يا وسخ الوسخ

يروى عن الفنان زيدان أنه مولع بالشراب لدرجة الشراهة ، وكثيرا ما كان الشراب سبب رئيسى (لتبويظ) وفرتقة حفلاته ، وقد كان يوماً مرتبطاً بحفل زواج مهم ، وأكثر من الشراب ، وجاء إلى بيت الحفلة فى وضع مزرى جداً ، وجلس فى الغرفة المخصصة للفنانين ، وقام العازفين بجهود جبارة (لصحصحته) من الحالة البطالة التى كان فيها ، ولم تنجح كل محاولاتهم ، فرقد فى السرير كالجنازة ، والمحتفلين فى الخارج منتظرين ، وأم العروس تدخل وتخرج ، والعريس (يحوقص) ، والناس فى حالة تأهب وإنتظار ، ومرت الساعة ولم يخرج زيدان من حالته البطالة تلك ، وبالطبع باظت الحفلة ،

فجاءت أم العريس ووقفت فى رأسه ، وهاك يا دعاء:

يا خايب ، يا باطل ، يا سجم الرماد ، يا المابتشبه الرجال ، يا عواليق ، يا مرمد ، يا وسخان ، يا الفعلت يا التركت ، الى آخر مسلسل النبز السودانى الفظيع ، وهو لا يرد عليها ولا يتكلم ولا يفتح عينيه ، حتى قالت له:

يا وسخ الوسخ

فرفع راسه وقال لها:

يا حاجة ، يا (وسخ الوسخ) دى ، زى (سلاح الأسلحة)

والله يا هشام

قلبى رضيان عليك دنيا وآخرة

تعرف أنا من أمس بالليل مدبرس والدنيا دى ضايقة بى وكرهان حياتى عديل

هسه إنت طلعتنى من الحالة الكعبة دى وضحكت حتى بانت نواجذى

والله بالغت لكين

وزيدان فعلا زول بارد جدا جدا ولذيذ

مرة كان عندنا عرس فى العرضة، وبغنى زيدان ومعاهو خليل إسماعيل

فى واحدة من الأغنيات بتاعته فيها مقدمة موسيقية طويلة جدا

واحد من جماعتنا "واقف تتك" ومستف للآخر، زهج منه وقال ليهو ما تغنى يا أم كلثوم

زيدان اتلفت عليهو وقال ليهو

ام كلثوم ولا أم فت فت

قالوا يا أبوذر مرة عندو حفلة فى سينما مدنى ، وجاء تاوق للجمهور من وراء الستارة ، ولقى ليك (الشعب) كلو (ناس زُرق) الزرقة الفظيعة ديك ،

إتلفت للعازفين وقال ليهم:

هسع ديل أغنى ليهم شنو؟ ، أغنى ليهم (الشعب العربى وين؟؟)



تحياتى

هشام شيخ الدين


الله يديك العافيه والله عندك جنس نضمي

شكرا يا سيف

بحاول (أتفشى) و (أفش) الناس معاى

والله ياعم هشام
طالع لى من امتحان وشرطتنى من الضحك
وكنت موش قرفان زهجان اى حاجة بس خليها على الله
ياريت لو على زيدان بس ياعم هشام
ماكتار ذى ديل كلهم كدة
مرة فنان شاب جاء شاربها شراب شديد
ومقدر اغنى الكلام دا هنا فى القاهرة لحدى ماجدع المكرفون

عثل شديد والله لوووووووووووووووووووووووووووول

العزيز هشام,
امثال زيدان هم من يعطون الحياة في السودان نهكة خاصة كما ووجودك في البورد يعطيه نكهة خاصة.
التحية له ولك.
رامي

هشام يا زول..

ويا زول أرعى بى قيدك!


أعشق صوت زيدان وغناه..
الصوت -يكاد يكون الوحيد- الذي لم تفسده السنوات..
حرير في حرير..

جابوه مرّة في سهره بقناة النيل الازرق .. (قبل ما يشفّروها اولاد اللذينا)..
كانت سهره اقرب الى الحلم.. غرّد فيها عندليبنا وابدع..

يا هشام

دي قصة حقيقية.
قالوا بعد قوانين سبتمبر وقفيل البارات زيدان كان عندو واحد صاحبو نقادي عندو استوك بتاع شري داسيهو في البيت.
زيدان يجي كل يوم غاشيهو يطبق قزازتو ويفرتق.
قام الامين عبد الغفار عرف القصة دي وقام يوم سبق زيدان ومشى للنقادي وقال ليهو زيدان عندو حفلة ومرسلني ليك قال ليك ترسل ليهو قزازنو.
النقادي طوالي شال القزازة وأداها للأمين.
بعد شوية زيدان جاء
النقادي قال ليهو قزازتك شالا صاحبك الفنان البغني "اشيل الريد واشيل ودو" داك.
زيدان قال ليهو يشيل الريد، يشيل الجن الأحمر قزارزتي دي تاني ما يشيلا.

Quote: النقادي قال ليهو قزازتك شالا صاحبك الفنان البغني "اشيل الريد واشيل ودو" داك. زيدان قال ليهو يشيل الريد، يشيل الجن الأحمر قزارزتي دي تاني ما يشيلا.

لا بالجد دي قويه يا شماسي
ضحكتني لمن وقعت علي قفاي .... أضحك الله سنك ياخي

محمد عادل
دوما
رامى يوسف الصديق
نجوان
شماشى
معاوية محمد

شكرا لمشاركاتكم الثرية فقد أمتعتمونا بها

تحياتى

هشام

هشام العزيز


يعني جد مفروض يكون العنوان (يا بهجة البهجة )

لكن انا اقول ليك حاجة تانية

عارف في حفلة عرس انا شفت اغرب حاجة من زيدان الفنان

كان بيغني والناس بترقص مبسوطة ولمن بدأ يغني أغنية الذكريات لعثمان الشفيع تحلركت انا نحو المسرح ووقفت بجانبه للاستمتاع بادائه الجميل ولكني شاهدت دموع زيدان وهي تتساقط من خلف نظاراته وتبلل خديه وهو يغني دون توقف والجميع يرقص فكان كما الشمعة يحترق ليضيء للاخرين

تخريمة ( زيدان قمة غنا شامخة)

الأستاذ الأديب جمال السنوسى

قلت فأوفيت يا أخى

تحياتى

العزيز هشــام و اللاي بوست بهجة البهجة زي ما قال جمال..

قـالـوا عـن زيــدان ... يوم مبارة الهــلال و المــوردة .. الموردة إتغلبت من الهــلال 6/0 و زيــدان زعــلان داير إطرشق ... و واقـف جم حافـلة لاعبيـن المـوردة و ينبذ فيهـم .. بلاي عليك الله شوف العبيد الخايبين ديل إتغلبوا ستة .. واحـد من لعيبة الموردة مد رأسـو من شبـاك الحافـلة و قال ليهـو أسكـت يا خايب ... قام زيــدان بســرعـة و بطريقتو المعروفة ديك قال ليهو ..

هــي إنتـوا قاعـدين جــوة و اللاي انـا قايل الحافـلـة مظـلــــلــــة...

هيثم عبدالعزيز

بالغت بالغت بالغت