ظاهرة المنبرييّن الذين يترشحون لتوني تونتي !

04:11 PM July, 02 2018

سودانيز اون لاين
آدم صيام-Hong Kong
مكتبتى
رابط مختصر

ظاهرة المنبرييّن الذين يترشحون لتوني تونتي !
مليون سؤال راجيهم
سأستعين بمقالات أستاذي العفيف




مع كامل المكر والود

ده الافتراض hypothesis

عشان يكون الموضوع علمي بحت،
وعشان أكون واضح :

شخصي ضد أي فكرة للترشح مع هذه الحكومة وفي هذا الوقت.


يجب علي البرهان #

حتى الآن قد بلغوا ثلاثة مرشحين بينهم فارسة.

مش ملاحظين أن أغلب المرشحين لمنافسة البشير جلابة؟
ناس الحامش ما اترشحوا لعلو عافية!

عبدالله علي إبراهيم العنصري المتخفي وراء عبدالخالق.
والد -المكتشف الرتينة المختبئ بالصدفة وراء ابنه-
عادل عبد العاطي بتاع القرد والليبرالية الميادية

بتاع الكمبيوتر الذي جاءكم من سئول على حين غفلة بعد مسحت ذاكرته استقباله للبشير الميمون في سيؤول!
وتراجي التي لا تغباكم ....
( لعله قام هؤلاء المواهيم ديل عبر التواصل بينهم ونسجوا هذه الفكرة على أنهم البدبل الأخير مقارنة بالبشير الذي لا يحسن القراءة أو أن البشير دفعتهم الواحد والأربعون وما في حد - أسحن- من حد!! )
...
...
------------
العضة هي طالما أنه وفق الدستور يحق لكل سوداني /ة توفرت فيه الشروط أن يترشح!!!

أولا بالتبادي : الدستور ده من سنّه و هو الحافظ على بيضته أو اختراقه؟

طيب، قول فزت عديل بعد الخج والتزوير، من أين لك بقوتك البشرية والمهارية وكيف تحمي نفسك من العصابة العنصرية الحاكمة لتنفذ برنامجك المجوبك؟؟؟


الأولاد المذكورون أعلاه ديل كلهم ألعبانيون يمررون رغبة أناهم على أنها من أجل الوطن. بل ويزعمون أنهم قدموا للوطن ويحق لهم التياسة!

يعني هسع دي دايرة ليها فلقصة عقل أو حساب لو فاز واحد من هؤلاء الرجرجة كيف يدير هذه الدولة فعليًا بمفرده الصمد ولا يوجد حزب مرجخيص ولا توجد جماهير تسنده؟

في اللبيرالية الجديدة لنج : أن الحكم يقوم على المؤسساتية والدستور والقانون وأن الحاكم لا يعدو كونه مواطن بلا حصانة ، راكب بسكليته ينزل المعاش وفي رصيده صفر. لذا عندما يستغل الوزير منهم سانحة أن نسي تذكرته ذات الجنينهن واستعمل كرت الحكومة، يقدم استقالته توًا ليفتك من وجع الرأس والمحاسبة.


ما لهؤلاء الجيعانين فكريًا ليرشحوا أنفسهم لحل مشكلة قارة السودان؟
إن كارزمة الفرد الصمد الحاكم المصلح دي انقرضت يا بجم، أي شركة هندية أوفرسيز ستدير هذا الوطن كمبيوترايزينغ يا وهم على أحسن حال من دون الحاجة لكم .


ما هو الدافع النفسي لخروج هذه الفئة بالمناداة من على شبابيك الميديا أنهم أحق بها والوطن يسلخ يوميا؟

فكرة الإنسان يترشح لتونتي تونتي دي زاتها لا تصدر إلا من زول هطلة
As defector اقر ببقاء الظلم حتى هذا التاريخ وشرع يمدد له بعد هذه الفترة بفترة أخرى وفقا للدستور الذي يتم تغييره أكثر من الشراب!
و جلده قرنتية بس، ولا يهمه إن شاء الله البصلاية تبقى بمليار وصف الجازولين يخرج من عبر الحدود
ما في لا إيمان بقدرة الشعب على التغيير في هذه المدة
ولا سلطان الموت و سنن الله

