خلونى أتمغّى

خلونى أتمغّى


27-06-2006, 05:29 AM


  » http://sudaneseonline.com/cgi-bin/sdb/2bb.cgi?seq=msg&board=52&msg=1184236243&rn=0


Post: #1
Title: خلونى أتمغّى
Author: يازولyazoalيازول
Date: 27-06-2006, 05:29 AM

صديقى فى جده ويدعى (مهلب) ، رجل جميل وفنان ومن الزمن السمح ، جمعنى به مجلس عامر قبل يومين ، وكان يحدثنى عن (مأساة) شباب السودان أبان السبعينات والثمانينات وبالذات خريجى جامعة الخرطوم ، قال لى مهلب والذى تخرج من جامعة الخرطوم فى أواسط السبعينات أن الكارثة الكبرى ، أن خريج جامعة الخرطوم ، وبالذات بعد التخرج ، يحس بأنه إنسان يختلف عن باقى الناس ، ويصيبه الغرور ، ويجىء بعد ذلك (الزمن المهدر) ، فيركن الخريج للراحة والدعة ، والتعالى على الناس وكأنه يريدأن يقول للمجتمع ، يا ناس أنا تعبت وجاهدت وقريت وخلصت الثانوى ودخلت الجامعة وإتخرجت ، وبعد كده (خلونى أتمغّى) شوية ، وتأتيه هذه التمغية على شكل ، نوم كثير بالنهار ، وخروج فى العصريات لدور الرياضة أو اللف فى الحلة ، وطبعاً الجلابية بيضاء مكوية ، وما أن تغرب شمس اليوم حتى يبدأ برامج الكلزيوم والبلو نايل ، وبعدها القعدات المرطبة والبيرة أبو جمل والجكس والمواعيد الغريبة ، والعود والوتر وألحان الليل الشجية أو الجلوس فى شواطىء النيل أو ألأتنيه وسان جيمس ، ويختم الليل بالتعريج على الشهداء وسبعة بيوت وكثير من بيوت الخناء والمواخير ، ويستمر الحال والزمن (يهدر) وصاحبنا (الخريج) ما زال فى غيه و (تمغيه) حتى يحل صباح اليوم التالى

فهل ما قاله صديقى مهلب صحيح؟؟

مجرد سؤال

Post: #2
Title: Re: خلونى أتمغّى
Author: طارق أحمد خالد
Date: 27-06-2006, 06:01 AM
Parent: #1

تحياتي للزول الظريف

هذه ظاهرة سيئة و للأسف تمثل حقيقة واقعة. نحن نتلهف للإحتفال بأي إنجاز مهما كان صغيراً. أنظر كم عدد المنشئات التي دعي لإفتتاحها كبار المسئولين بما فيهم الرئيس و هي لا تستحق ذلك. حدثني أحد الأصدقاء يعمل مهندساً ببلدية دبي أنه تم إفتتاح كبري بين دبي و الشارقة و عند الإفتتاح جاء مسئول صغير من البلدية للإفتتاح الذي تم من غير أي ضجيج. المخجل أن أحد المهندسين الشوام إلتفت للمهندس السوداني قائلاً: لو كان الكوبري دا في السودان كنتو جبتو الرئيس.
الميل للإحتفال هذا يقعد الناس عن المضي في طريق الإنجاز. إذن المسألة ليست فقط في الخريج الذي يفضبل الإحتفال بإنجازه عن مواصلة المكابدة بل تمتد حتى لحملة الدكتوراه الذين يظنون أن (الدال) هي نهاية المطاف فلا ينتجون و لا يبحوث بل يحتفلون بالإنجاز و يحصدون الوجاهة الإجتماعية (و يتمغوَا) حتى بلوغ سن المعاش. حاول أن تجري إحصائية لتصل إلى نتيجة مفادها: كم من حملة الدراسات العليا واصلوا في مسيرة البحث العلمي و تأليف الكتب و الأوراق العلمية بعد الحصول على الدكتوراه؟
يقيني أن الإجابة محبطة للزول الجميل. و لك التحية
طارق

Post: #4
Title: Re: خلونى أتمغّى
Author: يازولyazoalيازول
Date: 27-06-2006, 09:50 AM
Parent: #2

الوجيه طارق أحمد خالد

نعم يا وجيه ، هى فعلاً مثل ما ذكرت ،

ويظل السؤال إلى متى (يتمغّى) هؤلاء؟؟؟

ألف ألف تحية لمداخلتك الضافية

Post: #3
Title: Re: خلونى أتمغّى
Author: خضر الطيب
Date: 27-06-2006, 07:23 AM
Parent: #1

ابو الهش ..تحياتي

يا اخوي انتا اصحابك كلهم عجائز ذيك . . وانحنا قالوا ليك حضرنا السبعينات دي

ولا خمسة بيوت دي شنو كمان دي ,,, عشان نفتي ليك ,صاح,


المرحلة الذكرتها دي فعلا حقيقة لانو خريج جامعة الخرطوم في الزمن الجميل داك كان مسلح

بالعلم فعلا واصلا ماكان في جامعة غير جامعة الخرطوم ..كانت جامعة الفرع ودي بتخرج

بدرجة النادي القبطي .. وجامعة امدرمان الاسلامية ودي كان مغضوب عليها في ايام

النميري ..ومعهد الكليات التكنلوجيا ودا كان بخرج صنايعية


لكن مسالة القعدات دي انحنا طبعا كنا صغار في الوقت داك فممكن مهلب يفيدك ,, او

اي

واحد من اصحابك المخضرمين ( العجائز )

Post: #5
Title: Re: خلونى أتمغّى
Author: garjah
Date: 27-06-2006, 09:51 AM
Parent: #3



هشومة

مهلب ده في الشقق دي علا يمشي الشارع يتمغى ويجي راجع

محل ما ترفع يدك حيطة تعتر ليك.

والا يكون بيتمغى وهو متربع


سلام يازول يا حلو

وللمرة التانية مهلب ده خلي اليجي بالدرب

Post: #8
Title: Re: خلونى أتمغّى
Author: يازولyazoalيازول
Date: 28-06-2006, 02:19 AM
Parent: #5

كلامك صح يا قرجة

وبعدين بحاول أقنع فيهو ياخد عضوية هنا لأنو حا يكون مكسب حقيقى ، مهلب فنان وأديب وشاعر وزول ثرى بالتراث السودانى الأصيل ويحفظ كثير من أدب الهمباتة

تحياتى

Post: #6
Title: Re: خلونى أتمغّى
Author: يازولyazoalيازول
Date: 27-06-2006, 09:56 AM
Parent: #3

الحبيب خضر الطيب

لو قعدت أشرح ليك سبعة بيوت (هى سبعة ما خمسة) فسيخرج البوست عن مساره زى ما بيقول أخونا abcde

بعدين أعجبنى تصنيفك للخريجين
الخرطوم - مسلح
الفرع - درجة النادى القبطى
الإسلامية - مغضوب عليه
الكليات التكنولوجية - صنايعى


بعدين يا خضر ، إنت معقول ما حضرت الريفيرا والجندول والأغنية الجماعية (الندامى) عندما يكون الجماعة (لط)

نرجع للبوست ، حا يتمغوا كده لمتين؟؟؟

Post: #7
Title: Re: خلونى أتمغّى
Author: abcde
Date: 27-06-2006, 10:09 AM
Parent: #1

لا لا



الدوره دي ما حيخرج عن مسارو







صدقني

Post: #9
Title: Re: خلونى أتمغّى
Author: يازولyazoalيازول
Date: 28-06-2006, 02:20 AM
Parent: #7

abcde

مصدقك