حيلة لإخفاء الكاركتير

10:35 AM October, 17 2017

سودانيز اون لاين
عليش الريدة-
مكتبتى
رابط مختصر

أحيانا بكون بتصفح في البورد والشافع بجي جاري توش ،والشفع طبعا عندهم حب استطلاع عجيب،
بحاول سريع أحرك الصفحة ،لكن مرة مرة كدا ،الشافع قعد يلقط الرسمة...
المسألة دي مشكلا لي رعب حقيقي ..
لو في طريقة نمسح بيها الكركتير او نغطيهو ورونا ليها وينوبكم ثواب..

يا عليش .. يا لئيم هه
المثل بقول قوقل يونسّك ولا بوردابي يحشّش عليك
عايز اي حاجة اسأل قوقل لا بغلّت عليك لا بوسّخ ايديك
https://kb.iu.edu/d/acpv

دا ما حل ولا حيلة يا ود البشرى

الحل والحيلة آدبلوك

كيفك يا عليش يا ممل؟

آد بلوك بمنع الصور برضه؟ انا افتكرته يمنع البوب أبس و الاعلانات فقط

شفت يابشرى القلوب الطيبة دي نعمة كبيرة كيف،هسّ فرانكو دا رغم سخافتي المتكررة معاهو،قعد يسامحني..
عارف قلبي أبيض..ومابحمل أسية..
مرحب فرانكو يامستنير

آد بلوك بمنع أي Element أنت تحده في الفلتر

والفتلر بديك خيار هل عايز تعمل بلوك لصورة فقط أم لمصدرها (يعني أي صورة من نفس المصدر)

أعتذر للأخ عمر عمّا كتبته!
وما أظنه يحتاج مني لاعتذااار،
لأن الحكاية وما فيها زعلة من أخ على أخيه بسبب أراه وجيه ...،
على ما أعتقد هذاا هو شعوري!
أما النقد الموضوعي لكاريكاتيرات الأخ عمر دفع الله،
فعلى ما أظن عبّرت عنه في بوستات سابقة.

كلام اخفاء الصور دة بخفي جميع الصور موش الكراكتير براهو
والكرايكاتير ما اعلان عشان يمنعو ليك مانع الاعلانات

مافي أي حل ولا في أي حيلة
ويا عمر دفع الله كتر منه :)

مرحب بأستاذنا فقيري،إنت عارف ياصلاح،عمر دا مابعرفو،لكن عندي فراسة كدا إنو زول مهذب ومتدين كمان...لكن دا الفن ،قاتل الله الفن...


*متمني مرة واحدة احمد عمر دا يقول كلام وأقوليهو في سري :لله درك...ياخي الزول دا بس شغال عزيل في الحاجات القعد تجيب كثافتي...
هوي ياوليد،بنقوم عليك هسّ تقعد تحرم...

ما مكن أبدا يا عليش
لأنو الكاركتير ما تبع صور قوقل وغيرو من مواقع
الكاركتير منزلو بكري في السيرفر حقو زيو وزي أي بوست بصفة أدمن
هل ممكن تغطي أي واحد من بوستات الصفحة الأولى وتقرأ الباقيات
طبعا لا

ياخ أنا مرة شاشة كمبيوتري دي انقلبت إنداية عديل الوصوفو لي كلو ما نفع لحدي ما فرمت الكمبيوتر

عجبك كدا يا عليش ؟
جبتا لينا الشتيمة في صمة خشمنا واخونا صلاح فقير
ما صدق لقى فرصتو فيني ونزل شتائم بمزاج ...
معليش يا عليش
استحملنا كدا كم شهر وبعد ما يكتمل موقع التشكيليين
تاني كان لقيتني حايم بي هنا بالله شتمني زي شتيمة صلاح دا وبالزيادة كما ........ سلام

والله غلبنا النسويهو ..
عمر دفع الله رفض يخلي ادوات تعبيره ..
هو مفتكر انه طريقة التعبير الصادمة دي فيها ميزة !..
لكن اثرها لدى قطاع كبير عكس المأمول ..
صحي في ناس مستحسننها ..
لكن ظني دي مجاملة ليس اكثر ,,
او دعم لعمر ضد الهجوم البيواجهه ..
لمن ياخذ منحى زي الكاركتير الفوق ده في التعبير ..

