Post: #1
Title: هـــل أنت مـــهذب ؟؟
Author: هشام مدنى
Date: 04-24-2005, 03:48 AM
منقول الراى العام
حديث المدينة
عثمان ميرغني
هل أنت مهذب ؟؟
أتمنى أن يقف الشعب السوداني يوما أمام المرآة ليتأمل نفسه . فليس كل مابه من شقاء صنع الحكومات والساسة . فالشعب نفسه صاحب أسهم مقدرة في شركة الكدر والنكد القومي ..
من الحكمة أن نعترف أننا شعب غير مهذب.. وبدقة لم أقل (مؤدب) فنحن شعب كامل الأدب ولدينا حياء قلما يتوفر لغيرنا .. لكن يعوزنا التهذيب في التعامل.. ملمسنا الجماعي فيه خشونة سافرة . والأسوأ أن الضمير السوداني يعد الجلافة درجة من الرجولة .. كلما خشنت عباراتك.. كلما برهن ذلك على قوة شخصيتك وشكيمتك .. والرجل الذي يستخدم العبارات المهذبة الودودة هو في ضمير الشعب درجة من الميوعة الأقرب الى الخلاعة ..
لا أحد يستخدم عبارة (لو سمحت) أو (لو تكرمت) في تعامله اليومي . ندلف الى الحديث جملة واحدة .. خشنة الحواف .. ونطلب بلغة الأمر حتى ولو كان المطلوب هو معرفة الوقت مثلا من رجل عابر آخر ..
وحتى عندما نتنازل ونهبط اضطراريا بعبارت مهذبة فاننا نستخدم ألفاظا سمجة فيها من الركاكة الحضارية ما يستفز النفس ( قرصة .. يا خال ) عبارة قالها لي شاب عندما وصل الى مقصده وكنت حملته معي في سيارتي في طريقي من باب فضل الظهر ..احسست أن العبارة فعلا قارصة .. تفضح المستوى الحضاري المتدني للشاب بعكس مظهره المتأنق ..
لكن الذي يفجع حقوق المواطنة بصفاقة محيرة .. أن تقف في مكان عام في انتظار خدمة وأمامك آخر .. فيأتي ثالث من الخلف وكأنه لم يرك . أو كأنك لا ترى بالعين المجردة ويمد يده طالبا خدمته هو أولا .. كنت أقف أمام باب المخبز و سعير حرارته يلفح وجهي في انتظار من هو قبلي ليأخذ حاجته... فأتى شاب من خلفي ومد يده بالنقود الى صاحب المخبز طالبا حاجته من الخبز .. أحسست بالعدوان المهين.. زجرته قائلا ( هل تراني أتمتع بحمام الساونا بلفح هجير المخبز) .. نظر الى في حيرة شديدة .. حيرة في ما الذي يثير غضبي ثم قال في لهجة ادانة وشجب واستنكار ..(الدنيا طايرة .. ) ..!! المصيبة ليست في تعديه على حقي في الصف..بل في احساسه أن اعتراضي لم يكن (سلوكا مهذبا) ..!!
لماذا لا يتعلم أطفالنا في المدارس فضيلة الصف .. عندما يخرجون في فسحة الفطور بدلا عن تزاحمهم أمام المطعم؟ لماذا لا يكون من المنهج الدراسي أن يتعلم الصغار أن يقفوا في طابور أنيق بلا ضجر يأخذ كل حاجته بلا أدني عدوان على حق غيره؟
من المهم تطوير أدب الخطاب الشعبي العام.. ترفيع الذوق السوداني .. الاقرار بأن الذي لا يطور مقدراته الاتصالية الجماعية فهو متخلف و ذو خلق وعر .. وأن عبارات المجاملة ليست ميوعة وكلما تهذبت وتأنقت كلما كشفت الجوهر الحضاري لصاحبها ..
هل ترغب في رؤية عرض مجاني للسلوك التلقائي للجمهور السوداني .. اذهب أمام نافذة أى بنك وانظر كيف يقفون في شريط أفقي طولي على امتداد الكاونتر كل يريد أن ينهي معاملته أولاً .. حتى ولو كان قبله عشرة رجال كاملي المواطنة ..
بصراحة .. من باب الاستفزاز الايجابي أقولها لكم دفعة واحدة (نحن شعب غير مهذب ..) ..
وأرجوكم انتبهوا جيدا للعبارة فلم أقل (غير مؤدب) . فحاشا لله .. نحن شعب مؤدب جدا ..!!
|
Post: #2
Title: Re: هـــل أنت مـــهذب ؟؟
Author: A.Razek Althalib
Date: 04-24-2005, 04:02 AM
Parent: #1
هشام مدني يا رائع...
| Quote: نحن شعب مؤدب جدا ..!! |
وكمان جداً...
جداً...
الشيء شنو...
شغلة...
ولا .........
أبو نخلة..
ده أنت..
يا رائع.....
ما بتستاهل..
هديه..
وبس...
إنت ...
بتستاهل...
كف...
مليان...
ورد وياسمين...
|
Post: #5
Title: Re: هـــل أنت مـــهذب ؟؟
Author: هشام مدنى
Date: 04-24-2005, 12:14 PM
Parent: #2
الرائع عبدالرازق الطالب
[QUOTE]ورد وياسمين... [/QUOTE]
وفى احسن من كده
لكن ماعرفتنا رايك فى لغة التعامل اليومين دى
له شكلها اختلف من ايام زمان
زمن لو سمحت
لو تكرمت
وبعد اذنك
واسف لما حدث
ممكن التهذيب فى الكلام يكون بات عيب ولا ...
شكرا لك على الورد والياسمين
|
Post: #8
Title: Re: هـــل أنت مـــهذب ؟؟
Author: A.Razek Althalib
Date: 04-25-2005, 02:50 AM
Parent: #5
المحترم جداً جداً...
الرائع/ هشام مدني
تحية وتقدير...
Quote: لكن ماعرفتنا رايك فى لغة التعامل اليومين دى
له شكلها اختلف من ايام زمان |
لا يفل الحديد إلا الحديد..
ولو كنت فظاً.. غليظ القلب لإنفضو من حولك..
ولكن لكل وقت مضي شيء كان زمان..
