السودان يسع الجميع

10:23 AM August, 10 2017

سودانيز اون لاين
حسن محمد عمر-السودان
مكتبتى
رابط مختصر

المغتربين وما أدراك ماالمغتربين وحالة عدم التركيز الحاصلة اليومين دي إضافة إلى التصريحات المحبطة للإخوة فى جهاز شؤون العاملين بالخارج مع نقة عضو جهازشؤون رعاية الأسرة (أم العيال) والتى غالباً ماتغرد خارج السرب (لاهماك عذابنا ولادموعنا وشقانا ) كل المصائب دي جات دفعة واحدة فى صلع أولياء الأمور مع ضغوط الحياة والضغط والسكري مما جعل عدم التركيز أنسب وصف للحال دا حتى أن بعض أولياء الأمور تجده جالساً فى الحديقة سارح بخيالو يمعط فى النجيلة واحدة واحدة ويردد فى سره (أسفرهم ماأسفرهم ) والمحروسة جنبوا مشغولة بالواتس مع جارتها .
لذا يجب على الإخوة الزملاء الشركاء فى هم الغربة عدم الإنجرار وراء إستفزازت (أم العيال) وطبعاً لا أعمم فهناك زوجات حسبوها بالعقل والمنطق وأخريات يمهدن لخلع الزوج والإنقلاب عليه وتهيئة ولى العهد (الإبن) لتسنم المسؤوليةبعد أن تبين عدم مقدرة رب الأسرة لتكملة المسيرة ودا فى حد ذاتو نكران للجميل وللأسف الشديد بعض الزوجات فاكرين الحكاية ساهلة وقد نجد لهن العذر لأنهن جاهلات بالقوانين والنظم .
ياأخوان الموضوع طويل وشائك ومحتاج لرواقة وحسبة دقيقة بدون تهور وكان ماقادر تشيلنى بعيالى طلقنى لأنى عشت قصص فى الأيام دى لبعض الإخوة حالتهم تحنن ناسين أو متناسين أن الرزق بيد الله والسودان يسع الجميع
كسرة :
من الطرائف قال ليك واحد زهجان أخذ عيالوا الصغار مع أمهم ووصل مطار الخرطوم فى ساعة متأخرة أصبحوا الصباح العيال صحوا بدريوفتحوا الباب لقوا شفع الجيران ورجعوا بيقولوا لأمهم ماما ماما سكنوا جنبنا سودانيين ههههههههههههههه فاكرين نفسهم لسة فى أم الحمام الغربية .