علاجات منزلية ناجعة

04:46 PM April, 10 2017

سودانيز اون لاين
حمد عبد الغفار عمر-
مكتبتى
رابط مختصر

تجربتي وتجارب آخرين من ذوي المصداقية

واعني تخفيف حدة المرض وليس المعالجة النهائية

ارتفاع ضغط الدم

الموز + كركدي بارد
بينما الكركدي الدافئ لعلاج انخفاض ضغط الدم (حكمتو بالغة)

الموز يحتوي على نسبة عالية من البوتاسيوم تعمل على خفض نسبة الصوديوم في الدم والذي هو من اسباب ارتفاع ضغط الدم (تجربة شخصية لي)

الكركدي ما عارف ليهو تبرير

في حالات الربو وضيق التنفس الناتج عن نزلات البرد وبخاصة الاأشخاص المتعودين على البخار

في حالة بعد المستشفى يمكن فتح الدُش على الماء الحار وقفل الحمام والبقاء بداخل الحمام واستنشاق البخار لمدة 10-15 دقيقة يؤدي ذلك لفتح الشعب الهوائية

ودي ما سمعتها جربتها مضطر قبل 15 يوم لولدي الصغير كان عندو التهاب اختنق بالليل قلت ما بحصل المستشفى اتوكلت على الله وفتحت موية الحمام ساخن وقفلت نفسي معاه جوة

هل تصدقوا ما احتجت أمشي المستشفى؟.

ياخ دا شعر براحة مبالغة

بس لو ممكن أحد الأطباء يورينا مكونات بخار المستشفى

البواسير (طبعا لا حياء في العلم)

ودي جربها واحد صاحبي ما أنا

وضع ثلج في كيس نايلون ولفه بقطعة قماش شفاف ووضعه على المنطقة من الخارج طبعا

أو الجلوس في حوض به ماء دافئ أقرب للحار بقدر درجة احتماله


لحدي هنا أنا وقفت إلى أن نلقاكم

البوست مفتوح للتجارب الحقيقية الثابتة

دكتور عيون عالج لواحد عيونهقام المريض تكريماً للدكتور وضع صورةالدكتور داخل عين واهدى الصورة للدكتور .الدكتور قال للمريض كويس الما عالجتك من البواسير ازيك

هلا فيسل
ههههههههههههههههه الحمد لله فعلا
وفي البال نكتة شيخ العرب ود أبسن

للتذكير الموز بدون إسراف وايضا الكركدي لأنو النتيجة ممكن تكون عكسية (انخفاض شديد)

حصاوي الكلى
ورتاب الفجل يغلى ويصفى
يمكن اضافة السكر لتحسين الطعم
يشرب بارد مرتين يوميا
يفتت الحصاوي

كيفك يا صادق

تصدق أنا قبل يومين قريت حاجة عن ورتاب الفجل دا ونسيت إنها شنو أهو انت ذكرتني وهي بالضبط حصوة الكلى

عندنا صاحبنا (د. أسامة النور ) كتب في الفيسبوك قبل يومين باقتضاب ما معناه إنو الناس من بطلت أكل الفجل بدعوى التحضر مصائبها كترت ولم يوضح أكتر من ذلك

لكن اعتقد انه يعني الفشل الكلوي

وللزكام والأنفلونزاعليكم بالمر الحجازى بعد أن يتم نقعه فى فنجان أوكباية شاى وتغرغر ثلاثة مرات وتمسح تحت أذنيك وصدرك علاج أكيد بإذن الله وتجارب سنين فى البداية صعب تناوله لكن بعد التعود عليه يصبح عادى جدا حتى الأطفال بيتعودوا عليه وربنا يشفى مرضانا ومرضى المسلمين

اكل شمع النحل للجيوب الانفية
الينسون شراب لعلاج النزلة
المستكة تسخن في زيت سمسم ويدلك بها الصدر ويغطي بورق لالتهابات الاطفال وضيق النفس
شراب القرفة للسكري
جربتهم كلهم
ازيك يا حمد
قلت لي ياتو نكتة فيهو الاتنين في نفس المنطقة

الحرجل ....

صدلية متكاملة ..... وبالذات للمغص ... وآلام البطن ...


الحلبة ... للإسهالات .....

