ودعها ابنها وهو يحمل حقائبه مغادرا هذه الديار التى شهد فيها طفولته وشبابه.. شهدت معه الحياه حلوها ومرها ودع اخوته واخواته مهاجرا من هذا الوطن.. جاءت لحظات وداع الام الحنون ودعته بقلب واجف وكف يرتجف شيعته بذهول النظره المترقرقه دمعا بتمتمة الشفاه المبتهله وغادرها والدموع تبلل الخدود . . وسافر لكن الام الحنون كانت دائما فى ذهول لم تكن تحسب يوما ان قسوة الدنيا وهى فى اواخر عمرها تجعلها تفارق ابنائها . . فاض بها الشوق لكنها لا تريد ان تكون حجر عسره فى طموحات ابنها الا انها لم تعد تتحمل فكتبت له رساله كتبتها بدم الكبد . . دفقت فيها كل الموثرات العاطفيه الحزينه النابعه من امومتها حاولت وضع كل الحلول وكل البدائل لتلك الهجره اللعينه على ان ياتى يعيش بقربها ما بقى لها من عمر فارسلت له قائلة عافيه منك وراضه عنك سو رضايا ومابخيب الرضا والدتو يا جنايــا انت من يادوب صغير من زمان دايما معايا انت ديمه امامى سائر ما بخليك بى قفايا مابتغيب من عينى لحظه ولا حصل سبتك ورايا ولامن الله يشيل امانتو انا ببقى خاصاك بالرعايه لى يرعاك البيرعى ولى بيك يبرد حشايا اصلك انت هديه منو والله بيك اجزل عطايا جيتنى واحد مالو تانى رحمه فى اخر صبايا قبل ماافقد قدرتى وقبل ماتنهار قوايا جيتنى زى بدرا منور وفجاه طليت فى سمايا اسى لما خلاص كبرت داير تسيبنى اعيش برايا داير تفارقنى وتهاجر والحزن يصبح جزايا كيف اهون عليك تحزن امك شان تحقق ليك غايا كان مناك ترحل تغادر قعدك فى جنبك منايا كان مسافر عشان علاجى بلقى فى شوفتك دوايا كان عشان تسقينا مالك نحن بى حنك روايا كان عشان كرعينا راحل نحن بى بعدك حفايا كان مسافر عشان تعرس خير ابوك مالى التكايا وخيرو وافر ابوك يحمدو مراحو مليان بالسعايا بالقروش الجيب مجكن ولسع برضو الجايا جايا برضو منك ما بقصر بحفر اديك المعايا كان ده كلو كمان شويه بتلقى فى دهبى الكفايه اصلى من سويته ناذره يبقى لى ايام قسايا داخره للزمن البعاند ولى سعاتك يا عشايا لاتسيبنى وراك ترحل انت ياك ضلى وضرايا دايره منك تبقى جنبى فى فرحى وفى بلايا لا تسيب امك تسافر يمه محتاجه الحمايا دايره اقضى عميرى جنبك اصلو قارب للنهايه خايفه كان سافرت ترجع تلقى فاضى البيت بلايا

ابكيتني ايها الصديق المبدع
مالك و هذا الركن القصي بالقلب
ليتك توصلها بالصوت وتكمل الباقي من رهف قلبي
رحمة الله عليها

هل هي فوق رضاي

واللخ بالغته معنا ياخ والله الكلام ده كده حار
ونحن ما بنقدر عليهو
والله بكيت بدومعى ياخ والله كده حرام

alhabeb. . الاعزاء سودانيه دوما تترجم عواطفنا الفياضه تجاه الام الى دموع تحمل معها كل ماسى البعد . . مااسماها من عاطفه كلنا امل ان نعود الى الديار ونجدها كما عهدناها تحفنا بطيبة مشاعرها فالجرح عمق والام هى الطبيبه لهذا الجرح . . سودانيه بكل اسف لا املك نص الاغنيه بصوت الفنان ارقى فلك العتبى ولكم حبى

Sado7 ...


salam.








