عملت لي نفس الحركه دي في تلفونهم لما كنا لاجئين بلا تلفون ..بالمناسبه فرصه سعيده ..

بدر الدين والله جد كدا جد جد بركه الجيت
انا دي..
توما

Post: #4
Title: Re: كلِّم السودان
Author: سجيمان
Date: 03-20-2004, 00:39 AM
Parent: #1

بدر الدين

بالله انت من زمن التلفون ابو منفيلة؟... البي نشوفو في الافلام حسي دا؟

والله نحن يا جماعة قاعدين في البورد دا مع اجدادنا

Post: #5
Title: Re: كلِّم السودان
Author: صديق الموج
Date: 03-20-2004, 01:05 AM
Parent: #1

يا اخوان..... والله اناجديد معاكم ..قبلونى قريب فى المدرسة ...دى

وكنت مفتكر.. البورد ده كلو ..جكس..وبس حتى الاولاد الفيهو حا يكون الواحد بى الكتير اسمو بكون مركب من حرفين تلاته هيثم ...ميدو... دودى....نزار....خلودى.....سمسم... اجى القاه سجيمان والبدرى

وملاسى..... وود الجعلى. وبعدين ده مش بدر الدين لما كنا صغار (من فريع لفريع)...كنا بنشوفو فى محطة التلفزيون الاهليه ..وبغنى احرمونى.

كان كده انا جيت داخل غلط... دحين لو سمحتم..ادونى ..ورقى وشهاداتى ..ديل

معقول ..الواحد يدخل ليه بورد...من الارشيف.مع السلامه ياااااااى باى كباتن،،،،،

Post: #6
Title: Re: كلِّم السودان
Author: Raja
Date: 03-20-2004, 01:30 AM
Parent: #1


طبعا يا حاج بدر ما الاقي ليك بوست حاييم الا توووش ادخلو..

قلت لي الخبر بالموبايل (ياااااااااااااخي ؟؟؟)..
طيب تقول شنو في message بتقول:
Hi.. sori 2 tl u old man pas..
lv. bro

لازم تتعلم اختصارات الـ msm...

Post: #7
Title: Re: كلِّم السودان
Author: بدرالدين شنا
Date: 03-20-2004, 05:51 AM
Parent: #1

حبيبي الغالي ملاسي
سلاااااااااااام
أحكي ليك قصة بمناسبة كلم السودان
زمان كان إشتغلنا مسرحية إسمها (إنهم يقتلون العريس) كان مخرجها مصري إسمه بصمة ومساعد المخرج مصري إسمو حنفي .. أها يا زول حنفي دا كل مرة شابكني ليك كلم بصمة كلم بصمة وأنا محتار أكلم بصمة أقول ليهو شنو وما عرفت إنو حنفي يقصد أن بصمة هو الذي يريد التحدث معي إلاً قريب دا يوم جاتني مكالمة من السودان وصاحب الكبانية قال لي كلم السودان
لك تحياتي ياملاسي


العزيزة جد جد توما
سلااااااااااام
Quote: طبعا اساسي خليت الموضوع الاساسي الجايه ليهو

أأطع دراعي إذا كان عندك موضوع جاية ليهو
تحياتي ليك ولي عطانة وعلوية تل
والله يا توما جد وجد جد أنا برتاح لمداخلاتك
أنا دا
بدرالدين شنا


صديقي سجيمان سلاااااااااااام
أخبار غنمايتك شنو؟؟؟ سكسكوها ولا لسع؟؟؟
غايتو كان عرفت (سكسكوها) دي شنو أنا ما جدك ولا حاجة
بتعجبني ردودك ومداخلاتك الصغيرة ومختصرة وعندها ما ورائيات غايتو إنت زول ما هين كم أتمنى لقاءك


