Post: #1
Title: اغتيــــال............الرئيـــس
Author: سجيمان
Date: 10-19-2004, 06:39 AM
سافرت مصر سنة 2002......وصلت مطار القاهرة.....في صالة القدوم وعند نقطة تفتيش الجمارك...فتشو عفشي هو اصلا كان شنطة واحدة......وانا واقف مبتسم ومقدم كراع ومأخر كراع...وكلي ثقة في نفسي وفي عفشي الذي لا يحتوي علي اي ممنوعات....وفجأة... مفتش الجمارك..... ينادي ضابط......والضابط ينادي ضابط تاني...والضابط التناي يكورك لي تالت.....وفي ثواني الصالة كلها اتملت دبابير......واتلمو فوق شنيطي....وطلعو حجاب طبلة.... ملفوفة بي جلد...ومخيت عليها......وجا عسكري قايد كلبين الكلب مقاس اكس لارج...الكلب قدر الدحش.... وجدعو الحجاب للكلب والكلب قعد يشم....والظاهر لم يوفق في شمو.....
انا شخصيا اول مرة اشوف الحجاب ابو طبلة دا....رغم عن انو في هدومي....وتظكرت...لابد انو الحجاب دا جا هنا بفعل فاعل.....المرا...المرا...مافي غيرا....اكيد دا كادوك بن كلب..وخاتينو لي في هدومي.....الطبلة فيها مفتاح...يعني ممكن تتفتح تتقفل...الظاهر عليهو دا كادوك النَقة....لانو انا عااااارف نفسي..زول نقيّق...وبراااااي....لو مسكت في موضوع اقعد انضم فيهولحدي ما يظهر موضوع تاني غيرو....عاوزين يكضموني...وفعلا.....في الايام الاخيرة دي.. بقيت احيانا احس انو ما عندي رغبة في النضم.....الظاهر لو عاوزني اكضم بيقفلو الطبلة بالمفتاح..وبي قفلة الطلبة يتقفل معاها خشمي....ساقوني كتيبة الضباط ديل.. لي مكتب....وقعدوني في كرسي...واحد فيهم قال لي... اسمع يا اخينا ما تتعبنا معاك وتتعب نفسك..وبدون لف ودوران...وبدون كلام كتير.....وما تخلينا نلجأ لاساليب مش حلوة معاك...وانت باين عليك زول محترم...تقول لنا..... علاقة ايه بي تنظيم القاعدة؟....واخر مرة شفت اسامة بن لادن والظواهري متين؟....والهدف الجاي تفجرو هنا وين؟...والناس المعاك في مصر منو؟... يلا خليك حلو.... وجاوب..... عشان نحبك.......
في اللحظة دي.... فرتقو الحجاب وطلعو الطبلة...وطلعو الورق الجوا الحجاب...وفرتقوهو....اتلفت علي واحد من الضباط وضحك باستهزاء وقال لي...دا انتو خطيرين.....وكمان عاملين شفرة؟....يلا يا حلو عاوزنك تقرا الكلام المكتوب دا...فتحو لي الورقة قدامي... الورقة فيها كتابة كتيرة ومامفهومة صراحة...وفيها نجوم ..ومربعات...ومثلثات....وهيصة جواها......واحد من الضباط اشر علي المربعات....وقال لي دي واضحة... دامخطط للهدفالجاي تفجرو.....والنجوم دي واضحة.... ودي نجمة داوود...اكيد الهدف ليهو علاقة باسرائيل...... يلا اجدعن كدا وورينا الباقي...!!!!!!
لا اله الا الله محمد رسول الله....دي شقاوة شنو يا جماعة ؟....ودي ورطة شنو؟...........
والله يا جماعة انا ما عندي علاقة بالحكاية دي...وانا زاتي اول مرة اشوف النصيبة دي في شنطتي؟.....الضابط قال لي...لا يا شيخ؟؟؟؟..ما كلهم بيقولو كدا.....طيب يا ابن ادم دا؟ ورقة الحجاب كان مكتوب فيها يا ابن ادم......يا ابن ادم دا ... اسمو الاول منو؟هو ابوهو ادم عرفناهو..نحن عاوزين اسمو الاول..... اسمو ايه؟.......