كيفك يا حفيظ
بمناسبة السكري سمعت برضو مغلي الكسبرة بحافظ على مستويات السكري

نكتة أبو سن لما الخواجة قال ليهو البتاعة أصبحت كيف
قال للخواجة اصبحت كويسة لكن انت ما عندك لفض

هلا حسن محمد عمر

المر الحجازي مجرب بشكل قوي وعمل تخفيف لحالات كتيرة خاصة مع الحموضة

مع بعض الناس ما نفع

" الكُدّاد" لا يعالج بيد انه سهل الهضم :)


حمد إزاى الحال

البواسير (طبعا لا حياء في العلم) ودي جربها واحد صاحبي ما أنا وضع ثلج في كيس نايلون ولفه بقطعة قماش شفاف ووضعه على المنطقة من الخارج طبعا أو الجلوس في حوض به ماء دافئ أقرب للحار بقدر درجة احتماله

السلام عليكم حمد
البواسير دي مالها إلا التوم بعد تنضيفو وقطع الريسين من الجنبتين وخمسة دقايق كدا وبتبقا كويس (جربوا واحد صحبي برضو هههههههه).

أبوي الله يديهو العافية عندو قاوت متعبو شديد خلاص لكن من سنتين تقريبا بقا يشتري رطل بتاع توم ومعاهو ملوة ملوتين نبق بالنهار بيبلع ليهو بصلة كاملة بتاعت توم ومعاها حفنة من النبق دا الحمد لله طيلة السنتين ديل القاوت بتاعو بقا ماف عدييييل كدا لكن ما عارف العلاج هل في النبق ولا التوم.

جيب خمستاشر ستاشر فص توم ونضفن
قدد الفصول بابرة واللا رأس السكين
جيب نص رطل زيت زيتون اللخدر
أرمي فصوص التوم في الزيت لمدة خمستاشر يوم
بعد كدا أبدأ أشرب معلقة كبيرة يوميا على الريق
لمدة خمستاشر يوم
وأسألني .
كيفنك حمدوف

النبق للمفاصل
لكن نوم بعيد من الناس

سام اخونا حمد
عندك ورق الجوافة يتم غليه
علي الماء مثل الشاي ويشرب
يستعمل لعلااج التهاب الصدر الحاد

سلام

الجنزبيل " الطازج ويتم تقشيره " + الليمون ، يتم خلطهم بالخلاطة بدون سكر . ( علي الريق ) . علاج ناجع للالتهابات الصدرية ، والحنجرة ، ونزلات البرد والوقاية منها ( تجربة شخصية ) .

ملحوظة :
في حالة عدم توفر الجنزبيل الطازج ، يتم الاستعانة بالجنزبيل الجاف ( المسحون ) ، وهنا تختلف طريقة التحضير ( يتم غلي الماء + الجنزبيل المسحون ومن ثم عصر ليمونة علي الخليط ، ويشرب دافئا ) علي الريق ايضا ، لمده اربعة ايام علي الاقل ، حسب الحالة .

ملحوظة 2 :
يجب عدم وضع كمية كبيرة من الجنزبيل المسحون ، لان طعمه لازع جدا ، يكتفي بنصف ملعة صغيرة فقط .

مع التحيه وتمنيات الصحه والعافية للجميع ،،،،،

دحين ما عندكم شيتاً مجرب لتضخم الغدة الدرقية؟

Quote: جيب خمستاشر ستاشر فص توم ونضفن قدد الفصول بابرة واللا رأس السكين جيب نص رطل زيت زيتون اللخدر أرمي فصوص التوم في الزيت لمدة خمستاشر يوم بعد كدا أبدأ أشرب معلقة كبيرة يوميا على الريق لمدة خمستاشر يوم وأسألني .

مساء الخير

والوصفة دي بتعالج شنو بالظبط؟

سلامات حمد
انت قول التجارب الشخصية ونحن بنقول ليك النصائح الطبية المرافقة :)


ضغط الدم : موضوع إرتفاع ضغط الدم ده أو ما يعرف بال hypertension موضوع مهم وخطير جدا"
وأبحاثو كل يوم في زيادة ومافي شي العلماء ما جربوهو وأخضعوهو للمعايير العلمية والطبية عشان لو
في فايدة يستفيدو منها في علاجو فمبدئيا" كده أي واحد عندو ارتفاع في ضغط الدم عيه بالعلاجات الطبية
وما يوقفا نهائي حتى لو ضغط الدم عندو في الطبيعي مع العلاج او بدون علاج.

الموز والبوتاسيوم وضغط الدم :
أجريت أبحاث كتيرة في الموضوع ده لكن لا البوتاسيوه لا الموز عندو دور في خفض ضغط الدم للشخص
المصاب بارتفاع في ضغط الدم وتخيل الموزة الواحدة المتوسطة الحجم تحتوي على ما يقارب 500 ملغرام
من البوتاسيوم وحوجة الانسان اليومي للبوتاسيوم 10 أضعاف الرقم ده للانسان البالغ!! يعني لو أكلت عشرة موزات
لن تتعدي الكمية الموصى بها يوميا" ولن توثر في الصوديوم ولا ضغط الدم!!