Quote: عمر دا مابعرفو، لكن عندي فراسة كدا إنو زول مهذب ومتدين كمان... لكن دا الفن ،قاتل الله الفن..

انا مؤيد للكلام ده ..

مش كده وبس غالبا الصورة المعكوسة أو الفي الأذهان ..
تجدها لا تعبر عن الأصل بنسبة كبيرة جدا ..

تقديري لعمر دفع الله ..
ولا نتمنى مفارقته للمنبر كما قال ..
بس يحاول يخفف الجرعة دي شوية ..
أو يبحث عن ادوات أنجع واكثر قبولا ..

*مرحب ياحمد،اصلا أنا من جا احمد عمر وقال كلامو داك،قنعت من الحل والحيلة،الزول دا صاح في الحاجات التانية غياظ لكن مجود شغلو تمام..

*ياحبيبنا عمر،هسّ فقير دا شتمك عليك الله؟ والله كنت بتمنى لو كان زعلان مني بدلك عشان يأنبني بالطريقة الراقية دي..دي درر ياعزيزي درر..
لانتمنى فراقكم،والموقع القلتو دا مااظن يمنعك من إرسال الكاركتيرات،لكن قد يأثر على مشاركتك بالمداخلات،...ابقى بليز..

*هلا ودالقوز،المشكلة ياصاحب،الفنان ماممكن تقوليهو خفف وللا انقص،دا بيعتبر تدخل في اختساساتو..بعدين عمر عنيد قعد يشتغل عكس عكس..
أنا كنت داير حاجة امسحبيها الكاركتير لكن شكلها مافي..

*أخوانا المهندسين محمد الشيخ وأبوريش ( بوست الصاروخ) ،لو لقيت عندي باقي رصيد من الكوتة برد عليكم هناك..ولو مارديت اعرفو الرصيد خلص،وصباحاتو بيض إن شاء الله...

شكري للجميع

ممكن تمنع اي صورة من الظهور حتى الكاركتير بتاع عمر (انا اؤيد عمر دفع ومعجب بكل اعماله)
نزل Adblock plus
اعمل كلك علي الايقونا بظهر ليك open blockable items
اختار الصورة
كلك باليمين
block this item
الصورة عبارة عن رابط وسط لستة طويلة من الروابط
الصور كلها نهايتها png
لمن تمر علي الصور بدون ماتضغط اي شي الصورة حتظهر ليك
تقوم تبلكها

سلام

الأخ عمر دفع الله،
تحية واحتراماً،
نعم، وقد قرأت كلماتك المعاتبة،
استعدتُ شعوري القديم والأصيل تجاهك،
ولعلك تعرفه جيداً فقد عبرت أكثر من مرة
عن تقديري لموهبتك، وهذا شيء يفرض نفسه!
لكن العجب هو في كونك لا ترى أن هذه الصور
الكاريكاتورية الصادمة، كذلك تفرض نفسها
بوصفها شيئاً جارحاً لمشاعر المطلعين عليها
رغما ًعنهم،
ما حدث أنها جرحتني جداً،
فوجدتني أكتب تلك الكلمات التي لم يصدر عني
مثلها في سودانيزأونلاين من قبل،
وأنا مستغرب في إنك ما قادر تلمس مقدار القبح
في هذه الصور!
بل ما هو الهدف من ورائها؟
وهذا كما تعلم شعور الكثيرين.
على أيّ حال حقيقة لا أكن لك إلا الاحترام،
ولكن ماذا تنتظر ممّن وخذته بدبوسٍ حاد أن يفعل!؟

تحياتي للأخ عليش صاحب البوست ولضيوفه الكرام
.....
والله لا قيمة لاي موهبة أو مهارة مع قلة الأدب وفقدان الإحساس!
.....
كلمات مؤلمة بحق الشخص المهذب المؤدب الخلوق الأخ عمر دفع الله
....
اقدر لك اعتذارك فيما بعد أخي فقيري ولكن ارجو سحبها

مرحب أيمن،مداخلتك قيمة جدا وشرحت الموضوع تمام فلك جزيل الشكر..بالنسبة لتأييدك لعمر،كلنا معاك لكن عندنا تحفظات بسيطة..وعارفين كمان مامن حقنا إظهار هذه التحفظات..
عمر رقم في المنبر،دي حقيقة ثابتة..كفاية إنو قعد يتور نفس ودالباوقة...كنت دار أضيف و(فرانكو)..لكن تذكرت إنو الأيام دي علاقتنا كويسة...

