الرئيس السوداني يشهد مراسم عقد قران معتمد امدرمان “مجدي عبد العزيز” على الاعلامية “نسرين بحضور ووكالة الرئيس السوداني عمر البشير شهد مسجد الشهيد بالعاصمة السودانية الخرطوم مساء الأحد 18 يونيو الجاري مراسم عقد قران معتمد أمدرمان مجدي عبد العزيز والإعلامية نسرين النمر وسط لفيف من رجال الدولة والمجتمع، وكان حضور هاشم عثمان الحسين مدير عام قوات الشرطة لافتاً ويبدو كرد غير مباشر على إشاعة إعتقاله.
وبحسب رصد ريم منصور محررة المنوعات بموقع النيلين تم حفل الزواج مساء يوم الأحد 18 يونيو الجاري بأحد الفنادق الكبرى بالعاصمة السودانية الخرطوم.
اركز وين يا مجمر صايمين وعطشانين وبكري يجيب لينا عصير المنقة دة .. العصير سمح والكباية سمحة ما شايف هيثم يتراجف كتب مرتين خايفو يكون افسد صيامو وش لا يخلو من خبث النصيحة ليك يا الله البودن سمح اللهم اني صايم الله لا غز فيك بركة يا جلال
بكري زاتو يجيب لينا في النمور الرابضة دي تخليك تقطع وضوك زاتو خلي الصيام النصيحة ليك يا الله السمح بعجبني السمح المجيه ومتناسق تقيف فوقو وتعاين تشبع شوف امنتو بي الله اللهم احفظ لنا صيامنا
بقي زي عمدة القريه يوم الصفاح ... بيكون متلفح بالشالات وقت الدلوكة تسخن بفك الشالات وينزل يعرض ويفك أخره...
قاليك في وحدة غناية إسمها حميرة في نواحي كبوشيه عندهم عرس الجماعه خلو الزراع والشغل مشوا للعمده قاليو ليه حميرا ي حمتنا الشغل دحين أمشي وقف الدلوكة عمك العدة شال عكازة وجاريه في الواطه وماشي علي حميرا وعيونه شرار بدأت تغني : سيد محكر الديوان ثابت يا أب قلب تقابة للنيران وين مثل الحسن (الحسن و ضبعه) قام الحسن عرض وقاليها غني أريتهم ما إشتغلوا
غايتو يا جنى كان اخير تكون ماسك ضنب الككو __ و يا ناس البوست ده برى برى منكم و أحيييييى منكم برضو هسى انا لا سيد البوست و لا جيت شايل العصير و لا انا العريس و لا انا العروس .. شيل الحال لزومز شنو من يوم قبانى فتح بوست البوس و الناس شايلة شلاليفا و تمص بى مناسبة المص دى يا ود اب سن عمى ود الفضل *** ساكن جارنا الحيطة بالحيطة يوم دخلنا عليهو لقيناهو بارك فى الواطا و يمص فى خرطوش الموية عاين لى ابوى و قال ليهو يوماتى انا فى الحال ده مع الموية ابوى فك ليهو ضحكة طويلة كده ما متناسبة مع وقارو اها الكيوريوزتى مسكنى ليك قدرما حالوت اعرف ضحك ليه ما ورانى المهم فى رجعتى الاخيرة دى قعدت مع عمى الفضل ** و جات السيرة بعد 16 سنة قال ابوك قال لى فى سرو اقعد مص لامن تنشرق _____ *** عمى ود الفضل ده ابو صاحبى بكور بتاع اليوميات ثم اللهم انى صايم
غايتو يا عبدالعظيم البورد دة خرب صيامنا . ومن قباني لي جني فلسو بينا الواحد غلا الستوت ما تحلو بقيت زي عمك الحج وملا الجراب يا مشرف تفتحو في الشرور وان قلنا شي تلومنا امسكو عليكم منقتكم دي شوف اكان نشحدكم مصة يا جلال غايتو البقت علي عمك باقية علي . المص المصيتو الليامات دي زمني الصغير ما مصيتو وحياتك خوتك يوماتي ادنقر في الماسورة وامص غلا تلات مرات .. الواحد لامن جاهو وجع شلاليف وحلق الموية زاتا اتعودت المص دحين خلوني من العوة دايرلي فتوى دة يعتبر عمد قضاء وكفارة ولا قضاء بس لكن زول يعرس في رمضان بالغ ياخ وين خلوف فم الصايم
Post: #30 Title: Re: وضنب ككو لعموم البورداب بشة يشهد زواج نسر� Author: بدر الدين الأمير Date: 06-19-2017, 11:23 AM Parent: #28
لكن زول يعرس في رمضان بالغ ياخ ــــــــــــــــــــــــــــــــــــــــــ
اب سن ياحاسد داير المعتمد يستنى لبعد رمضان اها وكان طلع في كشوفات طه يلحق امات طه ولا كان جا والى خمسة نجوم ولا كان جا ودعمت ولا ود خالت ولا ود حبوبة اراعى الردلوبة وقال داير يتنسر ياكل نيم
- هل كان هذا الشاب المعتمد، يدير بلديات أمدرمان كلها، وهو لم يتأهّل اجتماعياً بعد ..؟؟!