أما من ناحية عامة الأغذية الغنية بالبوتاسيوم مفيدة جدا" لتنظيم مستوى البوتاسيوم في الدم في الشخص العادي ويمكن
تؤدي لأنتظام ضغط الدم في الشخص العادي وليس المصاب بارتفاع ضغط الدم!!


مريض ضغط الدم مفروض يعرف حاجة مهمة جدا" إذا هو مصاب بضغط الدم الأساسي عليه بأخذ العلاج مدى الحياة
ولا يوقفها الا في حالات طبية معينة حتى لو أنتظم ضغط الدم عندو كلها حبة أو حبتين يوميا" أصغر من حبة الفاصوليا
تحميك من مضاعفات ضغط الدم الخطيرة أمراض القلب والشرايين والجلطات الدماغية والفشل الكلوي والعمى!! غير
المضاعفات ولا يمنع ذلك من يتغذى غذاء صحي متوازن لكن لا توقف العلاج أبدا".


يتبع
الحادة لارتفاع الضغط

الأخ حمد عبدالغفار
لك الود والتحايا الطيبات
تعليقاً على الكركدي ابتداءً أقول لك أن مقولة بارد يقلل ارتفاع ضغط
الدم وساخن يرفع ضغط الدم فهذه المقولة لا أساس لها من الصحة
ولا توجد علاقة مباشرة للكركدي مع ضغط الدم حسب تجربتي الخاصة
ولكن علاقة الكركدي هي بارتفاع الكلسترول في الدم وارتفاع الكلسترول
أعتقد غير جازم يلازم إرتفاع ضغط الدم. كنت أعاني من إرتفاع الكلسترول
وكنت أتعالج منه بحبوب حسب وصف الطبيب وعن طريق الصدفة كنت
أتناول كوب من الشاي السادة بعد العشاء فأخذ يسبب لي قلق في النوم
فاستبدلته بالكركدي الساخن .. وبعد فترة طويلة امتدت لشهور تم فحص
الكلسترول في الدم فلم يظهر لارتفاعه أثر.الكلام ده قبل أكثر من عشرة
سنوات ومازلت مستمراً في شرب كأس الكركدي الساخن ليلاً وقد تعافيت
تماماً من الكسترول ولكن مازلت أعاني من ضغط في الدم خفيف لا يتعدى
150 على 95. أما تجربتك في حالة الربو فهي صحيحة وبدلاً من الحمام هناك
أجهزة طبية يمكنك تشغيلها في الغرفة التي ينام فيها المريض فترطب جو
الغرفة ولا يتعرض الولد للنوبة وهذه وصفة وصفها لي الطبيب. مع التحيات.

بقدر ما بنشجع العلاجات البلدية
بقدر ما بنشوف ناس العلوم والابحاث بقولو شنو!
غايتو حسب ال American Diabetes Association - مافي اي دليل على ان القرفة لها دور في تنظيم سكر الدم.

حمد وشركاؤه تحياتى

على مسئوليتى الكاملة : علاج الامساك والاسهال

الاسهال :

تسخين ماء - كباية صغيرة ماء ساخن ضع عليها 3-5 حبات ( قرنفل - مسمار ) اخلط بالملعقة واشرب مرتين - او ثلاث مرات فى نفس اليوم
وفى مرات متفاوتة ... ستجد النتيجة بعد المرة الثانية او الثالثة

الامساك :

عصير موز بالحليب اثناء تواجدك فى المنزل . النتيجة ستظهر بأسرع مما تتوقع ,

قرنفل - مسمار عصير موز بالحليب

معذرة يا جماعة ننط لدكتور عثمان الإمام
انت قول التجارب الشخصية ونحن بنقول ليك النصائح الطبية المرافقة

