Post: #1
Title: الشيطــان يسكـــن كيــس الصــعوط
Author: سجيمان
Date: 10-16-2004, 02:26 AM
ما بتذكر...اول مرة سفيت صعوط....متين.... لكن هناك علاقة مودة وعشق متبادل بيني وبينو....ورمضان انا بعتبرو من العوازل....لانو بيجي ويحجب بيني وبين السعوط.... نهارا......ويخليني طول النهار انا شوق وحنين....
انا لاقبل اي اهانة للسعوط....ولا ارضى عن اي زول يذكر السعوط بسوء...اكجنو لي يوم القيامة واشوفو عشرة عشرة....واحدر ليهو في الضلومة....
وكانت من مبادئ التعايش السلمي بيني وبين ام العيال ان لا تذكر السعوط بسوء..او تلغط فيهو....او تقول له افٍ...واي محاولة لاضطهاد السعوط او الاستعلاء عليه...قد تؤدي الي كارثة لا يحمد عقباها....وقد كانت ام الخير نعم الزوجة...ربنا يطول عمرا....كانت في غاية التعاون..وغاية الحب والمودة للسعوط...تحفظو في التلاجة وتشيل الكيس بكل احترام وتقدير وترفعو في بكان مأمون...تمسح السفة الواقعة في البلاط...او في الموكيت.. بروح رياضية طيبة.... هاشة باشة......قلما توجد في مثيلاتها من نساء الرجال السفيفة.....
جاء رمضان.....وانا صراحة من يفوت رمضان اكون شايل هم لي رمضان البعدو....وكلو عشانحيفرق بيني وبين الصعوط نهارا...لما يقرب اذان المغرب.. قبل المويات اكون جبت كيس الصعوط وختيتو جنبي كل مرة اتلفت عليهو واقول ليهو....خلاص هانت كلها دقائق وتحتضن شلوفتي التحتانية بعضٌ منك......
كل محاولاتي لايجاد فتوى تسمح بالسعوط في نهار رمضان باءت بالفشل والنهزرة....سألت واحد قريبنا انصار سنة...عن امكانية سف السعوط في نهار رمضان....قبل علي نهرني ونهزرني وزلاني.....وقرررررررب يطلعني كافر....مشيت لي واحد تاني مو انصار سنة.....وقعدت اشكر وامدح في المذهب المالكي.....وكيف انو مذهب ييسر على المسلم امره.....ويهون عليهو كل قاسي....ومذهب اصلو ما بيمسك الزول من ايدو البيتوجعو....ومالك زاتو الله يرحمو كان راجلن طيب وعديل....واصلو ما بيغليت علي زول...ويا شيخنا دحين دايرك تفتي لي في امكانية سف السعوط في نهار رمضان.....او ان شاء الله اشمو ساااااكت بس.....لكن لا فائدة.....
في اول يوم من رمضان.. قمت من النوم وشي ينعل قفاي......لبست البنطلون..والقميص مقلوب.....وانا ماشي الشغل....عاينت لقيت كيس السعوط فوق التربيزة....بعيونو يقول لي تعال وتعال....واحتضنته عيناي...وطفق الدمع منها....
في الشغل... قعدت في المكتب وافتح واقفل في الادراج بدون سبب....وفجأة لقيتصعوط قاعد في الدرج ناسيهو انا من امبارح....كل ما افتح الدرج هو يمد لي لسانو ويغيظني.......قلتو يعني انت عامل فيها قوي؟....ونمرة واحد؟....وساموطي؟...والله حقو الزول حسي يقوم عليك ويوريك شبهك ويسفك.....الله ينعل ابليس....تاني فتحت الدرج لقيت الكيس برضو يعاين لي ويضحك...شلتو بطرف اصابعي.... وبكل قوة قلب..ورباطة جأش...وشجاعة فائقة....رميتو في الادبخانة....واعاين لو وهو يدردق....الي القاع..... وقلت لو.....اها..... عاجبك كدي؟؟؟؟؟؟
رجعت البيت وقلت اخد لي غفوة شوية كان الوقت يجري....غفيت ...لوري..... لوري قلاب مليان صعوط .. صعوط ممطر وجاهز...اشوفو....واشوف نفسي وانا غاتس فيهو لي اضنيا.....واتهزني فوفو من كراعي ... افتح عين واحدة واعاين لها....واشوفا شايله كيس صعوط برضو وقالت لي بابا ... بابا... هاك الكاكا......
