Post: #1
Title: حجة بت احمد كوريق آنج نل(كل عام وانت بخير)
Author: sharnobi
Date: 11-02-2005, 07:34 PM
هلو سلام حجة
كوريق آنجا نل ( كل عام وانت بخير)
كوريلى كوريا ارون كجيميقوا
وهل العيد عيد بدون قدومك الينا
ياولدى امك كبرت
تتمنى ترجعوا البلد
ونرجع نحنا كمان للحلة من الغربة فى الخرطوم
نمشى نفتح باب الحوش (سمن بابا)
نملئ الازيار
ونفتح مسيد والدك للضيفان
الحارقنى يا ولدى انى صحيت بدرى
وكنت قايلة نفسى فى البلد..
وقلت امشى اقطع من نخل والدك جريد
ومن نخلة خاتك هانم جريد
وامشى لفقير محمد (مقابر الحلة)
ازور قبر والدك
واختى هانم
وارش الموية واقرا الفاتحة
لكن ياولدى لقيت نفسى ما فى بيتى
فى الخرطوم
امان ما بكيت واليوم عيد
شنو الجابرنا فى القعاد فى بلد ما بلدنا..
يا ولدى كفاك الغربة
تعال اتلمه علينا
وبالفى نعيش
خير والدك ونخلو الماتوا من الهملة
كان كفانا
اكان قلت على الحكومة
الحكومة ما جايبة خبر لزول..
اخير ارجع
امك دايراك
ومشاقة
كانت العبرة والدموع
هى حائل كثيف
انهى المكالمة فى جو حزين
واليوم عيد
انتهت المكالمة...
وبدأت قصة فصل المعاناة واجترار الذاكرة..
مع مراعاة فروق الوقت... انتظرت لحظة الافطار... وكانت غمة فى صدرى
وحنين... يهزمنى.. الى متى ولماذا...
جال فى خاطرى.. المسلوب ذاكرة العيد فى قريتنا...
والناس كاسراب الحمام فى حركتهم الدائمة
فى زيارة العيد
كرويقون آجا نلا
اوكن داجا نلا
سالم انتان سليمانتان
كمقطع اغنية
كل عام وانتم بخير
وانت بالصحة والسلامة
سالم سليم بيننا
ومضى عيد آخر
أه يا اهل بلدى
انتم كجريد النخل ظلال
لمعنى الحياة
وكل عام وانتم بخير
|
Post: #2
Title: Re: حجة بت احمد كوريق آنج نل(كل عام وانت بخير)
Author: اساسي
Date: 11-02-2005, 08:39 PM
Parent: #1
وانت والحجة بت احمد بخير
|
Post: #3
Title: Re: حجة بت احمد كوريق آنج نل(كل عام وانت بخير)
Author: sharnobi
Date: 11-02-2005, 09:39 PM
Parent: #1
وانت اكثر عطاءا وصحة
يا اساسى
انها امى العزيزة
حجة بت احمد
التى تعيد صياغة اشياء تخصنى كما تشاء وفق ما تشاء
عبر الاسير
والمسافات
بكلمة نوبية
يموت نصفها فى جوفها
حزنا ولوعة
انها الام
يا اساسى
وانه العيد
|
Post: #4
Title: Re: حجة بت احمد كوريق آنج نل(كل عام وانت بخير)
Author: Elmosley
Date: 11-02-2005, 09:46 PM
Parent: #1
ياسلااااااااام
|
Post: #6
Title: Re: حجة بت احمد كوريق آنج نل(كل عام وانت بخير)
Author: Tragie Mustafa
Date: 11-02-2005, 09:54 PM
Parent: #4
شرنوبي
كل عام وانت بخير
والحاجه بت احمد بخير
واحمد الله اها بخير وتسمع صوتها,
لكن اقول لك كلمة حق اخير ترجع وتستمتع بوجودها اكبر قدر ممكن
فهم اقيم ما في هذه الحياة.
امنياتي ان يكون العيد في بفلوا اقل كآبة من عندنا.