*هلا أستاذنا الشامي،أرجو تذكر ان الأخ صلاح لم يفتح بوست لإظهار رأيه عن رسومات عمر،لقى بوست قدامو وقال رأيو...يعني ياأستاذنا مافي ترصد ههه..
كلامو عن قلة الأدب،قد يكون عام،يعني حاجة كدا زي القاعدة وليس بالضرورة معني بها عمر تحديدا...
بعدين ،الشئ العارفو أنا عن ناس كلية الفنون الجميلة ،إنو قلة الأدب دي بتعتبر عندهم مدح،وفي واحدين منهم لو ماسمعوها بعتبروا نفسهم ما أدوا رسالتهم في الحياة...
ديل ناس مقاييسم غير..
شكرا للجميع

وقوووول استخدمت الآد بلوك وحجبت الصورة الفوق الما png دي وجاء الشافع داخل وقووووم يا بكري نزل كاريكاتير جديد ؟
أها تحجب المصدر كلو زي ما قال ليك فرانكلي ؟
معناها اي صورة عاملين ليها pin في pinterest ما حتظهر ليك .. الكلام دة بشمل صورة حمد عبد الغفار الفوق دي :)
وموش في الاونلاين براهو بل في النت كلو
يعني تمشي أطرش في زفة
أها بتدور تعرف في كم صورة حتتحجب ليك من الاونلاين .. بحسب فتوى سيدي قوقل زيادة من 25 ألف



وقووووول شلت الآلاف دي كلها قلت ما دايرها وحمد ذاتو شين أها فيديوهات تروس بتعمل فيها شنوووووووو ؟
تحجب اليوتيوب ؟


__________
النبي فيك يا عمر قبل تمشي أجدع ليك حركة فيها طهور ومؤخرات كدة خليها تورم ناس عليش ديل شهرين

لله درك..

الجنا دا خبارو متلحنا كدي؟

المشكلة انت الحاجة الواضحة وشايفينها العالمين كلها بتغالطهم فيها وفي شوفهم خليك من تلقاهم بتكلموا في صورة انت ما شايفها
علي الحلال بي عكازك الحايم بيه في البورد دة تضارب الطرفين المتحاورين ومعاهم الحكم والجمهور

أيوااا..
جايي بغبينة* يعني؟

لقيتا في البوست البيغادي وماعارف الحقوق لمنو...
نخليها للبوست احسن..

احمد محمد عمر
انتظر بس بكري يركب السيراميك الجديد
الواحد اصلو كايس ليهو غبينة في البورد واهو لقيتها
بوستك مضمون عايزو من ياتو نوع

مابتلقى فيهو فرصة ياحمد..
الجنى دا متل روماريو،خواف وهداف..