مرحب بيك ووجودك وجود زملاء أطباء آخرين مفيد على الأقل لتوضيح طبيعة الأمراض دي وطبعا ما قدامنا غير نبصم على ما تقولون لأنو التجارب البلدية دي مهما تكون نتائجها فهي لا تخضع لمعايير يمكن ضبطها أو التحقق منها
بعكس الحقائق العلمية وانا من باب معرفة لا تتجاوز مجرد ثقافة صحية بأكد على كلامك في إنو أي مرض ناتج عن خلل عضوي لن تعالجه العلاجات البلدية يعني مثلا زول جسمو ما بفرز أنسولين ما عندو علاج غير تناول عقار الأنسولين وهكذا وأنا في أول مداخلة تكلمت عن تخفيف وليس علاج
بخصوص الموز ولحسن الصدف أمس لما كتبت البوست مشيت حضرت نشرة العربية الساعة 11 لقيت خبر عنو فعلا أكد الخبر على فائدة الموز لمرضى الضغط بس حسب كلامك مفروض الزول يأكل على 11 موزة عشان الننتيجة تكون واضحة ودا مقدار كبير
ما عنيته هو تخفيف الضغط على الجسم بتخفيض بعض مسببات المرض أو تلك التي تزيد من حدته
أنا تجربتي مع الموز دا باكلو عشان بساعد في النوم بعدها اكتشفت إنو بخفف التوتر وبخفف لي أعراض الضغط العرضي العندي والناتج من أكل الجبنة بشراهة وشرب القهوة والشاي وقبلها الدخان قبل تركه

نطمح في المزيد منك

حمد عبدالغفار وشركاه المحدودة
اكيد المنبر دا كلو بعاني من النسيان وضعف الذاكرة
اديكم وصفة بسيطة وفي المتناول
زنجبيل احدر .. يعني طازج ما مجفف ولا ناشف
نعناع اخدر ... برضو طازج ولا مجفف ولا ناشف
قرفة .... اعواد يعني ما مسحونة
قرنفل .... (مقطوع الراس) يعني الصورة الجابها علاء سيداحمد القرنفل بتاعو دا
نقطع راسو ونخلي الساق بس ... اكرر (سيقان) القرنفل المعروف بالمسمار
الكميات تكون مناسبة .. (حسب درجة نسيانك) اذا كنت مفوت رسمي كتر الكمية
كل المجموعة دي يتم غليها في النار لمدة 30 دقيقة لا تزيد ولا تنقص ثانية واحدة
يصفى الناتج ويشرب ساخنا .. مرتين في اليوم
ممكن تحتفظ بالكمية الباقية من المشروب في التلاجة ويسخن عند تناوله
انا جربت الوصفة دي .... بعد تلاتة ايام بس اتذكرت ستين حاجة رايحة مني
بالهناء والشفاء
واتمنى لكم ذكريات سعيدة

عبد العزيز الشغيل
وينك

الحلبة دي زي البندول ثابتة بالنجيضة باقي ليها تصريح من مجلس الصيدلة بس

الحرجل ما راكب لي في رأسي انا بلاوز من الأعشاب البتعكر الموية وتبقى هي جزء من المحلول نفسو

كيفك يا احمد يسن

تصدق ما ناسي البوست القديم داك حول نفس الموضوع
بس الجديد هنا حكاية بخار الحمام دي ياخ أنا مصدق لقيت لي علاج مجاني ومريح للاحتقان دا- اليومين ديل انفي بقى زي ماسورة البندقية الهواء داخل وبكثافة في الرئتين رغم تقلب الجو مافي أي حساسية
ما بدخل الحمام وإلا الموية السخنة شغالة والبخار عاكل

بجيك مرة تانية لقصة التركيبة بتاعتك دي

معذرة يا شباب

كيفك يا وليد
الكدّاد دا شنو
صدق ما عرفتو
الدوم ولا حاجة تانية
راعي عامل السن نحن جيل مايو وكدا

هلا محمد حامد

بواسير وتوم كتير مشكلة

أنا مرة قريت إنو التوم والفجل وكل البهارات والحاجات الحارة دي ما بتنفع مع ناس المصران والبواسير

