Post: #1
Title: نـــظرية الحاجات وتـطور البتاعات ..!!
Author: humida
Date: 01-07-2006, 08:09 AM
زمان
وزمان شديد .. شديد
ولا بأس بعصر الديناصورات .. للناس العاشوا الحقبة دي ..
كان كل واحد .. نفسو يكون عندو حاجة
الشافع داير بزة .. يكبر شوية .. تنقلب سفنجة
شوية .. شوية ... داير عجلة
حسب التطور الميكانيكي .. الحاصل ليهو
وكلها حاجات .. لانها بتنطلق من رغبات
وفي بتاعات .. ودي بتفرضها .. الظروف الراهنة
ذي شنطة المدرسة .. فهي في النهاية .. بتاعة كدا
لزوم .. البتاعة التانية .. الا وهي المدرسة
وفي هذا الخضم .. تتوالى البتاعات .. علي مضض
والحاجات .. حسب الرغبة
لحدي المتوسطة كدا .. والولوج الي شارع المدارس بالبنطلون
فهنا .. البنطلون .. حاجة ملحة .. وكان الردا .. بتاعة كدا .. ترمز للشفعنة
وممكن نأرخ لدخول مرحلة المراهقة الممتدة من لحظة ارتداء البنطلون
في هذا الاثناء بتظهر حاجة ملحة .. تانية
وهي الحاجة الي حاجة .. نظام جكسوية وكدا
والموضوع خاضع للعرض والطلب .. وشيل جرب .. وكان ما نفعت فك عكس الهوا
وكذلك الامر لدي الطرف الآخر
لحدي ما تلقى الحاجة بتاعتك .. تقوم بقدرة قادر تبقى بتاعة كدا
مع الاستمرار الدنميكي في حركة .. فك .. امسك .. فك .. امسك
بعدها .. الواحد بجيهو أحباط .. وببقى جادي
يقوم يلم حق الحاجة الباردة .. ولاحظ انها حاجة لانها باردة
ويشتري بيها حاجات تانية .. تبدأ بقميص .. وممكن تصل لحدي عربية
حسب مقتضيات الفكة .. الفاكيها في روحو .. ولا الفكة بمعني القروش
بعد المرحلة دي .. نصل لمرحلة التفرد
ودي بتكون اغلبها حاجات .. مع التوازى مع متطلبات الحياة .. البتاعات
لكن بكون في هامش ربح .. بتيح ليك التحرك .. بطريقة بهلوانية
وتطبيق نظرية .. بُص شوف بيبو بيعمل أيه
وهنا بدخل المجال المهني .. والهواية .. والرغبات .. وكلام الجرايد داك
في تحديد رغباتك لحاجات المرحلة القادمة
في ناس بتشترك في قنوات فضائية .. وفي ناس بتشتري لاب توب
وفي واحدين بحبو يشربو بربيكان .. ويأكلو جلاكسي
وفي ناس الموبايلات .. وناس الملايات والستاير
وفي واحدين فريدين .. بقلبوا الهوبة في شارع الزلط .. وبكسروا رقبتهم ..
ومالو زاتو ياخي .. لو ناطحنا الزرافة دي .. ولا اشيل لك الاسد دا ادق بيهو الارض ..
كلها حاجات .. مع الايمان المنقطع النظير بالبتاعات الضرورية
الممكن مرات توقف الحاجات
غايتو .. ربنا يستر ..
|
Post: #2
Title: Re: نـــظرية الحاجات وتـطور البتاعات ..!!
Author: humida
Date: 05-07-2006, 08:15 AM
Parent: #1
up
|
Post: #3
Title: Re: نـــظرية الحاجات وتـطور البتاعات ..!!