وكان أجمل...
وما أحلى ساعات اللقاء...
والذكريات بين الحبان...
لامن تكون صادقة ونبيلة..
فهي أحلى ساعات اللقاء...
وأجمل بشارة...
والزمن علمني أنسى...
Quote: لو سمحت
لو تكرمت
وبعد اذنك |
طاقة حضارية..
ولكن...
أمزجتنا المتقلبة...
وحرارة طقسنا...
مثال لذلك...
أنا وبعض من أعرفهم:
كما زجاجة المياه الغازية...
إذا تعاملت معها برفق تستمع بها..
وإذا عاملتها بعنف...
تنكشح فيك...
وتعكر مزاجك...
| Quote: ممكن التهذيب فى الكلام يكون بات عيب ولا ... |
نحن كبشر ...
عادةً ما:
نطرب للمديح والمجاملة
ونغضب للنقد ...
وأحياناً..
يقال ..
لتوصيف هذه الحالة...
فنون النفاق
فالنصب
والكذب
والمجاملة
والمسايرة
والمداهنة
قد تكون عند بعض المستنيرين...
شكل حضاري..
والله أعلم..
ممكن يا رائع..
الإستعانة بصديق...
بعد الموافقة طبعاً...
السؤال ده محول...
لخــــدر.....
|
Post: #12
Title: Re: هـــل أنت مـــهذب ؟؟
Author: هشام مدنى
Date: 04-25-2005, 04:09 PM
Parent: #8
الرائع عبدالرازق ابوالطالب
تحياتى من الجبال
ماهى ما عندها علاقة بى
Quote: أمزجتنا المتقلبة...
وحرارة طقسنا...
|
وكمان دى مفروض تكون الروح فيها يعنى معقوله
ولو كان بناء ومفيد ليه نغضب منه خاصة لو فى مصلحة العامة من غير.....
Quote: فالنصب
والكذب
والمجاملة
والمسايرة
والمداهنة
|
ما اعتقد نحن فى حوجه لها ولا رايك شنو؟؟
شوف محول دى زى او ابن عمت كونه لجنة لدراسة الموضوع
لجنة يعنى مغبرة المواضيع؟؟؟؟
مع تحياتى
تخريمه:
بالاخضر الابراهيمى حلال المشاكل
سلام يا صحبى
|
Post: #3
Title: Re: هـــل أنت مـــهذب ؟؟
Author: nasiradin
Date: 04-24-2005, 04:25 AM
Parent: #1
العزيز هشام مدنى
و يجب ايضا ان نتعلم :
| Quote: اختلاف الرأى لا يفسد للود قضية و لو من باب التهذيب ايضا. |
عبارة نطلقها فضفاضة على مدار اليوم
و لكن
مثقفى مثقفينا لا و لم و لن يفهموها حتى الان ... و هذا البورد شاهدا على ما أقول
ان اعتبرنا ان اعضاءه هم من المحظوظين الذين تعلموا و شاهدوا حضارات اخرى
و تعاملوا مع شعوب اكثر تهذيبا و لكنهم تجد الفرد منهم يعيش فى اكثر الدول تحضرا
و مدنيه و ارقى الشعوب تعاملا و تهذيبا و تجده لم يأخد من هؤلاء الا الوجه القبيح
للحضاره و لربما تجده قد اخذ هذا التهذيب فى تعامله مع بقية الشعوب و لكنه
فى اللحظه التى يأتى بها الى هنا تجده و كأنه لم يغادر هذه البلاد قيد انمله
و كأنه لم يتعامل مع شعوب شيدت حضارات بثقافاتها و معاملاتها... دوما اتسائل من أى اتينا نحن؟؟؟؟؟
تحياتي... ناصر البطل
|
Post: #6
Title: Re: هـــل أنت مـــهذب ؟؟
Author: هشام مدنى
Date: 04-24-2005, 02:45 PM
Parent: #3
العزيز ناصر البطل
Quote: هذا البورد شاهدا على ما أقول
|
شهادة لم تحتاج اخر لتاكيدها
| Quote: ان اعتبرنا ان اعضاءه هم من المحظوظين |
لا اعتقد انهم محظوظين بل العكس
| Quote: فى اللحظه التى يأتى بها الى هنا تجده و كأنه |
كثيرين تخيلوا ان الاساءات والتجريح والشتم للاخرين قد يرفع من اسهمهم
| Quote: دوما اتسائل من أى اتينا نحن؟؟؟؟؟ |
اتينا جميعا من بلد عرف اهلها الرقى والتهذيب فى المعاملات اليومية
لكن للاسف كثيرين تركوا اجمل ما عندنا والذى هو مادة مدرسية فى الغرب
تحياتى لك
|
Post: #4
Title: Re: هـــل أنت مـــهذب ؟؟
Author: عمر الفاروق شيخ الدين
Date: 04-24-2005, 09:25 AM
Parent: #1
هشام مدني ..
كم أتمني لو أن العنوان كان إستفتاء وسؤال مباشر يكون حاله حال لسانك ..
( هل أنا مهذب؟؟؟)
لأنني حينها كنت سأدخل دون أن أتردد وأقول أري في منبرنا أدب بأرجل يسمي هشام مدني ...
لك التحية ودوماً في خاطري أجمل لقب سمعته في هذا المنبر عنك ..
" هشام مدني ..حمامة سلام المنبر.."
حبينا نسلم بس ..
|
Post: #7
Title: Re: هـــل أنت مـــهذب ؟؟
Author: هشام مدنى
Date: 04-25-2005, 01:38 AM
Parent: #4
الاخ عمر الفاروق
لك الشكر الجزيل على المرور والكلمات الطيبات والسلام
وحقيقية ما يقلقنى العبارات المتداولة هذه الايام.
هل ستكون هذه لغة الاجيال القادمة؟
تحياتى لك
|
Post: #9
Title: Re: هـــل أنت مـــهذب ؟؟
Author: Walid Safwat
Date: 04-25-2005, 08:31 AM
Parent: #1
Quote: وحقيقية ما يقلقنى العبارات المتداولة هذه الايام.