الكدّاد دا شنو
تحياتى حمد الكداد ياهو التمليكة

الكول
1 - عمل توازن للميكروبات الطبيعية فى القناه الهضمية والجهاز التنفسى
2 - تحسين مقاومة التوطن للميكروبات فى القناة الهضمية والجهاز التنفسى والبولى
3 - خفض مستوى الكلسترول عن طريق تفكيك الدهون فى الاحشاء مما يمنع الجسم من اعادة امتصاصه
4 - تثبيط الطفرات فى مكونات القناة الهضمية واحتمال تكون اوارام فى الامعاء
5 - تحسين كفاءة عمل جهاز المناعة والوقاية من الالتهابات فتناول الاطعمة الغنية بالمحفزات الحيوية يعزز جهاز المناعة حيث يزيد
انتاج خلايا البلازما والخلايا الدفاعية فى الجسم وتناولها يقلل الاصابة بالاسهال والتهابات الجهاز التنفسى والاصابة بنخر الاسنان
كما يثلل من نوبات الحساسة لدى الاطفال وليس لها تداخل فى النظام المناعى للجسم
6 - تحسين امتصاص المعادن خاصة الكالسيوم والتغلب على امراض هشاشة العظام
7 - الحد من ارتفاع الضغط فقد ظهرت الدراسات ان الببتيدات التى تنتج عن عمليات التخمر تساهم فى تخفيض ضغط الدم المرتفع
8 - تحسين هضم البروتين
9 - زيادة الفيتمانات والاملاح المعدنية بفعل نشاط التمثيل الغذائى لها
10 - منع او تقليل اصابة الجهاز الهضمى بالامراض ومنع حدوث اضطرابات هضمية والامساك وامراض الكبد والتهاب الجلد
11 - ضبط وتقليل معد الارتفاع فى ضغط الدم
12 - انتاج مواد مثبطة لنشاط ميكروبات الفلساد
13 - كفاءة فى علاج الاسهال
14 - تنقية الجسم من السموم والوقاية وتحفيز عمل غدة البنكرياس وينشك جينات التنقية فى الكبد وحمايته من المواد الكيمائية
الموجودة فى الاطعمة زالمشروبات المختلفة
15 - مفيد لمرضى التوحد باعتباره مصدر طبيعى للبكتيريا النافعة فى الجهاز الهضمى لدى مرضى التوحد
16 - يستخدمه العطارون فى مناطق دارفور وجنوب كردفان لعلاج الكثير من الامراض
17 - مفيد فى حالات التهاب الكبد الوبائى واليرقان
18 - يستعمل كمقوى
19 - وجبة كول تعادل 6 وجبات عدس
ولذلك يطلقون عليه كول ميسر تاكلو بيدك اليمنى تشمه رائحته يدك الايسر
وبالصحة والعافية وعن تجربة شخصية

الكول
1 - عمل توازن للميكروبات الطبيعية فى القناه الهضمية والجهاز التنفسى
2 - تحسين مقاومة التوطن للميكروبات فى القناة الهضمية والجهاز التنفسى والبولى
3 - خفض مستوى الكلسترول عن طريق تفكيك الدهون فى الاحشاء مما يمنع الجسم من اعادة امتصاصه
4 - تثبيط الطفرات فى مكونات القناة الهضمية واحتمال تكون اوارام فى الامعاء
5 - تحسين كفاءة عمل جهاز المناعة والوقاية من الالتهابات فتناول الاطعمة الغنية بالمحفزات الحيوية يعزز جهاز المناعة حيث يزيد انتاج خلايا البلازما والخلايا الدفاعية فى الجسم وتناولها يقلل الاصابة بالاسهال والتهابات الجهاز التنفسى والاصابة بنخر الاسنان كما يثلل من نوبات الحساسة لدى الاطفال وليس لها تداخل فى النظام المناعى للجسم
6 - تحسين امتصاص المعادن خاصة الكالسيوم والتغلب على امراض هشاشة العظام
7 - الحد من ارتفاع الضغط فقد ظهرت الدراسات ان الببتيدات التى تنتج عن عمليات التخمر تساهم فى تخفيض ضغط الدم المرتفع
8 - تحسين هضم البروتين
9 - زيادة الفيتمانات والاملاح المعدنية بفعل نشاط التمثيل الغذائى لها
10 - منع او تقليل اصابة الجهاز الهضمى بالامراض ومنع حدوث اضطرابات هضمية والامساك وامراض الكبد والتهاب الجلد
11 - ضبط وتقليل معد الارتفاع فى ضغط الدم
12 - انتاج مواد مثبطة لنشاط ميكروبات الفلساد
13 - كفاءة فى علاج الاسهال
14 - تنقية الجسم من السموم والوقاية وتحفيز عمل غدة البنكرياس وينشك جينات التنقية فى الكبد وحمايته من المواد الكيمائية الموجودة فى الاطعمة زالمشروبات المختلفة
15 - مفيد لمرضى التوحد باعتباره مصدر طبيعى للبكتيريا النافعة فى الجهاز الهضمى لدى مرضى التوحد
16 - يستخدمه العطارون فى مناطق دارفور وجنوب كردفان لعلاج الكثير من الامراض
17 - مفيد فى حالات التهاب الكبد الوبائى واليرقان
18 - يستعمل كمقوى
19 - وجبة كول تعادل 6 وجبات عدس
ولذلك يطلقون عليه كول ميسر تاكلو بيدك اليمنى تشمه رائحته يدك الايسر وبالصحة والعافية وعن تجربة شخصية المصدر : Re: علاجات منزلية ناجعة Re: علاجات منزلية ناجعة ]

البواسير انا عندي دواء مجرب
ليهو خمسين سنة
بلدي
العاوز يخش في الخاص
الناس ما تتحسس