|
Post: #2
Title: Re: الشيطــان يسكـــن كيــس الصــعوط
Author: bunbun
Date: 10-16-2004, 02:45 AM
Parent: #1
سي جي سفة
يدعوكم الاتحاد العام للشياطين للإجتماع السنوي لمناقشة أمر الإجازة السنوية في رمضان ! نرجو الحرص على الحضور وعدم التغيب !
|
Post: #3
Title: Re: الشيطــان يسكـــن كيــس الصــعوط
Author: سجيمان
Date: 10-16-2004, 06:29 AM
Parent: #2
بن بن
خليني انفس شوية عن رغبتي القُرادية دي وبجيك راجع
|
Post: #4
Title: Re: الشيطــان يسكـــن كيــس الصــعوط
Author: saif massad ali
Date: 10-16-2004, 06:50 AM
Parent: #3
يا اخوي انا با بحب التنمباك قرف يقرفك , ده كلام شنو كلو كملتو قبلت علي التمباك
|
Post: #8
Title: Re: الشيطــان يسكـــن كيــس الصــعوط
Author: سجيمان
Date: 10-16-2004, 09:43 PM
Parent: #4
سيف مساعد علي
| Quote: يا اخوي انا با بحب التنمباك قرف يقرفك , ده كلام شنو كلو كملتو قبلت علي التمباك |
انت زول معزتك عندي زي معزتي للسعوط...ما تخليني اغلط فيك
|
Post: #5
Title: Re: الشيطــان يسكـــن كيــس الصــعوط
Author: سجيمان
Date: 10-16-2004, 10:15 AM
Parent: #2
بن بن
| Quote: يدعوكم الاتحاد العام للشياطين للإجتماع السنوي لمناقشة أمر الإجازة السنوية في رمضان ! نرجو الحرص على الحضور وعدم التغيب ! |
حضرنا ولقينا..دار الكلاب ترقع
سجيمان
|
Post: #6
Title: Re: الشيطــان يسكـــن كيــس الصــعوط
Author: ابو جهينة
Date: 10-16-2004, 12:47 PM
Parent: #5
سي جي العزيز
في قريتنا بالشمال .. وجدت عجوزتين نهار رمضان و هما تستمخان بالصعوط المدردم في حجم أكبر من الحجم المعتاد أيام الفطر العادية ..
فأوضحت لهما بأن الصعوط حرام في رمضان لأنه من المكيفات كالسجاير و القهوة و خلافه ..
فقالت واحدة و هي تغير إتجاه السفة بلسانها للجهة الأخرى و تبزغ بزغة سوداء :
هوى يا الغبيان المفلهم .. هو بلا الصعوط في شيتن بيخلي الصوم ليهو طعم ؟ الواحدة فينا تتمخمخ و راسا ينعدل و تقعد مع الجوع دة تفكر في حكمة الله البالغة دي السواها في رمضان ..)
ثم أخرجتْ حقتها و قالت : هاك .. أكان ربنا يهديك يا جنا ...   
|
Post: #7
Title: Re: الشيطــان يسكـــن كيــس الصــعوط
Author: ناجى الزبير الملك
Date: 10-16-2004, 03:35 PM
Parent: #6
| Quote: واتهزني فوفو من كراعي ... افتح عين واحدة واعاين لها....واشوفا شايله كيس صعوط برضو وقالت لي بابا ... بابا... هاك الكاكا...... |
يالله..... سيجيمان .......ابو النسب ..
فوفو دى ما تخليها....تشيل الكيس زاتو ....
انت سف زى ما داير ....
.....
|
Post: #11
Title: Re: الشيطــان يسكـــن كيــس الصــعوط
Author: سجيمان
Date: 10-17-2004, 03:10 AM
Parent: #7
ناجي الزبير الملك
Quote: يالله..... سيجيمان .......ابو النسب ..
فوفو دى ما تخليها....تشيل الكيس زاتو .... |
خلاص ؟؟؟؟ انت بقيت عليها؟؟؟ نرجع لانور شيلتو؟
|
Post: #9
Title: Re: الشيطــان يسكـــن كيــس الصــعوط
Author: سجيمان
Date: 10-16-2004, 11:07 PM
Parent: #6
ابو جهينة
رمضان كريم
| Quote: تقعد مع الجوع دة تفكر في حكمة الله البالغة دي السواها في رمضان |
حكمة الله شنو؟ السواها؟
|
Post: #10
Title: Re: الشيطــان يسكـــن كيــس الصــعوط
Author: abas
Date: 10-16-2004, 11:32 PM
Parent: #1
يع يع يع يع يع يع يع يع يع يع يع يع يع
بتسف
يع يع يع يع يع يع يع يع يع يع يع يع يع
|
Post: #12
Title: Re: الشيطــان يسكـــن كيــس الصــعوط
Author: خضر عطا المنان
Date: 10-17-2004, 03:31 AM
Parent: #10
Quote:
وكانت من مبادئ التعايش السلمي بيني وبين ام العيال ان لا تذكر السعوط بسوء..او تلغط فيهو....او تقول له افٍ...
