سعـــاد الفـاتح......معـزومــة عنـدنا

سعاد الفاتح.... في لقاء تلفزيوني.... قالت زعلانة ومتحنطقة.ومحمبكة.. من الصور البيجيبوها تلفزيونات العالم لي للناس في دارفور.... الناس المقطعين والجيعانين زي ما قالت هي بالحرف....... قالت النضم دا بكل قرف واستهتار واشمئزاز..... والله..ما بهتها
وقالت ليه ما يجيبو صور الناس النضاف وسمحين وشبعانين؟.....قالت لايمة التلفزيون... عشان ما قاعد يعرض للعالم الناس الشبعانين...؟؟؟؟؟؟؟.....هو لاقي ناس شبعانين عشان يعرضوهم وقال لا يا حاجة؟.... حليل زمن الشبع يا حاجة....وحليلك انتي يا يمه...... دي حرب يا حاجة.... حرب الله يديكي العافية....والحرب فيها الجوع وفيها القطيع وفيها البشتنة....والناس الصوروهم ديل في منطقة الحرب....ما صوروهم في سينما قاعة الصداقة...ولا في شوارع مدينة النيل والمنشية...والفقر والقطيع والجوع ما واقفت علي دارفور بس....دا السودان كلو لا يخلو شبر منو من قطيع وجوع
الزول البيستهتر بالفقراء وبالمساكين وبالجيعانين...ما ضاق فقر ولا ضاق جوع.... ....
ما ضاقت حاجة سعاد انها راجلا يمرق من الصباح ويديها شوية قريشات عشان تاكل الناس الفي البيت.... وتمشي تجيب ربع كيلو لحم بقري وتقسمو... علي اتناشر نفر...ما ضاقت ساعة الغداء يتلمو ناس البيت كلهم في صحن واحد.... ويقومو منو وكل زول يتم الباقي بي موية......
وما شافت اخوها شايل جردل موية وحايم في الصقيعة وسط الناس ويبيع في الموية.. ولاّ يغسل عربات الناس الشبعانين الزي حاجة سعاد...عشان يشتري ليها فستان يسترها بيهو....
وما جربت حاجة سعاد انها تبيت القوا.... يوم واحد في عز الشتاء....وما جربت تغيب من المدرسة عشان فستان المدرسة الوحيد.... حرقتو المكواة....ولاّ... اتهرد من كترت اللباس
ما جربت حاجة سعاد..... انها تمشي المدرسة كداري مسافة اتناشر كيلو متر....وهي طفلة عندها تسعة سنوات...... لانو بكل بساطة ما عندها حق المواصلات....
ما جربت تمرق من الصباح... شايلا قفتا فيها عدة الشاي عشان تمشي تبيع الشاي.... وتصرف علي وليداتا.....وما جربت وهي قاعدة تبيع الشاي تسمع كلام....ما بيخطر علي بالا.....
ما جربت تقعد صباحا كلو في دوكة الكسرة عشان .... تعوس وتلحق السوق وتبيع كسرتا...ما عارفة انو في نسوان معظم وقتن جنب الدوكة... بدل ما يكونن قدام المرايا عشان يتمكيجن....ودا كلو سببو الجوع..
ما جربت حاجة سعاد.... تشوف جناها يموت قدام عينا من الملاريا.... لانها ما لاقيه حق العلاج....ولاّ كل يوم ينقص ...زي الصابونة...من سؤ التغذية... ينقص وهي ما قادرة تسوي شي.... غير تخت ايدا تحت جضوما...وتتمحن تعاين لو.....لحدي ما يموت....وتاكلها نار الحشا وهي ما لاقيا تاكل
ما جربت حاجة سعاد.... انها تشوف وليداتا جيعانين...عريانين...ومقطعين.... وصبحان عليهم عيد
. والله والله والله ...لو جربت دا ما كان قرفت من المقطعين والجيعانين.... الفي دارفور
اركبي عربيتك يا حاجة.... وما تمشي بعيد.... ما دايرنك تمرقي برا وتتعبي نفسك وتشقي وتمشي الاقاليم...دايرينك تمشي اطراف العاصمة بس.....وما تمشي عشان تتفرجي وتتفسحي....حاولي انضمي مع الناس ما تقرفي وان الله قدر وقرفتي اتحملي....وما تزهجي....الناس ديل لو لقو اللقيتيهو....كانو حسي نضاف وسُمان وسمحين.....علا قسمتهم يبقو فقرانين عشان تغنو انتو وتستمتعو بي فقرهم..... ويبقو جيعانين عشان تسمنو انتو وتستمتعو وتتاجرو بي جوعهم...ويبقو مقطعين عشان تلبسو انتو وتستمتعو بي قطيعهم...
.وما تنسي انتي والزيك من حكامنا بدون استثناء سبب في فقرهم وجوعهم......اقصد من حكمونا من الاستقلال ولي حسي مافيهم ولا واحد معفي....والجارين دايرين يحكمونا.....والبي يحاربو عشان يحكمو
مصيبتنا مصيبة لو كل ساستنا يفكرو بنفس عقليتك يا حاجة سعاد.... مصيبتنا مصيبة لو كل كبارنا بيحتقرو صغارنا...ويشمئزو من المقطعين والجيعانين........