طيب لو البشير مات في تونتي ناينتيين !!! تودوا دقنوسكم ده وين؟

والله يا ادم بعد السلام ، كلنا محتارين فيما يمكن ان يقدمه هؤلاء
بس المكر دا ما اسعفك في حكاية اخراج تراجي من الهامش
تراجي ابوها من بورتسودان وامها من دارفور وبتدافع عن المهمشين
عايز ليك هامش اكتر من دا ولا عشان وجيهة ومنغنغة؟
الهامش دا فكرة ولا مناطق جغرافية؟.

عشان يكون الموضوع علمي بحت،
ـــــــــــــــــــــ
معظم المرشحين جلابة
ـــــــــــــــــــ

عشان يكون علمي والمرشحين جلابة ، دا علم وين يا صيام ؟!

Quote: والله يا ادم بعد السلام ، كلنا محتارين فيما يمكن ان يقدمه هؤلاء بس المكر دا ما اسعفك في حكاية اخراج تراجي من الهامش تراجي ابوها من بورتسودان وامها من دارفور وبتدافع عن المهمشين عايز ليك هامش اكتر من دا ولا عشان وجيهة ومنغنغة؟ الهامش دا فكرة ولا مناطق جغرافية؟.

حبابك حمد أخوي
يا أخي يا الله ويمين حتى لميت في العينات دي فهي ذالتها شوية للتشريح

لو مرقت ليك تراجي العدد بنقص كتير يا أخي !

Quote: عشان يكون علمي والمرشحين جلابة ، دا علم وين يا صيام ؟!

مرحب عبداللطيف
بالمناسبة كونوا الناس كتبوا ليهم شوية كتابة في الموضوع ده لا يعني أنه انتهى
مازال رلفنت ويصلح للهيبوثث !
دم بخير
لكن بالله ما عندك ملاحظة أخرى في الحزمة دي والتوقيت ده !

Quote: ظاهرة المنبرييّن الذين يترشحون لتوني تون�

وهل مشكلة السودان اشخاص ومنصب رئيس الجمهورية البليد من الاساس ام مشكلة السودان النظام الذى جاء بالحثالة السياسية الي سدة الحكم بالانقلابات المدعومة من المستعمر السري و نظام الون مان شو (المصري الهوي) او دولة الراعي الرعية والريع والرعاع النموذج العربي المتخلف...
كلامك صاح منتهى البلادة والنرجسية ان يتوهم شخص انه وحده قادر ان يحل مشكلة بلد كامل ووعية لا يتجاوز اللفة وصابرين عبر العصور
يجب ان ترجع اول حاجة من الليلة الدولة الديمقراطية الفدرالية الاشتراكية الديمقراطية ام ستة اقاليم وتفعل المحكمة الدستورية العليا بقضاة محترمين مش حثالة اجتماعية ويفعل الدستور والمادة 57 نهت ولاية البشير من 2015 وهو نفسه قال الكلام ده لمن استضافتو خديجة بن قنة في فضائية الجزيرة في 2012 ..الفيديو حايم في الواتس ما عرفت اجيبو هنا كيف
يعني عايزين برنامج وليس شخص في المرحلة الحالية من الان
الفكر السياسي المتكامل عبر العصور قدمه
الاستاذ محمود محمد طه في كتاب اسس دستور السودان 1955
الدكتور جون قرنق اتفاقية نيفاشا ودستور 2005
وفكنا من باقر العفيف خير الكلم ما قال ودل ما تهرق البندويش ساكت
غير كده خواء مزخرف يدور فيه المثقافتية..وانصاف المتعلمين ومخلفات الكيزان والشيوعيين في المركز حتى اليوم

تحياتي آدم
وضيوفه
اهو الواحد لقا فرصة يسأل عن مصطلح ما قادر افهم المقصود بيهو شنو
المهمش
الجلابي
يعني شنو بلغة بسيطة لي زول زي لا يفقه كثيرا في المصطلحات السياسية المعقدة

ليه ترد بالقطاعي يا مازوم
هل مشكلتنا في السودان رائيس جمهورية ؟؟؟

سلام عليكم
اعتقد انواى واحد يترشح من خارج منظومه الحزب الحاكم مفروض يراجع طبيب نفسى .
.
ياخ قول الناس دى اترشحت وفازت
تعمل شنو مع (الدوله العميقه)بغض النظر عن دوافع ارتباطهم بالنظام ارتباط مصلحه ام ارتباط فكرى ام ....
اى ترشيح من خارج صفوف الحزب الحاكم معناها تجميل لوجه النظام خارجيا.ومزيد من المعاناه للشعب.