في ورقة الحجاب تحت مكتوب فيها وجعلنا من بين ايدهم سدا ومن خلفهم سدا.....الضباط مسكو في كلمة سدا..وكل واحد قعد يعاين للتاني ومطير عينو.....وواحد قال لي.......وانتو برضو جاين تفجرو السد العالي؟..... ماشاء الله.... لا دا مخطط كبير ااوي......وقلبو ورقة الحجاب....ولقو مكتوب كلام كتير ورسم وشغلانة طويلة عريضة....والكلام الواضح كان" تبارك الذي بيده الملك".....والفكي الحمار الكتب الحجاب كلمة تبارك بدل ما يكتبها بالتاء كاتبها بالميم.... يعني بقت مبارك الذي بيده الملك...الضابط جرا فيني نور طويل ونفسو قام وكفكف ايديهو..وقال يا ديني النبي ي ي ي ي؟..كمان جاين تكتلو السيد الرئيس؟.....دا انت وقعتك سودا.......انا هنا اتخلعت واتبهطت واتهجمت....وان قرصوني ما اكب الدم...قلت لو وين السيد الرئيس.؟....قال لي شوف....وختا اصبعو فوق كلمة مبارك.....هو في غيرو؟.....وبعدين بيده الملك يعني رئيس الجمهورية....
اتلمو كلهم فوق الورقة وكل مرة واحد يعاين لي ويصر وشيهو...ويعضعض في شلاليفو.....مافيها شك يا سجيمان انت رحت شمار في مرقة..والله يازاك يا الفكي الكتبت الحجاب .....وانتي يا ام الخير اصبري لي.... ان مرقت انا من دي.....اوووووعك ترجيني في البيت.............
|
Post: #2
Title: Re: اغتيــــال............الرئيـــس
Author: خضر عطا المنان
Date: 10-19-2004, 06:57 AM
Parent: #1
Quote:
وانتي يا ام الخير اصبري لي....
ان مرقت انا من دي.....
اوووووعك ترجيني في البيت .
|
أم الخير دي يومن لماها فيك يومن أسود ياقشيران ..
كدي خلي أم الخير دي اسع ..
ورينا الورطة دي مرقتا منها كيف ؟؟؟.
خضرعطا المنان
|
Post: #4
Title: Re: اغتيــــال............الرئيـــس
Author: سجيمان
Date: 10-19-2004, 09:07 AM
Parent: #2
خضر عطا المنان
Quote: ورينا الورطة دي مرقتا منها كيف ؟؟؟.
|
قول انتتتتتتتتتتتتتتتتتت
وبعدين عليك الله ما تحرش علي ام الخير...هي براااااها متحلمة
|
Post: #3
Title: Re: اغتيــــال............الرئيـــس
Author: Rama
Date: 10-19-2004, 07:07 AM
Parent: #1
القصة شكلا عندها باقي
صاح ...
|
Post: #8
Title: Re: اغتيــــال............الرئيـــس
Author: سجيمان
Date: 10-19-2004, 10:48 AM
Parent: #3
Quote: القصة شكلا عندها باقي
|
لا..............لا..........انتهت على كدا
|
Post: #5
Title: Re: اغتيــــال............الرئيـــس
Author: Agab
Date: 10-19-2004, 09:59 AM
Parent: #1
Cgman
We are waiting 
Agab
|
Post: #10
Title: Re: اغتيــــال............الرئيـــس
Author: سجيمان
Date: 10-19-2004, 11:51 AM
Parent: #5
Agab
طيب...........
|
Post: #6
Title: Re: اغتيــــال............الرئيـــس
Author: abdalla BABIKER
Date: 10-19-2004, 10:09 AM
Parent: #1
كمل
القصه
يا سي جي مان ودوك وين الجماعه بعد داك
قول وما تخجل
اوعى يكون عملوا ليك ال ؟؟؟؟؟؟؟؟؟؟
|
Post: #11
Title: Re: اغتيــــال............الرئيـــس
Author: سجيمان
Date: 10-19-2004, 01:21 PM
Parent: #6
عبد الله بابكر
| Quote: يا سي جي مان ودوك وين الجماعه بعد داك |
انا الوديتم
|
Post: #7
Title: Re: اغتيــــال............الرئيـــس
Author: Esameldin Abdelrahman
Date: 10-19-2004, 10:13 AM
Parent: #1
سجيمان
رمضان كريم
بس ما تقول لي كتلوكم؟
|
Post: #9
Title: Re: اغتيــــال............الرئيـــس
Author: شمهروش
Date: 10-19-2004, 10:55 AM
Parent: #7
سجيمااااان الشريدان
ماتكون قلتا للضابط انا ما اشربش الشاي اشرب قازوزة