بما انني من قدامى الجيعانين والمقطعين ولي شرف الخدمة في هذا المجال....اطالب بروفسير سعاد الفاتح.... بالاعتذار العلني .... لجيعانين ومقطعين المليون ميل......

لنا الله

سجيمان يا أخوى ديل ناس هم.. سعاد والله فاتح ... عليهم ابواب الخير

وبعدين يا صديقى نسيت إنك نازل إجازة ...؟؟؟

عمر الماحي

Quote: وبعدين يا صديقى نسيت إنك نازل إجازة ...؟؟؟

والله الايام دي يا عمر اخوي...انا ماني لبابة

مورووود.....وقاعد اهضرب

Quote: بيان هام هنا شقلبان محطه إذاعه حلاوه زمان نقدم اليكم بكل اللغات مراسح وسيما وجميع الفنون صحافه ومنابر وتليفويونات وخطبا ف جوامع وجبنه وزيتون ونفزح ونركب جميع الموجات ونبحث ونفهم فى كل الشئون واديما نلعلع فى كل الحالات ولا حد سامع ولا يحزنون وتمسع ما تسمع دا ما يهمناش لان احنا اصلا بناكل بلاش فخليك فى نفسك وما نخليناش نسلط عليك القلم واللسان هنا شقلبان محطه اذاعه حلاوه زمان يسر الاذاعه وما يسركوش بهذي المناسبه وما بندعيكوش نقدم اليكم ولا تقرفوش شحاته المعسل بدون الرتوش شبندر سماسره بلاد العمار معمر جراسن للعب القمار وخارب مزارع وتاجر خضار وعقبال املتك امير الجيوش ما تقدرش تنكر تقول ما اعرفوش ما تقدرش ايضا تقول ما اسمعوش شحاته المعسل حبيب القلوب يزيل البقع والهموم والكرب يا نفس يا فين يبلغ حبوب ويفضل يهلفط ولا تفهموش وتفهم ما تفهم دا ما يهمناش لان انت فاهم وعامل طناش ح تنكر وتحلف ح اقول لك بلاش ح تتعب دماغنا وتتعب كمان هنا شقلبان محطه اذاعه حلاوه زمان لان المخبى ظهر واستبان وكل المسائل بدت للعيان وطلعت حكاوي ونزلت كمان عن التهريبيه وعن كيت وكان وعن محسوبيه وعن العبان ظهر فى المدينه كانه الطوفان وغرق مراكب وسوح غيطان وبعض المراكب ح تغرق كمان وازمه مساكن وازمه امان وعالم بياكل فى عالم جعان وريحه مؤامره فى جو المكان مخطط خيانه مع الامريكان لدبح العشيره وحرق الجيران وفيه ناس بترغي ولازم بيان كما ابلغونا جميع الودان لهذا وذاكا ... وتكلم كمان نقدم اليكم عروسه وحصان شحاته المعسل وهذا البيان هنا شقلبان محطه اذاعه حلاوه زمان بسم الله سلام عليكم وسلمون وموز واما المسائل فهنجف ولوز فيا اخوتى ويا اخوات اليكم بيانى كما هو ات جميع المسائل تمام التمام وكل الكلام دا مجرد كلام فصيرا جميلا ولا تقلقوش وشغل الضغاين انا ما اقبلوش ما فيش أي حاجه على الطلاق والعتاق بالتلاته ما فيه أي حاجه وقدر كمان ان فيه أي حاجه ما فيش أي حاجه ما لوش أي لازمه الكلام واللجاجه وعيب ان عيل يسوق السماجه ويعمل ديباجه انا بطبعي ضد السماسره الكبار بحكم المنافسه وحكم الجوار لكن مش ف طبيعي انىاعمل فضيحه لو احد زميلي هبش كام صفيحه ما كل الزمايل بتهبش صفايح وكل اللي جاي مش زي اللي رايح فيا ايها الشعب صهين تفعلص مساء التنفس مساء الرويح اخويا الامير بزرميط الايرانى بعت لي السنه دي عزمنى ودعانى انا قبلت طبعا ورحنا العزومه وكانت وليمه ما تحصلش تانى دا ايه المحمر وايه المكمر وايه المشمر وايه الصوانى انا دماغى تعبت ولفت صراحه من الفخفخه واهنا الاصفهانى هناك يعنى مثلا اذا شربت طافيه تمز بكوارع وبسطرمه ضانى ما شفتش هناك ناس بتحقد عليهم ولا ناس بتشتم فلان الفلانى لانه اشتري عزبيتن من شطارته وحكمه ادارته وطلع مبانى وبعد الواليمه استلمنا الهدايا مفضض ومدهب وقز وقيشانى وطبعا اخويا الامير قال لى حاجه ح اقوالها لكو طبعا اذا الوقت ناسب ح تطلع لى عيل بدون أي حاجه ويعمل لى فلحس ويقعد يحاسب دا حقد اشتراكى انا ما اقبلوش ولو هو ابنى انا ما اعتقوش كلام عن سماسره كلام عن دعاره حاجات مش صحيحه جمل مستعاره وعايزين يخلوا البلد اردغانه وعايزين اسيب البلد من زمان وانا مش ح اسلم واسيب الامان ولابالبوليس والنيابه كمان فيا ايها الشعب كمل جميلك وصبرا واذلم حتيجى المصاري وتاكل وتشرب تبع ما ياتيك وتغرق فى بحر العبيد والجواري وترسم حياتك حسب ما يرائيتك وتملا الحواري فساقى وقصاري تسبح بحمدك وتشكر جميلك وفضل الزباله وطفح المجاريه ختاما سلاما واخر كلاما ضرورا يسود الهدوء والوئاما فماذا والا ح طربقها واللا