تراجي.
|
Post: #5
Title: Re: حجة بت احمد كوريق آنج نل(كل عام وانت بخير)
Author: sharnobi
Date: 11-02-2005, 09:52 PM
Parent: #1
من ذاكرة قديمة
المكان قرية نائية فى اقصى الشمال
الزمان صباح عيد الفطر المبارك...
خلفية قبل العيد ...
عبدالله اراب( العربى) قدم للقرية الى اهله فى فريق العرب..
عبدالله شاب يعرف خياطة الملابس (الجلاليب) الرجالية..
والمرحوم عبد عثمان بدر سر التجار.. يمتلك مكيانة الخياطة الوحيدة فى القرية..
مشاوير على راس الساعة الى عبد الله للتأكيد من ان جلابية العيد البوبلين السمنية
حتكون جاهزة.. مشاوير.. ومواعيد غير موفية.. المسافة بين الحلة ودكان عبد عثمان كليومتران... ولكنها فى عنفوان الطفولة.. خطوات..
العيد العيد
وبالنوبية يعرف عيد الفطر بانجين كورى اى عيد النساء..
وعيد الاضحى يعرف بادين كورى... عيد الرجال..
للعيد فى مخيلتى رغم طول الزمن مكانة..
اواصل فى سرد تفاصيلها ..
|
Post: #7
Title: Re: حجة بت احمد كوريق آنج نل(كل عام وانت بخير)
Author: sharnobi
Date: 11-02-2005, 09:55 PM
Parent: #1
يا صديقى الموصلى
كيف حالك
لك وحشة
وعيد يملا قلبك الكبير
شجنا وعطاءا
كيفك
لا بد من تواصل
|
Post: #29
Title: Re: حجة بت احمد كوريق آنج نل(كل عام وانت بخير)
Author: Elmosley
Date: 11-04-2005, 05:35 AM
Parent: #7
كل سنه وانت طيب
يازول ياسمح
وانا بخير
|
Post: #8
Title: Re: حجة بت احمد كوريق آنج نل(كل عام وانت بخير)
Author: sharnobi
Date: 11-02-2005, 09:59 PM
Parent: #1
الفاضلة
تراجى
كل عام والله يخلى ليك الاولاد الظرفاء
فعلا
راجع اكيد بحساب الزمن قريب
اما عن كآبة العيد
اتخيلى
صمت وفطرت براى
واعيد براى
وبخدر نفسى ببرنامج دراسى قاسى
جلست لامتحان اليوم
فرحت بنجاحى قلل من كآبة قادمة
ولك الود والاحترام
|
Post: #9
Title: Re: حجة بت احمد كوريق آنج نل(كل عام وانت بخير)
Author: sharnobi
Date: 11-02-2005, 10:12 PM
Parent: #1
تقترب الساعة كل بهمه النساء مشغولات لنظافة المنازل..
الاطفال ورعون بجديد الثياب.. والرجال ما زالوا مقهورين برمضان
وتعب عمل الزراعة... والكل فى فلك...
لحظة الترقب.. بكر العيد.. ثبت العيد ولا لا...
احمد سكينة قال شاف الهلال.. ولكن منو البصدقو..
العلامة.. صوت طلق نارى.. من احدى الحلال والقرى المجاورة..
ومن يمتلك السلاح غير.. اغنياء القرية.. والذين يمتلكون المذياع..
العمدة .. كان فى الجزيرة( صاى ارودين) لازم يعيد فى القرية..
وهو عندو السلاح.. لكن ممكن واحد تانى يعلن.. المهم فى آخر الشهر بالاخص بعد الثامن والعشرين.. يذاد الهمس والهاجس.. رغم انهم
صاموا الشهر.. ولكن.. اصعب الايام هى القادمة..وعيدية ونواصل..
|
Post: #10
Title: Re: حجة بت احمد كوريق آنج نل(كل عام وانت بخير)
Author: sharnobi
Date: 11-02-2005, 10:24 PM
Parent: #1
بعد المغرب.. والكل فى المسيد.. ملقى على الارض ووجه الى سماء
حميد (قرية فى الجهة الغربية) .. وفوق باسق النخل.. يدقون النظر بعيونهم الحادقة والتى فعلت بها.. حشرة النمتة ما فعلت.. والكل.. يمنى نفسه.. بالرؤيا الى يمكن.. ان تضع اسمه فى لسان اهل البلد..
