كُر على ، عشّة بت الصدّيق كشّوها

كُر على ، عشّة بت الصدّيق كشّوها


12-27-2006, 10:47 AM


  » http://sudaneseonline.com/cgi-bin/sdb/2bb.cgi?seq=msg&board=52&msg=1189112147&rn=16


Post: #1
Title: كُر على ، عشّة بت الصدّيق كشّوها
Author: يازولyazoalيازول
Date: 12-27-2006, 10:47 AM
Parent: #0

صحوت من نومى هذا الصباح على صوت زوجتى تقول لى (كُر على ، عشّة بت الصدّيق كشّوها) وهى إحدى قريباتها ، إمرأة كبيرة فى السن ، وذلك بعدأن تلقت إتصالاً هاتفياً من أحد أقاربها يفيدها بأن هذه المرأة التى حضرت لهذه البلاد بتأشيرة عُمرة منذ شهر رجب الماضى ، وبقيت مع بنتها طوال هذه الفترة فى إنتظار الحج ، والعودة مباشرة بعد إكمال الفريضة لبلدها السودان ، ولكن بالطبع لم تكن تدرى ما يخبئه لها القدر من كشة وكشف حال وسجن وترحيل وقمل وقاذورات فى تجربة فريدة لم يسبق لعشّة أن مرت بها ، فقد (كشوها) هذا الصباح هى وبنتها ، بعد أن قام زوج بنتها (العريبى) المغفل بإرسالها هى وزوجته (بنتها) إلى مكة المكرمة للدخول لأداء الفريضة ، دون تصريح حج أو وجود إقامة سارية المفعول أو حتى دون مرافقتهم ، فقاموا بإيقاف الإمرأتين فى نقطة (الشميسى) ، النقطة الأساسية لدخول مكة المكرمة وعند تفتيش أوراقهما الثبوتية ، تأكد أنهما غير مقيمتان وغير مصرح لهما بالحج فأنزلوهما من السيارة التى كانا يقلناها وأركبوهما بص الكشة (الممتلىء) بنساء سودانيات وتشاديات وعرب وأفارقة ، وتحرك البص صوب جدة مرة أخرى ولكن هذه المرة لسجن الترحيل ، حيث تقبع (عشّة) الآن تلعن حظها العاثر ، وتندب آمالها ، بعد أن تبددت أحلام الحج وأداء الشعيرة

سمعنا أيضاً أنه قبل فترة قصيرة ، قام بعض الأخوة السودانيين بتأجير منزل شعبى فى مكة ، وأخذوا أمهاتهم وخالاتهم وآبائهم الكبار وذهبوا بهم إلى مكة وأسكنوهم فى هذا البيت بحجة (اللبدة) حتى حين موعد الحج ، ورتبوا لهم أمر أكلهم وشربهم ومنامهم وتركوهم فى رعاية الله ، حتى أتتهم ذات ليلة ليلاء جوازات العاصمة المقدسة فزارتهم بليل ، وأركبوهم باصاً كبيراً وتوجهوا بهم صوب سجن الترحيل بجدة ، بعد أن إستلم الجندى الهمام الذى ألقى القبض عليهم خمسين ريالاً عربياً سعودياً عن كل رأس مخالف ، فضمن العسكرى عيداً سعيداً هانئاً بينما عانت أمهاتنا وخالاتنا وأعمامنا من القمل والعفن فى سجن الترحيل المهيب

تتكرر مثل هذه المآسى كل عام ، ويضرب أهلنا بالقوانين واللوائح عرض الحائط ويقعوا فى شر أعمالهم ثم يجلسوا بعد أن يقع الفأس فى الرأس يندبون حظهم العاثر ، فما الحل يا أخوة فى حل هذه الإشكالية السنوية المتكررة

تحياتى

Post: #2
Title: Re: كُر على ، عشّة بت الصدّيق كشّوها
Author: حمد فتح الرحمن
Date: 12-27-2006, 11:14 AM
Parent: #1

انا لله و انا اليه راجعون

هسه يا هشام الحاجة عشة تاني تجيب ليكم 7 مليون من وين عشان ما تحج ؟
تخيل عشان ما تجي حج رسمي من السودان لازم تدفع المبلغ دا غير مصاريف الاكل و الشراب و الذي منو !