مراويد.............. شكرا لي شقلبانتك... الخلت الناس يشقلبو

سجيمان

تحياتي

ديل ياسجيمان في وادي والناس في وادي ، اكتب لتعري هذه الزيف ، لااسكت الله لك

حسا ، اكتب لتفضح هذا الدجل والنفاق ، اكتب فداك روحي ،،،،

محمد عبد الرحمن
لك التحية

Quote: ديل ياسجيمان في وادي والناس في وادي

المصيبة يكونو كل ساستنا كدا................

تشوفهم كيف يا سجيمان ..وعندها ولد أسمو حسن البطل ..ما شاءالله قدر الحيطة حاجب عيونا ومعاهو مرتو البسكويتة التلفزيونية لأخبارالتنجليزي ..داليا
وبالمناسبة حسن ده بي تخنتو دي كان بطل الجري في الجامعة ..طبعا ما جري المسابقات لكن جري المواجهات وكت الحارة .. حتى لقب بحسن البطل .. وأتذكر يا سجيمان الأيام ديك الجامعة مشربكة والجو متوتر والساعة كانت مسا ..وناس الأتجاه الأسلامي عندهم ندوة في النشاط ..وأخونا حسن البطل ماسك المايك وهاك يا خطب حماسية ونبذ ما خلى جهة ما أعلن عليها الجهاد ..وفي الجو المكهرب داك تقوم واحدة من لمبات النيون تطرشق .وقام واحد صاح وقال(جااااااكم) أها تعال شوف الجريالركب في رقبة داك والجري حصل ..أها اخوانا ناس الاتجاه الاسلامي بعد نص ساعة أكتشفوا أنو دي كانت لمبة ما هجوم ..بهدوء شديد وخجل جو راجعين يرفعوا في الكراسي ويفتشوا في الجزم ويتمموا في عددهم فأكتشفوا أن حسن البطل غير متواجد سوى فردت شبطو الشمال ..
وأخيرا تم العثور على حسن بعد خروجه من بينات العشر ااجنب سينماء النيل الازرق .. وعلق ود عكود شيخ البركس تعليقو الشهير (وسط العشر متصور ..جريا شديد متهور ..يا لمبة هاى حسن الحديد ومنور ..والله أيام يا سجيمان وخالتى سعاد ليها حق ..أصلها بتكره التلفزيون من أيام أخونا المقداد ..وجدولة المذيعين ..و داليا ..وسالمة يا سلامة ..

malamih

Quote: وأخيرا تم العثور على حسن بعد خروجه من بينات العشر ااجنب سينماء النيل الازرق