هل ستكون هذه لغة الاجيال القادمة؟
|
مع الاسف ستكون.. الا اذا تداركنا وبدانا بمن حولنا..
|
Post: #13
Title: Re: هـــل أنت مـــهذب ؟؟
Author: هشام مدنى
Date: 04-26-2005, 00:36 AM
Parent: #9
الاخ وليد
تحياتى لك
| Quote: الا اذا تداركنا وبدانا بمن حولنا |
محتاجه بعض الوقت ولكن املى ان يتغير الحال.
مع تحياتى
|
Post: #10
Title: Re: هـــل أنت مـــهذب ؟؟
Author: مشتاق
Date: 04-25-2005, 09:34 AM
Parent: #1
الاخ هشام مدني
لك الشكر الجزيل على هذا الاقتباس الجميل لهذا الموضوع المهم
نعم نحن لسنا مهذبين لاننا مصابين بداء الجهل ولاننا نمسك من الامور السطحي
منها ولاننا دخلت الينا صفات التعقيد بعد ان كنا مجتمع البساطه
يعوزنا علاج ناجع يجب ان يكون بدايه من اغوار انفسنا
ان نتغير من الجذور المتاصله في طباعنا الخاطئه
ولنبدا بمراجعه انفسناوتقويمها وتهذيبها
|
Post: #14
Title: Re: هـــل أنت مـــهذب ؟؟
Author: هشام مدنى
Date: 04-26-2005, 01:06 AM
Parent: #10
الاخ مشتاق
تحياتى لك وانت تسطر وتحصر الامر فى هذه النقاط الهامه.
فعلا الحوجه ماسه لجرعات قوية فى هذا الاتجاه لانه يؤسس
لاجيال قادمه.
نفس هذه المشكلة بدات فى بعض الدول الاوربيه والبعض
يقول ان اسبابها اقتصادية وضغوط يومية تجعل من الانسان
يتصرف من غير قصد.
فالنبداء العلاج من حولنا ونذهب به الى ارض الواقع.
مع تحياتى
|
Post: #11
Title: Re: هـــل أنت مـــهذب ؟؟
Author: Fadl Karrar
Date: 04-25-2005, 10:33 AM
Parent: #1
الإخوة الأعزاء
من الشجاعة نقد الذات والإعتراف بالذنب فضيلة ولكن نحن فى السودان من أكثر الشعوب مقدرة علي التبرير وأبعد الناس عن الإعتراف بالأخطاء الجسيمة التي نرتكبها كل يوم خلال تعاملاتنا مع الآخرين حتي للأسف تعودنا علي الأخطاء لدرجة أنها أصبحنا لا ننتبه أنها أخطاء
أتذكر أحد الخليجيين فى برنامج كوميدي خلال شهر رمضان سابق يرمز للسودانيين إضافة للجلباب بكلمة ( ما قلت ليك ؟ ) وهي كلمة تدل علي أن صاحبها يبرئ نفسه أو يتنصل من نتيجة أحد الأحداث بل والأدهي يرمي اللوم علي الآخر.
ونحن في تبريرنا لجفاف تعابيرنا نرمي باللائمة تارة علي سخونة جو السودان وتارة لإعتبارات نفسية متوهمة منها أن الرجالة تقتضي الخشونة فى الكلام والصوت العالي مع أن قدوتنا رسول الله صلي الله عليه وسلم لم يقل لخادمه قط لم فعلت هذا ولم لم تفعل هذا. وهذا قليل من هديه صلي الله عليه وسلم.
نقطة أخيرة : هل نعبر عن حبنا لزوجاتنا وأولادنا وزملائنا وأصدقائنا ... ألخ كما ينبغي أم نعتبر ذلك أيضا من الميوعة وعدم الرجالة؟؟؟
لكن رغم ما يبدو
أحب السودان وأحب السودانيين أبناء عشيرتي والحب لكم جميعاً
|
Post: #15
Title: Re: هـــل أنت مـــهذب ؟؟
Author: Hussein Mallasi
Date: 04-26-2005, 01:35 AM
Parent: #11
سلامات يا هشام؛
| Quote: ( قرصة .. يا خال ) عبارة قالها لي شاب عندما وصل الى مقصده |
هذه العبارة و هذا البوست ذكراني بوست كنت قد كتبته قبل نحو عام؛
كدي دقايق بس افتش عليهو و اجيبو؛
اذ كان دور حول نفس القضية.
|
Post: #16
Title: Re: هـــل أنت مـــهذب ؟؟
Author: Hussein Mallasi
Date: 04-26-2005, 01:42 AM
Parent: #15
في 5 يونيو 2004
كنت قد كتيت البوست التالي:
قرصة ياااااا ....
|
Post: #17
Title: Re: هـــل أنت مـــهذب ؟؟
Author: Hussein Mallasi
Date: 04-26-2005, 01:49 AM
Parent: #16
و جاء فيه:
عمنا برعي كان مثلي الاعلى .... فقد كان صديقا لوالدي و كان يسكن بجوارنا.
ابناؤه في مثل عمرنا تقريبا فقد كان له ولدان و بنت. ابنه الاوسط عبد الحميد
زميلي في المدرسة .
و ما شاء الله فقد تخرج ثلاثتهم من كليات الطب بتفوق؛ الاكبر من طب الجزيرة
– الدفعة الثانية – و عبدالحميد و اخته من طب الخرطوم؛ و جميعهم تخصص
و تلقفتهم المنافي.
كان عمنا برعي مثالا للاناقة و الرقي؛ فقد تعلمنا منه كيفية تثبيت
ربطة العنق بثلاثة طرق مختلفة؛ اذ تختلف طريقة الربط باختلاف نوعية الربطة
..... او كما قال ....
كما كان مثقفا ثقافة عالية و ذا عقل منفتح و لغة انجليزية رصينة ؛
كانت كلماته منتقاة بعناية فائقة ... كنا نحرص على التحدث معه
و الاستماع اليه للاستمتاع بكلماته الفخمة و تعبيراته الجزلة و بالذات
تلك التعبيرات الانجليزية التي كان يزين بها حديثه و يكثر من استعمالها
لتقريب ما يود الاشارة اليه.
