الشاعر عمر ابراهيم شاعر غنائي فذ له اعمال كثيرة في الوصف والغزل كم صدح له الفنان القامه المبدع عبد الواحد محمد بشير ودمديني المشهور اسفيرياً بـــ عبد الواحد الباوقه في الفترة الأخيرة الاحداث الجسام التي انتاشت الوطن ولم تسلم ولاية النيل والشماليه وانسانها صوب قريحته الشعريه لإنصاف هذه البقعه وانسانها موجها ومصوباً ومذكرة بعظمة انسانها وارث اهله فخرجت له اعمال كثيره منها عمل باسم نهر النيل (يقول في مطلعها : داير اغنيلم ناسي نهر النيل الشكر هيلن عايز اجر النم ) غناها الفنان الحماسي محمد الحسن قيقم سنرفد بها هذا البوست مع عمل آخر اكثر شمولاً لإنسان نهر النيل ومكوناته غناها الفنان القامه عبد الواحد ودمديني : : هذا العمل يخاطب فيه الشاعر إنسان الولايه وإنسان كل السودان بالبقاء في الوطن من أجل إعمارهـ والحفاظ عليه وتعميره بدل الهجره والبهدله التي يجنيها من الغربه والاغتراب هذا العمل غناه الفنان خرساني بخيت وتم تسجيله في التلفزيون القومي إبان موجة الهجرة وقد نال اعجاب الفنان محمد جبارهـ وهي فرصه لإظهار هذا العمل بحنجرة فنان قامه لا تخطئه العين وسانحه للتعريف عن هذاالشاعر المرهف ...
أقيف يازووووول وييييين ماشي وقول شقيش ووييين ماشي نترككم مع الكلمات
Quote: اقيف يازول وين ماشى وقول شقيش وين ماشى
رايح وين مخلى اهلك رايح وين مخل بلدك هو الرباك من جهلك اخير يازول تكون قبلك ديل بيسندو لى ضهرك
اقيف يازول وين ماشى عندك نيل حداه نخيل وناس فى الضيق يشدو الحيل ساعة الحوبه هم بلحيل يعشوا الضيف تلوت الليل ديل مالكين عواتى الخيل وللعشمان يطبقوا الشيل
اقيف يازول وين ماشى ابوك تربال وعيشتو حلال وكايس لى سترة الحال مكفكف ديمه ضرعاتو يقتح فى الابق شغال يقوم فجرواى بالنجمه يسابق حتى فى النسمه ودايما راضى بالقسمه شال طوريتو والاربل على الرحمن هو متوكل يرمى الحب ويرجى الرب ولافى يوم عرف كضب عامره البينه بين الله يمين طعامو ماقل حتى ان شا الله بى غله
على المافيش يعزم الضيف غنيه نفسو ديمه عفيف
اقيف يازول وين ماشى يمين الغربه مابترحم اسال قبلك الجرب باما شال جبال الهم ضيع عمرو واتعشم قايل المال هناك بالخم ولافى حساب ولا بالكم
اقيف يازول وين ماشى شن الناقصو شان ترحل بلد حدادى مدادى فيه الغابه والوادى موسم ضهرو من الكى ماسمعناه قال احى حد ماناسو يختلفوا يقول حرم وبى حلفو اقعدو وبيضو النيه وليكم ست بغفر السيه زمان جابونى زنديه وتشهد كررى كان ليا
ديل غبش يازول للماعارفين مابيخونوا الجار حاشا مو طامعين فوق حدود السيف ديل يجوك حافين يدرجوا العاطله وتايه للمسكين
هيلن العرضه والدرق والسيف يضبحوا الشايل يوم يجيهم ضيف السبح لالوب حاشا ماتزيف اى زول دغرى فى المدن والريف
داير اغنيلن يستحقوا القول لى لسانى بسل والكلام بيطول سيرتم سمحه لافشر لاهول ناسى نهر النيل كعبه لى كل زول
