دعاء الشيوعى مستجاب

دعاء الشيوعى مستجاب


30-04-2007, 12:46 PM


  » http://sudaneseonline.com/cgi-bin/sdb/2bb.cgi?seq=msg&board=52&msg=1189110591&rn=0


Post: #1
Title: دعاء الشيوعى مستجاب
Author: يازولyazoalيازول
Date: 30-04-2007, 12:46 PM

ذهبت يوماً تصحبنى زوجتى لمعايدة أخ عزيز كان يعانى من ألم فى الظهر الأمر الذى إستدعى بقاؤه فى المنزل بعض الوقت لزوم الراحة والإستشفاء ، ولما كان صديقى هذا (شيوعياً) فقد كان الحديث معه ممتعا وجميلا كعادة أخواننا الشيوعيين المتفائلين بغد مشرق ، وقام مضيفنا بالواجب تجاهنا ، وبعدها هممنا بالإنصراف ، فشكرناه على حسن الإستقبال داعين الله له عاجل الشفاء وأن يمتعه بالصحة والعافية ، ولما كان دعاء المريض مستجاب فقد قلت له بالحرف الواحد ( لاتنسانا من صالح دعائك يا أخى ، فالشيوعيين دعاؤهم مستجاب) فضحك كثيراً وضحكت زوجتى من مقولتى وإعتبروا المسألة مجرد مزحة رغم جديتى فى الطلب

عندما قلت الشيوعيين دعاؤهم مستجاب ، فأنا قطعا أقصد (الشيوعى السودانى) ، وأقول لكم لماذا؟؟؟ طبعا الفكرة التى نحملها عن الشيوعيين ، أن الشيوعيين كفار ، ولا دين لهم ، لا يصلون ولا يصومون ولا يتصدقون ولا يفعلون الخيرات أو يأمرون بالمعروف و ينهون عن المنكر ، هذا هو إنطباع السودانيين عن الشيوعيين ، وحتى إلى عهد قريب إنطبع فى أذهان الناس جميعا هذا المفهوم القاسى عن الشيوعيين ، وروويداً رويداً وبطول العشرة وبالتعايش مع (الشيوعى السودانى) وجدنا أن الشيوعى فى السودان إنسان كريم وشهم وأصيل ، بل رأيناهم فى صفوف المصلين ورأيناهم فى الحج ورأيناهم يأمرون بالمعروف وينهون عن المنكر ، وإذا كان إمرىء هذه هى مواصفاته فما الذى يمنع أن يكون مستجاب الدعاء؟ ، فهل تكرم الأخوة الشيوعيين أن يوضحوا لنا ، لماذا الشيوعية لا تؤمن بالأديان بينما نجد الشيوعى فى السودان يمكن أن يكون مسلماً أو مسيحيا ، أم هى مجرد (شيوعية فلس) كما ذكر لى صديقى ابوعبيدة محمد الأمين


Post: #2
Title: Re: دعاء الشيوعى مستجاب
Author: محمد عادل
Date: 30-04-2007, 02:13 PM
Parent: #1

القصة دا ياعم هشام فعلا حقيقية
مرة من المرات كنت فاطر رمضان مع واحد ةشيوعى معروف لدا الوسط السياسى السودانى
هنا فى القاهرة
فقام صلى بى المغرب وبعد شوية اذن العشاء صلى العشاء وبعد شوية صلى بى التراويح
فقام دعاء دعاء دعاء لحدى مابكى قام قال اللهم من اراد بالسودان وباهل السودان خير فاجعل الخير على يدية
فقام بعد شهر مشى نيفاشا وقعو اتفاقية السلام
قام لقيتو فى القاهرة المرة التانية قام قال لى الله استجاب دعواتنا

Post: #3
Title: Re: دعاء الشيوعى مستجاب
Author: يازولyazoalيازول
Date: 30-04-2007, 02:28 PM
Parent: #2

يا الله

ألم أقل لكم أن الشيوعى مستجاب الدعاء



شكرا يا محمد عادل على إيراد هذه القصة العجيبة ، والمسألة ترجع فى النهاية لعلاقة الشخص بربه وإخلاصه وصدقه فى إيمانه ، ولله فى خلقه شئون

تحياتى يا همام

Post: #4
Title: Re: دعاء الشيوعى مستجاب
Author: sunrisess123
Date: 30-04-2007, 03:13 PM
Parent: #3