- هل ســتُريحنا هذه الإعلامية التي تكاد تكون شاركت ببرنامج برنامجين تلاتة في معظم القنوات الفضائية السودانية!! من " كثرة" طَــلاّتها التي لا تُخلِّف في ذهن المُتلقّي، أي شيء غير " هواء " ..؟! ليتـ ها، بعد زواجها من المعتمد الأمدرماني، أن تصبح سيّدة بيتها وَ تسيب مهنة الإعلام، فليس فيها لها، الكثير!
معقول المعتمد العجوز ده حايم لي الوكت ده بي نص دينو . ولا نسرين دي دبلوا بيها .. ولا هي الدبلت بيهو .. غايتو لو ده دبل .. ومن أي ناحية .. بيكون دبل يفوق طعم عرس أول مرة ..
واحد صاحبنا عرس في رمضان نوى بعد الحفلة الصباحية ان جهته كسلا اكتر من تمانين ميل والمدام برضها نوت علي كسلا طبعا ولكنه غشى فندق خفيف في الخرطوم يستريح ساعات على بال ما يسافر كسلا ليلا بس خلاص
......... وبمناسبة الفندق صاحبنا هنا في الرياض أرسل لزوجته التانية لكي تنزل مع الاولى في نفس البيت ويوم جاية قال انها تصل ستة مساء وهي طيارتا ٩ صباحا واخد اجازة الْيَوْمَ داك ولبس لَبْس الشغل ولكنه اكتر اناقة شوية بحجة اجتماع وفللي المطار شقة مفروشة لساعات لزوم الاستقبال رجع البيت ٨ مساء دايخ ...... صاحبنا الفوق دا سكن المرتين كل واحدة في غرفة وهو في غرفة واتفقوا التلاتة انهم رهبانا وانه لن يقرب لأي منهما القصة انكشفت لمن المرتين الاتنين حملن في فترة متقاربة جدا وبرضو داسات الحكاية لمن كشفا التكوير ....... التلاتة احداث دي حقيقية ......
اها بكري زاتو قالت تعليقي أشد لكن يا مشرف لقيتك تفهم في السمكرة ياجودة هي تنفع مذيعة لكن شرطا واقفة ودالقوز شنو ياخ داير تطلع ليهم شهادة تسنين مبروك عليها وان شاء الله تبكر بالبنية واخطبها لي علاء ولدي المشرف شابكنا انصرافية في الفيس وقومو لسلاحكم اها يا مشرف انصراف لي انصراف فرق تبقي تلت ساعة للفطور ف يجوز علي مذهب هيثم
الريس قال ليك شديبببببدة .. شديدة .. يا ود أب سن .. الشدة الواحدة دي .. هههههه .. النصيحة لي الله كلامه صاح .. رغم مراقته الما جايبة حقها .. والأبت تقسم معانا دي .. هههه ..
Quote: ودالقوز شنو ياخ داير تطلع ليهم شهادة تسنين
كبار ياود أب سن يأخ .. والله مزعلاني الأراضي البور دي .. ههههه .. لينا الله نحن .. الجماعة ديل الله لا كسبهم .. لقطوا البقاق كلو .. خخخ ..