Quote: الحرجل ما راكب لي في رأسي انا بلاوز من الأعشاب البتعكر الموية وتبقى هي جزء من المحلول نفسو

بالغت يا حمد ..
تعال اقعد للحكي ليك ..
ضربني مغص لا اقعد لا ارقد بندول بيش امبرزول بيش ..
أم العيال جابت لي كباية حرجل أبيت أشربو زي حالتك دي ..
قعدت تقول لي كدى جرب ..
مع المغص مسكت الكباية قلت كان سم بشربو ..
تصدق اقل من ساعة زمن كنت حايم عادي في البيت ..
من ديك بقيت من كبار المستوردين للحرجل ..
حسه لو جيتني أهو دا جكو في التلاجة .

شاي الكسبرة علاج لي الدوشة ولفة الراس
جربتو
كان علاج من الوالدة ووصفتو لي كم زول نفعو

أخونا حمد لك التحية وللإخوة المشاركين فى البوست الرائع دا أهو من التجارب المطروحة دى عملنا ( صيدلية أعشاب ) ماشاء الله وحتى لا يزعل علينا أخوانا الأطباء والصيادلة عايزين نسمع رأى طبي فى الحاجات الجربناها ياخى دى أسمائها زاتها تريح الأعصاب ( حرجل / كركدي / قرتفل / توم / قرفة / جنزبيل / يانسون / حلبة / كمون أسود ) وتعال شوف وقارن (أوغمانتين / موكسسلين/ أبيروفين / أوراتادين ) أسماء تخلع عديل أخير منها الجردقة شفى الله مرضانا ومرضى المسلمين

العسل للحبوب والبثور ( مسيح حوالين الحبة دون الراس )
المسمار ( القرنفل ) لتطيب الفم وطرد الغازات

Quote: البواسير دي مالها إلا التوم بعد تنضيفو وقطع الريسين من الجنبتين وخمسة دقايق كدا وبتبقا كويس (جربوا واحد صحبي برضو هههههههه)

واحد بلدياتنا ادوهوا الوصفة حقت التوم دي و قال ليهو تستعملوا بعد تدقوا كويس الراجل مشي دق التوم في فندق كان دقوا فيهو شطة قبل كدة المهم صحبك ظبط الخلطة في الفندق حق الشطة داك وبعدين عينك ما تشوف الا النور ههههههههمشكور اخونا حمد

Quote: عبد العزيز الشغيل وينك الحلبة دي زي البندول ثابتة بالنجيضة باقي ليها تصريح من مجلس الصيدلة بس الحرجل ما راكب لي في رأسي انا بلاوز من الأعشاب البتعكر الموية وتبقى هي جزء من المحلول نفسو

انت ما سمعت ب ( الحراجل ... دوا الراجل ).....

الحرجل زبون دائم في مقاضينا من السودان

طلحة كيفك
علاجك دا لشنو زي ما قال ليك حاتم بتجدع ليك 15 فص توم في زيت وبتمشي ؟
كان للبواسير ما عندي إلا يجيبا لي قعاد سودانيز دا من هنا ورايح
عندي حساسية مطلعا صليبي ولقيت ليها السم القدرها

اليومر الريال كيف؟

من فترة اعاني من اصفرار الاسنان وتكون الجير
الاسنان اخر عمر ما بتحملو نظافة الدكاتر والدربكين بتاعهم
من فترة شاهدة فيديو لمغربية قلت نجربو ,,
اها الشغلة بسيطة
كركوم (الاصفر بتاع الاكل)
زيت جوز الهند او زيتون
تعملهم في الفرش وتنظف به الاسنان
النتيجة كانت مدهش من 3 ايام زال الاصفرار وبدء الجير في التفتت,,

والحمد لله ,,,

اسامة العريفي

الجوافة خضراء وقيافة
غنية بفيتامين ج وهي نفسها علاج سريع للإسهال

شوف حاجات الشراب الحار دي استشاق البخار بكون مؤثر برضو فيها
ملاحظ كل حاجات النزلة والانفلونزا يقول ليك أشربها حارة وحسب علمي فيروس الإنفلونزا بقل نشاطو مع ارتفاع درجة الحرارة في الغشاء المخاطي

السلام عليكم الاخ حمد وجميع الاخوة الكرام
البوست جميل جدا ومفيد
بس العلاجات البلدية هل بتظبط مع اي زول ؟
لانو الجرعة ما مضبوطه زي الادوية الطبية وبعدين اختلاف جنس المريض وعمره وهكذا دي في العلاجات البلدية ما اظن بختوها في الاعتبار
وشي تاني مهم وهو الاثار الجانبية للعلاج البلدي هل معروفة شنو؟