العزيز صديق الموج
أولاً مرحب بيك في هذا الوطن الرحب وإن شاء الله يبقالك بورداً وسلاماً ونشوف إبداعاتك والتي أستشفها الآن من مداخلتك الطيبة
بدرالدين شنا هو نفسه الذي كنت تشاهده من فريع لي فريع في محطة التلفزيون الأهليه أما إسم الدلع خلي يكون (بيبو) عشان ما ترجع بي شهاداتك وورقك
إنت صديق الموج (Almouj's frend) ولا صديق الموج صديق الإسم؟؟؟
لك تحياتي وترحابي


الشفيفة رجوية سلاااااااااااام
أشكرك على الدخلة التووووووووووش دي والبوست بوستك وإن شاء الله كل ما تخشي تنبستي إنبساتة شديدة وأنا مبسوت
Quote: طيب تقول شنو في message بتقول:
Hi.. sori 2 tl u old man pas

غايتو رسالة زي دي أنا لغاية ما أفك تلاصمها الجماعة يكونوا دفنو
لك ودي وفخري

Post: #8
Title: Re: كلِّم السودان
Author: Ibrahim Algrefwi
Date: 03-20-2004, 01:22 PM
Parent: #1

كلّم السودان قول ليه قالو ليك بطل الحركات البتعمل فيها دي!!


Post: #9
Title: Re: كلِّم السودان
Author: ابو جهينة
Date: 03-20-2004, 04:51 PM
Parent: #8

الشقيق الحاج بدر الدين

تحية و محبة

أيام كان الخط للخرطوم يجيك عن طريق إيطاليا أو أثينا أو مالطا ،، و تطلب الخط يجيبوهو ليك بعد 72 ساعة ،، المهم ،، خالتي عيانة جات الخرطوم و طلبتها من بلد أوروبي و بعد تلتلة جات المكالمة و الخالة منتظراني في بيت عمي في حى الأملاك ببحري ،، أها ، أنا فرحان إتكلمت مع بت عمي و قلت ليها أديني خالتي ،، الخالة مسكت السماعة و بعد مدة قالت : آي منو ؟
أنا يا خالتي ،، كيفك كويسة ؟
و سمعتها تسأل بنت عمي :دة منو الصوتو زى الزول البيتكلم جو صفيحة فاضية دة ؟ إنت ما قلتي لى دة جلال ،، دة ماهو ،، يبرا و يستبرا ،، جلال صوتو ما كدي.
و بكل هدوء وضعت السماعة.

تسلم يا بدر

Post: #10
Title: Re: كلِّم السودان
Author: بدرالدين شنا
Date: 03-21-2004, 07:32 AM
Parent: #1

ملك السربعة جريفاوي
تحيات صالحات وأشواق
Quote: كلّم السودان قول ليه قالو ليك بطل الحركات البتعمل فيها دي

بلااااااي عشان (يكلِّم) لي أضافريني


شقيقي الجميل جلال
أمش المخزن داك شيل البكفيك من التحايا والحب والأشواق وأقفل باب المخزن وجيب لي المفتاح
Quote: أيام كان الخط للخرطوم يجيك عن طريق إيطاليا أو أثينا أو مالطا

زي تحويل القروش من ليبيا
لكن خالتك عسل و(لا نمطية) يا جلال تحياتي لها
تحياتي صديقي جلال وفرحت بيك من الصباح

Post: #11
Title: Re: كلِّم السودان
Author: shiry
Date: 03-21-2004, 08:24 AM
Parent: #10

سلام مربع

بدر


نحن غير موجودين الان في البيت ، فضلا اترك رسالة واسمك بعد سماع الصفارة
تتتتتررررررررررررررررررر
الو
بقولولكم زينب بت العجوز ماتت ، الدفن بعد المسلسل المدبلج

Post: #12
Title: Re: كلِّم السودان
Author: nazar hussien
Date: 03-21-2004, 09:03 AM
Parent: #11

يا حاج بدر...