كويس اللقوهو.... دا كان لي حسي يكون جاري

سجيمان والله ماقلت الا الحق لكن الناس الجلدن تخين ديل ما بيحسوا .. ديل ما سمعو بقولة عمر ابن الخطاب الذي يتشدقون بالسير في ركبه (لو عثرت بغلة في العراق لسألني الله عنها لمَ لَمْ أسوي لها الطريق) وهم ما قادرين يحسوا بعثرة "اخوانهم المسلمين" حسب تعبير رئيسهم في التلفزيون هذه الأيام .. ليها حق تقرف من ناس دارفور ومن ناس الجنوب لأنها مابتشوفهم الا في محطات التلفزة الخارجية .. قالت "قرفانة" قالت ..
عمر

عمر عبد الله

Quote: .. ليها حق تقرف من ناس دارفور ومن ناس الجنوب لأنها مابتشوفهم الا في محطات التلفزة الخارجية

هي قرفانة من الناس المقطعين.....في كل بكان مش دارفور والجنوب بس....وناسية انو دي حرب...والحرب ما بترحم

ايوا ياسجيمان ... حجه سعاد ما بتعرف ده كله وما شافته ...حجه سعاد بتعرف تسك بنات

الاسلاميه وترفدن عشان الواحده طرحتها وقعت من راسها... حجه سعاد بتعرف تقول العميد

مايصافح الخريجات لانه حرام... حجه سعاد بتقول حرام وحلال في زي ده لكن ما بتعرف انه الجوع

كافر وانه حرام ناس تموت من الجوع وناس تاكل حقها وحق التانين عشان كده بتتعجب لما يكون

في ناس بيهتمو بالفقراء ويجيبو صورهم... عشان كده انت يا سجيمان ياخوي ما تتعجب

وعندما تجلجل السماء
يهطل المطر
و يعلم الفقير أنه الغنىُّ و القوىُّ
أنه الذى
لأجل لحظة المخاض
عاش ينتظر
بكفه الدعاء
وجهه النقاء
صدره السماء
صوته القدر
و أننا اذا بدت لنا
أظافر السباع
تنهش المضاجع التى نما
على حريرها
هدؤونا البسيط و الأمان و الخدر
يذوب صمتنا الدفين
و اتكاؤنا على حواجز الغياب أمنين
ليسقط الجدار بيننا
ويخرج النهار من عيون شعبنا
فينهض البشر
اؤلئك الذين يحلمون بالكساء
هؤلاء من لأجل عيشهم
يمدّدون فى العراء
يلهثون خلف قطعة الرغيف
يحتمون بالرصيف و الشجر

من قصيدة (منك قادم إليك)
معز عمر بخيت

سجيمان يا اخوي انا ماشي السودان يوم الجمعة الصباح ورسل الموضوع قبل الخميس عشان يوم الخميس ح اشتغل صفحة التلاتا الجاي.. واذا في اكثر من موضوع رسلهم لآنك لو مشيت مقرات بتاعتك دي لا في انترنت ولا بتيخ ولا حاجة فمن هسة رسل لي كم موضوع.. وانت ماشي السودان متين (ما ح اكلم زول)..

Quote: والله الايام دي يا عمر اخوي...انا ماني لبابة مورووود.....وقاعد اهضرب

ضحــكات عريــــــضة
والله دى أوسكار شحمان يا سجيمان
ما قتو لا ورا مابنتر .. حتى كان إتردفنا

منعمشوف

Quote: ما قتو لا ورا مابنتر .. حتى كان إتردفنا

غايتو انا ما قلت النضم دا............... شوف الزول القالو

Quote: وعندما تجلجل السماء يهطل المطر و يعلم الفقير أنه الغنىُّ و القوىُّ أنه الذى لأجل لحظة المخاض عاش ينتظر بكفه الدعاء وجهه النقاء صدره السماء صوته القدر و أننا اذا بدت لنا أظافر السباع تنهش المضاجع التى نما على حريرها هدؤونا البسيط و الأمان و الخدر يذوب صمتنا الدفين و اتكاؤنا على حواجز الغياب أمنين ليسقط الجدار بيننا ويخرج النهار من عيون شعبنا فينهض البشر اؤلئك الذين يحلمون بالكساء هؤلاء من لأجل عيشهم يمدّدون فى العراء يلهثون خلف قطعة الرغيف يحتمون بالرصيف و الشجر من قصيدة (منك قادم إليك) معز عمر بخيت سجيمان يا اخوي انا ماشي السودان يوم الجمعة الصباح ورسل الموضوع قبل الخميس عشان يوم الخميس ح اشتغل صفحة التلاتا الجاي

حاضر يا دكتور
وشكرا للقصيدة الجميلة دي

سلوى صيام

Quote: عشان كده انت يا سجيمان ياخوي ما تتعجب

انا ما متعجب..... انا حزين..غاية الحزن

Quote: بما انني من قدامى الجيعانين والمقطعين ولي شرف الخدمة في هذا المجال....اطالب بروفسير سعاد الفاتح.... بالاعتذار العلني .... لجيعانين ومقطعين المليون ميل......