مازالت قراصة الويكة الناشفة مثقلة على البطون.. ولكنها سوف تعاود الظهور. فى الوجبات القادمة.. ولكن هنالك صحون وكوريات ستختفى لمدة عام كامل.. منها مديدة النشاء (تمر الهندى العرديب).. بليلة اللوبيا الخضراء.. القمر الدين اذ وجد...
لحظات من الترقب.. وارخاء الاذن لسماء بشارة انتهاء الشهر..
ولحظات ونواصل.
|
Post: #11
Title: Re: حجة بت احمد كوريق آنج نل(كل عام وانت بخير)
Author: sharnobi
Date: 11-02-2005, 10:36 PM
Parent: #1
اظن ان التسمية اتت من الدور العظيم الذى يقع على كاهلهن.. هذا العيد هو.. عيد الحلوى.. والشريك والمنين (الكعك) من قبل اسبوع..
تبدأ حركة دؤبة.. لشراء دقيق الفينو.. والخميرة.. وتحضير.. الذيوت.. والاتفاق على يوم بين نساء الحلة للخبيز.. فى رمضان.. وصعوبة الصيام.. انه لجد عمل شاق.. الخبيز.. عمل مرهق..
يبدا اليوم بتجمع نساء الحلة.. بجمع.. الوقود.. للفرن.. وجمع المواعين الخاصة للخبيز.. والبدأ فى تحضير العجين.. ويطلب عمل جماعى.. من تحضير الصوانى.. وقطع الخبيز يدويا.. وانتظار لمدة من الزمن لتقوم الخميرة بفعلها.. ثم.. ادخال العجين للفرن.. وكل ذلك قبل البدء .ز بتحضير الافطار لرمضان..
لهذا سمى نوبيا بعيد النساء
ونواصل..
|
Post: #12
Title: Re: حجة بت احمد كوريق آنج نل(كل عام وانت بخير)
Author: sharnobi
Date: 11-02-2005, 10:51 PM
Parent: #1
جبنا الهدوم من عبد الله الخياط
لازم نغسل عشان نكسر النشا بتاع البوبلين
ونكوى..
العمة من التوتال.. ولازم تظهر..
يوم.. قبل العيد... نشاط.........
وكان العيد...
وجانا العيد
ونحن بعاد
اعلان مسبق صوت طلق نارى... يجلل سماء نوبية هادئة تعرف النوم المبكر.. من ناسها وطيورها.. غير ان الضفادع يحلو لها ان تغازل صمت قريتى ليلا.. وبعض صوت الصراصير.. وطير اسمه
نورين مونس كورتى اى الطير التى رفضها الله .. تلك التى تنوح ليلا..
انها.. قريتى وغدا .. سيكون العيد
وكأن الساعة توقفت ليبدا يوم جديد
انه العيد
نفس الناس
القرية هى القرية لم يطرأ جديد.. كلهم او اغلبهم بتقابلون يوميا.. فى دوامة الحياة.. فى الطاحونة او فى الجروف.. او فى صلاة الجمعة.. او فى سماية
خليل النوبى.. او فى الليل البغطى الجبال.. وتدور حياة الليل الهادى..
والانس الجميل ولعب الكوتشية الشياب وكونكان 14 وشراب الكردكى الحار دم الغازل...
|
Post: #13
Title: Re: حجة بت احمد كوريق آنج نل(كل عام وانت بخير)
Author: sharnobi
Date: 11-02-2005, 11:05 PM
Parent: #1
لكن للعيد شعور جديد
الناس ذى تقول اتو من كوكب آخر..