بعد سفري للخارج للدراسة و من ثم للعمل؛ لم اعد اقابله كما في السابق؛
و ان كنت احرص على السؤال عنه في اجازاتي المتقطعة للسودان؛ و عرفت في
إحداها بانه قد تقاعد بعد ان تولى منصب وكيل الوزارة؛ لبلوغة السن القانونية
.... يوم كان للوزارت وزير واحد و وكيل و احد و دونما وزير دولة واحد.
في اجازتي السابقة للسودان؛ و في طريقي للخرطوم من سعد قشرة مستقلا احدى
الحافلات العامة؛ و عند محازاتنا لسوق الخضار – امام موقف شمبات سابقا –
سمعت من ينادي على الكمساري من الخلف و بطرقعة من اصابعه قائلا:
قرصة ياااااااااااا .....
التفت تلقائيا لارى المطرقع الذي كان حينها خلفي تماما فالتقت نظراتنا؛
فاطرق قليلا و حياني قائلا:
- حمدالله على السلامة يا ابني ......
ثم اردف مبتسما:
- نعمل شنو بس ......
|
Post: #24
Title: Re: هـــل أنت مـــهذب ؟؟
Author: هشام مدنى
Date: 04-27-2005, 01:35 AM
Parent: #17
Quote: كان عمنا برعي مثالا للاناقة و الرقي؛ فقد تعلمنا منه كيفية تثبيت
ربطة العنق بثلاثة طرق مختلفة؛ اذ تختلف طريقة الربط باختلاف نوعية الربطة
..... او كما قال ....
كما كان مثقفا ثقافة عالية و ذا عقل منفتح و لغة انجليزية رصينة ؛
كانت كلماته منتقاة بعناية فائقة ... كنا نحرص على التحدث معه
و الاستماع اليه للاستمتاع بكلماته الفخمة و تعبيراته الجزلة و بالذات
تلك التعبيرات الانجليزية التي كان يزين بها حديثه و يكثر من استعمالها
لتقريب ما يود الاشارة اليه.
|
سلامات عزيزى الفاضل ملاسى
ذى عمنا برعى ده عنده تصريح يقول اى حاجه يكفى انو كان وكيل وزارة
فى زمانه ما كان اى زول ممكن يحلم انو يكون وكيل وزارة وراكب حافلة
بعد المعاش .
تصرفه هذا يدل على انه راقى ومهذب جدا لانه تعامل مع منصبه بتهذيب واحترام
وهذه اكبر دليل على تهذيب الرجل رغم ظروفه وهو مبتسم
يا ملاسى ياخى الناس دى صعب تانى تتكرر فى الزمن ده
مع تحياتى لك
|
Post: #18
Title: Re: هـــل أنت مـــهذب ؟؟
Author: خدر
Date: 04-26-2005, 01:50 AM
Parent: #16
Quote: . لكن يعوزنا التهذيب في التعامل.. ملمسنا الجماعي فيه خشونة
سافرة . والأسوأ أن الضمير السوداني يعد الجلافة درجة من الرجولة .. كلما
خشنت عباراتك.. كلما برهن ذلك على قوة شخصيتك وشكيمتك .. والرجل الذي
يستخدم العبارات المهذبة الودودة هو في ضمير الشعب درجة من الميوعة
الأقرب الى الخلاعة .. |
اضف الي اعلاه
- السلام الجمهوري كلماتو كلها رجاله و حرب بعكس الشعوب الاخري .
- النسوان لمن يتونسو و يضحكو بضربو بعض في الكتف مع نهايه
الضحكه.
- السلام و التحيه يلازمها خبط و ضرب علي الكتف عند الرجال .
حبيبنا هشام
انا جيت اسلم لقيت ودالطالب محولجي
في العموم دي طبيعة الشعب السوداني الكريم النابعه من البيئه العائش
فيها و اظن الاستاذعثمان ميرغني سيد العارفين انو كل شعب بستنبط طريقة حياتو من
البيئه العايش فيها
لو عاوزيننا نكون رقيقين في التعامل كان السودان مفروض يقع علي ضفاف
البحر الابيض المتوسط 
ولا شنو !!
|
Post: #19
Title: Re: هـــل أنت مـــهذب ؟؟
Author: خدر
Date: 04-26-2005, 01:52 AM
Parent: #18
خواردتواطر خطير يا ملاسي
|
Post: #20
Title: Re: هـــل أنت مـــهذب ؟؟
Author: Hussein Mallasi
Date: 04-26-2005, 03:57 AM
Parent: #19
عشان تعرفونا بس يا خدر.
يا ربي لو الزول لو إتظلّم
لناس "الحقوق المجاورة"
تفتكر ما بيلقى حاجة.
|
Post: #21
Title: Re: هـــل أنت مـــهذب ؟؟
Author: Hussein Mallasi
Date: 04-26-2005, 07:23 AM
Parent: #20
| Quote: خواردتواطر خطير يا ملاسي |
تعرف يا خدر؛
خوارد تواطر دي ذكرتني ب خوارد التي يكثر اخونا
كوستاوي من استعمالها ( هي و مشتقاتها )
و فكرت عدة مرات في ان أسأله عن المقصود ب خوارد.
الا ان خشيتي من ان يكون معناها مثل معنى ِAlkaramba
هو الذي منعني من السؤال.
|
Post: #25
Title: Re: هـــل أنت مـــهذب ؟؟
Author: هشام مدنى
Date: 04-28-2005, 02:24 AM
Parent: #18
مولانـــا العزيز خــــدر
اسعد الله اوقاتك بكل الخير
والله اضافات مهمه وملاحظه جيدة
Quote: اضف الي اعلاه
- السلام الجمهوري كلماتو كلها رجاله و حرب بعكس الشعوب الاخري .
- النسوان لمن يتونسو و يضحكو بضربو بعض في الكتف مع نهايه
الضحكه.