ونسبة لمحدودية المشاركات نلتقي غداً لنرتع في ظلال هذا الشاعر الوارف ومراميه وان شاء الله نتحصل علي العمل الآخر الذي صدع به فنان الباوقه عبد الواحد ودمديني اهلي ولاية النيل وهو عمل اكثر شمولاً لمكونات الولاية : : : مع التحيات لله الزاكيات
Post: #3 Title: Re: أقيف يا زول وين ماشي ... كلمات الشاعر عمر إب Author: محمد حمزة الحسين Date: 04-15-2018, 03:43 PM Parent: #2
فوق ولاية النيل داير اجر نمى لو يوفى القول حقهم عنى ءءءءءءءءءءءء لى ولاد المك منى الف سلام انتوا يوم حرت كنتوا فى القدام *يشهد التاريخ* مافى زول اتلام الترك فروا والبقيه حطام ءءءءءءءءءءءءء دامر المجذوب نار تقاقيبا من بعيد لاحت والمسك طيبه *تهدى للضالين* يعجبوك شيبا غير عبادة الحى مافى تب صيبه ءءءءءءءءءءءءء ميرفاب بربر للرجال مقياس ديل علم بينين للحضاره اساس *عندنا الحلفا* وتانى تور كدباس والغبش بى فوق للعلم نبراس ءءءءءءءءءءءءء فى ديار انقير مما قمت صبى ناس تكرم الضيف فاتوا حاتم طى *حدث العالم* واحكى ليهم بى قولهم فتوار ياها دار والدى ءءءءءءءءءءءءء الرباطاب ناس مابيسوا اللوم فى المحافل هم ديل دلالة القوم *من زمامه ابدأ* حله حله وحوم امشى لى مقرات مافى زول مزموم ءءءءءءءءءءءءءءء عن ولاد منصور بنهى ترحالى استريح وانجم وانا سعيد حالى *فوق ضفاف النيل* والنسمه هابالى عشان ابل الشوق الشغل بالى
كلمات عمر ابراهيم 2017 لحن وغناء المبدع عبد الواحد : : : : ولي عودة مع التحيات لله الزاكيات
Post: #4 Title: Re: أقيف يا زول وين ماشي ... كلمات الشاعر عمر إب Author: محمد حمزة الحسين Date: 04-16-2018, 10:16 AM Parent: #3
وشاعرنا نجم الدين الشيخ يقول في قصيدة يصف صديق كاجر ابوهو واسرتو وهاجر وعندما رجع وجد امه ماتت وابوه كذلك ورجعت حليمه لي قديمه يقول فيها :-
شايل أمالا في عينيه يحلم سافر إتغرب ... وضيع عمرو في الغربه مسكين املو يتسرب ... فارق تربتو ووطنه قايل الغربه فيها مجال يحقق فيها غايتو كايس فيها سترة حال ... مشاكل الدنيا ما بتنحل الا يكون معاك المال ووضع الدنيا تتغير مدام طبع الزمن بطال...
ويقول :- مرات بس يلوم قدروا يقول انا حظي ما جيد ومرات يرضي بي قدرو حكم الواحد السيد ... شن يعمل مع الايام ما دام في قيدا متقيد لا موت امو هـــزاااااااهو ولا العيد جابو متعيد ...
الي ان يقول محفزا :- شن وداك تتغرب ما سودانا اضحي جميل ممكن فيهو تتعيش بلد مساحتو مليون ميل ... بلد خيراتو منسابا فيهو بترول وفيهو نخيل ومأوي للنزح والجاع وبي خيراتو ماهو بخيل ... ارجع تعال وطنك اصلاً الرجوع مو عيب وازرع وابداء بي نخلك بين الناس ابقي فريد ... *** *** ***
ورد الله غربت كل متغرب
: : : : مع التحيات لله الزاكيات التعديل لوضع الريل بلي لكن فشلت
Post: #5 Title: Re: أقيف يا زول وين ماشي ... كلمات الشاعر عمر إب Author: محمد حمزة الحسين Date: 04-22-2018, 04:14 PM Parent: #4
Post: #6 Title: Re: أقيف يا زول وين ماشي ... كلمات الشاعر عمر إب Author: محمد حمزة الحسين Date: 05-16-2018, 02:03 PM Parent: #5