مشاركة : لتغيير رائحة الفم شفت هنا في السعودية عند احد الاخوة السعوديين جنزبيل مجفف - زي الزبيب كدا - جربتو فعلا بيعمل ريفرش كويس ...لكن هل ليهو اضرار جانبيه؟ وجع معدة مثلا؟

مرحب هاشم كاروري

الجنزبيل متفق عليهو لتخفيف نزلات البرد ودا بسبب أنو الجنزبيل بمد الجسم بطاقة حرارية كبيرة ما ملاحظ في عز البرد لما تشرب جنزبيل تحس إنك ح تعرق

حقو نتفق على مصطلح تخفيف وليس علاج

هلا حسن مكاوي

دحين ما عندكم شيتاً مجرب لتضخم الغدة الدرقية

كدي جرب وصفة طلحة الرماها ومشى دي إمكن تصادف أصلو العلاج البلدي دا تجريب زي ملحات السودان (جمع ملاح) انا متأكد قبل الويكة والخدرة ديل بكونوا جربوا شجر السودان دا كلو عشان يعملوا ملاح

وزي البايظ في الحريق مرات ترمي شايب ما يعمل حاجة ترمي تريس أو دو يفتح الورق

عليك الله جربها عندي إحساس انها ممكن تنفع وما فيها ضرر أصلا

صباح الخير حمد

لا شك عندي بتاتا" ولافي الطب إنو كثير جدا" من المنتجات البلدية (او الأعشاب) ليها تأثير كبير على صحة الأنسان
ولوقت طويل قبل تطور الطب الحديث كانت مستخدمة وذات تاثير ملحوظ وحتى حاليا" كثير من العلاجات بتكون مصحوبة
بتوصيات بالإكثار من أنواع معينة والإبتعاد عن أخرى حسب المرض.

لا مانع البتة في استخدام العلاجات البلدية التي تخفف الالام والأعراض وكلنا أخدناها قبل كده لوجع الضرس وللكحة والام المفاصل
والامراض الجلدية الخ الخ ورغم تفاوت النتائج وعدم جدواها في الكثير لكن لا باس اذا لم تؤثر في سير المرض ولا تسبب مشاكل أخرى

الحقيقة الدفعني للمشاركة رغم معرفتي إنو المواضيع دي تحظى بعدد كتير من المشاركات والخبرات المتبادلة هو علاج الضغط والامراض
المزمنة الأخرى كالسكري وارتفاع الكوليسترول وهم اكتر فئة بلتجأ للعلاجات البلدية وترك العلاجات الطبية على الاقل بحثا" عن الشفاء
الكامل وهروبا" من استخدام العلاجات مدى الحياة وهنا الطامة الكبرى!! رأينا حالات كثيرة لحالات تركت العلاج وكانت النتائج أقلاها فشل
كلوي وبتر رجل وغيبوبة سكر ومن مختلف الفئات فيهم غير المتعلم وفيهم أساتذة الجامعات !!

وأنا عارف بوستك ده حيلم ناس كتيرة عشان كده حنستفيد منو في شوية تثقيف صحي ووصايا للفئة دي وبنقول ليهم لا ضير تستخدم علاج بلدي
لكن إياك وإياك تترك العلاج الموصى به حيث لا ينفع الندم بعد فوات الأوان الأبحاث في المجال ده يصرف عليها سنويا" ما يفوق ميزانيات دول
وأغلب الأعشاب دي درسوها ودرسوا مركباتها لكن لا يوجد أفضل من المستخلصات الموجودة حاليا" في صورة ادوية حتى الوقت الراهن.

المريسة يا حمد بتعالج الحصوة الفي الحالب ..
جردل دقة على الريق علي الحلف فتتت الحصوة تجي متلبة ..

عاين ناس علي دفع الله ديل
ياخدوا من الدين الحاجات البتكيفهم بس

-----
الحساسية من العطور ما عندك ليها صيبة يا دكتور حمد
أي رشة ولو في القميص من برا،، الجسم يحمّر ويولع
اها نسكت نمضغ في اللبان عشان نروّح الريحة ولّ كيف؟ (وجه غامز مرتين)

هلا حاتم الهواري

شكلو قاصد بيها البواسير بس طلحة دا خجول بطبعو

مرحب بابكر قدور

أنا أول شعور بالضغط كان معي زميل بالمكتب وكان بيتو قريب معاهو واحد عندو ضغط قال لي قبل المستشفى يلا البيت جاب لي جك الكركدي شربت منو بعد شوية شعرت إني كويس وممكن يكون مفعول القهوة الشربتها قبل الارتفاع زال
عموما ما مقتنع بمسألة الكركدي دي بس حاجرب عشان الكلسترول بس خائف من قصة كركدي حار دي.