عندنا خالتنا جات زارتنا هنا...وبعدين...اتصلت بنا...قريبة من السودان...رفعت السماعة اتكلمت معاها...وانا اقول ليها حاضر...حاضر...كويس...كويس...دون ان تعلم خالتي مع من اتحدث...وهي تتابع المكالمة...بعد انتهت قريبتنا من حديثها معي طلبت ان تسلم علي خالتي...قمت دون ما اقول ليها البتكلم منو...طبعا هي من الحديث عرفت ...كلم السودان دي....ختت السماعة في اضأنها وقبل ما ترد قالت لي دا منو...والطرف الآخر سامع قلت ليها دي فلانة..

ولا تزال السماعة في اضانا.....قالت انا مكجنة فلانة..ام نضما كتير... وفلانة سامعة وطوالي واصلت ماكن طيبين

ان شاء الله ما عندكم عوجة...

Post: #13
Title: Re: كلِّم السودان
Author: بدرالدين شنا
Date: 03-21-2004, 09:04 AM
Parent: #1

الغالية مربع شيري
سلام لا نهائي
Quote: بقولولكم زينب بت العجوز ماتت ، الدفن بعد المسلسل المدبلج

بالآنسر مشين؟؟؟
دي ما أدونا ليها
لك الود يا مليئة

Post: #14
Title: Re: كلِّم السودان
Author: بدرالدين شنا
Date: 03-21-2004, 09:37 AM
Parent: #1

الشفيف الكثيف نزار حسين
سلام يحمل كلام مضمونو حبي
أنا سررت لهذه المداخلة لسببين
الأول: طلتك البهية وأعتقد أنها الأولى إذا لم تخن الذاكرة
والسبب الثاني هو روح المداخلة نفسها والتي جعلتني أضحك وكأني شاهد على الموقف وأرى خالتك رأي العين وهي تلبس ذلك الخاتم الكبير والذي يحدث طقطقة مع سماعة التلفون
تسلم أخي نزار

Post: #15
Title: Re: كلِّم السودان
Author: عمر بانقا
Date: 03-23-2004, 05:54 AM
Parent: #14

الاخ بدر الدين
دخلت على عجل لقيتك قلت اسلم سريع
امشى واجيك راجع
تحيتات ياصديق على فكره قبل يومين تلاته كنت مع الاصدقاء
محمد نعيم جمال عبد الرحمن عبدالمنعم فيصل احمدسعد اميرعبدالله
وكل الشله والله كانت دقائق لكن انما ايه
اجتررنا فيها ذكريات وذكريات ماخلينا القنا عشره وتيم واسكتشات منتزه المقرن العائلى
وبورتسودان وعيييييييييييييييييييييك قايتو اليوم داك موبايل فيصل اتهرا

Post: #16
Title: Re: كلِّم السودان
Author: صديق الموج
Date: 03-23-2004, 06:11 AM
Parent: #1

بدر الدين.. بمناسبة كلم السودان......نكته جديمه


قالوا واحد من الجماعه اياهم الغنوا بعد الناس فرت من السودان


قالوا مركب ليه (انسرمشين) مسجل فيه: الرجاء ترك اسمك ورقم هاتفك


بعد سماع سورة البقرة لكى نتمكن من الاتصال عليك.(جزاك الله خير)،،

Post: #17
Title: Re: كلِّم السودان
Author: walid taha
Date: 03-23-2004, 09:59 AM
Parent: #1

اخوى بدر ازيك...

ثورة الاتصالات فى العالم وفى بلدنا بالذات سهلت كتير علينا فى تقصى احوال الاحباب رغم انها قدت جيبنا..المهم يا سيدى الشغلة دى -زى اى جديد فى بلدنا- جابت كمية من المواقف الطريفة...ذكرتنى بادروب لمن شاف ناس سوداتل بيحفرو ويرمو الكيبلات وادروب قاعد بس يعاين ليهم ..اتغظ منو المصري قال ليهو: ايه ده؟ ..انتو ما شفتوش خبرات اجنبية ابل كده؟ ادروب قال ليه :والله خبرات اجنبية شفنا ..لكن تلبة(طلبة) اجنبية ده دايرين نشوف الليلة..(على لسان القائل)