سلام بالاحضان.. احساس جديد.. الاخوان الكانوا امبارح متصارعين فى الارض .. الجرف.. اليوم ذى كانه ما حصل شئ.. نسوان الحلة الاتخاصموا فى شبر قصبة جرف وقش غنماية .. نسوا امبارح..
دغش قبل صياح ديك الحلة الوحيد الخالينو بسبب.. صحوا اهل البلد الناموا .. متأخر
قالنسوان قامن للنخل قطعن الجريد وشالن الموية ومشن المقابر لزيارة الموتى..
ونحن النوبة لنا قدسية خاصة للموتى.. نقدس الموت اكثر من الحياة
وجريد النخل رمز الحياة
كل هذا يحدث فى الساعات الاولى من صباح العيد..
شاى الصباح قبل مطلع الفجر
شاى بلبن الكل لبس ومشوا للمسيد نقطة التجمع الاولى
شاى بالمنين (الكعك)
مع تحيات العيد الجميل.. والملابس الجديدة.. وعناق الاحبة..
بداية تفتح اسارير العلاقات الجميلة..
|
Post: #14
Title: Re: حجة بت احمد كوريق آنج نل(كل عام وانت بخير)
Author: sharnobi
Date: 11-02-2005, 11:22 PM
Parent: #1
الصلاة فى امارين ( منتصف القرية يوجد بها المسجد)
ناس ما بصلوا ابدا حتى فى رمضان ولا صلاة الجمعة الفيها من زمن التركية.. بقت مركز الحكومة فى ابلاغ عموم الناس بامور الدولة. من جباية
او غرامة.. او زيارة..
لكن فى العيد .. كل القرية صغيرها وكبيرها.. يجتمعون فى محراب الصلاة.. المهم الكل يسجل حضور صلاة بدون وضوء.. او صلاة بدون قراية.. هى شعائر.. تجمع كل ناس القرية..
شربوا الشاى.. وتقليد لازم ناس الحلة يعيدوا لبعض قبل التحرك للصلاة.. احساس جميلز اطفال فى ملابس زاهية .. رجال.. فى ملابس جدسدة وعمم مظهرة.. وعباءات لا تظهر الا فى المناسبات.. وحركة.. تضامنية داك قاعد يلبس فى طفل الجزمة الجدية الضيقة.. واحد بشيل صوانى الشاى .. والكل على استعداد الرحلة لامارين للصلاة...
سلسة وعقد فريد كل ناس حلة ينظروا ناس الحلة القدام قبلما يتحركوا
.. واتخيل هذا النظم الفريد..
نواصل..
|
Post: #15
Title: Re: حجة بت احمد كوريق آنج نل(كل عام وانت بخير)
Author: بكرى ابوبكر
Date: 11-02-2005, 11:27 PM
Parent: #14
الصديق العزيز صلاح شريف
كل سنة انت و الخالة بت احمد بخير و عافية
|
Post: #16
Title: Re: حجة بت احمد كوريق آنج نل(كل عام وانت بخير)
Author: elsharief
Date: 11-02-2005, 11:37 PM
Parent: #15
الاخ شرنوبى
كل عام انت والوالده بألف خير
|
Post: #17
Title: Re: حجة بت احمد كوريق آنج نل(كل عام وانت بخير)
Author: sharnobi
Date: 11-02-2005, 11:47 PM
Parent: #15
الفاضل
الصديق بكرى
كل عام وانت اكثر عطاءا والتزامنا للعام للوطن الكبير الصغير
لك واسرتك احر التهانى بهذه المناسبة التى تحدث وجلا فى القلب
لك الود والاحترام
|
Post: #18
Title: Re: حجة بت احمد كوريق آنج نل(كل عام وانت بخير)
Author: sharnobi
Date: 11-02-2005, 11:47 PM
Parent: #15
الشريف
لك التحايا النواضر
فى ومن الغربة والارتحال
واللجوء القسرى للذاكرة
للاحتفاء
بمناسباتنا القومية
ونحن اشد حوجة لوطن خير ديموقراطى
لا فى السجن
لا مختفى
|
Post: #19
Title: Re: حجة بت احمد كوريق آنج نل(كل عام وانت بخير)
Author: sharnobi
Date: 11-02-2005, 11:53 PM
Parent: #1
مرحلتين اتحدث عنهما مرحلة كان للدواب الحمير مهملة توصيل المسنين الى مركز الصلاة.. ومرحلة اخرى مرحلة الاندروفر..