مسكينة و الله ، الله يعينا علي الترحيل و البهدلة دي .

Post: #3
Title: Re: كُر على ، عشّة بت الصدّيق كشّوها
Author: يازولyazoalيازول
Date: 12-27-2006, 11:18 AM
Parent: #2

شكرا يا حمد على المواساة

والله لو علم السعوديين طيبة عشة بت الصديق لتركوها آمنة سالمة بينهم لأن طيبتها لا شك تملأ المسافة بين السماء والأرض فى كل أنحاء الحدود السعودية ، ولكنها حكمة الله فى خلقه

تحياتى

Post: #5
Title: Re: كُر على ، عشّة بت الصدّيق كشّوها
Author: Haytham Abdulaziz
Date: 12-27-2006, 11:34 AM
Parent: #3

Quote:
والله لو علم السعوديين طيبة عشة بت الصديق لتركوها آمنة سالمة بينهم لأن طيبتها لا شك تملأ المسافة بين السماء والأرض فى كل أنحاء الحدود السعودية ، ولكنها حكمة الله فى خلقه
تحياتى


آآآي واللاي يا هشــام و كانت تصلي امام مقام سيدنا إبراهيم بردأ و سـلامـا ... لكن يا هشام عديلك دة بااالغ .. هو زاتو جايي عُمـرة و لا شنـو... غايتو تاني مع الحالة الصعبة في السودان دي الحج دة إلا تشوفو في التلفزيون و نسـأل الله يسهل ليها السنة الجاية و إديها طول العُمــر و تحج...

Post: #8
Title: Re: كُر على ، عشّة بت الصدّيق كشّوها
Author: يازولyazoalيازول
Date: 12-27-2006, 12:13 PM
Parent: #5

الحبيب هيثم

أشكرك على المداخلة الجميلة والدعوات الصالحات

ربنا يقبل منك

Post: #4
Title: Re: كُر على ، عشّة بت الصدّيق كشّوها
Author: عبد المنعم سليمان
Date: 12-27-2006, 11:23 AM
Parent: #1

ازييك يا هشام

كل سنة وانت طيب

يا اخوي عشة بت الصديق ماشه لبيت الله كيفن يمنعوها

والله دي قصة !!

هو ذاتووو راجل بتها السجمان دا ما عارف القوانين ولا شنو !! .

بس عندي سؤال يا هشام بالله اساله للعثيمين ولا واحد من ناس الكشة

ديل ..

من استطاع الية سبيلا بتدخل فيها الكشة والجوازات ولا شنو !!!

ورد علي بالله لانة عندي نية ارسل ام البت المجكسا عشان تلاقي

مصير بت الصديق رد الله غربتها !!

وحجتك مقبولة و بالنية يا خالتنا بت الصديق ..


Post: #6
Title: Re: كُر على ، عشّة بت الصدّيق كشّوها
Author: يازولyazoalيازول
Date: 12-27-2006, 11:37 AM
Parent: #4

الحبيب عبدالمنعم

من إستطاع إليه سبيلا ، والله أعلم تدخل فى باب الإمكانيات المادية ، يعنى تستطيع بمعنى عندك حق التذكرة والمصاريف للإقامة والترحيل بين المناسك ، ولا أظن سبيلا هنا مقصود منها (الزوغان والزغبير والحيلة للدخول) فمن دخل مخالفا يكون إستطاع ومن لم يدخل لم يستطع ، لا ، لا أظن ذلك

أما خالتك عشة بت الصديق ، فهى إمرأة سودانية (طيبة) وكفى

أما زوج بنتها فهو فعلا (سجيمان) و (رميدان) و (معولقان) كمان

فكّ الحاجة عكس الهواء
وفاكر نفسو عندو الدواء
قبضوا الحاجة ومرتو سوا
وصار الحج عند سقط اللوى




تحياتى

Post: #7
Title: Re: كُر على ، عشّة بت الصدّيق كشّوها
Author: Tabaldina
Date: 12-27-2006, 12:09 PM
Parent: #1

..
.
والله افتكرتها عشة بتاعت الكســرة
الفي بنى مالكـ
قلت اكيد حتكون عندكم ازمة فى الكسرة
والحروم حيتعبن من العواســة ..