تراجي ح يرفض طلبها للترشيح، لأن مستواها في الكتابة لا يتعدي الكُتّاب

Quote: وهل مشكلة السودان اشخاص ومنصب رئيس الجمهورية البليد من الاساس ام مشكلة السودان النظام الذى جاء بالحثالة السياسية الي سدة الحكم بالانقلابات المدعومة من المستعمر السري و نظام الون مان شو (المصري الهوي) او دولة الراعي الرعية والريع والرعاع النموذج العربي المتخلف... كلامك صاح منتهى البلادة والنرجسية ان يتوهم شخص انه وحده قادر ان يحل مشكلة بلد كامل ووعية لا يتجاوز اللفة وصابرين عبر العصور

كلمتك من زمان نحن أولاد كار واحد تقول لي الراتب وما أدريك !

انطلق بحملتك الراكزة التثقيفية دون إكليشيهات الإمام قال نسلي قطن ولا دخلاك نور

Quote: تحياتي آدم وضيوفه اهو الواحد لقا فرصة يسأل عن مصطلح ما قادر افهم المقصود بيهو شنو المهمش الجلابي يعني شنو بلغة بسيطة لي زول زي لا يفقه كثيرا في المصطلحات السياسية المعقدة

ود أبو سن حبابك أبوي
دحين ما عصرت علي شوية بسيعالك ده!

الموضوع يتناول الفكرة وأنت ترجعني للمفردة والمصطلح!
على كل ما في مشكلة، لمزيد من التراجع ، فضلاً راجع السيف والنار تجد هذه المفردة مصنقرة.

Quote: تراجي ح يرفض طلبها للترشيح، لأن مستواها في الكتابة لا يتعدي الكُتّاب

قبل عشرات السنين قام البرلمان التايلندي طلّع قرار أي عضو برماني يتوجب عليه حصوله على البكالوريوس.

لقوا الأميين كتار فتحوا ليهم معهد لمنح الدبلوم، تعبوا تعب أغلبهم تحول لتجار جملة وقطاعي وما فيا بعد ما نقلب عليها العسكر على الرئيس المليونير الفاسد تكسين شينيواترا

الناس الإرينغتنج ديل أوضعوا ليهم امتحان إملاء كارب قبل ولوجهم (للتحرش السياسيي) 1

Quote: سلام عليكم اعتقد انواى واحد يترشح من خارج منظومه الحزب الحاكم مفروض يراجع طبيب نفسى . . ياخ قول الناس دى اترشحت وفازت تعمل شنو مع (الدوله العميقه)بغض النظر عن دوافع ارتباطهم بالنظام ارتباط مصلحه ام ارتباط فكرى ام .... اى ترشيح من خارج صفوف الحزب الحاكم معناها تجميل لوجه النظام خارجيا.ومزيد من المعاناه للشعب.

شكرا أخي عاصم للمرور والمفاكرة
المترشحين ديل الراكوبة منحتهم صفة (المرشح الرئاسي ) السابق!!

تقول طبيب نفسي! أها لعلمك سيقر الدستور المجوبك من قبلهم أن أي مرشح سابق يحق له بدلات ومعاش حتى مماته

الناس ديل في زعمي عندما يقومون بعمل خير إنما يقومون به من أجل (رصيدهم الرئاسي)

تراجي دي خرجت على الملآ تشكر في الدكتاتور وتقدم له النصائح وتتصور مع الترابي والبشير المجرمين،
زول واحد من أصحابها الراشحين ديل أدان موقفها مافي!