سجيمان الحاشا ما سجمان
اضم صوتي لصوتك واطالبها
بالاعتذار

ليك وحشه والله يالحاشا
ما سجمان

هذا افضل بوست اقرأه لك يا سجيمان
وافضل بوست يكتب في هذا البورد منذ زمن بعيد؛
- باستثناء بوستات شيري طبعا -..

عادل

Quote: وافضل بوست يكتب في هذا البورد منذ زمن بعيد؛

تسلم يا عادل

مها عبدالله
حبابك

Quote: اضم صوتي لصوتك واطالبها بالاعتذار

ان شاء الله تبقى عاقلة وتعتذر

Quote: وما تنسي انتي والزيك من حكامنا بدون استثناء سبب في فقرهم وجوعهم......

قول لابن ادم فى بلد طالت معاناتو وتعب
حكاموا طاشين بالشرق..وسكانو دايشين بالغرب...حميد


سجيمان انت بتبالغ كلامها صاح ستى سوسو..لزومو ايه لى ناس فى غاية الترف والحبور ذكر دارفور والبلاوى دى..بطل حسادة انت وناس التلفزيون يعنى هى بتاكل ليها فى بقلاوة على العشاء تجى تصدموها بالمناظر السخيفة دى.. ماليكم حق يا ناس التلفزيون تطمموا بطن البت سوسو...يكون بتتوحم يا سجيمان؟؟؟باقى انت دكتور،،،

سيجمان سلامات

والله البوست ده موضوعى ومحبوك ومن اجمل ما قرأت لك

اها بعدين مابتحلك هضربة ولاحمى، شيل شيلتك لسه فى بيوت اشباح


واجازة سعيده

اشراقة مصطفي

Quote: اها بعدين مابتحلك هضربة ولاحمى، شيل شيلتك لسه فى بيوت اشباح

انا ما محتاج لبيوت اشباح......راسمالي نهرة بس

صديق الموج

Quote: قول لابن ادم فى بلد طالت معاناتو وتعب حكاموا طاشين بالشرق..وسكانو دايشين بالغرب

كلام رائع روعتك وروعة حميد

قدمت رشا التنقارى أمس السبت برنامجا تلفزيونيا استمر لحوالى الساعة باسم "ذكريات داعية" مع الدكتورة سعاد الفاتح، وقد نعت سعاد على الإعلام الغربى يشدة تحيزه محتجة "كيف يمشى دارفور ويجيب الناس المقطعين الوسخانين ديل"!! دعت سعاد أيضا لتحريم تعليم الرقص للأطفال ووصفت عمر البشير بالعدل والرحمة وأفاضت فى ذكر محاسن "الوطنى الغيور" جون قرنق ومنصور خالد وياسر عرمان، وقالت أنها كادت تبكى لما أجلس جون قرنق أبناء على عثمان على حجره وأطعمهم بيده!! وثمنت عزاء قرنق لآباء الشهداء!!!!
عووووووووووووووووووووك يا ........... ألفونا!!

عبد الله عثمان

الحمد لله اللقيت زول شاف الحلقة معاي

أجمل تعليق قرأته عن الجنجويد كتبه كاركاتيرست اسمه نزيه يقول للحكومة: التسوي بى جنجويدك يغلب أجاويدك

مرحب بالجميع في إبداع سجيمان التراجيدي

يا سجيمان إت لية بتخلط كيمان العز مع الطبقة العاملة
ما تقول لي جبهة ديمقراطية . يعني شن لمه خالتي سعاد مع ناس دار فور
يعلم الله خالتي دي من إتخرجت من الجامعة ولندن جاكي زول تحضير ساكت
وبعدها رجعت لي السودان في مناصب حساسة ومنها مديرة جامعة أم درمان الإسلامية وتعال شوف ليك جنس إنضباط حرم من البواب لي الطالبة مشي دغري . يا زول جوة الجامعة دي قالوا خالتي سعاد تجي بي جنبك والله تقول ما تزح جنس عطور ما تقول لي باريس ولا حاجة. ومنها للبرلمان بس بعد الجلسة كتاب الله جاك زول وطوالي علي البيت وآخر مرة كرمها رئيس الجمهورية . وقزاز عربيتها مظلل ما بتفتح علا قدام البيت . يعني لا بتشوف وساخة ولا حاجة . وعشان كدة كل كلمة قالتها في محلها وما عايزة أي مناظر سودانية .