المرحلة الاولى مجموعة قليلة من كبار السن مجبرة ان تستخدم الدواب للذهاب لمراسيم العيد.. لما فى ذلك من تعقيد.. وتعطيل. فى ممارسة مراسيم العيد..
اتذكر. من الحلة الوالد.. كان يمتلك حمار.. مهجن اصيل اشتاره بمبلغ 12 جنيه وكان رغما خرافيا فى ذلك الزمن.. هذا الحمار كان مكأله علف البرسيم الاخضر.. وغير مصرح لاحد الاقتراب منه.. ويجد عناية خاصة... ولى مع هذا الحمار ذكريات خاصة.. اتمنى ان اجد سانحة ان .. اقص حكياتى وطرائفى الصبيانية .. ولكن لندلف للعيد..
عمى شريف رغم انه اكبر سنا من والدى كان يفضل ان يذهب راجليا.ز فى الحلة المجاورة.. العمدة نورى (نور الدين).. ذلك الفاره الاسمر.. الذى يعجبك قامته وهنداهمه و العباءة السوداء والعصا.. انه عمدة البلد.
ينتظر اخاه لكى يتقدموا الركب شمالا... والمترجلون تبدا رحلة التجمع والسير من حلة الى اخرى دون الدخول الى المنازل والمعايدة.. الا فى الشارع.. معايدة المنازل مشروع لاحق بعد الصلاة
الصلاة..
القرية منقسمة على نفسها شمال جنوب. وفى الشمال هنالك شمال الشمال.. لههم جامع وطريقة مختلفة عن جنوب القرية.
ولكن العيد الذى يجمع
|
Post: #20
Title: Re: حجة بت احمد كوريق آنج نل(كل عام وانت بخير)
Author: sharnobi
Date: 11-03-2005, 00:05 AM
Parent: #1
القرية منقسمة على نفسها شمال جنوب. وفى الشمال هنالك شمال الشمال.. لههم جامع وطريقة مختلفة عن جنوب القرية.
ولكن العيد الذى يجمع
كدية شريف نصر
نبى حامد ، احمد سكينة،
نبى كلو عبدو حسين ، صالح احمد ، نصر احمد،عم عبد السيد، احمد محمد حسنين
نوقودين صالح العربى، عبد الرحيم عوض، محمد سعيد، محمد حسين، عبد الفتاح، على اراب،
ابدلان ارك الدين، بكر، عبد عثمان، عمر
سنبت محمد فرح،
هؤلاء مجموعة المسترجلين من جنوب القرية وهم الكبار...
خلاف الصبية والاطفال من الجنسين.. وخلاف الذين تقدموا بالدواب..
محطة تجمع كل ابناء حلة هى المسيد..
|
Post: #21
Title: Re: حجة بت احمد كوريق آنج نل(كل عام وانت بخير)
Author: sharnobi
Date: 11-03-2005, 00:20 AM
Parent: #1
والتقوا فى فضاء حلة امارين
ناس الشمال والجنوب... حركة دائمة سلام ومعايدة وتحابب فى وجه الله..
مناسبة.. الاطفاء يقدمون لنظافة موقع الصلاة من الحجارة ويجلبون البروش..
امام الجامع شيخ سعيد الرجل الفاره الطول القيافة والشلوخ المتناهيه فى الدقة ..
وشيخ يسن عثمان مؤذن الجامع.. والتكبيرات وبدء مراسيم الصلاة
واجتماع اهل القرية خلف امامهم..
الصلاة.. الصلاة
انتهت..
بدء الرحلة للمسجد
للسفينة
ولحظة الجلوس الجماعى وبدء مراسيم العيد بطريقة اهل القرية. اهل الحلة امارين ودكى هم المستضيفين عليهم تحضير الحلوى والشربات.. للحضور.. تقليد اسنه محمود عباس.. القادم من مصر..