Author: almulaomar
Date: 05-08-2006, 05:35 AM
Parent: #1
دى نظرية بت ...... جداً جداً وهناك نظرية أخرى توازي هذه النظرية وتنص على أنه ما أن تبلغ هدف معين في الحياة إلا وتخطط لآخر أكبر منه ، وهي نظرية بنطلون الجنيز عندي صديقي اللدود عكو ، فقد زهج وحدد هدفاً واحدا من إغترابه والذي جاء مصادفة ودون تخطيط مسبق يعني وقع ليهو من السما أها عكو كان هدفه الأسمى من الإغتراب أن يشتري بنطلون جينز لا أكثر فمكث في الغربة حوالي الثلاثة عشر عاماً وما أنفك عمل فيها ما عامل من سراويل جينز ، وقد كان سبب إغترابه مع غيره من الأسباب أن يكون رجلاً حكيماً يكلم الناس بالنصيحة قبلوها أم لم يفعلوا ، ففي جلسة من جلسات السمر جمعتني بالكثير من المغتربين المدبرسين منهم والمخلوعين والفرحانين والذين لا إلى هؤلاء ولا إلى هؤلاء ، أخذ أحدثهم زمناً بالإغتراب يلعن الزمان ويسب الغربة ويعدد مآثر الوطن وما يفقده المغترب في غربته ، ثم عرج على الهدف الأسمى لغربته وقال فض فوه أنه بس داير ليهو حافله روزا ويرجع يعني لخص أهداف غربته في هذه الغاية ، أها يقوم صاحبنا الحكيم ينط ليهو في حلقو ويقول ليهو وهو ينفث دخان سجارته والله يا أبو الشباب أنا جيت عشان أعمل بنطلون جينز وأرجع وأهو قعدت حوالي 13 سنة وما زال في العمر بقية وفي الإغتراب كذلك تقول لي عاوز تعمل حافله فبهت المغترب الجديد وبحسبه بسيطة عرف أن هدفه وحلمه من الإغتراب زي ما تقول يعني mission impossible فقال ليه أخش في مشاكل وديون وضرائب وزكاة وحليفه في المصحف قام شتت ورجع البلد وسمعت إنو آمن يقيناً بنظرية بنطلون الجينز رغم إنو مبتدعها ما زال يمارس تيهه في بلاد الغربة.
===
وطبعاً نظريتك دي قريبة من نظرية النشؤ والتطور بين البتاع والحاجة وحا أرجع ليك فيها من واقع قريتنا التي أصبحت ديجتال بفضل الثورة وبس
|
Post: #4
Title: Re: نـــظرية الحاجات وتـطور البتاعات ..!!
Author: ابو جهينة
Date: 05-08-2006, 06:41 AM
Parent: #3
حميدة
و هناك رواية أخرى يرويها أحد الممسكين بتلابيب الغربة حد الإختناق ..
و هو من الذين عندما جاء إلى ميناء جدة قال للعسكري : أنا جاي نهائي لغاية ما ربك يهونا بي هناك..
و من يومها لم يفكر حتى في الحصول على تأشيرة خروج و عودة و بالتالي فهو ضد فكرة خروج نهائي ..
هذا التِلِبْ .. المكنكش في صحراء ( الضبوبة : جمع ضَب .. و هو زاحف صحراوي يقول عنه البدو أنه بطعم السمك الفيليه ... ما علينا ) ... قال و هو يغازل شعراته البيضاء :
أول بالتبادي لما جيت هني ..
قلت أعرس لي مرة .. و أبني لي بيت و أشتري لي لوري سفنجة و أتوكل على الله ...
المرة الأولانية ما نفعتْ
وكت عرفت إنها ما بتنفع معاى .. كان جابت لى خمسة جنُّون ( الجنون جمع تكسير جنيات و مفردها جنا و في رواية زينب أن معناتا جنا يجن جنا فهو مجنن ناس البيت )
أها عرست التانية ..
قامت الأولى عملتْ ليها عمل ..
فمرضتْْ و كدة .. رجعتَ الأولانية .. قامت التانية فكت العمل و رجعتْ للخدمة تاني ..
أها المقاول أكل كل قروشي و إغترب ليبيا ...
أها لملمت قريشات من تاني و إشتريت لوري قلاب ..
أخو مرتي التانية .. قلب بالقلاب الهوبة .. إتزوج منو و بنى بيت في المايقوما و إشترى ليهو تكسي مرخس.
مرتي اللي هي أختو عملت ليها توكيل قلت ليها بيعي القلاب ..
باعت القلاب و إشترتْ بيهو أحفض مالك و غوايش ثعبان و ختَم ماركة أديس أبابا و ختتْ الدهب دة كلو عند خالتها الشفة .. و قالت لى القروش سرقوهن في المحطة الوسطى ..
خالتها تشيل القريشات و تديهن رشوة لواحد هي ميتة فيهو موت و هو مطنشا ..
أها أتزوجا شهرين بس .. و فرتق القضارف يتاجر بباقي القريشات في العيش
لملمتَ لى حبة قريشات .. و رسلتهن لي أخوى ال جا من البلد و سكن الكلاكلة اللفة.
إشترى لى بيت في الشقلة .. و بنى لى فيهو سور جالوص و سكن فيهو واحد غرباوي بيبيع فحم ..