كتب اخونا احمد محمد عمر :
النبي فيك يا عمر قبل تمشي أجدع ليك حركة فيها طهور ومؤخرات كدة خليها تورم ناس عليش ديل شهرين
----------------------------------------------------------------------------------------------------
طبعا يا عليش علاقة الطفل بالصورة دى علاقة معقدة ودور الوالدين في المراقبة في زمن الاسافير المفتوحة
سيكون اكثر تعقيدا مع تدفق ثورة المعلومات وتطور تقنياتها المتسارع .... المهم والله حننتني وعشان اخفف عليك شوية سأحكى لك
واحدة من الطرائف عندما كنت في سن المراهقة . فأنا انسان قروى ولدت وترعرعت في قرية صوفية ننوم ونصحوا
على ضربات ( النوبة ) واصوات المادحين . واذكر في تلك الفترة كنّا نهتم بجمع صور الفتيات العاريات من الجرائد الاجنبية
التى كان يستخدمها التجار في لف السكر والرز والحاجات الزي كدا وكان دا قبل انتشار استخدام الاكياس البلاستيكية
كما هو الحال الآن . المهم في مرة كدا كنّا نحن مجموعة من الاطفال قاعدين نتفرج على الصوّر التى جمعناها .
ولسوء حظنا قام واحد من اقربانا كان عمره في حدود الاربعين قبضنا وصادر منا قصاصات الجرائد ويا زول نزل فينا
سب وشتم بطريقة عجيبة ، بالله بس الزول دا التقول لقى معانا الخواجيات الفي الصور ديل بلحمهن وشحمهن .
المهم في النهاية قبلنا بالامر الواقع والخسارة الفادحة . يا زول بعد ساعة وشوية قام ودعمتى ممن كان معنا مشى الدكان
وكانت المفاجأة ان وجد قريبنا وحوله لفيف من الرجال امام الدكان يتفرجون على الصور التى صادرها منّا ، يعلقون عن استحسانهم لمفاتن نساء الخواجات
ويضحكون ويقهقون ، فرجع مسرعا ليخبرنا بالفضيحة المدوية وبصراحة انا زعلت شديد وقلت للاولاد دى حقارا عديييل
نحنا مفروض نمشى نخطف الصور من يدو ونجرى واليحصل يحصل . اها مالقيت زول ايد فكرتى وخافوا . اها في واحد منّنا كان
اكثر حماقة منّي قام بدون ما يشاورنا مشى الدكان وقال لقريبنا :
يا زول ادينا الصور بتاعتنا . وانتوا وقت الصور دى بتاعت قلة ادب بتتفرجوا فيها ليه ؟
المهم قام صاحبنا اخد ليهو كف صاموتي ورجع ينهنه بالبكاء .
ودى يا حبيبنا عليش كانت اول مرة في حياتى ابدأ التفكير بشكل جدى في
مستودع القيم التى تحكمنا كمجتمع قروى بسيط وبدا لي انه في الظاهر ليس كما في الباطن .
كدى خلينا يا عليش نرجع لمداخلة اخونا ابوحميد
ونطلب منك ان تعرض الصورة ادناه على ابنك ونسمع رأيه او كيف يراها دا لو ما عندك مانع

https://www.0zz0.com

صورتك دي يا عمر فيها حركة دبلوماسية واللا أنا عيوني طششن؟

مرحب ياابو الريش وشرفتنا..

ياعمر
ولدي البتكلم عنو دا لما كان عمرو بداقش في التلاتة سنة،سقتو يوم وديتو البحر،اخترت حتة معزولة جدا وضحلة،دايرو يجمبغ في الموية ويرفه شوية،
وطبعا لو خش الموية بهدومو ح يلخبت مقاعد العربية بعدين..
اها ،قلتليهو طلع هدومك عشان تعوم،الشافع طلع قميصو وبقى يعاين لي،قلتليهو طلع اللباس...
قالي الناس ديك بعاينوا لي...
اتلفت عشان أشوف الناس ديل منو...إنت عارف ياعمر لقيتو قاصد ناس في الشاطئ التاني..
تخيل قدر ماحاولت معاهو رفض،وانا طبعا ماممكن اخليهو يلخبت مقاعد العربية،حارة عليّ...
عشان كدا،المشوار في النهاية بقا فسحة ساكت ،اخدليهو حوامة في طرف الموية بكرعيهو،واتخارجنا..


*ياتو صورة إنت قاصد؟
إنت من زمن الصور،نحن استخدمنا البرنامج زمان وماشايفين أي حاجة هسّ..
بعدين بالنسبة لمفاتن عمك الريس،نحن ياخي (مفاتنو) شايفنها في قفة ملاحنا،نجي كمان نلقاها في البورد عيانا بيانا..
تحياتي العميقة ومشكور جدا

يعني نقّبت شاشة الكومبيوتر ؟ ...... بالله دي عالم يخترعوا ليها الانترنت !