السفينة صلاة الله تغشى المرسلين، وذكر على اهل الطرق الصوفية.. لتيدا رحلة المعايدة.. الكل يتجه شمالا.. الجزء الشمالى من القرية..
كويكة. وقبلها يجتمع الناس فى حلة العرب عند الشيخ على سالم لتناول وجبة الافطار بالمش وفطير القمح.. ومواصلة الرحلة لشمال القرية.. لحلة جامع
حلة الاشراف اهل شيخ ادريس الحسن شيخ الطريقة الختمية...
وهنالك قصة..
|
Post: #22
Title: Re: حجة بت احمد كوريق آنج نل(كل عام وانت بخير)
Author: sharnobi
Date: 11-03-2005, 00:30 AM
Parent: #1
حلة جامعة حلة محافظة بنات سيدى .. ممنوع الاختلاط بعامعة الناس.. المناسبة الوحيدة التى تتلقى نساء حلة جامع مع باقى خلق الله من اهل القرية العيد.. هنالك يرقد ضريح شيخ ادريس.. وهى احد اجمل البنايات فى الشمالية.. واجمل الاضح فى السودان قاطبة.. ويذهب اهل القرية للضريح لزيارة قبر الشيخ ومنا يدخلون الى المنزل القديم.. ترص نساء الاشرفاء ويدخل اهل القريى للمعايدة.. منظر مثير.. ولك ذا رهبة.. وتتم تقديم بصوت خافت لكل زائر لنساء الاشراف. وتنهتى العيدية بالخروج ل بداية الحلة . وبدء العيد لكل اسرة
كرويق آجا نلا
اوكن آجا نلا
قم انقلق سالم سليما انتان
وتبدء رحلة الرجوع
ومراسيم انتهاء العيد
ليبد اليوم الثانى والثالث لزياراة القرى المجاورة
وينتهى العيد بانتهء مراسيم الزيارة
وترجع القرية الى طبيعتها بعد ثلاث ايام من التوقف
وكل عام وانتم بخير
|
Post: #23
Title: Re: حجة بت احمد كوريق آنج نل(كل عام وانت بخير)
Author: سفيان بشير نابرى
Date: 11-03-2005, 00:46 AM
Parent: #22
العم/
شرنوبى...
كل سنة وانت طيب والحاجة بت احمد طيبة.
الى الان ازكر ان الرحلة النيلية فى الخرطوم تركت فى اذنى صوتاً هادى وودود لا يفارقنى
ابداً .
لك ولحاجة بت احمد كل الحب.
|
Post: #26
Title: Re: حجة بت احمد كوريق آنج نل(كل عام وانت بخير)
Author: sharnobi
Date: 11-03-2005, 09:10 AM
Parent: #23
نابرى العزيز
كل عام وانت بخير
على امنيات الشباب
|
Post: #24
Title: Re: حجة بت احمد كوريق آنج نل(كل عام وانت بخير)
Author: نادر
Date: 11-03-2005, 01:09 AM
Parent: #1
العزيز شرنوبي
كوريق آنجا نل
لك وللحاجة الغالية حجة بنت أحمد
وعبركما للراحلة والدتي وهذا أول عيد يمر على رحيلها إلى دار الخُلد والبقاء
|
Post: #27
Title: Re: حجة بت احمد كوريق آنج نل(كل عام وانت بخير)
Author: sharnobi
Date: 11-03-2005, 09:15 AM
Parent: #24
نادر
اكن آجا نل
وانت بخير
عندنا نحن النوبيون صقوس تجعل من هذه المناسبة
حلقة تواصل بامواتنا البركة فيكم .. هى لحظة تتكوم فيها
الاحزان فى مناسبة سعيدة حين تلتفت ولا تجد بينكم عزيز رحل الى دنيا
اخرى.. ولكن هذه سنة الحياة.. وتأتى المناسبات والاعياد لغور فينا جرح
الصبر والحزن..