بعد فترة أخوى ضرب لى تلفون قال لى القطعة حقتك مشيت لقيت في زول باني فيها و شدرتو يقوقي فيها القمري بطن حوشو و رابط ليهو كلب قدام البيت سنونو حُمُر .. و قال لى أمشي شوف ليك ناقة أحلبا ..
أها حسع جاني إحباط ..
لاني قادر أقعد هني لأنو وفروني من الشغل بعد موت كفيلي ..
ولاني قادر أرجع لأنو بيت ما عندي ..
و نسواني الإتنين قاعدات عند أهلهن ..
تقول لي حاجات و تطور بتاعات ؟
|
Post: #5
Title: Re: نـــظرية الحاجات وتـطور البتاعات ..!!
Author: humida
Date: 05-08-2006, 03:17 PM
Parent: #4
عمنا ابوجهينة ..
صديقي ( الملا ) ..
والله .. ضحكت حد الدهشة ..
ما كنت قايل روحي بقدر اضحك لهذه الدرجة ..
لي عودة ..
|
Post: #6
Title: Re: نـــظرية الحاجات وتـطور البتاعات ..!!
Author: Sobajo
Date: 05-08-2006, 03:43 PM
Parent: #5
Quote: والله .. ضحكت حد الدهشة ..
ما كنت قايل روحي بقدر اضحك لهذه الدرجة ..
|
و انا اندهشت لحد الضحك الهستيري ...
و انا بتخيل انك بتضحك و انت رافع حواجبيك دهشة ...
ده الو اعتبرناانو انت المندهش .. ما الناس الجنبك ,,,
ذكرتني عادل امام ... و هو جايب البتاع بتاع البتاع ... عشان يعملو الجماعة عليه بتوع ..!!!
و دمت يا بتاع البتاعات ...!!
|
Post: #7
Title: Re: نـــظرية الحاجات وتـطور البتاعات ..!!
Author: Sobajo
Date: 05-08-2006, 03:43 PM
Parent: #5
Quote: والله .. ضحكت حد الدهشة ..
ما كنت قايل روحي بقدر اضحك لهذه الدرجة ..
|
و انا اندهشت لحد الضحك الهستيري ...
و انا بتخيل انك بتضحك و انت رافع حواجبيك دهشة ...
ده الو اعتبرناانو انت المندهش .. ما الناس الجنبك ,,,
ذكرتني عادل امام ... و هو جايب البتاع بتاع البتاع ... عشان يعملو الجماعة عليه بتوع ..!!!
و دمت يا بتاع البتاعات ...!!
|
Post: #8
Title: Re: نـــظرية الحاجات وتـطور البتاعات ..!!
Author: Waly Eldin Elfakey
Date: 05-08-2006, 04:01 PM
Parent: #7
لكن ما عجيب يا حميدة
دي نظرية بت كلب بتاعت تطور البتاتيع و ارتقاء الحاجات
وفي ناس بتشتري لاب توب
وفي واحدين بحبو يشربو بربيكان .. ويأكلو جلاكسي
لكن يا حميدة انت ما قاصدني انا عديل كدة...
|
Post: #9
Title: Re: نـــظرية الحاجات وتـطور البتاعات ..!!
Author: humida
Date: 05-09-2006, 01:11 AM
Parent: #8
والله يا والي الدين يا اخوي ..
النصيحة لي الله ..
بصورتك الشايفها دي .. جلاكسي ما بتجي بجنبك ..
وباربيكان الا يعملوها لي في ( دِرب ) ..!!
|
Post: #10
Title: Re: نـــظرية الحاجات وتـطور البتاعات ..!!
Author: almulaomar
Date: 05-09-2006, 01:15 AM
Parent: #8
شوف يا والي الدين الفكي يا أخوي أنا زول يا دوب بديها تبشسي وهو الإسم التجاري للتبش والموازي لجلكسي حقكم ده أما بيربيكان فدي ما أدونا ليها رغم إنو تحت تحت قالوا إنها عبارة عن شراب شعير خالي من الكحول يعني تقدر تقول بيره بلا جمل أو قل بيره ماركة الإبريق أو التبروقه ، بعدين ما تفكها فينا يا أخ وتقول إنت المقصود وإنت بتاع البيربيكان والجلكسي والدريم ويب والتيك أوي والهاي وي والهاي فاي والديفي دي وحاجات أولاد العز الكلها بالإنجليزي دي وقبل ما تكون كده من الواجب توفر حق الجالكسي يومين عشان تعمش العرموص الفي الحيطه الوراك دي والبوماستك أو الديستمبر زي ما بقولو الجماعه على أنا. ونفس اللون أها قلت شنو 
|
|