- السلام و التحيه يلازمها خبط و ضرب علي الكتف عند الرجال .
|
Quote: لو عاوزيننا نكون رقيقين في التعامل كان السودان مفروض يقع علي ضفاف
البحر الابيض المتوسط
|
طيب يا مولانا ماعندنا البحر الاحمر
ولا ما ينفع؟
لك معزتى
|
Post: #22
Title: Re: هـــل أنت مـــهذب ؟؟
Author: هشام مدنى
Date: 04-26-2005, 03:07 PM
Parent: #11
الاخ فضل تحياتى لك ونحن فى اشد الحاجه الان قبل اى وقت لما سطره قلمك
Quote: من الشجاعة نقد الذات والإعتراف بالذنب فضيلة ولكن نحن فى السودان من أكثر الشعوب مقدرة علي التبرير وأبعد الناس عن الإعتراف بالأخطاء الجسيمة التي نرتكبها كل يوم خلال تعاملاتنا مع الآخرين حتي للأسف تعودنا علي الأخطاء لدرجة أنها أصبحنا لا ننتبه أنها أخطاء
|
تحياتى لك
|
Post: #23
Title: Re: هـــل أنت مـــهذب ؟؟
Author: almulaomar
Date: 04-27-2005, 01:27 AM
Parent: #1
أخي هشام مدني
أنا غير مهذب وأحب أن أكون مهذب بل أذهب أبعد من ذلك وأحب كل مهذب لو أنه خصمي ، لكن أخي عدم تهذيبنا وجلافتنا هي متأصلة فينا منذ التنشئة مروراً بالتعليم والمجتمع ، لو حبوبتك قالت ليك يا ولد هوي قوم جيب لي موية وإنت كنت بتقرأ في جريدةأو كتاب وبعد ما تقوم وتجيب الموية من المزيرة بتاعت بيتكم والتي تبعد عن موقع حبوبتك بمسافة تحتاج إلى ركشة وبعد أن تقطع عليك حبال أفكارك وعنقريبك وتجيب ليها الموية وتقول ليها الموية يا حبوبة ما بتسمع منها كلمة شكراً ، أما عمك فيقول ليك أمشي يا ولد قوم جيب لي تمباك من سعد قشرة وتمشي إنت كداري كل ذلك المشوار وتعود بكيس التمباك ويتأبط عمك كيس التمباك ويدنكل سفته ويخلف رجل على رجل دون أن يسمعك كلمة شكر ، وحتى والدك يقول ليك قوم يا ولد أمشي جيب قش للغنم فتخرج في حر غائظ ودرجة حرارة تذيب الحجارة وتعود بالقش للمعزات الثلاثة وأنت تتصبب عرقاً دون أن يسمعك كلمة شكر واحدة.
والحال لا يختلف في الإستئذان ، وبالرغم من كل هذا يظل هنا نفر مهذبون إيما تهذيب فهم يفعلون أكثر من مجرد الشكر فيدعون لك بالخير والصحة والبركة والعافية.
|
Post: #26
Title: Re: هـــل أنت مـــهذب ؟؟
Author: هشام مدنى
Date: 04-28-2005, 03:52 PM
Parent: #23
عزيزى الفاضل الملا عمر
اسعدالله اوقاتك بكل الخير
| Quote: أنا غير مهذب وأحب أن أكون مهذب بل أذهب أبعد من ذلك وأحب كل مهذب لو أنه خصمي |
والله كلامك ده انت مهذب ومهذب جدا ومهذب وربى الكعبه
فائق تقديرى لك
|
Post: #27
Title: Re: هـــل أنت مـــهذب ؟؟
Author: Mohamed Suleiman
Date: 04-28-2005, 06:06 PM
Parent: #26
الأخ هشام:
هل أنت مهذب؟
هل أنت شجاع؟
هل أنت جبان؟
هل...
يعتمد علي المجتمع الذي تتعامل معه.
"لو سمحت" "لو تكرمت" .. منتشرة أكثر في الحضارة الغربية .. مجتمع الفرد.
فأنت لا تستطيع في دكان مثلا أن تمر بجانب أحدهم مزاحما له دون أن تقف و تستأذن منه
ليفسح لك الطريق. بينما نجدك في دكان في السودان مثلا يكفي أن تضع يدك بلطف و تلقائيا يفسح لك الآخر المجال للمرور. مجتمعنا مجتمع جماعي .. زحمة في المواصلات.. الأكل جماعة و من نفس الماعون و الناس تتزاحم لحد العفص و يمكنها أن تكون في آخر تهذيب.
أيضا لأنك غير متعود علي السلام بالتقبيل كما في حالة أخواننا العرب ... فأنه أذا أكتفيت بالمصافحة فقط بينما أخا الخليج يود أن يشعرك بحميميته بالسلام علي (الخدين) فأنه يعتبر سلوكك "غير مهذب".
أذن المسألة تعتمد علي "القوانين العرفية" لكل مجتمع و تعود الناس علي ممارستها.
|
Post: #29
Title: Re: هـــل أنت مـــهذب ؟؟
Author: هشام مدنى
Date: 04-29-2005, 04:19 PM
Parent: #27
عزيزى الفاضل محمد سليمان
اسعدالله اقاتك بكل الخير
قد اتفق معك فى بعض النقاط ولكن مجتمعنا كان.
وكان دى هى مشكلتنا فى الكثير؟؟
فيه التهذيب والرقى والتعامل فى منتهى اللطف.
عشنا فى مجتمع متحضر جدا لكن الظروف الحاليه تركت اثرها على كل جميل
هل تتذكر كيف كان يتعامل اهل السودان فى السبعينات رغم الضيق الذى صاحبها
محتاجين لوقفه صادقة من جديد هذا ليس لنا وانما للاجيال القادمة
مع تحياتى لك
|
Post: #28
Title: Re: هـــل أنت مـــهذب ؟؟
Author: Bashasha
Date: 04-28-2005, 09:57 PM
Parent: #1
العزيز هشام
نقطة نظام لوسمحت.
اولا لاينبغي قياس قيمنا بي معايير غيرنا، لانو اجرائيا خطا او يطششنا اكتر ممابوصلنا لي باب المعبد.
بالذات عملية ربط القيم دي بالحضارة، اللي تلقائيا تعني قيم المجتمعات الغربية، او ده مزلق لزج او لولبي!
لانو لكل مجتمع حضارتو ولاينبغي الاشارة لي مجموعة قيم حضارة الغرب بي صيغة الحضارة بالالف واللام.
برضو من السذاجة والتبسيط المخل الانبهار بي قيم الغربيين باعتبارها حضارة او رقي!