Quote: المسألة ترجع فى النهاية لعلاقة الشخص بربه وإخلاصه وصدقه فى إيمانه ، ولله فى خلقه شئون

تسجيل حضور يا أبو صهيب

Post: #6
Title: Re: دعاء الشيوعى مستجاب
Author: يازولyazoalيازول
Date: 30-04-2007, 03:28 PM
Parent: #4

sunrisses123

تحضرك السعادة


Post: #5
Title: Re: دعاء الشيوعى مستجاب
Author: othman mohmmadien
Date: 30-04-2007, 03:14 PM
Parent: #3

يا زول يا زول يا زول !!!!!!!!!!!!!!
أولا بالتبادي قبل كل شيئ كيف حالك؟
عشان أخوانا الشيوعيين ما ينشبطوا معاي
هذه الرواية على لسان شيخ الهدية
شيخ مشايخ أنصار السنة المحمدية
وفي ندوة له بالأبيض
فبراير 1985م
قال أنا كنت بهاجم الشيوعيين بأنهم ناس ما بعرفوا دين
يعني ما عندهم دين
بعدين عملوا ندوة في حي العرب وعلقوا المكرفون فوق حيطة بيتوا
المهم - ما قال شيئ وأحترم جيرتهم لحين أنتهاء الندوة
وقال بعد ما صليت العشاء جيت أدمدمت وبسمع فيهم
واحد من المتحدثين قام قال:
شيخ الهدية ياهو السماعة في راس حيطتوا وما جاء مارق لينا
لكن أكيد بيسمع فينا
شيخ الهدية يقول نحن ما بنعرف الدين - هو فاكر نفسه نبي
هو ربنا سبحانه وتعالى قال:
(إذا جاء نصر الله والفتح (_) ورأيت الناس يخشون في دين الله أفواجا(_) فسبح بحمد ربك ... الخ

قالحمدت الله وواصلت دمديمتي)
آها أنا عندي صاحبي شيوعي حأقوم ليه فللي لكي يدعو لنا

Post: #7
Title: Re: دعاء الشيوعى مستجاب
Author: يازولyazoalيازول
Date: 30-04-2007, 03:31 PM
Parent: #5

othman mohammadien



أنا بخير ، وأشكرك على المشاركة الحلوة ، قلت لى (يخشون) فى دين الله ، هم قايلنها (كورة) ولا شنو؟؟؟



يلا يا محمدين الجماعة هسع بجوك طايرين ، يا ربنا قبل دعوتهم ، ولا غطسوا حجرك



تسلم تسلم تسلم

Post: #8
Title: Re: دعاء الشيوعى مستجاب
Author: Mohamed E. Seliaman
Date: 30-04-2007, 03:38 PM
Parent: #7


قصة تانية-من جد حقيقية- من حلتنا:وحصلت زمان زمن كان في شيوعية واشتراكية وتقدمية
والحصل إنو مجموعة من الشباب الذين عرف ((بعضهم))
باعتناق الشيوعية قاموا أسسوا ناديا في حلتنا
من نوع الأندية التي يكتب عليها (نادي اجتماعي ثقافي رياضي شامل))
بس النادي ارتبط في أذهان الناس بالشيوعية
طيب الحصل شنو ؟
يوم شباب النادي ديل جاتهم فكرة عمل خير يتم تنفيذه باسم النادي
وقال نقوم نشجر فناء مسجد الحلة بالنيم داير ما يدور
أصلو المسجد ما كا فيه شجر !!
وفعلا ناس النادي زرعوا النيم في حوش المسجد...
والنيم قام ما شاء الله أخضر
والظل الوارف اتمدد في حوش الجامع داير ما يدور
والهمبريب ضارب...
وعمنا حاج أحمد المؤذن -الله يرحمه-وهو الكان المسؤول
الأول عن الجامع يتولى نظافته وحراسته
وتمامة الموية !!!
وقوم تعال يا موسم النفض
وشجر النيم يصفر صفقه زي الكركم
وكل صباح تلقى ليك
السفير (صفق النيم ) محتوت ومالي الحوش ملي بالكيمان
ويجي حاج أحمد شايل المقشاشة
ويبدأ مشقة الكنس في الحوش الكبير:
المقشاشة تسوي كش كش!! كش كش!!
وحاج أحمد يدعو متذمرا ولاعنا من كان السبب :
الله لا تكسب الشيوعيين !! الله لا تكسب الشيوعيين !!
المقشاشة تسوي كش كش!! كش كش!!
وحاج أحمد يدعو
الله لا كسب الشيوعيين !! الله لا كسب الشيوعيين !!