اذا واجهتك مشكلة للاستماع للاغنية
اضغط بزر الماوس على اوكي
ثم على زر التشغيل في الايقونه وهو آخر مثلث على اليسار



Ridhaa

عزيزى رضاء
مااروعك لقد اكملت بلمستك الفنيه بقية
العقد المنضوم امتناى لك من الاعماق يازوق
بس كده البكاء حيكتر بينى وبينك الله يستر بس

السلام عليكم ورحمة الله وبركاته
لك التحية على هذه الاغنية التي هي اصدق ما يدور في خاطر الام التي يغادر منها ابنها والتحية للاخ الصديق الشاعر علاء الدين عبد الرحيم ابو سير وكل مبدعي قرية ارقي الطيبة
والتحية للاخ الفنان عبد الرحيم عبد الحفيظ حاج الشيخ ((أرقي ))الذي تغنى بهذه الرائعة

shokran ya shabab.



Ridhaa

.

كم هى غالية تلك اللحظات التى نعيشها بعيدا
عن ماقى الام الحنون . . وكم هو رخيص ذلك المقابل
الذى نتحصل عليه ثمنا لهذه اللحظات الثمينه . . كثير
منا يعيش فى تابوت الغربه الطاحنه بارداته او مجبرا واحاسيسه
تتنقل ما بين ماضى تحت اجنحة الام و رحمة الوالد . . مااقساها
من لحظات عندما تترك الديار وبها والدتك كالشمس تهب الدفء والضياء
بلا انقطاع وتعود بعد حقبه من الزمن فتجد ان شمس البيت قد
فقدت توهجها فقدت اشعتها الدافئه وتجد البيت اصبح بدون الام
وتحزف هذه الكلمه من قاموس الحديث فى البيت وتصبح فى عداد
الزكريات نسال الله ان يمد فى اعمار امهاتنا حتى ننعم بوهجها الحنون
فكم هو جميل عندما تمسك سماعة التلفون وتحادث والدتك تحس بان
اتلال من الهموم حملتها عنك وعندما تسمع منها دعوه تشعربالطمانينه
تتوسد فى الاعماق ولن تكترث بما يحمله يوم غد معه ولكم حبى

sado7
الله يديك العافيه
لكن ماجننتنا عديل
دي باقي الاغنيه جبتها ليكم من بوست اختنا سماح


عافي منك وراضي عنك سو رضايا
وما بيخيب الرضى والدتو يا جنايا
::::::::::::::::::::
انت من يادوب صغير
من زمان دائما معايا
انت ديما ما مسايرما بخليك بقفايا
ما بتغيب من عينى لحظة
ولا حصل سبتك ورايا
لامن الله يشيل امانتو
انا ببقي خاصاك بالرعاية
************
ليا يرعاك البيرعى
لي بيك يبرد حشايا
اصلك انت هدية منو
والله بيك اجزى العطايا
جيتنى واحد مالو تاني
رحمة في اخر صبايا
قبل ما افقد قدرتى
وقبل ما تنهار قوايا
جتنى زي بدرا منور
وفجاء طليت في سمايا
***********
اسى لما خلاص كبرت
داير تسيبنى اعيش برايا
داير تفارقنى وتهاجر
والحزن يصبح جزايا
كيف يهون لك تحزن امك
شان تحقق ليك غاية
كان مهاجر شان علاجي
بلقى في شوفتك دوايا
كان عشان تسقينا مالك
نحن بحنك روايا
كان عشان كرعينا راحل
نحن ببعدك حفايا
كان مسافر شان تعرس
خير ابوك مالي التكايا
خيرو وافر ابوك يعمم
وراح ملايان بالجكايا
وبالقروش الجيب مجكن
ولسى برضو الجاية جايا
***********
برضى منك ما بقصر
بحفر اديك المعايا
كان دا كلو كمان شوية
بتلقى في دهبي الكفاية
اصلي من سويتو نادرا
يبقى لايام قسايا
داخرا للزمن البعاند
ولسعادتك يا عشايا
انت من شبيت صغير
راسي ما تحتاج وصايا
ما حصل خيبت ظنى
ولا فشل فيك زين غنايا
لا تسيب امك تهاجر
يمى محتاجى لحماية
**********
لا تسيبنى وراك ترحل
انت ياك ضلي وضرايا
انت فوق الحوبه مقنع
انت للمكشوف غطايا
دايرا منك تبقى جنبي
جنبي في فرحي وبلايا
دايرا كان كحيت اتمك
ارفع اقسم لك غطايا
انت ساعة تبقي جنبي
تبقي ضلي وتوب دفايا
وما بخاف ظلم الليالي
انت ياك عكاز عمايا
********
داير اقضى عميري جنبك
اصلو قارب للنهاية
خايفة كان سافرت ترجع
تلقي فاضل بيت بلايا
حين ما تنفع قروشك
وما بتجيب لك ام سوايا
ماني عارفة سبب رحيلك
يا وليدي شنو الحكاية
الا تبقي براكا شايف
في فراق الوالدة غاية
ما بعاتبك وما بلومك
لو رحلت وبلقى في الامثال عزايا
على حجر دائما قليبك
وقلبي كلو عليك جنايا
عافي منك وراضى عنك سو رضايا
وما بيخيب الرضا والدتو يا جنايا
***********&&&&&&&&&&**********

