شعر الشوايقه لا يمكن ان اصفه

كمان زعلان
صديق احمد
عبدالله محمد خير



تعاتبنا !!! وما قبلان تكاتبنا
ما إنتو البيتو الحله يا نوره
ورحتلو بعيد بلا شوره
تراها الحله من يوم قمتو مهجوره
وما رضيانه بعدك إلا مجبوره
ومشتاقه
عارفه الدنيا لمان تقسى فراقه
حليل الحله .. وين أملاكه
(وين حوره)؟؟ وين شاديها ؟؟
يا شاديها ما تزوره
يا فتنه
يا البعد الله منك كان مخافتنا
أكان حيين .. وما متنا
وكان حن القدر والدنيا لمتنا
وتاني الحله زي ما كنا ضمتنا
بنحلف ليك بزمتنا
سعادتك كل مهمتنا
وبلاك قامت قيامتنا.

وعد الحبيبه
صديق احمد
عبدالله محمد خير





عديلـه عليـك مشـاويـرك عديـلـه
عديله إن كان قصيره إن كـان طوليـه

عديله عليك محـل مـا تمشـي تمشـي
يـا عديلـه أبقيلـو زي الغيمـه رشـي
أما أنـا الهامانـي راحتـك أول الشـي
ليـك تأمرنـي وعلـي أمـرك بمشـي

بس توعدنـي مـا طـول بيـك غيبـه
وعد من أنبـل حبيـب لأجمـل حبيبـه
فيـك شفـت الدنيـا قاصيهـا وقريبـه
ومنـك اتعلمـت كيـف أقـدر أجيـبـه

لا متين يا نومي فيـك رؤيـاي تصـدق
ولا متين يا شوق موالي قليبـي تحـرق
تاني جود باللقيـا يـا زمنـي المفـرق
وتاني يا اجمل صباح في عمري أشـرق

يا حلاة العُشرة وكتين تبقي صـح صـح
ويا حلاة الريده وكتيـن تصفـى تفـرح
يا حلاة ليلاً معـاك مـا درنـا يصبـح
ويا حلاة صبحاً معاك تكون إنت المصبح
في الربيع قالوا الزهـور تنضـر تفتـح
يا ربيع في حضنو كـم لفانـي وارتـح
صار يباب بستاني من غيـرك مكـردح
غير سموم في أم شير وغير أم شير تكتح

حبـك الخلانـي لـى زول مـا بجافـي
وحبـك العلمنـي أنظـم ليـك قـوافـي
حبك أكبر مهر لـي طهـري وعفافـي
آي بحبك وأصلـو حبـك زيـو مافـي

يا قمره
صديق احمد
عبدالله محمد خير





يا قمره ... صبي السنسني الحمـره
شوفي أبوي أنا الراجاهو كلو صبـاح
يا زينوبه أبوكي هو أصلو حالو بـره
لو قاري العلم هو ولاهو سيد خبـره
ومو زول غربه لكن الظروف جابره
مالو إن كان صبر كل الخلوق صابره
والصابرات روابح لـو يجـن قمـاح

هو أصلو متين نساكم يُمة شان يطره
بيتنفـس هـوا ذكراكـم العـطـره
رهيف إحساس حنين قلبـو بالفطـره
نديمو بقت دموعو الديمـه منقطـره
وأصلو إن ما قعد بينكـم ولا بيرتـاح

جاهو العيد كمان زاد القليب حسـره
ساد العبره حلقـو ونفسـو منكسـره
هو لا لمّ القروش لا حصل المسـره
بلد ما فيها زول مات من عدم كسـره
فراقكم ليها يا أحباب ولا كان صـاح

يـا أمارتـي المـا طاعـت الأمـره
ندماني وبقـت محتـاره فـي أمـره
بعد قسن الـدرادر قصـرن عمـره
الشوق فاض وعماها الحنيـن غمـره
الشوق للبلـد لـي بهجتـه وسمـره
الشوق لي مقيلا ضـم ضـم تمـره
الشوق لي حديثا ضـم ضـو قمـره
الشـوق للبلـد جابريـتـا وكـكـره
كان الشوق يخفف والله يبرى جـراح

مشتـاق للحسينـاب أسقـه وبكـره
مشتاق للقبيل إتربـوا فـوق حكـره
مشتـاق للدميـري ومويتـه العكـره
مشتاق للجزيـري وتشقـه وهكـره
مشتاق لي قطع بحره ودخول وكـره
مشتاق للأبي يفـارق الفـؤاد ذكـره
مشتاق للعلـى مشغـول دوام فكـره
مشتاق للصباح ديـدن غنـاي شكـره
وياريت كت بقدر أسوي شوقي جناح.

