Post: #1
Title: قاشّى الشّارع...(توجد صور)...!
Author: mekki
Date: 12-13-2006, 01:12 PM
|
Post: #2
Title: Re: قاشّى الشّارع...(توجد صور)...!
Author: mekki
Date: 12-13-2006, 01:19 PM
Parent: #1
الصور مأخوذه بواسطة فتى أمدرمان ابا عن جد عبدالعزيز دفع الله عبدالعزيز ابن أخ الشاعر الفذ سيد عبدالعزيز...وهو من اسره عريقه وكريمه فقط نعيب عليها إنتمائها المريخى الصارخ...!
وأخذنا الصوره فى التاريخ الموضح عليهاعندما كنا ذاهبين الى الخرطوم ونحا ما زلنا بأمدرمان...
بذلنا مجهودنا الخرافى للحاق بالأتوسان(مريم الشجاعه!) المهاب...
ونجح عبدالعزيز ببراعه متناهيه فى إلتقاطها...
نهديها الى كل القادمين الى السودان...كى يتعرفوا على (الأكواد) الجديده المتداوله...
كما (نحندق) بها اخوتنا المغتربين...
انها تراب بلادنا....!
|
Post: #3
Title: Re: قاشّى الشّارع...(توجد صور)...!
Author: yasir Abdelgadir
Date: 12-13-2006, 04:04 PM
Parent: #2
مكي الحبيب سلامات.....والله مافهمت اي حاجة....
ياخوي اوعي الحادث يكون اثر عليك...تحياتي وبكرة لازم تمشي الاستاد
|
Post: #4
Title: Re: قاشّى الشّارع...(توجد صور)...!
Author: خدر
Date: 12-13-2006, 04:45 PM
Parent: #2
Quote: بذلنا مجهودنا الخرافى للحاق بالأتوسان(مريم الشجاعه!) المهاب...
ونجح عبدالعزيز ببراعه متناهيه فى إلتقاطها...
نهديها الى كل القادمين الى السودان...كى يتعرفوا على (الأكواد) الجديده المتداوله... |
ولاذلت تحمل قلبكـ المرح يا مكي
رغم تصاريف الدهر
بوست لطيف .. سأتابع معكـ
|
Post: #5
Title: Re: قاشّى الشّارع...(توجد صور)...!
Author: mekki
Date: 12-14-2006, 07:34 AM
Parent: #1
ياسر زين العابدين الصديق الخلوق..كيفنك وكيف وليداتك
| Quote: مكي الحبيب سلامات.....والله مافهمت اي حاجة.... |
الراجل خاتى مكنسه فى الحافله...
ومعناها انو قاشّى الشارع يعنى: ما حا يشحن من المحطه حا يقوم فاضى من المحطه ويلقط (يقش) من الشارع
طبعا يا ياسر انت طولت من البلد عشان كده انا رفعت البوست للناس الزيك عندما يجو البلد ويلقو ناس المواصلات خاتين مقاشيش فى عرباتهم ما يستغربوا ويقولو الجماعه جنّوا!
***
خدر: لك ودى واحترامى
|
Post: #6
Title: Re: قاشّى الشّارع...(توجد صور)...!
Author: Tabaldina
Date: 12-14-2006, 07:53 AM
Parent: #1
..
.
والله يا مكى من قريت العنوان
طوالى خيالي جرى للهايس ..
اصلى اليومين دى بقي الهايسات وموضوع الهايس احد الهموم
ولو ربنا اعمى بصيرتك وخلاك تستثمر غلط
تقوم تخش فى هايس .. وتعال بعد داك شوف التنظير والهموم
من السوق ..
المسالة بقت متعبه لحد الفكاهة واظنك شفت الاسكتشات السودانية
عن الهايس وسواقيين الهايس ..
يا زول (التوريدة) مالها ناقصة كدا !!؟
والله يا استاذ كنا بنقش الشارع لانو النمرة طويلة ...