الخرطــوم خمــر شــديدة الإســـكار وفتيات يرتدين الـــدروع في شوارعها

Post: #11
Title: Re: دعاء الشيوعى مستجاب
Author: يازولyazoalيازول
Date: 01-05-2007, 08:46 AM
Parent: #8

Mohammed E. Seliaman



أشكرك على القصة الطريفة ، بس طبعا الراجل أتعبتو حكاية الكنس وكدة ، والمصيبة لو أن الله إستجاب دعاؤه (بصفته المؤذن) فإن كل الذى حدث للشيوعيين حتما يكون بسبب هذا الرجل ، وعلى الشيوعيين فى هذه الحالة (لو أرادوا أن تقوم لهم قائمة من جديد) أن يضعوا ضمن أولويات أجندتهم البحث عن هذه الحلة ، ومن ثم البحث عن هذا الجامع ، ومن ثم البحث عن المؤذن ، والإعتذار إليه ، وتعيين شيوعى كناس للنيم ورعايته مدى الحياة ويا ريت لو تبرعوا بأباريق المسجد.



شكرا محمد سليمان فقد فاجأتنى حيث لم اتوقع ان تكون بكل هذا الظرف واللطافة


Post: #9
Title: Re: دعاء الشيوعى مستجاب
Author: أبو عبيدة البصاص
Date: 30-04-2007, 03:51 PM
Parent: #2

محمد عادل

Quote: القصة دا ياعم هشام فعلا حقيقية
مرة من المرات كنت فاطر رمضان مع واحد ةشيوعى معروف لدا الوسط السياسى السودانى
هنا فى القاهرة
فقام صلى بى المغرب وبعد شوية اذن العشاء صلى العشاء وبعد شوية صلى بى التراويح
فقام دعاء دعاء دعاء لحدى مابكى قام قال اللهم من اراد بالسودان وباهل السودان خير فاجعل الخير على يدية
فقام بعد شهر مشى نيفاشا وقعو اتفاقية السلام
قام لقيتو فى القاهرة المرة التانية قام قال لى الله استجاب دعواتنا




محمد عادل

يصرح ان الله اجرى الخير
على يد الكيزان لهذا البلد يا انصار

هذا مضمون المداخله


اما الصياغة

معليش يا محمد ما بقدر

اعد


البصاص

Post: #10
Title: Re: دعاء الشيوعى مستجاب
Author: محمد عادل
Date: 30-04-2007, 09:10 PM
Parent: #9

Quote: محمد عادل

يصرح ان الله اجرى الخير
على يد الكيزان لهذا البلد يا انصار

هذا مضمون المداخله


اما الصياغة

معليش يا محمد ما بقدر

اعد

الحبيب ابوعبيدة
اولا هذا الرجل ليس كوز
حركة شعبية شيوعى كان من القيادات فى الصف الاول فى الحركة ياحبيب
فى كوز شيوعى غير سبدرات ياحبيب

Post: #12
Title: Re: دعاء الشيوعى مستجاب
Author: يازولyazoalيازول
Date: 01-05-2007, 09:16 AM
Parent: #10

لم أفهم مقصد البصاص يا محمد عادل ،

ممكن تفهمونا؟؟؟؟

Post: #13
Title: Re: دعاء الشيوعى مستجاب
Author: محمد عادل
Date: 01-05-2007, 02:17 PM
Parent: #12

البصاص ياعم هشام
بفتكر انو الزول الدعاء الدعاء دا من الكيزان
وانو الخير مقصود بيهو الكيزان حاكمين السودان فاكر انا بقول كدة
لكن يابصاص ليس هذا المقصود
انا قاصد انو الزول دعاء دعواء لى نفسو هو وهو فاكر انو دا الخير
اه نحنا نعمل ليهو شنو
دا علاقتو مع الله

Post: #14
Title: Re: دعاء الشيوعى مستجاب
Author: يازولyazoalيازول
Date: 01-05-2007, 02:58 PM
Parent: #13