العروس الجديدة وحبة نصايح مفيدة !!!!

مقال لصديقى بابكر حميمة
_________________________________



العروس الجديدة وحبة نصايح مفيدة
____________________________________



سد الزرائع:-
________________________

بإعتبار أن هذا المقال فى المقام الأول مخصص فقط للزوجات القديمات ( الجديدات بتاعات الدبل يمتنعن)،فهناك جملة نصايح مفيدة لهن وتدخل فى باب سد الزرايع أو الوقاية خير من العلاج،أو مضارفة المؤمن على نفسو حسنة، وأول هذه النصايح الغالية بالنسبة للزوجات- المرشحات للنزول الى الدرجة التانية بعد تسجيلات الموسم- ... تخريمة صغيرة جوة الموضوع... طبعا يا حبيبات قساى زواج المسيار والعُرفى والكافيار وغمدت لبدت.... ماداخل ضمن هذه الحزمة النصائحية بإعتباره ضل ضحى ساكت ونزوة زى سحابة الصيف وعلى قول الفنان-ظروف وتعدى ما تهتمو للأيام- لكن كلامنا فى العرس الراسو عديل داك، صورة وصوت، على كل هذه النصايح نظام أرض جو بحر يعنى زى دواء الفكى نافعة لكل الأحوال المرضية:

نمرة واحد:
___________________

خلى العوارة وبادرى بتشبيك صفحتك فى الفيس بوك مع صفحة زوجك – الحجل بالرجل- ولازم تعملى إسمك فى الصفحة – بحب زوجى فلان-

نمرة اتنين:
__________________

تعمدى وضع تلفونك بالقرب من زوجك أثناء تواجده بالمنزل وعندما يرن تلفونك يمكنك مناداته من المطبخ بقولك" عليك الله يا أبو فلان كدى رد لى على تلفونى" أو أقرأ لى الرسالة الجاتنى دى" وبما أن هناك فقرة فى القانون الدولى تسمى- المعاملة بالمثل أو البساط أحمدى أو الحالة ون – يبقى فى الحتة دى اللبيبة بالإشارة حتفهم-

نمرة تلاتة:
________________

سوى ليك همة واخلقى علاقات حميمة مع الموظفات العذابيات فى مكتب زوجك- حسب تحليل مخابرات السى أى إيه قالوا الطابور الخامس يعتبر من أنجع السبل التجسسية لكشف الأحداث قبل وقوعها- كما يستحسن تخشى معهن فى صرفة صندوق عديل كدة وماتنسى تحكى ليهن قصص مروعة عن زوجات قديمات مارسن تصفية جسدية ضد زوجات جديدات أو دلقن عليهن موية النار(يمكنك الإستعانة فى ذلك بأرشيف صحيفة الدار)

نمرة اربعة:
________________

تشيلى من فكرك خالص حتة إمكانية محاولة زوجك الإستعانة بوسائل إتصال بديلة كمثال لذلك- صناديق بريد البوستة أو تلفونات سوداتل الثابتة، أما إذا دار بخلدك إمكانية تعرف زوجك على مرشحات جدد عبر فضل الظهر الخاص ب- ياعم- فى الحالة دى خلى إيمانك كبير فى ناس النظام العام وأمن المجتمع

سبق السيف العزل:
_____________________

لنفترض جدلا يعنى أنو الزوج كان تفتيحة لمن غلط واستعان بتكلونوجيا الإتصال عبر الأقمار الصناعية- مابين الثرى والثريا- مع مرشحة سرية وإرتكن الى فقهية واستعينوا على قضاء أموركم بالسر والكتمان، وبذا على حين غرة – كف بب لب- وقعت الفاس فى الراس،عندها هناك عدة إجراءات سلامة من الواجب على الزوجة القديمة المباشرة الفورية بها، فعند سماع خبر زواج – أبوكم – من واحدة تانية عليك بإتخاذ الأتى:

