الحراز والطر سبب الكبر

بسم الله الرحمن الرحيم

جاء من الشغل تعبان .. قامت من ونستها بي همة وإستعجال حفيانة وتوبها جاري بي الواطة جابت ليهو الموية وبعد دقيقة جابت ليهو الغداء وبعد شوية شالت عدة الغداء بي يد وبي يدها التانية ختت ليهو الشاي ورجعت لي ونستها وهو شرب شاهيهو ونام في أسرع عملية فندقة وكرم لكن ينقصها الكتير وأوله هيئة المضيفة .. رجلين عاريات من شبشب وحافيات من حنة وربما مكشكات وتوب جاري بي الواطة وشعيرات ما ضاقن طعم الزيت من أيام وفاة أمحدأحمد والغويشات ما بطلعن من الحفرة إلا ساعة الوصية والرمق الأخير .. والحال يستمر بالطريقة دي أكتر من تلايتن سنة بعد الزواج بعدها المسكين ينوم ويكحكح في الديوان وهي تنوم مع بناتها بي هناك وترخي أضانها لي سكلي الموتات البحصلن أنصاص اليالي والدور جاي علي زول الديوان الكبر بسبب حراز زوجته ومطر الزينة والطيب

عاطر التحايا
بدرالدين شنا

بدر الدين ..
سلا يا يابا غيبة طويلة ..
كل سنة وانت طيب يا ابو اواب والسنة الجايه ان شاء الله وليداتك معاك ..قول آميــن لكن فى سرك ما تقوم تكورك فى اضانى هسه من دغش الرحمن ..
والله يا بدر الدين صورت واجدت التصوير وسردت وصورت الواقع المرير بى دقة ..
لكن العتب ليس فى اهلنا الغبش بى طيبة قلبهم وصفاء نواياهم
اهلنا ديل كانوا فى زمن انعدمت فيه التوعية .والزوج الطيب المغلوب على امره مقتنع وراضى كل الرضاء .وغالبا ما يكون ساعد فى هذا الجفاف والتصحر الحياتى بينهم بشراء بعض مستلزمات الحداد .من ملابس كئيبه قاتمة الالوان .و احيانا يكون المتوفى عزيز له يشاركها الحزن بعدم حلق لحيته وحلق شعر الراس صلعة ومحاربة العطور .. اللهم لا اعتراض على حكمك ..
لكن الشىء المحير فى المدن وعند المتعلمين ..يعنى الواحده تكون استاذه فى مدرسة ثانوية واحيانا محاضره فى جامعة
ولم تلبس فى حياتها الالوان الغير محدده لى الحداد .مثل الاسود والابيض او ما ربط بالاثنين وخلاص لو فكت الحد تلبس رمادى ..
ده كلو ليه ؟ لانه مسلسل الوفيات فى العائلة ما انتهى .وطبعا ما حا ينتهى لانه دى سنة الحياة .ولانه غير مربوط بافراد الاسرة القريبين فقط عندها .بل العكس وصلت المجامله الى الصداقات الفى الشغل ..
يعنى حتى لو خلاص نوت تتحرر من قيد الحداد .حصلت لا قدر الله وفاة لى اى احد من اقرباء زميلاتها .تقرر فورا مجاملتها فيه لمده شهر نص مثلا كاقرب فترة حداد .ام الاقربين حماكم الله بالشهور الطويله.. وكثيرا ما تستمر المده لسنوات عدة كما ذكر اخونا البدرى ..
بدر الدين اتطرقت لى ظاهرة جد مؤلمه ومحزنة فى بعض من مجتمعنا السودانى ..نتمنى ان نحاربها جميعا فى زمن كثرت فيه التوعيه فى شتى سبل الاعلام من اذاعة وتلفزيون وصحف . بالاضافة للتوعية من شبابنا داخل قراهم ومدنهم وخاصة القرى
نتمنى ان تعم الفايدة .وجزاك الله خير يا ابو اواب
وكل سنة والجميع بخير وسعيد وفرحاااااان

بسم الله الرحمن الرحيم

المتفردة/ سوما
سلام يحمل كلام مضمونه تقديري
طيب يا سوما عوضنا الله أنا ممكن أتنازل من مسألة الحنّة عشانك ما دام جابت ليها حداد لكن على الأقل الظهور بمظهر يسر الناظر وخاصة الزوج.. ياخي على الأقل خليها تتشطف وتسرح مسيراتها وتلبس التوب الجابو ليها عبدالخالق العيد الفات داساهو لمتين .. لأنه صراحة هيئة الزوجة وعدم إهتمامها يؤثر في نفسيات الراجل وبكبرو قبال يومو

عاطر التحايا
بدرالدين شنا