كل عام وانتم والحجيج بخير؛

Post: #10
Title: Re: كُر على ، عشّة بت الصدّيق كشّوها
Author: يازولyazoalيازول
Date: 12-27-2006, 12:16 PM
Parent: #7

والله يا تبلدينا كشوا كتير من ستات الكسرة ، حتى اصبحت الكسرة سلعة نادرة فى جدة لا يأتى بها إلا الحريفون


Post: #9
Title: Re: كُر على ، عشّة بت الصدّيق كشّوها
Author: Omer54
Date: 12-27-2006, 12:15 PM
Parent: #1

هشام كل عام و انتم بخير

هؤلاء النسوة الذين فشلوا في اللحاق بالحج هذا العام الله سيكتب لهم حجه ان شاء الله و بالنية.

الحج من السودان يحتاج الي 4 ونصف مليون جنية سوداني, اكثر من نصفها تذهب للحكومة و حكومات الولايات و هيئة الحج و العمرة السودانيه, لذا اعتقد ان الحكومة هي التي تتحمل وزر هذه المشاكل بتصعيبها الحج علي السودانيين.

العام الماضي اديت فريضة الحج - الحمد لله- كان حجا صعبا للزحمة الشديدة و البهدلة التي تفرضها علينا هيئة الحج السودانية لانها تسعي في كل خطوة لجمع اكبر مبلغ ممكن من خلال توفير بصات اقل و سكن مزري لا يسع الحجيج و خفض ايام الاقامة في السعودية.

درجت هئية الحج السعودية علي تقديم محاضرات للحجاج في احدي هذه المحاضرات قامت المحاضرة -سيدة سعودية- بتحريض الحاجات السودانيات و طلبت منهم تحريض الرجال و ضرب مسئولي البعثة السودانية المتلاعبين و علي حد قولها لا سبيل لاصلاح الوضع الا بهذا الاسلوب. و طبعا هذا اعتبراف صريح من السلطات السعودية بان مشكلة الحجيج السوداني تكمن في السطلة السودانية و فسادها.
ولكم كل الشكر.

Post: #12
Title: Re: كُر على ، عشّة بت الصدّيق كشّوها
Author: يازولyazoalيازول
Date: 12-27-2006, 01:19 PM
Parent: #9

Omer54

شكرا على الرد التوضيحى الجيل ، ربنا يسهل على الحجاج أمر حجهم وعودتهم

تحياتى

Post: #11
Title: Re: كُر على ، عشّة بت الصدّيق كشّوها
Author: ملكة سبأ
Date: 12-27-2006, 01:01 PM
Parent: #1

كُــر عليّ

Post: #13
Title: Re: كُر على ، عشّة بت الصدّيق كشّوها
Author: يازولyazoalيازول
Date: 12-27-2006, 01:21 PM
Parent: #11

كُر يا بت أمى


Post: #14
Title: Re: كُر على ، عشّة بت الصدّيق كشّوها
Author: تماضر الخنساء حمزه
Date: 12-27-2006, 01:21 PM
Parent: #1

شئ محزن ...
ربنا يعينها على التجربة القاسية ..
ربي يكتبها ليها حجة حسب نيتها الصادقة إن شاء الله..

Post: #15
Title: Re: كُر على ، عشّة بت الصدّيق كشّوها
Author: يازولyazoalيازول
Date: 12-27-2006, 01:26 PM
Parent: #14

إن شاء الله يا تماضر

مع تحياتى

Post: #16
Title: Re: كُر على ، عشّة بت الصدّيق كشّوها
Author: عادل فضل المولى
Date: 12-27-2006, 01:47 PM
Parent: #15

الزول الرائع هشام
كل سنة وانت طيب
معليش للحاجة ..وان شاء الله ربنا يكتب لها حجة حسب نيتها
...
اها لكن جانا شمار عابر
قالو في زول اسمو هشام عايز يعرس ..دحين دا منو انت ولى زولاًً تاني