عشان لعبة السلم والثعبان لديهم واحدة

داري لي وأنا اسكت عن هفواتك ولو كانت للوطن قاتلة

مساء الخير ادم وضيوفه
اجراء اي انتخابات دون مستحقاتها وشروطها بكون نوع من العبث وتوفير كومبارس مجاني للبشير وعصبته
ا

ترجع الدولة الديمقراطية الفدرالية الاشتراكية المكونة من ستة اقاليم والمضبوطة بمحكمة دستورية العليا قوية ذى كل العالم
و يلغى الرقم الوطني المشبوه و
يرجع قانون الجنسية السوداني الاصلي ويلغى الرقم الوطني لتحديد من هم السودانيين في الداخل والخارج وترجع الاحزاب الوطنية السودانية التي اسهمت في الاستقلال وجماهيرا تسد عين الشمس من الاستقلال لحدي الليلة
ونطرش القرف لمصري الشيوعيين والناصريين والاخوان المسلمين في اقرب خور وده كلو عبر مرجعية واحدة بس رؤية الحركة الشعبية الاصل بتاعة الاسطورة جون قرنق اتفاقبة نيفاشا ودستور 2005
مع التعديل الايجابي الغاء والولايات واعادة للاقاليم وتنيظفه من القوانين المعيبة وبعد داك الشعب هو البحسم من يحكم السودان عبر انتخابات ثلاثية
افليمية ثم مركزية ثم راسية بشرح فيها هنا لي قرود بافلوف من 2005
نحن ما اولاد كار واحد ابدا ....انت مشوش وفاقد البوصلة تهضرب هنا مع كلاب الحر الشيوعيين ساكت
ان عفن مصر الشيوعيين والناصريين والاخوان المسلمين ما بنفعو معاي والاعلام الحر كافي لاذالتهم من السودان وهم لا يشكلون اصلا رقم كبير اما شريحتي رباعية الدفع
حزب الامة نسخة السيد عبدالرحمن الاصلية وثيقة استقلال السودان
حزب الشعب الديمقراطي نسخة السيد علي الاصلية الجمهورية السودانية فقط
الحزب الجمهوري نسخة الاستاذ محمود الاصلية = اسس دستور السودان 1955
الحركة الشعبية برنامج الامل مرجعية نيفاشا ودستور 2005 ..لا جبهة ثورية ولا بوتيكات قطاع الجديدة
الموت للدولة المركزية وحكم الحثالة في السودان بالاتنقلابات والمشاريع المشبوهة والبوتيكات الغبية المالية الساحة الان والاسافير دون رؤية واضحة

Quote: مساء الخير ادم وضيوفه اجراء اي انتخابات دون مستحقاتها وشروطها بكون نوع من العبث وتوفير كومبارس مجاني للبشير وعصبته

أسعد الله أوقاتكم بكل خير حاتم


عبث وبس هم شافوا تجارب الكومبارس كلها على مدى تلاتة عقود ومصرين يترشحوا!
لو قلبت فكرتهم حسب إصرارهم! تفتكر هؤلاء الناس لديهم قدرات هاري بوتر لكن نحن طاشين شبكة ساكت!
الله للسودان المكلوم بالقرون من هؤلاء القوم وتجاربهم غير المسؤولة

Quote: يرجع قانون الجنسية السوداني الاصلي

قانون استخراج الجنسية السوداني (الأصلي!) يشترط أن مقدم الطلب متواجد في السودان - مش الجزيرة العربية- منذ دخول العرب السودان!

ككيف تحلها دي يا أصلي

Quote: قانون استخراج الجنسية السوداني (الأصلي!) يشترط أن مقدم الطلب متواجد في السودان - مش الجزيرة العربية- منذ دخول العرب السودان! ككيف تحلها دي يا أصلي

القانون ده عملو الانجليز 1957 ما عنده علاقة بالجزيرة العربية
السوداني بالميلادجنسية خضراء كلنا طلعناها بي معرف زمن امتحان الشهادة السودانية
السوداني الوافد ان شاء الله من الاسكيمو جنسية بنية فلاتي يمني مصري اي ملة
ده القانون الاصلي في السودان وليس السوداني الاصلي
الرقم الوطني الهسة ده ما دستوري اطلاقا واجراته مجحفة لملاييين السودانيين المشردين في النزوح وخارج السودان ويجنس الاجانب ويتاجر فيه اخو البشير

إذا جاءكم حاملو الرايات فُرادى فلا تولوهم !