بحيراوي

فى ايام الديموقراطية الله يطراها بالخير وبعد مذكرة الجيش الشهيرة للحكومة خرجت الجبهة من الحكومة وابتدعت حاجة اسمها مذكرة المصاحف وبداوا المظاهرات فى الاحياء والنزول للشارع بعد صلاة التراويح ..
وفى يوم وانا راجع من الجريدة قابلت واحدة من تلك التظاهرات متجهة نحو دار حزب الامة فى الصحافة وامراة تهتف بعصبية غير عادية الى الاسلام يا حكام ..الى الاسلام يا حكام ..
فاذا بها سعاد الفاتح ام حسن الذى ذهب لخارج السودان ولم يجاهد ليستشهد فى الجنوب ليدخل الجنة مع ابناء الفقراء من امثال عبد الفتاح وغيره من المخدوعين بخطاب الاخوان الاعلامى ..لان الدوحة اكرم له ولامثاله من تلك الجنة التى ذهب اليها اولئك المغرر بهم ..
انا متابع احاديثها الصحفية منذ الفتنة التى حدثت فيما بينهم وهى طبعا محسوبة علي الترابي ولكنها لم تعلن ذلك تقية وتم اكتشاف ذلك وتم طردها من القصر ومنذ حدوث هذه الحادثة تحاول اظهار الولاء لعلي عثمان بطرق شتى منها ما قالته فى هذا البرنامج ولا اعتقد ان ما تتزلف به لهم يشفع لها ولكنها تكرره وفجاة تتذكر ما حدث فى القصر وتذكره فى كل لقاءاتها ولكنها لا تذكر اسبابه ..وربما سبب لها ذلك يا سجيمان حالة نفسية ..
مسالة الولاء لشيخين صعبةاحدهما فى القصر والثانى فى السجن ..تعمل ايه ما لازم تهضرب.

الكيك

Quote: تعمل ايه ما لازم تهضرب.

يعني ممكن تكون مورووده؟ زي كدي

بحيراوي

مرحب حبابك

Quote: وقزاز عربيتها مظلل ما بتفتح علا قدام البيت

هي ما دايرة تشوف القواعد الجماهرية بتاعتها؟.....القاعدين في المجلس يتكلمو باسمهم؟

سجيمان السجيمان

خالتك احتمال الحركة الاسلامية الي فرحانه بيها شديد دي علمتها أنه الفقر عيب وعيب شديد عشان كدة الرأسمالية هي الحل الأمثل الي قال عليه ربنا .. ودعم الاغنياء على حساب الفقراء هو أساس شرع ربنا وعشان كده البنوك الاسلامومافوية سرقت قوت المزارعين باسم الدين لتضع أموالهم في جيوب رأسماليي الجبهة ... ولما اتذكروا انو ممكن يقصمو ظهر الفقير بوسائل أخرى ما قصروا .. المدارس (عديمة الجدوى)، المستشفيات، دمغات الشهيد والجريح والمطهر ... وديوان الزكاة الي بيجبي المال من الجميع وما عارف الزكاة البيجبوها دي بتمشي لفقراء أمريكا والدول الرأسمالية العظيمة ولا شنو

ليك آلاف التحايا يا غالي

هاني ابو القاسم
سلام

Quote: وديوان الزكاة الي بيجبي المال من الجميع

الغريبة فعلا اي زول واي حاجة بيشيلو منها زكاة....لكن يمكن ما بتكفي علا العاملين فيها

اسفين يا حاجه سعاد
نطمم ليك بطنك شويه،استحملينا انحنا اصلنا عملاء للصليبيه الدوليه والصهيونيه العالميه.
و يخسي على ناس دارفور المقطعين والجيعانين ليه ما اتنضفوا ولبسوا هدوم العيد لما الكاميرات جات، لازم نورى الوجه المشرق للسودان الانقاذى الحضارى. ايه رايك يا دكتوره يا قائده عالميه لما يجوا مصورين تانى تمشي انتى واحسان الغبشاوى ولبلوبه الفضل و بت شبرين وهبه السمحه تتصوروا بي شحمكم المدفق و وشوشكم النايره و هدومكم وارد ايطاليا وفرنسا.