|
Post: #25
Title: Re: حجة بت احمد كوريق آنج نل(كل عام وانت بخير)
Author: sari_alail
Date: 11-03-2005, 03:44 AM
Parent: #1
عمنا شرنوبي
كل عام وانت بألف خير ,,,,,,,,,,
-----------
كنت أتمنى أقولها بالرطانة لكن المعذرة
فلك كل الود والتحايا
|
Post: #28
Title: Re: حجة بت احمد كوريق آنج نل(كل عام وانت بخير)
Author: sharnobi
Date: 11-03-2005, 09:18 AM
Parent: #1
صديقى الشاب الابن سارى الليل
كل عام وانت بخير
وتتحقق امنياتك الاكاديمة وتسجل تفوق
اتمنى ا تهتم باللغة النوبية وان تبدأ فى تعلمها
انها كنز
ولو بديت بتقدر
|
Post: #30
Title: Re: حجة بت احمد كوريق آنج نل(كل عام وانت بخير)
Author: mo
Date: 11-04-2005, 12:03 PM
Parent: #28
(العم) شرنوبي كل عام وانت ومن معك بألف خير ..عيد معه (اعدتنا) الي زمن ولي .. عودة الي موضوع (السفينة) ولا ادري من أين جاء هذا الاسم علي مدح الرسول وآل الميرغني ( نحن الشباب شباب الميرغني السيد علي ) كان هؤلاء هم افضل من يقرأ (السفينة) وفي حركات ايقاعية وسط (الدائرة) .. سعيد جليوه . صالح احمد صالح. شيخ سعيد . جمال علي . يسن عثمان . جمال عبد الجليل .. لم يبق منهم ولم يبق من تلك السفينة الا الاخرين وهما في خريف عمريهما .. ولم تعد للسفينة تلك الجاذبية ولم يعد للعيد نفسه تلك التقاليد...
|
Post: #31
Title: Re: حجة بت احمد كوريق آنج نل(كل عام وانت بخير)
Author: sharnobi
Date: 11-04-2005, 01:21 PM
Parent: #30
وانت بخير
هذا الذى تبقى لنا يا عزيزى شعبان
الذكرى .. والانغماس فى تفاصيل ولت
اعشق قريتى واهلها وسيرتهم العطرة التى لا تفارق البال
انهم كالطود
انهم ركائز
وانهم نفحة تهب فى زمن الغربة والارتحال
ما زالت صور كل واحد من رحلوا او حى يذيد الله فى اعمار احيائنا .. تجول
فى خاطرى..
هنالك تفاصيل.. نهملها لا عن قصد.. ولكنها تعنى الكثير
انها موطن امى واهلى العزاز
انها كويكة
وكل عام وانت بخير
|
Post: #32
Title: Re: حجة بت احمد كوريق آنج نل(كل عام وانت بخير)
Author: Kostawi
Date: 11-04-2005, 01:37 PM
Parent: #31
العيد أمبارك عليكم
و للوالدة أحلى الأمنيات و التبركات
خردة
|
Post: #33
Title: Re: حجة بت احمد كوريق آنج نل(كل عام وانت بخير)
Author: حبيب نورة
Date: 11-04-2005, 02:24 PM
Parent: #32
كل سنة طيبين
|
Post: #35
Title: Re: حجة بت احمد كوريق آنج نل(كل عام وانت بخير)
Author: sharnobi
Date: 11-04-2005, 02:53 PM
Parent: #33
حبيب نورة
وحبيب الكل
كرت ليه معنى
من زول كلو معنى
ودمت جميلا تزرع ردهات هذه الساحات
بابداعاتك الجميلة
التى تجعلنا نعيشها ونشهق ونصمت
لك الود
|
Post: #34
Title: Re: حجة بت احمد كوريق آنج نل(كل عام وانت بخير)
Author: sharnobi
Date: 11-04-2005, 02:49 PM
Parent: #32
الى صديقى
ورفيقى فى الغربة خردة والاسرة الجميلة
وانت بخير ناوى اخبارك ليلا
|
|