نمرة واحد:
_____________________

مثلا يعنى لو كنتى قاعدة تعوسى أول حاجة ركزى كويس وراجعى بدقة، ختيتى القرقريبة وين؟كذلك الطايوقة والتملة أو الدوكة؟ وهل صاج العواسة فى تلك اللحظة فيهو طرقة كسرة ولا فاضى؟ وهل خُمارة العجين على يمينك ولا عن شمالك؟ وهل هناك طيور داجنة أو حيوانات أليفة فى الراكوبة فى تلك اللحظة المفصلية- قريب غطاء من جرسة الإستفتاء- أم لا؟ وعلى رأى الخبراء- يستحسن التوقف عن العواسة فورا.. ولكن بالعدم فى حالة أن تكونى- شوبارة- لازم تخرسى خالص وتتمى عواستك من سكات- مستعينة فى ذلك بالخبرة التراكمية الآلية- أو لو الكلام- حرقك خالص خالص- يجب عليك التوقف التام عن العواسة وإتاحة الفرصة لفعل الكلام- كيفما أتفق- وذلك لصعوبة الجمع بين العوم والطيران فى مثل تلك اللحظات المصيرية، لأنو فى واحدة جاها خبر عرس أبو وليداتها من أخرى أثناء العواسة فوضعت – التملة- وتناولت سوسيوة كانت تسترزق من سواقط العجين ومسحت بيها الصاج حتى إستشهدت السوسيوة وذلك لأن الأستاذة أصرت على الجمع بين العواسة والكلام فى نفس الوقت، حيث قالت وهى ماضية فى مسح صاج العواسة بالسوسيوة" كاك كاك بتاع شنو؟ بكرة بطهر حيطتى وبجيّر وليداتى يايمة، هم الرجال ذاتهم شن طعمن يا يمة؟!! بالاى خلينا كدة !"

نمرة إتنين:
_____________________

أول إجراء للإسعافات الأولية على الزوجة القيام به عندما تسمع خبر زواج زوجها من عروس جديدة، أخذ أنفاس عميقة وبطيئة على طريقة اليوجا- شهيق ،حبس الهواء لثوانى ثم الزفير ببطء- وبعدها تبدأ بصورة متانية فى إعادة التعرف على الحاجات من حولها، هل هى جالسة أم واقفة عندما نما اليها الخبر الأكيد؟ وبالتالى عليها الجلوس- برررراحة- فور سماع الخبر أو العكس صحيح، ثانيا عليها التأكد، هى بالضبط لابسه شنو؟ فستان ولا توب؟ حفيانة ولا لابسة شبشب؟... الخ، وأخيرا عليها –قدر ما تقدر- إرجاء أو تأجيل القيام بتلبية إحتياجاتها الآنية، مثل شرب الماء أو تناول الطعام أو دخول الحمام أو حتى محاولة التعليق- الفورى- على الحدث مع جاراتها،وذلك لتحييد الكوارث الطبيعة ذات الصلة بصحة البيئة، فعلى سبيل المثال ما حدث للأستاذة عندما- نما الى علمها- خبر زواج زوجها بينما كانت فى طريقها الى- المزيرة- لتناول كوز ماء، فإذا بها تتجه مباشرة الى- البلاعة- وتقطع ليها كوزين من – موية الكاكا- وهى تقول ضاحكة فى تسامح صوفى صرف"يايمة ما يعرس كان عرس، أبونا محلالات ليهو تانى إتنين، أيويويو يوووويا"......صاااااااااح صدقناكى



بابكر حميمة

شكرا الاخ بابكر

Quote: شكرا الاخ بابكر

وشكرآ محمد عكاشة..وكل عام والجميع بخير.

حولينا وما علينا
وفى مقال تحدث فى الخلا والهوا يشيل لا ورا
وفى مقال آخر ايضا تحدث فى الخلا وطندب العريان

عمنا ابوالزهور
والاخت فتحية
كل سنة وانتو طيبين
محبتى

نصايح مفيدة نتيجة خبرات ثرة

الأخ/ عكاشة

حياك الله أخي

لقد امتعتنا ضحكا ومعلومات جميلة

شكرا لك

تحياتي

الاخ عبدالعزيزعيسى
سلامات
المقال لصديقى بابكر حميمة
تسلم كتير

Quote: المقال لصديقى بابكر حميمة

العزيزة/ عكاشة


العين البصيرة الثاقبة هي التي تنقي وتنقل لنا ما هو جميل..

فلكما التحية والتجلة..

شكرا الاخ عبدالعزيز
مودتى

اولا بند وللمصداقيه
والله الموضوع فعلا عمل مشكله مع اختى وراجلها من فتره كيفين ما توضح انها معرساه فى صفحتها
ههههههههههههههههههه
ومراة اخويه اتهرشت وبعد 4 سنين ربطت راجلها الهو اخويه بصفحتها من ايام لمن اتريقت عليها وقولت ليها يادابك عرفتى انك عرستى ولا شنو
:)))))))))))))))))))
النصيحه دى فعلا فى السلك

عكش
كــــيف هى الاحوال تبدو ؟؟؟؟؟
سؤال
ماف نصايح للعريس الجديد؟؟؟
السؤال من صديق حابب يخش القفص (الشوكى )






قاسم المهداوى