علي العكس من جانبي افضل بي مليون مرة "جلافتنا" او عدم نظامنا علي رقي الغربيين "افتراضا" او تحضرم ان جازت العبارة، لانو ده مظهر براق او خادع، يخفي تحتو عالم الله لاوراك ليهو.
ماعايز احكم علي قيم الغير انطلاقا من معايير قيمي، لكن مافي مفر هنا!
بخلاف الخصائص المركوزة في ثقافة الغربي، فالمعادلة تبدو صفرية مابين التقدم المادي والدفئ الانساني.
فاكليشي لوسمحت او شكرا..الخ مامقصودة لذاتها، بقدر ماهو تمثيل طقسي محسوب بالملي!
كتير مانتخمي كقادمين جدد للعالم ده، بالمظهر الخادع ده، لينتهي الامر بالاعتقاد الغرير في الخواجة كانسان كامل!
طبعا لكل قاعدة شواذ، ولكن علينا بالقاعدة ماالاستثناء.
الحقيقة الغايبة عن غير العايشو الغربين عن قرب، وبالذات في امريكا، انك ممكن تفقد حياتك ذاتها، لمجرد قولة سلام للزول الخطآ، او مجرد التحديق بالعين في وش الانسان الخطآ.
خلاصة الامر الموضوع ده مركب او متشعب شوية، اوما بي تبسيط عثمان ميرغني ده.
التحدي كيف نكون منظمين ونحن نستصحب قيمنا في التكافل والدفي الانساني الماتمثيل او قشرة.
من الجانب الاخر، احنا بننسي واقع حالنا، حروبنا، او شظف العيش!
فقط اتخيلو الامريكان ديل مدورنها، من نصف قرن، اوماتو منهم 14,000,000 مليون، لوقلنا عدد سكانم يعادل 7 اضعاف تعدادنا!
الكترابة!
لمان اتامل نصف اناءنا الملئ، بقول احنا ملايكة عديل، مقارنة بي "ناس الحضارة"، بي كل شكرا بتاعم او معليش..الي اخر تمثيلم!
|
Post: #32
Title: Re: هـــل أنت مـــهذب ؟؟
Author: هشام مدنى
Date: 04-30-2005, 02:33 PM
Parent: #28
ابننا العزيز بشاشا
تفضل بكل سرور
| Quote: اولا لاينبغي قياس قيمنا بي معايير غيرنا، لانو اجرائيا خطا او يطششنا اكتر ممابوصلنا لي باب المعبد |
المعيار اعتقد كان هل قبل عشرين عاما مثلا نحن فى معاملاتنا مثل اليوم وده معيار صعب؟
Quote: لانو ده مظهر براق او خادع، يخفي تحتو عالم الله لاوراك ليهو.
|
هنا دخلت فى موضوع اخر ويصعب نقاشه لانه متعدد الجوانب قد تكون فيه بعض ليس من عادتنا وتقاليدنا كما فى الغرب ولا اود ان اقول انه لعين لانه فيه الكثير الذى يختفى فيه المؤلم
لنا ولا رايك شنو فى هذا الامر.
Quote: ماعايز احكم علي قيم الغير انطلاقا من معايير قيمي، لكن مافي مفر هنا!
|
اود ان نحكم نحكم على قيمنا انطلاقا من ما كان عندنا منها
فى تقديرى ومن غير زعل ان الامريكان هم اسوء مثال لعدم التهذيب فى المعاملات العادية رغم التظاهر وخداع الاخرين بهذا والدليل القاطع على هذا كلامك.
Quote: الحقيقة الغايبة عن غير العايشو الغربين عن قرب، وبالذات في امريكا، انك ممكن تفقد حياتك ذاتها، لمجرد قولة سلام للزول الخطآ، او مجرد التحديق بالعين في وش الانسان الخطآ.
|
| Quote: ده مركب او متشعب شوية، |
اتفق معك فى ما ذهبت اليه انه متشعب وقد ترك كاتب المقال اهم مافى التهذيب وامسك بالجانب
الممكن علاجه.
| Quote: التحدي كيف نكون منظمين ونحن نستصحب قيمنا في التكافل والدفي الانساني |
وقبلها سؤال يفرض نفس كيف نكون كما ذكرت وعندنا اذمة تهذيب ؟
كيف نستوعب منظمين واساس التنظيم هو الغائب على الاقل هنا انظر الى هذا الفضاء كيف حلنا فيه.
| Quote: لمان اتامل نصف اناءنا الملئ، بقول احنا ملايكة عديل، مقارنة بي "ناس الحضارة"، بي كل شكرا بتاعم او معليش..الي اخر تمثيلم |
كنا فعلا فى تعاملاتنا ملائكة ولكن نرجع الى الشماعه ونقول الظروف الضاغطة حولت الموازين
لكن املى ان ينصلح الحال عن غريب
تحياتى لك
ارجو ان تقراء ملاحظات زائر الى باريس
السائق الفرنسي قليل التهذيب ولا يكترث للمارة
معظم سائقو السيارات الفرنسيين يبدون عدم اكتراث بالمارة، ويركنون سيارتهم على الارصفة ويستعملون الجوال اثناء القيادة.
ميدل ايست اونلاين
باريس - من بيار ماري غيرو
اظهر استطلاع للرأي نشر الخميس بمناسبة اليوم الوطني الفرنسي السادس للتهذيب اثناء قيادة السيارات، ان السائق الفرنسي يتسم بالعدائية وقلة التهذيب وعدم الاكتراث بالمارة، كما انه يركن سيارته على الارصفة ويستعمل هاتفه الجوال اثناء القيادة.
وفي استطلاع حمل عنوان "كيف ينظر السائقون الفرنسيون الى انفسهم"، اعتبر اكثر من 60% ممن شملهم الاستطلاع ان السائقين الفرنسيين عدائيون وقليلو التهذيب.
واجرى معهد "اد هوك ريسيرتش" هذا الاستطلاع الذي يشكل "مؤشرا سنويا لتصرفات السائقين الفرنسيين"، لحساب شركة "آ جي اف" للتأمين والجمعية الفرنسية لمكافحة التصرفات السيئة اثناء القيادة التي تنظم هذا اليوم الوطني للتهذيب.