هيثم ألف نطة ولا واحد شنو كدة ما عارف بكرى عرد وقبلناها منو ايا عادة الرؤسا يا ود القوز شكيت محنك ياخ خشو لينا حتي في حدودنا البنوت السوغار تأبي انسانيتنا ان نجعلهن ممرضات ورونق الصبا وبريق الشباب يتقافز من عيونهن اها نقع مقاسنا برضو لاحقننا غايتو لكن هي ما شديدة في البناء الهرمي غراء فرعاء بعيدة مهوي القرط ذات ادب وقوام
يا أبوجودة عليك اله شيل كلام البلاغه والتشكيل والمنطق بعيد من نسرين النمر إنت ما شايف الناس فقدوا المنطق كيف الريس بكري مرق زي مرقة جيفارا من غابات الأمازون و دأب سن لا عارف يصوم ولا عارف يفطر ولا قادر يلقي ليه 60 مسكين
يعني بالعربي كدا هي سمحه وهي قمحة وهي سيدة الشاشة والمعتمد دا علي قول مجيدو إن شاء الله ما تنفعوا
دحين شيل كلامك السمح المنمق دا وشوف عادل أميـن وين
هههههه يركز شن يا هيثم الزول انبهل عديل كدى يا حليلك يا ود الباوقة انبهالاتك ضاعت سدىً
Post: #71 Title: Re: وضنب ككو لعموم البورداب بشة يشهد زواج نسر� Author: الصادق عز الدين Date: 06-20-2017, 06:50 AM Parent: #1
يا جماعة في رمضان الناس بتاكل الملاح بالشطة وبرضو بتاكل الحلو والباسطة والبس بوسة
طيب شنو لو عرس او عرس أو حتى لو عرس والدخلة في العشر الأواخر
Post: #72 Title: Re: وضنب ككو لعموم البورداب بشة يشهد زواج نسر� Author: محمد فضل الله المكى Date: 06-20-2017, 07:06 AM Parent: #71
. آآآآآآآآآآآآآآ جماعة .... الناس دي بتهضرِب في نهار رمضان ماله ؟؟ الشي ما شُفتولكم نِمر قُبال دا ؟ . . واحد قال لي : قُرود ساااااااااي . الله يجازي الفرتق جنينة الحيوانات !!
Post: #73 Title: Re: وضنب ككو لعموم البورداب بشة يشهد زواج نسر� Author: بدر الدين الأمير Date: 06-20-2017, 07:52 AM Parent: #72
المساخيت المكسرين الهنا ديل ماهم داسنها بس ياريس بكرى الومستنى دو ود المشرف يمرقك الرماد كال حماد بس عجبيتنى النسرة فطرتكم وبقيتو ليها كفارة العرس في رمضان على الطريقة اللبنانية قاليك اللبنانية ماشة في الشارع وهى متعطرة ومتمكيجة فى نص نهار رمضان والشعر سادل ومتموج واللبس حدث ولاحرج ... والكعب العالى ..كجشك كجشك ... سألوها ليش عملتى كدا !؟ قالت عليا كفارة والشيخ قالى فطرى ستين مسكين
تنهدات: ياريس بكرى كمال سالم عامل صيوان عزاء وقال المابجيهو في دى تانى مايجيهو والكشف ماسكو ود المشرف
يبدوا ان القنوات التلفزيونية وما تخلقه من نمط محدد في مواصفات الجمال قد جذب اليه سياسيى الإنقاذ الذين هم شغوفين بتكملة مراسم الابهة الاجتماعية والتي من مواصفاتها بالنسبة اليهم هي الوظيفة السياسية المرموقة ، السيارة الفارهة ، المكتب الفاخر ، السفر الى الخارج ومن ثم الزوجة ذات مواصفات القنوات الفضائية فالشاهد ان هناك سياسيين انقاذيين شغلوا مناصب مهمة في سلطة الإنقاذ تزوجوا بمذيعات بمواصفات قناة النيل الأزرق منهم :
1 - الفاتح عزالدين رئيس البرلمان السابق متزوج من المذيعة شذى عبدالعال وهى مذيعة بقناة النيل الأزرق
2 - إبراهيم ميرغنى وزير الدولة بوزارة الاتصالات متزوج من المذيعة تسابيح خاطر ، المذيعة بقناة النيل الأزرق
3 - والا، حديثا ، معتمد امدرمان مجدى عبدالعزيز يتزوج نسرين النمر مذيعة وإعلامية تقدم برامج في قناة النيل الأزرق
يا ترى ما هو سر مصاهرة سياسييى الإنقاذ لقناة النيل الأزرق او يا ترى ما هو السر الذى يجعل مذيعات قناة النيل الأزرق جاذبات لمسؤولى الإنقاذ ؟
..؟!