غاليتنا بت الجزيره بتبلدنا الحنين لك شكرى على اطلالتك البهيه ولك تقديرى على اكمال رسالة الوالده الحنون والتى توغلت فينا حتى النخاع فكلنا ذلك الابن الذى يعتبر الغربه رساله مستمره من الام تحمل اقسى المعانى لايمكن استيعابها بسهوله الى بعد شرح مستفيض ولا نملك الا نحمل رسائلنا واشواقنا لحبايبنا للاهل ولك ودى

.

يا الله ،،، يا الله

كنت أعتقد أن قلبي صار حجراً في الغربة ، وكنت أعتقد أيضا أن المآقي جفت من الدمع ،،، ولكن حمدا لله في فقد جنحت بشوقي ليرتطم بسواحل الحنان ،،، فسكبت دمعا غزيرا ،،، شوق وتحنانا لوالدتي

حفظ الله والدتك وأمهات الجميع

عزيزى ولياب
ان الدموع وان تحجرت فى الماقى فحنان الام كفيل
بان يزيب اصلب الاحجار كلنا كنا نعتقد بان الغربه
جائره فى حقنا فقد تنسينا معنى الدموع الا اننا
وجدنا ان امهاتنا دائما فى رفقتنا بمشاعرهن ولك
شكرى وتقديرى

الاخوة الاعزاء
السلام عليكم ورحمة الله وبركاته
حقيقة حنان الام لا يعوض وعذاب الغربة مر شديد ومنا هنا اقدم التحية للغربة التي كانت السبب في هذه الاغنية الجميلة والتي جعلت الشاعر علاء الدين يخرج ما بدواخله
وهنالك قصيدة جميلة من الشاعر علاء الدين وهي تقول اصلي من عفوك رويان

عزيزي صدوح

السكوت و عدم الكلام يعبر عما في داخلي
فكفى

يا مبدع

العزيزه سكر
تعترينا لحظات تحترق المعانى وتتبعثر فيها
الكلمات ونظل فى حالة تجهم رغم مانحمل من
مشاعر فيظل الصمت هو الرسول المبلغ عما فى
الخواطر لك تقديرى على زيارتك وطلتك البهيه

صدوح عزيزي

من منا لا يعشق امه , من منا لم يعرف الحنان على يديها
من منا لا يذوب حبا و حنانا امام ناظريها
من منا لا يطلب رضاها و كل كلمه حلوه تطلقها شفتاها
من منا لا يسعى لارضاء ام الجنه تحت قدميها


دموع

صدوح
وبقية الاعزاء
كلنا نحتاج الهروب من واقع الحال وغبن الزمن اليهاولا شئ بسوي البقاء قربهالا شئ
يديها الصحة بت علي
ويديكم العافية
ولكم الشكر فدائما ما نحتاج لابداع كهذا يا
SAdo7

الاعزاء دموع وعبد الله
لكم كل الود والتقدير ولامهاتنا
كل الاحترام فهى مدرسه ليست لها فصول
تسع الجميع ولا تمل من العطاء
ولكم ودى

قصيدة رائعة بروعة أهلنا الغبش الطيبين الممهورين برائحة ألأرض وأصالتها ، اتمنى إذا كان في واحد من ناس البورد عنده رد الولد لأمه حين سمع هذه القصيدة يتحفنا بها

up

لقبيلة الشايقية ابداع مميز ومتواصل وتعتبر هذه الاغنية واسطة في عقد الاغنية الشايقية الاصيلة الحبيية الي القلب الخفيفة علي الروح.. وعافي عنك ياوليدي

up

عزيزى رضاء كل منى كل الود

....