اهم مافى الموضوع انو انا دخلت فى المسنجر مع ابن خالي وعملنا محادثة وصادف وجود الوالدة العزيزة ببيت الخال ولاول مرة تواكب الوالدة العولمة بالدخول الى عالم الانترنت -رغم انها بتتحدث لغتين-(عربي مكسر ورطانة سنينة)
..الو ازيك يا وليد..كيف يا امى ان شاء الله كويسة وراحت المكالمة بين الو ارفع صوتك، ايوه سامعانى؟...صوتك ما واضح.....الخ
وانقطعت المحادثة بعد ان تركت الوالدة رسالة بتقول (اتصل بينا بالتلفون احسن).... وذهبت آمالى ادارج الريح وانا امنى نفسى بمكالمة (ملح).ونمت تلك الليلة وفى خاطرى اشياء عدة.

آآآآآي ابكر نت آآآى اولمة وكده

_________الى اللقاء يا اصدقاء

Post: #18
Title: Re: كلِّم السودان
Author: بدرالدين شنا
Date: 03-23-2004, 12:02 PM
Parent: #1

صديقي وزميلي المبدع الممثل المغني عمر بانقا
إنت وين يا خطير؟؟؟
بالمناسبة يا بورداب عمر بانقا دا عسل
ياخي شوقتني للأيام الحللللللللللللللللللوة ديك وبيت بانت والشعبة الفي نص الأوضة والهدوم الفي المخزن يا سلاااااااااااام يا عمر
إنت كلمت السودان ولا السودان الكلمك؟؟؟
شوقي ليك يا الغالي


الممسوخ صديق الموج
الله يجازيك بالخير
أنا سعيد بيك وفخور بيك ومحمد علي بك
دي شفافية وحضور ما طبيعي
أنا لا زلت بضحك من النكتة وغالباً أدخل بيها السوق يومين تلاتة وأرجعها ليك


الغالي وليد طه
ترحيب حار وسلام سمين وثمين
سعدت بي طلتك ومداخلتك
Quote: -(عربي مكسر ورطانة سنينة)

الكرت بتاعها ما بسحب من ماكينة العولمة
أدخل بالباب وأمشي للصراف عديل كدا
تحياتي للوالدة وربنا يحفظها ويخليها ليك ومبروك عليها عيد الأم
تسلم يا وليد

Post: #20
Title: Re: كلِّم السودان
Author: Munir
Date: 03-24-2004, 02:01 AM
Parent: #18

الاخ بدر الدين ـ تحيات عطرات ـ
جيت ماري لقيت تلفوناتك تتخابط ـ قلت اديك دي ـ
مع انبلاج فجر الاتصالات التواصل اتسهل شديد ـ عندنا في الشمال بعد ما كان الحال جهاز تلفون لكل مية قرية، الحكاية انبهلت ـ
قالوا واحد ضرب تلفون لاقاربه في ( الكرو ) ـ ضرب نمرة غلط رد عليه واحد في الزومة : ـ هالو آلو ـ دي الكرو؟؟ ـ فرد عليه: لا لا والله دي الزومة، الكرو فتها !!! ـــــــ ( الكرو قرية تمر بها في طريقك من كريمة قبل ان تصل الزومة ) ــ

Post: #19
Title: Re: كلِّم السودان
Author: صديق الموج
Date: 03-23-2004, 06:56 PM
Parent: #1


/[وفخور/]
وفخور عمر

اصلى بجرب فى المصيبه الاسما الكوت دى،،،،،

Post: #21
Title: Re: كلِّم السودان
Author: بدرالدين شنا
Date: 03-24-2004, 06:48 AM
Parent: #1

منير المنير
سلام من جوَّا قلبي
Quote: لا لا والله دي الزومة، الكرو فتها

دي قمة الكوميديا .. وبتشبه إلى حد كبير مبدعكم ود الزومة
مرحباً بهذه السخرية الرفيعة والرائعة وتحياتي للجميلين


صديق الموج حبيبي
إنت زعلت ولا شنو؟؟؟
ولا آآآآآآآآآآآآه يكون الليلة يوم البلاطة
لك تحياتي وحبي وشناتي