رحلة النسيان
صديق احمد
عبدالله محمد خير





نسيتك أنا نسيتك مـا لأنـي إنسـان ونسـاي
نسيتك أنا لأني بقيـت لمـا أطـراك بساهـر
وإنــت طـيـفـك مـاهــو لـــولاي
نسيتك أنا عشان ردة فعـل ذكـراك جـواي
بقـت تنـتـر مـغـس مــرات ولــواي
نــســيــتـــك أنــــــــــا
ونسيت كل السماحه الفوق دريبا بقيت غنـاي
وخليت لك بلد بي حالو ورحلت بـي جـاي
غلطانه إن بقيت فهمتي إنو رحيلي فـوق رأي
مهاجر شان أحسن حالي وأرجع ليك شاشاي
وحاتك لا لا .. دنياك ما بتوافق تاني دنيـاي
وحاتك لا لا .. لا داير أخادعك ولاني خازاي
قـسـا الـقـلـب البـبـكـي الـشــوق
عـلـيـك بـقــي مـاهــو بــكــاي
وجـفـاهـا الـقـمــري عصـريـاتـنـا
مــاعــاد فـيـهــا .. قــوقـــاي
صحيح حسدوني فيك زمن عزلتك وقالوا نقاي
ما عارفني بكدح وبشقى ساكت وماني لقـاي
يفيض بحرك يعم وما فيهو من تالاي سقـاي
نسيتك أنا وبفتش في دليل لي دربي ضـواي
دحين أطفيها نار الغيـره أو زيديهـا بوبـاي
وأبكي على غرورك بعدي أو كوسيلو رضاي
وقول لي معاك سلامـه، أو قوليهـا بابـاي

طارق العوض





حزين تايـه شقيـان فـي دربـك سنيـن رحـال
رضيت بالهم معاك حيران صبرتا وصبري ياماطال
بقيت وحيد فقدتـا حنـان يامـا ضاعـت الآمـال
بكيت وبكيت دمع حزنان علي خديدي حزين سيال
ساكب ذاتي في الألحان وفاقد ذاتي في الترحـال
مسافر ديمه طول العام علي جوف الزهور رحال
وكم حاولتا أنسي الكان اشيل ذكـراك مـن البـال
اشوف صورتك معاي دوام محل قبل يمين وشمال
تبين الرؤية لي عيان اشوفه هناك وعـود عميـان
بشوفك زي زرع نديان وشايـل خضـرة السيـال
نسايم فايحي في الوديان تهبهب في بيـوت النـال
شجر فرهد دوام رويان من النسام طـروب ميـال
أناديك يا فريع البان واهمس ليـك تعـال وتعـال
وتجري تجيني بي تحنان بعد توصل اشوفـه زوال
ارجع تاني للأحـزان واقالـد فيهـا كـل محـال
اقول يا ناس حليل الكان سنين مرن علـيّ طـوال

طارق العوض





في زولا في هواك اسرتو ختاك جـوه جوفـوا
وآ خيبـة ظنونـو الفيـك وآضيعـة حروفـوا
يا خي بستان الهوي الزارعنو احتكـت قطوفـوا
والبحر انحسر بالحسـرة فـارق لـي جروفـوا
يا خي في وادي الندم والحسرة سبتو وراك ينادي
ما رشى السحاب بي فوقوا ما غشـت البـوادي
يا خي كان قايل نداك يرويهو تاني تشوفوا نـادي
اتاري هواك سراب ما بيروي للعطشان وصابـي
ياخي ات عارف ازاهو براك عارف وين دواهو
عارف البيهو يـا محبوبـو مـن شـدة هواهـو
عارف البيهو يا محبوبـو مـن كتـرت هواهـو
يا خي لو نظرة حنان تكفيهو تاني تعيـد قواهـو
لكن انتـي بيهـا بخلـت جدتبـا لـي سواهـو
عرف قدرو ومقامو معـاك يـا القللـت قـدرو
عشان الناس رميتو مشيت كان ما بهمـك امـرو
يا خي الناس كان بعرفوا البينا كانوا اكيد بعزروا
عشان اصلو النسيم ما بيبقي لو حرموهو زهروا
لو بعد الحصل لا قيتو في النار زيدلوا جمـروا
ولأنو صبر عليك كفاية وانتـي نهيـت صبـروا
يا خي صبر دمعو ليك وانينو والحرمان وهجروا
وقـرر إنـو يتناسـاك لأنـك مـا بتخـبـروا
فـي ساعـة ابتهاجـو إليـك اتخليـتـا عـنـو
يا خي اتوسل إليـك نـاداك لقـاك بعدتـا عنـو
ياخي منك بي آخر بصيص آمالو كلماتك طفنـو
كتلتا الفرحه فـي جواهـو فيـك خيبتـا ظنـو

أخي إيهاب
شعر الشوايقة يتدفق حناناً وحنيناً، جُل من أكتوى بنار الغربة وحس لذاعتها شغف بشعر الشوايقة. زدنا منه بوركت ياراقي!


* أنا لست شايقية لكني لا أقاوم ما يخرج بصدق من الوجدان وهذا أجده في شعرهم.

غالي و الطلب رخيص وعيونا ليك
وشكرا ليك

ياسلااااااااااااااااااااااااااااام

ياخ شعر الشايقية ده مو عذاب عديييييييييييل كدى والله !!

ست الناس ناديه عثمان الصراحه عذذذذذذذذذذذذذذذذذاب شديد خصوصا لمن تركزي في الكلمات وتفهمي المعنى اوالمقصد من القصيده او مناسبة القصيده
حاجه اجمل من الجمال ، وبكره ح انزل ليك المزيد المزيد
شكرا ليك يا فنانه يازوق