بعد ده كل المقطعين والجيعانين فى دارفور اشرف واطهر منكم كلكم يا قتله يا مجرمين

أستاذنا العزيز




ألذ حاجة فى الموعــــــــــــوض ده (انو ناس الجرايد ما حيقدروا ينشروا)


عندك فكرة عن مواضيعك البتنشر بإسمك (أقصد بتتسرق)


فى الصحافة

ناجي الزبير الملك

Quote: عندك فكرة عن مواضيعك البتنشر بإسمك (أقصد بتتسرق) فى الصحافة

في مواضيع عندي عنها خبر..... لكن تاني اي موضوع انا ما عندي عنو خبر...وما وافقت انو بتنشر........وحات الله حاشتكيهم....واشيل حالهم

مراويد

شكرا لي صور السادة الجيعانين والمقطعين

سجيمان

(الصلاة مع علي أقوم والطعام مع معاوية أدسم)

ولهذا( عظم ثدياها وربت عجيزتها)

جني

جني

Quote: (الصلاة مع علي أقوم والطعام مع معاوية أدسم)

غايتو انا كان حاضر.... بمسك في توب معاوية قوي...لكن برضو غيبنا الفقر ومالقينا طريقة نمسك

عمنا سجيمان
ولماذا لا تقرف الدكتورة وتزهج؟ هؤلاء المنكوبين بينهم بين الدكتورة مئين السنين الضوئية.. بل لعلهم من مجموعة شمسية اخرى، وليس من ولاية سودانية اخرى..
والحاكمون في سوداننا- على عموم أنواعهم، وتقلب اتجاهاتهم- مترفون بتحاشي ما يجرح ضميرهم الحكومي الرقيق.. فمن غير المتصور لديهم أن لسياساتهم ومشاريعهم الحاكمية ضحايا ومتأثرين.. لذا ثارت ثائرة الخرطوم الانقاذية حين أكثرت وسائط الإعلام العالمية في تبيان ما نال بعض أهلنا في أقاصي بلادنا.. وأشهدك الذي لا إله إلا هو أن مسؤولاً حكومياً ذي حيثية كال - في حديث وجهاً لوجه- لمؤسستي التي أعمل فيها صنوفاً من اللوم والتوبيخ لكونها "متحيزة" وغير عادلة.. ولماذا هي كذلك في نظره؟ لأنها تعرض ما تخرجه الوكالات العالمية على شاشتها.. وكأن هؤلاء ليسوا بسودانيين، بل كومبارس من الدرجة العشرة جيء بهم للعب دور المنكوبين أملاً في إحراج حكومة الخرطوم وطعن مشروعها الرسالي- إن تبقى منه شيء يذكر- في مقتل.
عمنا سجيمان
شكراً لأسلوبك الموجع وكلامك المؤلم.. ما نحتاجه فعلاً هو إيقاظ النائم السوداني تجاه الغرغرينا التي تأكل بعض أطرافه.. حيث نام هو وغيره صاح بآلامه...
شكراً كثيراً

serenader

Quote: والحاكمون في سوداننا- على عموم أنواعهم، وتقلب اتجاهاتهم- مترفون بتحاشي ما يجرح ضميرهم الحكومي الرقيق.. فمن غير المتصور لديهم أن لسياساتهم ومشاريعهم الحاكمية ضحايا ومتأثرين

والله دي مصيبة كبيرة

ما أروع هذا البوست البسيط الخفيف العميق جدا
فقد نجحت في أيصال رسالة كبيرة وعريضة كتبت عنها المجلات
والصحف وسودت بها الالاف الصفحات - نجحت في أيصالها بكلمات بسيطة عميقة ومعبرة
وساخرة
لك ودي يا سيجيمان

شكــرا يا سجيمــان،

مسكينـة أم حسـن البطـل، ما عرفت إنـو الخـواجـات ديل ما بحبـو إلا الناس الجعانين والوسخـانين.

ابو الريش

Quote: ما عرفت إنـو الخـواجـات ديل ما بحبـو إلا الناس الجعانين والوسخـانين

ما تشوف لي واحدة المانية تحبني وتاخد فيّ الاجر

كمال عباس

Quote: لك ودي يا سيجيمان

ولك ودي يا كمال

سلم علي عشوشة... كان عتر لك

"ما تشوف لي واحدة المانية تحبني وتاخد فيّ الاجر"

سجيمـان،
الألمـان ديل جـوع وتـوســخ ما بفوتـو عليهـم!! حيقولو ليك دى قـديمـة شـوف غيـرهـا!
غايتـو ما عـارف.. كان مت فى الجنـوب إحتمال شيـخ حسن يعقـد ليك على واحـدة منهـم بطـريقـة خاصـة.. هـو قال مسمــوح ليـه يعقـد على بنات الحـور بس.. مـع إنـو جون قرنق هسى طلعـو أوت أوف بزنس.