واي محاولة لاضطهاد السعوط او الاستعلاء عليه...قد تؤدي الي كارثة
لا يحمد عقباها....
|
غايتو والله يا قشيران أم الخير دي شقية في عمرا دا!!!
حتى السعوط ممنوعة تتكلم عنو !!!
أنا ماعارف ام الخير دي قاعدة معاك كيفن لاأسع ؟؟؟؟!!!!.
ورمضان كريم .
خضر عطا المنان
|
Post: #13
Title: Re: الشيطــان يسكـــن كيــس الصــعوط
Author: Sidig Rahama Elnour
Date: 10-17-2004, 03:59 AM
Parent: #12
سجيمان
رمضان كريم
كمان السفة وجقيمات الوضوء وضواقة الملاح بيحمن الصيام ( انت مالك دائر تجيب لينا هواء بارد )
|
Post: #17
Title: Re: الشيطــان يسكـــن كيــس الصــعوط
Author: سجيمان
Date: 10-17-2004, 11:52 AM
Parent: #13
صديق رحمة النور
| Quote: كمان السفة وجقيمات الوضوء وضواقة الملاح بيحمن الصيام ( انت مالك دائر تجيب لينا هواء بارد ) |
يعني اتوكل علي الله واعتبر دي فتوة
|
Post: #15
Title: Re: الشيطــان يسكـــن كيــس الصــعوط
Author: سجيمان
Date: 10-17-2004, 09:04 AM
Parent: #12
خضر عطا المنان
Quote: أنا ماعارف ام الخير دي قاعدة معاك كيفن لاأسع ؟؟؟؟!!!!.
|
قاعدة معاي....وكمان بتحترم الصعوط جدا
|
Post: #14
Title: Re: الشيطــان يسكـــن كيــس الصــعوط
Author: سجيمان
Date: 10-17-2004, 06:13 AM
Parent: #10
عباس
| Quote: يع يع يع يع يع يع يع يع يع يع يع يع يع |
13 يع ؟...... يا حنكوش
|
Post: #16
Title: Re: الشيطــان يسكـــن كيــس الصــعوط
Author: Dr. Moiz Bakhiet
Date: 10-17-2004, 09:11 AM
Parent: #14
سجيمان،
السعوط ولا بسوي سرطان ولا حاجة..
يا زول سف سفك
مش أحسن من السافينو الجماعة في السودان
|
Post: #18
Title: Re: الشيطــان يسكـــن كيــس الصــعوط
Author: سجيمان
Date: 10-17-2004, 01:08 PM
Parent: #16
د.معز
اريتك انت فكي السرور يا يابا....اها من باكر دي لومك علي
|
Post: #19
Title: Re: الشيطــان يسكـــن كيــس الصــعوط
Author: سجيمان
Date: 10-17-2004, 10:32 PM
Parent: #18
*
|
Post: #20
Title: Re: الشيطــان يسكـــن كيــس الصــعوط
Author: saadeldin abdelrahman
Date: 10-17-2004, 11:09 PM
Parent: #1
يا سي جي
مع اننا من مشجعين البرنجي لكن بنقدر نفهم وجهة(خرمتك)
بس انتا شلوفتك متبري منها ولا متبرية منك؟
They Said in the Hanbata times.. If the Hanbaty Couldn't find a thing to rub, he would drink a water and put a (dogar) wo Yega3 yenoom fi aldaima
|
Post: #21
Title: Re: الشيطــان يسكـــن كيــس الصــعوط
Author: سجيمان
Date: 10-18-2004, 02:32 AM
Parent: #20
سعد الدين عبد الرحمن
| Quote: بس انتا شلوفتك متبري منها ولا متبرية منك؟ |
يا جماعة الحكاية شنو؟؟؟زول يقول لي لسانك....وزول شلوفتك...وزول سنونك....متبري منك؟...
انا كدا حاقعد حريطة ساكت
|
|