لانها دي اخطر من اغتيال الرئس دي بتفجر السد الصقير
|
Post: #12
Title: Re: اغتيــــال............الرئيـــس
Author: saif massad ali
Date: 10-19-2004, 03:20 PM
Parent: #9
سي جي ام الخير دي بجيها انا نسيبها ود عوج الدرب والله اكتب ليها واحد صاموتي من تجلون ونكسبون تاني ماتفتح معاك خشمها
|
Post: #22
Title: Re: اغتيــــال............الرئيـــس
Author: سجيمان
Date: 10-20-2004, 08:29 AM
Parent: #12
سيف مساعد علي
| Quote: والله اكتب ليها واحد صاموتي من تجلون ونكسبون |
انت قاعد تكتب للصادق حجبات برضو؟؟؟؟؟؟؟؟؟؟؟؟؟
|
Post: #17
Title: Re: اغتيــــال............الرئيـــس
Author: سجيمان
Date: 10-20-2004, 02:42 AM
Parent: #9
شمهروش
Quote: ماتكون قلتا للضابط انا ما اشربش الشاي اشرب قازوزة
|
ما كان عندهم لا شاي ولا قازوزة .........كان عندهم ببسي الحجم العائلي
|
Post: #13
Title: Re: اغتيــــال............الرئيـــس
Author: سجيمان
Date: 10-20-2004, 00:12 AM
Parent: #7
عصام الدين عبد الرحمن
| Quote: بس ما تقول لي كتلوكم؟ |
|
Post: #15
Title: Re: اغتيــــال............الرئيـــس
Author: اساسي
Date: 10-20-2004, 00:22 AM
Parent: #13
سجيمان اوع تكون اتحليت بي اهو عايشين
|
Post: #23
Title: Re: اغتيــــال............الرئيـــس
Author: سجيمان
Date: 10-20-2004, 09:48 AM
Parent: #15
اساسي
| Quote: سجيمان اوع تكون اتحليت بي اهو عايشين |
امشي يا عندك هوّس
|
Post: #14
Title: Re: اغتيــــال............الرئيـــس
Author: abas
Date: 10-20-2004, 00:20 AM
Parent: #1
سجومي
اها يا صديقي منو الصحاك من النوم ام الخير ولا فوفو بعد شاكوش انور بقت ما بتقدر تنوم
|
Post: #16
Title: Re: اغتيــــال............الرئيـــس
Author: قلقو
Date: 10-20-2004, 00:44 AM
Parent: #14
والله ياسجيمان انت اصلك مابتتصرف ودة الموديك فى داهية..ياخى كان تقول ليهم الحجاب ده علقوه لى فى رقبتى لمن طهرونى..وكان ممكن تقول ليهم ده حجاب ضد الرصاص وتقول ليهم ممكن يجربوه عليك..وكدة تكون ارحت واسترحت
شفت الدغالة ياسجيمان ؟
|
Post: #18
Title: Re: اغتيــــال............الرئيـــس
Author: Safa Fagiri
Date: 10-20-2004, 05:24 AM
Parent: #16
| Quote: "وفي ثواني الصالة كلها اتملت دبابير......" |
الا قول لي يا سي جي...
هم كمان عندهم ذنان?
|
Post: #30
Title: Re: اغتيــــال............الرئيـــس
Author: سجيمان
Date: 10-21-2004, 05:33 AM
Parent: #18
صفاء فقيري
| Quote: هم كمان عندهم ذنان? |
كتااااااااااااااااااار.....هم ديل اسيادا
|
Post: #29
Title: Re: اغتيــــال............الرئيـــس
Author: سجيمان
Date: 10-21-2004, 03:40 AM
Parent: #16
قلقو
| Quote: ..ياخى كان تقول ليهم الحجاب ده علقوه لى فى رقبتى لمن طهرونى |
والله انت بتاع مشاكل....حسي جايب سيرة القشارة دي مالك....؟؟؟ يا دوب هجدنا وسكتنا.....من عااااك عووووك
| Quote: وكان ممكن تقول ليهم ده حجاب ضد الرصاص وتقول ليهم ممكن يجربوه عليك.. |
غتاتة...... مسئولة
|
Post: #25
Title: Re: اغتيــــال............الرئيـــس
Author: سجيمان
Date: 10-20-2004, 12:52 PM
Parent: #14
عباس
| Quote: اها يا صديقي منو الصحاك من النوم ام الخير ولا فوفو بعد شاكوش انور بقت ما بتقدر تنوم |
انت قايلو حلم؟؟؟؟؟؟؟؟؟؟؟؟؟............يا ريت
|
Post: #19
Title: Re: اغتيــــال............الرئيـــس
Author: برهان تاج الدين
Date: 10-20-2004, 05:44 AM
Parent: #1
سجيمان ازيك ..