Quote: كان مت فى الجنـوب إحتمال شيـخ حسن يعقـد ليك على واحـدة منهـم بطـريقـة خاصـة

شيخ حسن الله يمرقو حسي من عضة الفأر...... لكن باقي لك الفار دا عضاهو في كراعو ولا في بكان تاني............ الكراع اصلو ما فيها حتة قدر خشم الفار

فوق

من اجل الشعب الفأري

سيجيمان

الود والتقدير

ياخوي كتار زي خالتك سعاد دي من التخمة بقوا ما يتصوروا انو في زول فلسان والله في زول بايت القوي..والله عريان..وياخوي حكاية يصورهم عريانين دي زات ياها البلوي.

ئاخوي خبر الفار شنو نعل ماجتو عوجة

يديك العافية
عبد الله جعفر

عبد الله جعفر

Quote: ئاخوي خبر الفار شنو نعل ماجتو عوجة

تمت ترقيته من... فار... الي دفتردار

راشد عبد الرحيم ---- الرأي العام -- 15/7/2004

Quote: وكثير من الصور التي عكست أنواعا من النشاطات العادية في دارفور إذ أن غالب القري هناك وفي أوقات السلم تتكون من مبان من (( القش )) وفيها النساء هن اللائي يحملن الماء وفي ذاك المجتمع فإن مهمة جلب الماء تقوم بها النساء وأن المسافات التي يقطعنها ليست بالقريبة وفي دارفور أزمة مياه متوارثة منذ مشروعات محاربة العطش علي أيام مايو وما بعدها. والصور التي عكست أبانت عن أوضاع أقسي ما فيها أن مواطنين فقدوا أرضهم ولكنها تبين أنهم في أوضاع ليست بائسة أو سيئة قياسا علي ما كانوا فيه من أوضاع. والصورة المقابلة تكمن في أن الإعلام الحكومي والرسمي والوطني قد عجز عن عكس الأوضاع في دارفور ليست هناك صور معبرة في الصحافة السودانية وفي القناة الرسمية السودانية وليس في السودان وللأسف وكالة مختصة ومعنية وخبيرة في ترويج الصور.

محمد عبد الحميد


طيب حاجة سعاد بتقول صور الناس المقطعين وجيعانين ليه؟..... يكونو ديل من وين يا ربي؟.....

Quote: وقالت أنها كادت تبكى لما أجلس جون قرنق أبناء على عثمان على حجره وأطعمهم بيده!!

هم أولاد علي عثمان كانوا جعانين و لا شنو؟ عجايب ، لو كان أدى اللقمه دي للأطفال الناشفه ضلوعا في الجنوب ما كان أحسن!

أنا برضو بقول ده أحسن بوست أقرأه ليك يا سجيمان، تحليل و عمق و موضوعيه.

ندى امين

Quote: هم أولاد علي عثمان كانوا جعانين و لا شنو؟

ايوا.... بدليل انو حاجة سعاد قعدت تبكي وقرنق كان بياكل فيهم بيدو

Quote: راشد عبد الرحيم ---- الرأي العام -- 15/7/2004 Quote: وكثير من الصور التي عكست أنواعا من النشاطات العادية في دارفور إذ أن غالب القري هناك وفي أوقات السلم تتكون من مبان من (( القش )) وفيها النساء هن اللائي يحملن الماء وفي ذاك المجتمع فإن مهمة جلب الماء تقوم بها النساء وأن المسافات التي يقطعنها ليست بالقريبة وفي دارفور أزمة مياه متوارثة منذ مشروعات محاربة العطش علي أيام مايو وما بعدها. والصور التي عكست أبانت عن أوضاع أقسي ما فيها أن مواطنين فقدوا أرضهم ولكنها تبين أنهم في أوضاع ليست بائسة أو سيئة قياسا علي ما كانوا فيه من أوضاع. والصورة المقابلة تكمن في أن الإعلام الحكومي والرسمي والوطني قد عجز عن عكس الأوضاع في دارفور ليست هناك صور معبرة في الصحافة السودانية وفي القناة الرسمية السودانية وليس في السودان وللأسف وكالة مختصة ومعنية وخبيرة في ترويج الصور.

سجيمان بالله الواحد لو طرش ليكم في البورد دا ما ليهو حق!! عاوز يعمل مونتاج لإخفاء العيوب
جني