ولسان حالهم يلهج بـ :

- نطبق الشريعة !!! براكم شفتوا ياتو شريعة.

- نطبق الإسلام الصحيح! ناس الإسلام ديل كلهم يؤمنون ذريعةً بأن (الحاكم) هو الله ثم يقصّوا أطرافكم بلا رأفة من خلاف حسب هواهم!! مع أنه في كل الدنيا منذ بدء الخليقة رأى الناس رأي العين أن (الحاكم) للدول هم الناس.


- نطبق العلمانية! الصحيح والممكن هو نعمل على تطبيق مبدأ المساواة والعدالة وحرية المعتقد وكفل كل الحريات الفردية والجماعية.

- نطبق الليبرالية! الصحيح والممكن هو : نعمل لسيادة القانون وقيام دولة المؤسسات لا الأفراد وفصل السلطات الثلاث وحماية السوق وضبطه وليس لبررته ليجرفه السوق العالمي.


- نمنح كل مواطن بيت وسيارة وعلاج وتعليم مجاني والدخل القومي للفرد سنرفعه إلى 15000 دولار في السنة ! براكم شوفتوا الكضب الاشتراكي ده عند الإنقاذيين، ليجعل الإنسان السوداني الكسلان أصلاً يتكئ على مواعيد عرقوبية.

وعليه #
أي زول من ديل أو أشباههم جاءكم أباطه والنجم وقال بغير ليكم السودان من الإنتو فوقو ده للأحسن بواسطة ريموت أو أنه سيأتي بمفرده ولكن يستعين بوزراء ملائكة من الدنمارك لحكم السودان !
أنتم مخيرون وعلى كيفيكم، على اليمين كان ما شفتوه بكرة أعلن في المذياع بعد فرز الخج بأنه انهزم بشرف ويهنئ النخاس عمر البشير الذي باعكم، ما تدوني يدكم

حبيبنا ادم
لك الود و التقدير
كلامك عن 2020 أو مجرد التفكير فيه
إقرار بشرعية الإنقاذ عندك
و مع ملاحظة ردودك.. زي الاستكنت.
البعض ممكن يكفرك.. ههههههه ناس النضال المتوهج
ربنا يزيح عن الوطن الفسدة و المفسدين.. و يولي خيارنا
اللهم امين ف هذه الأيام المباركات.. و تونتي تونتي يكون السودان دار سخاء و رخاء و عدل
و اللهم صلي علي كامل النوز

Quote: اللهم امين ف هذه الأيام المباركات.. و تونتي تونتي يكون السودان دار سخاء و رخاء و عدل و اللهم صلي علي كامل النوز

تسلم الحبيب محمد بدر الدين
كل عام أنتم والأسرة الكريمة بألف خير

اللهم آمين اللهم آمين

الاخ ادم صيام - كل سنه وانت طيب
موضوع ترشيح البشير شايفو من جانب تانى .
هل المشكله دخول القصر الجمهورى والجلوس مكان البشير ؟
طيب .طالما فى ناس ارتضت انها لعبانتخابات ونفترض حسن النيه ورغبتها فى احداث تغيير .
اتغير الزول القاعد فى القصر الجمهورى طيب رئيس الوزراء والبرلمان اللى من خلال تركبتو بيقدم رئيس الوزراء.
اعتقد انو حتى لو نجح واحد وجا القصر الجمهورى ح يكون قاعد زيو زوى السنشارين الديكور او وزراء الدوله فى التشكيله الحكوميه.
الدوله العميقه - كتله نيابيه ذات وزن فى البرلمان تؤثر فى تقديم رئيس الوزراء .
خلاف كدا الترشيح ضد البشير مجرد مسرحيه وديكور وصرف لانتباه المواطنين عن ماهو اهمفى معركه التغيير.