ويعتقد 48% من السائقين الفرنسيين ان السائق الفرنسي هو سائق جيد عموما غير ان الاكثر شبابا (بين 18 و24 عاما) يعتقدون العكس بنسبة ستين بالمئة.
ويرى 64% من السائقين ان السائق الفرنسي عدائي وقليل التهذيب لكن النسبة انخفضت بالنسبة الى استطلاع 2004 عندما اكد 69% من السائقين ان السائق الفرنسي يتسم بهذه الصفات السيئة.
وراى نصف من شملهم الاستطلاع ان السائق الفرنسي لا يحترم المارة بينما يؤكد 87% من الفرنسيين انهم يعنون "غالبا او احيانا" من صعوبات في عبور الطرقات. واقر 37% من السائقين انهم يركنون سيارتهم "احيانا او بشكل منتظم على الرصيف".
ويؤكد 21.8% من الفرنسيين انهم يستعملون الهاتف الجوال اثناء القيادة، اما الاكثر تعلقا بهذه العادة السيئة فهم السائقون الاكثر شبابا (بين 18 و24 عاما) الذين اقروا بنسبة 36.7% بقيامهم بهذا التصرف.
وعلقت على هذه النتائج الجمعية الفرنسية لمكافحة التصرفات السيئة اثناء القيادة قائلة ان "التهذيب والاحترام والصبر والحكمة مفاهيم يبدو انها تخرج من لغة الفرنسيين عندما يكونون وراء مقود القيادة (..) ان قليلا من المدنية والتهذيب قد تجعل الطرقات اكثر امنا". واخذت الجمعية بريطانيا مثالا على ذلك حيث ان نسبة الوفيات في حوادث السير تقل 40% عنها في فرنسا.
و"التهذيب وراء المقود" هو بند من سبعة بنود تنص عليها شرعة "المواطنين على الطريق"، وهي منظمة غير حكومية اسسها برنار دارنيش احد اهم سائقي سباقات الرالي الفرنسيين.
|
Post: #30
Title: Re: هـــل أنت مـــهذب ؟؟
Author: toona
Date: 04-30-2005, 02:20 AM
Parent: #1
الموضوع جميل ومهم للغاية عزيزنا هشام ، وعانيت منو كتير ، زي كتيرين غيري ، سواء كان للإحساس السيئ البيجيك لما تعامل بصورة غير مهذبة " في صمة خشمك " ، او لما تتعامل مع الآخرين بتهذيب ويعاينو ليك كانك "كائن فضائي نازل من المريخ هسسسسسسي ! " وذكرني بي موقف طريف مريت بيهو قبل كم يوم ، بعد فترة انقطاع طويلة من البيت ، قضيتها في الداخلية لظروف الامتحانات ، رجعت البيت وكنت يوم واقفة مع الحجة في المطبخ ، فبقول ليها عن اذنك ناوليني كدة ، وبعدين شكراً ، قعدت تعاين لي باستهجان شديد ، وعلقت " انتي لما تقولي لي شكراً دي وعن اذنك بتغيظيني شديد ! عليك الله تاني ما تقوليها ! " ... وما اتمالكت نفسي من الضحك ، لانو اتخيلت كانوالكلمات المهذبة نوع من الاهانة الشخصية .. لانو كسودانيين ، اتعودنا انو عدم التهذيب دلالة علي القرب العاطفي ، والتبسط في الكلام وخلوه من ال " تعقيدات التهذيبية البشعة " يدل علي انك بتعتبر ال "حالة واحدة " ، وهي إشارة الي التقدير حسب المفهوم بتاعنا البسيط .. والتهذيب في القاموس السوداني مرادف لكلمة ال "رسميات " ..وبالتالي لا يستخدم إلا في المناسبات الرسمية .. وده فهم متأصل من كبيرنا لي صغيرنا للأسف يحتاج لمجهود تربوي كبير جداً لتغييره ، واتمني انو ادارة المناهج ووزارة التربية والتعليم تنتبه للمفهوم ده وتحاول تصلحو ، بس للأسف ما حنلحق نستمتع بي كلمة " عن اذنك " واحنا واقفين في صف العيش ، ولسة كتوفنا حتورم من الخبتي بتاع السلام ، الله يكون في العون ، بس يمكن اولادنا يقدرو ؟
|
Post: #33
Title: Re: هـــل أنت مـــهذب ؟؟
Author: هشام مدنى
Date: 05-01-2005, 02:12 AM
Parent: #30
الاخت الفاضلة toona
تحياتى لك واشكرك على الاضافة الرائعة منك
اتفق معك فى ان التهذيب عندنا يفهم على انه نوع من الرسميات
| Quote: واتمني انو ادارة المناهج ووزارة التربية والتعليم تنتبه للمفهوم ده وتحاول تصلحو |
هذا هو الامر المطلوب فعلا لابد من مادة مدرسية وتكون بداية دخول الطالب المدرسة.
مع تحياتى
|
Post: #31
Title: Re: هـــل أنت مـــهذب ؟؟
Author: wadaldeem
Date: 04-30-2005, 07:13 AM
Parent: #1
اخى الكريم
ايوه نحن ناقصانا حجات كتيرة وزى مابقولو الزوق العام والاتيكيت وامكن الحجات دى لانو نحن كنا شعب مقفول ومفتون بى ثقافته المحليه وهى طبعا ثقافة عضلات ولكن بعد الهجرات الكبيرة للسودانيين للخارج بمختلف الاسباب احتكو شوية بالناس البره وبدت تكون فى ثقافة عامة فى شكل حتى منظر الشارع العام والتعامل اليومى وشوية شوية بقينا نهتم بى مسلمات زى النضافة العامة والمظهر الجميل والشكل اللائق وبقينا شوية شوية نهتم بى حياتنا الخاصة شوية شوية وتركنا ما لا يعنينا فى الخاص والعام يعنى لناس ماشة كويس وتشاومكم دا عندو اسبابو لكن برضو فى تغير ولو كان بسيط بس للاحسن
التحية لابناء السودان بالخارج وهم يسهمون فى الدفع بايجابيات كانت تنقصنا
ودمت اخى الكريم
|
Post: #34
Title: Re: هـــل أنت مـــهذب ؟؟
Author: Elawad Eltayeb
Date: 05-01-2005, 10:11 AM
Parent: #31
إن الشعب السوداني هو قمة في الأدب والتهذيب والزوق. إلا أننا شعب أغبش باطنه ألطف من ظاهره، نحتاج لتطوير لغتنا العامة حيث يسمى اللطف الظاهر حنكشة ويكون مدعاة للتأمل.