ووين انت !!؟
فى العربي .. _ وهو يكون طلع فى الفكى هاشم _
يا راجل ما قلنا الجمع دى ..جمعة ليك وجمعة لينا
والله يا استاذ جمعتك صادفت المره عيانه واضطرينا نخصم حق الزيت من توريدت السبت
- حظك كدا .. اقدار بس بتتعوض ..
وهكذا دواليكــ..
اها يا مكى تشترى بالاقساط المريحة !!؟
انا هايسى دى فترت من (قش ) الشارع مع الزول دا
هايسى الله يصبرك ..
|
Post: #7
Title: Re: قاشّى الشّارع...(توجد صور)...!
Author: المكاشفي الخضر الطاهر
Date: 12-17-2006, 11:27 AM
Parent: #1
الاخ مكي السلام عليكم بعد غيبة
طيب رايك شنو فى الحافلات فيها صندوق بارد فاضي مربوط فى نفس مكان المقشاشة دي ؟؟
ولا ما قابلتك ؟
جيب صورة الصندوق يا مكي وحلل
|
Post: #8
Title: Re: قاشّى الشّارع...(توجد صور)...!
Author: yasir Abdelgadir
Date: 12-17-2006, 09:41 PM
Parent: #7
مكي العزيز
Quote: الراجل خاتى مكنسه فى الحافله...
ومعناها انو قاشّى الشارع يعنى: ما حا يشحن من المحطه حا يقوم فاضى من المحطه ويلقط (يقش) من الشارع
طبعا يا ياسر انت طولت من البلد عشان كده انا رفعت البوست للناس الزيك عندما يجو البلد ويلقو ناس المواصلات خاتين مقاشيش فى عرباتهم ما يستغربوا ويقولو الجماعه جنّوا! |
مشكور علي الايضاح القيم جدا.....طيب علي كدا بتاع بص التاتا مفروض يركب هوفر عديل...لانو حيشفط كل الشارع...
كميات من الشوق ليك ياحبيب
|
Post: #9
Title: Re: قاشّى الشّارع...(توجد صور)...!
Author: mekki
Date: 12-19-2006, 02:08 PM
Parent: #1
المحترم تبلدينا:Quote: اها يا مكى تشترى بالاقساط المريحة !!؟
انا هايسى دى فترت من (قش ) الشارع مع الزول دا |
والله معروف انو الاستثمار فى العربات غير مضمون واهلنا عندهم مقوله بى تقول:
العربيه فى البدايه تقول ليك: بدّيك ...بدّيك...بدّيك (أى بعطيك فلوس)...!
ثم بعد شويه تقول ليك: أدينى...وبدّيك...!
ثم تقول ليك: أدّينى....أدّينى....أدّينى...!
فيا خوى هايسك دى اول حاجه فى اياتو مرحله؟!
**
المحترم خضر الكباشى...تلفونى عندكم ظاهر لسه عدّادو رامى وانا ما جايب خبر...
الله يكتر لى الفلوس عشان احولو DSL...!
| Quote: طيب رايك شنو فى الحافلات فيها صندوق بارد فاضي مربوط فى نفس مكان المقشاشة دي |
...والله (الكود) جديد على..بالرغم من انو عامل فيها مُفَّتح...
الخلوق ياسر:Quote: طيب علي كدا بتاع بص التاتا مفروض يركب هوفر عديل...لانو حيشفط كل الشارعQuote: ...ها ها ها...
وبعدين كنت عايز اكتب ليك عن مشى الاستاد لو ما موضوع نقل السيرفر...
كنت عايز اقول جنس ها المباريات ما بى ننفعل بها لأنها تمارين تورينا النقص وين...
عشان نحنا ناس وداد..اهلى...وما شابه...
لكن السيرفر ابى ...!!
|
Post: #10
Title: Re: قاشّى الشّارع...(توجد صور)...!
Author: yasir Abdelgadir
Date: 12-20-2006, 00:10 AM
Parent: #9
سلامات مكي
بالله افيدنا بانطباعاتك عن مباراة القمة واحداث التسجيلات...ومنتظرك هنا
حالة السعار التي اصابت اهل المريخ
تحياتي
|
|
|
|