Quote: موضوع ترشيح البشير شايفو من جانب تانى . هل المشكله دخول القصر الجمهورى والجلوس مكان البشير ؟

اخي عاصم تحية زاكية


دي بالضبط مربوطتهم

الشعب السوداني ده كلو جهلول بالميلاد بفتكر لمن تحكم ستبقى إله ودي نهاية المطاف، الإذاعة باسمك والميديا باسمك وتعين أهلك وترفد بتاعين المشاكل!
وتركب طايرة وتتعالج في بلاد برة
بل وتحي وتميت!!!
وهم حسب عقدة المستعمر بفتكروا أن الحاكم التركي أو الإنجليزي ده حاصر الحكم لذاته وفي نفسه، بينما ، لم يسجل السودان زيادة في الاقتصاد رقميا إلا في عصرهما!

عشان كده لو جاءكم حامل لافتة غربية أو عربية - كوبي اند بيست- وقال ليكم بترشح لأحكمكم بس لا على طريقة ميادة سوار الدهب أو إعادة شرعية الصادق فترقبوه!

Quote: مش ملاحظين أن أغلب المرشحين لمنافسة البشير جلابة؟ ناس الحامش ما اترشحوا لعلو عافية! عبدالله علي إبراهيم العنصري المتخفي وراء عبدالخالق. والد -المكتشف الرتينة المختبئ بالصدفة وراء ابنه- عادل عبد العاطي بتاع القرد والليبرالية الميادية بتاع الكمبيوتر الذي جاءكم من سئول على حين غفلة بعد مسحت ذاكرته استقباله للبشير الميمون في سيؤول! وتراجي التي لا تغباكم .... ( لعله قام هؤلاء المواهيم ديل عبر التواصل بينهم ونسجوا هذه الفكرة على أنهم البدبل الأخير مقارنة بالبشير الذي لا يحسن القراءة أو أن البشير دفعتهم الواحد والأربعون وما في حد - أسحن- من حد!! ) ... ... ------------ العضة هي طالما أنه وفق الدستور يحق لكل سوداني /ة توفرت فيه الشروط أن يترشح!!! أولا بالتبادي : الدستور ده من سنّه و هو الحافظ على بيضته أو اختراقه؟ طيب، قول فزت عديل بعد الخج والتزوير، من أين لك بقوتك البشرية والمهارية وكيف تحمي نفسك من العصابة العنصرية الحاكمة لتنفذ برنامجك المجوبك؟؟؟ الأولاد المذكورون أعلاه ديل كلهم ألعبانيون يمررون رغبة أناهم على أنها من أجل الوطن. بل ويزعمون أنهم قدموا للوطن ويحق لهم التياسة! يعني هسع دي دايرة ليها فلقصة عقل أو حساب لو فاز واحد من هؤلاء الرجرجة كيف يدير هذه الدولة فعليًا بمفرده الصمد ولا يوجد حزب مرجخيص ولا توجد جماهير تسنده؟ في اللبيرالية الجديدة لنج : أن الحكم يقوم على المؤسساتية والدستور والقانون وأن الحاكم لا يعدو كونه مواطن بلا حصانة ، راكب بسكليته ينزل المعاش وفي رصيده صفر. لذا عندما يستغل الوزير منهم سانحة أن نسي تذكرته ذات الجنينهن واستعمل كرت الحكومة، يقدم استقالته توًا ليفتك من وجع الرأس والمحاسبة. ما لهؤلاء الجيعانين فكريًا ليرشحوا أنفسهم لحل مشكلة قارة السودان؟ إن كارزمة الفرد الصمد الحاكم المصلح دي انقرضت يا بجم، أي شركة هندية أوفرسيز ستدير هذا الوطن كمبيوترايزينغ يا وهم على أحسن حال من دون الحاجة لكم . ما هو الدافع النفسي لخروج هذه الفئة بالمناداة من على شبابيك الميديا أنهم أحق بها والوطن يسلخ يوميا؟

كتابة قاسية بحق ولكن على ضوء تلاعب هؤلاء بالوطن لعقد أخر لا ضير عليها البتة!
شايفها ولدت ليها (كوز!) على استحياء!!!