جيت اقول ليك رمضان كريم .. تصوم و تفطر على خير ..
|
Post: #20
Title: Re: اغتيــــال............الرئيـــس
Author: برهان تاج الدين
Date: 10-20-2004, 05:49 AM
Parent: #19
اساسى
| Quote: سجيمان اوع تكون اتحليت بي اهو عايشين |
ما صايم انت يا زول
|
Post: #21
Title: Re: اغتيــــال............الرئيـــس
Author: mohamed osman bakry
Date: 10-20-2004, 06:09 AM
Parent: #20
ســيــجــو
وبــعــديــن !
دبــحــوك ؟
|
Post: #24
Title: Re: اغتيــــال............الرئيـــس
Author: Ali Alhalawi
Date: 10-20-2004, 11:35 AM
Parent: #21
سجيمان
| Quote: مبارك الذي بيده الملك |
إستملت رسالة من صديقى فى القاهرة وقال أنه أتطلع على أضبار المخابرات وقال أنك لم تذكر كل التفاصيل
الرتينزة كان أيضا مكتوب فيها
| Quote: فَلَمَّا أَن جَاء الْبَشِيرُ أَلْقَاهُ عَلَى وَجْهِهِ |
وبعد داك عينك ماتشوشفش إلا النور .. آل البشير آل
خلاص كمّل باقى الحكاية أو أنزّلها من مصدرى الموثوق به
|
Post: #35
Title: Re: اغتيــــال............الرئيـــس
Author: سجيمان
Date: 10-22-2004, 02:36 AM
Parent: #26
د.معز
شكرا يا دكتور......استلمنا الرخصة وركبنا الظلط
|
Post: #33
Title: Re: اغتيــــال............الرئيـــس
Author: سجيمان
Date: 10-21-2004, 01:49 PM
Parent: #24
علي الحلاوي
| Quote: وبعد داك عينك ماتشوشفش إلا النور .. آل البشير آل |
البشير؟....ودا كمان مالم ومالو؟.......يخلو موضوعو لي ناس مطار الخرتوم
|
Post: #32
Title: Re: اغتيــــال............الرئيـــس
Author: سجيمان
Date: 10-21-2004, 11:39 AM
Parent: #21
Quote: ســيــجــو
وبــعــديــن !
دبــحــوك ؟ |
سلخوني......................
|
Post: #31
Title: Re: اغتيــــال............الرئيـــس
Author: سجيمان
Date: 10-21-2004, 08:25 AM
Parent: #19
برهان الدين تاج الدين
| Quote: جيت اقول ليك رمضان كريم |
اصلك ما جيت تقول كدي.......لكن مقبولة برضو
|
Post: #27
Title: Re: اغتيــــال............الرئيـــس
Author: ودالعباسية
Date: 10-20-2004, 02:02 PM
Parent: #1
ياشباب
انا جانى الشمار قالوا الزول دا جرا واطى ....
وما معروف خلوه ولا لسه
|
Post: #28
Title: Re: اغتيــــال............الرئيـــس
Author: ناجى الزبير الملك
Date: 10-20-2004, 03:45 PM
Parent: #27
أنـــــــــــــــــــــــــــــــــــــــا
عارف ....؟؟؟
سى جى مان ا ت ك ل م .... معليش يا جماعة ...نحنا نسايب ويهمنا امر بعض .... واللا ما كده يا صاحبى
|
Post: #37
Title: Re: اغتيــــال............الرئيـــس
Author: سجيمان
Date: 10-22-2004, 06:40 AM
Parent: #28
ناجي
Quote: أنـــــــــــــــــــــــــــــــــــــــا
عارف ....؟؟؟
|
السترة في رمضان قالو فيها اجر كبييييييير
|
Post: #36
Title: Re: اغتيــــال............الرئيـــس
Author: سجيمان
Date: 10-22-2004, 06:17 AM
Parent: #27
ود العباسية
| Quote: انا جانى الشمار قالوا الزول دا جرا واطى .... |
انا من نزلت من الطيارة كنت جاري واطي..... علا هم الله يهديهم بس
|
Post: #34
Title: Re: اغتيــــال............الرئيـــس
Author: فيصل النعيمه
Date: 10-21-2004, 02:22 PM
Parent: #1
| Quote: ورينا الورطة دي مرقتا منها كيف ؟؟؟. |
دا أهم شئ في الموضوع .. يظهر فدت بجلدك منها
بس قولي دا يا تو يوم في سنة 2002
|
Post: #38
Title: Re: اغتيــــال............الرئيـــس
Author: سجيمان
Date: 10-22-2004, 06:56 AM
Parent: #34
فيصل النعيمة
| Quote: بس قولي دا يا تو يوم في سنة 2002 |
اوائل شهر يناير
انت قبضو عندك الحجاب ياتو يوم؟؟؟؟؟؟؟
|
|