وأظن أن الأمر يعود للجو السياسي العام الذي كانت له آثاره السالبة على مظهر البلاد وجوهرها. فهو الجو الحاكم على غالب أمور الحياة الإجتماعي والإقتصادي والسلوكي منها وهو المهيمن والمسيطر على جو الأخلاق العام غير عابيء بحالة المواطن النفسية والمادية مكمم لحريات التعبير مما جعل شخصية المواطن المكبوت (ضد النظام) أو الكابت (مع النظام) تطغى على سائر الشخصيات السوية ونافيا لها.
وإذا تأملت الأفلام السودانية الرسمية القديمة (أبيض وأسود) لوقع لك ما أتحدث عنه حيث تجد مظاهر التمدين والتحضر بادية على وجوه الناس والأشياء وفي تصرفاتهم.
أما اليوم فإن الشارع هو لوحة تعكس النظام السائد.
وإذا كان رب البيت للدف ضارباً فشيمة أهل البيت كلهم الرقص.
أنظر للخطاب السياسي بين الأمس واليوم. تجد أنه كان حكما يحفظها العامة أما اليوم فإن الخطاب السياسي إما توكيد للذات أو نفي للآخر وكلها من ضروب الأنانية والنظرة المتعالية والقاصرة عن إدراك وتحقيق مصالح الوطن والمواطن.
ولا يغير الله ما بقوم حتى يغيرو ما بأنفسهم.
|
Post: #37
Title: Re: هـــل أنت مـــهذب ؟؟
Author: هشام مدنى
Date: 05-03-2005, 07:05 AM
Parent: #34
Quote: أما اليوم فإن الشارع هو لوحة تعكس النظام السائد.
وإذا كان رب البيت للدف ضارباً فشيمة أهل البيت كلهم الرقص |
اخىElawad Eltayeb
فعلا لما ذهبت اليه من حقائق هو حالنا الان
مع تحياتى لك
|
Post: #35
Title: Re: هـــل أنت مـــهذب ؟؟
Author: هشام مدنى
Date: 05-02-2005, 03:01 PM
Parent: #31
العزيزwadaldeem
تحياتى لك
| Quote: ايوه نحن ناقصانا حجات كتيرة وزى مابقولو الزوق العام والاتيكيت |
والله كنا اكثر الشعوب رقى وذوق وتهذيب لكن ما عارف الحصل لنا شنو وكنا اكثر الشعوب
نهتم بمظهرنا لانه يعبر عن الكثير من ما عندنا من اشياء جميلة لكن ربما ظرفنا خلت
بعضنا فى التغير المستمر بس ابشر الايام الجايه املى كبير فى الله ان تكون احسن من
سابقتها والتحيه لابناء السودان فى كل مكان.
والتفاؤل بالخير لابناء امتنا مهم.
مع تحياتى لك
|
Post: #36
Title: Re: هـــل أنت مـــهذب ؟؟
Author: خضر عطا المنان
Date: 05-02-2005, 04:26 PM
Parent: #35
Quote: من المهم تطوير أدب الخطاب الشعبي العام..
ترفيع الذوق السوداني .. الاقرار بأن الذي
لا يطور مقدراته الاتصالية الجماعية فهو متخلف
و ذو خلق وعر .. وأن عبارات المجاملة ليست
ميوعة وكلما تهذبت وتأنقت كلما كشفت الجوهر
الحضاري لصاحبها ..
|
عزيزنا : هشام مدني
قرأت المقال وقد استوقفتني هذه الفقرة .. فلنتأملها مليا .
وأضيف بأن التهذيب في (سودان الانقاذ) له مفهوم آخر غير الذي
نعرفه او يعرفه غيرنا !!!!!.. ألم يفسد (هؤلاء الاسلامويون!!!)
حياتنا كلها من الف باء الى يائها ؟؟؟؟.
وتلك أمور ـ كما يقول علماء النفس ـ تنعكس على تصرفات الفرد
فمن يعيش القهر لا يمكن له أن يجد وقتا ليتعلم درسا في التهذيب
في حياته ابدا !!!!!!!!..
فالأمران سيان ( سلطة قاهرة مكروهة وسلوك انساني يومي !!!) ..
أليس كذلك ؟؟؟؟؟؟؟؟؟؟.
لك ودي .
خضرعطا المنان
|
Post: #38
Title: Re: هـــل أنت مـــهذب ؟؟
Author: هشام مدنى
Date: 05-03-2005, 03:50 PM
Parent: #36
الرائع العزيز خضر
تحياتى لك
ما لدينا الا ان نقاوم ونحاول
Quote: فمن يعيش القهر لا يمكن له أن يجد وقتا ليتعلم درسا في التهذيب
|
نخرج بالاجيال القادمة الى نور التهذيب والمعاملة الطيبه
املى فى ذلك
تحياتى لك
|
Post: #39
Title: Re: هـــل أنت مـــهذب ؟؟
Author: هشام مدنى
Date: 05-06-2005, 12:19 PM
Parent: #38
اجـمـل مـافـى الانـســـان
الانــســان الـمــهــــذب
|
Post: #40
Title: Re: هـــل أنت مـــهذب ؟؟
Author: هشام مدنى
Date: 05-09-2005, 12:17 PM
Parent: #39
؟؟؟؟؟؟؟؟؟؟
؟؟؟؟؟؟؟؟؟؟
؟؟؟؟؟؟؟؟؟؟
ماذا يحدث الان فى هذا المنبر؟؟؟؟؟؟؟؟؟؟
|
Post: #41
Title: Re: هـــل أنت مـــهذب ؟؟
Author: هشام مدنى
Date: 05-16-2005, 03:54 PM
Parent: #1
افـضــل مــــافـــى الانــــسان
الانــــــسان الـمــهـــذب
مع تحياتى لكم جميعا
|
|