موضوع بخار الحمام حأدي نفسي جائزة عنو هههههههههههه

هلا أيمن محمود
موش القرفة وبس أنا السكري دا تحديد ولأنو مرتبط بافراز الأنسولين في الجسم ما شايف ليهو علاج غير الأنسولين خصوصا الناس المتوقف عندهم افراز الانسولين نهائيا
أي محاولة لف ودوران معاه ما بتنفع عندي خالي معاه سكري من 1982 لو ما اخد الحقنة وفطر ما بطلع من بيتو لكن ما شاء الله للآن ما تعرض لهزة منو حتى الأكل محسوب شديد

آي يا علاء سيد أحمد
حاجات زي دي اسعافات أولية

أنا عشان كدا بحب الموز والمنقة والقرنفل دائما بدوك احساس بالفائدة حقتهم

مرحب أحمد حمودي

شوف الكول والموليتة ديل مسمار تنفيس للجسم من البلاوي
ممكن ريحة الكول بعد التخمر منفرة شوية لكن لو كشحتو في الأكل بتحس براحة أنا جربت أكلو كم مرة أذكر إني شعرت براحة بعد أكلو بس ما كنت عارف إنو فعال بالمستوى دا
يلقوا وين هنا ؟ خليني بكرة أنا بدقش غبيرا بشوف آخرو
انا أي حاجة في أمل فيها لإزالة الدهون دي بجربها

ياخ دا صيدلية متحركة
تشكر يا شاب

يا صادق ميرغني

ياخ انت ذاتك ما تتحسس كب هنا للمصلحة العامة
ما قلنا لا حياء في العلم

مولانا الملك

الاعشاب دي فيهن العلة ودواء العلة
المغس الناتج من سوء الهضم وبطء حركة الجهاز الهضمي الحرجل بقضي عليهو في دقائق
بسبب إنو الحرجل عالي المحتوى من السليولوز وطبيعتو ليفية والسليولوز معروف منشط جدا لحركة الأمعاء عشان كدا بفك المغص بسرعة
لكن ما اعتقد فيهو أي مادة كيميائية مثل الحلبة مثلا
تانيا الاعشاب نفسها فيها درجة من السمية تتفاوت من نبات لآخر عشان كدا تناولها يكون بحساب دقيق وتحاشي تناولها مباشرة يعني في شكل منقوع أو مستخلص وهكذا

الطيب عباس هلا بيك

العسل لا يعلى عليه

لا تعيش فيه الجراثيم بسبب تركيزو العالي

سلام يا حمد تاني ..

الضريسه للقاود ههههه اخر ما موردني في الواتس بس ما عارفا شراب ولا سف .. .!

كيفك يا الوليد

التوم نفسو حار كيف يعني؟
بعدين زولك دا درجة الحذر عندو منخفضة جدا ياخ الفندك دا بدقوا فيهو أي حاجة دق العيش
كيف يدق فيهو حاجة ويوديها لمناطق حرجة زي دي

كيفك يا عمار حمد الله على سلامة العودة
ليك مدة مختفي

دا نوع العلاجات الإيجابي فعلا وما فيهو تكلفة وبينطبق عليهو لفظ علاج منزلي ناجع

ح نجرب لبقايا السجاير والحاجات التانية

مستحيل بباقي الاسنان دا الواحد يمشي لدربكين

هلا أحمد سيد أحمد

بس العلاجات البلدية هل بتظبط مع اي زول ؟

ما بتظبط بسبب احتمال وجود تعقيدات أخرى في الجسم خلاف المرض المعني بالعلاج

مثلا الفجل بقولوا عندو تأثير سلبي على الناس العندهم مشاكل في الكبد مع إنو حسب ما ذُكر فوق مفيد للكلى
وهكذا

هلا علي دفع الله
المريسة

كع انبهلت

ياخ المريسة دي يكفيها فخرا أنها:

بتقطع العطش
تشبع الجوع
وتنعنش الرأس

لو ما اليوم جمعة كان قلت ليك المريسة دي فتح رباني وبشريات عديل كدا

جمعة الصحة والعافية يا حمد
الناس البتعاني من المصران العصبي وعسر الهضم عندي ليهم حل ناجع
وهي رخيصة ومتوفرة بالعطارات او محلات الهنود ثمنها 5 ريال
عبارة عن الياف طبيعية معلقة كبيرة تذوبها في كباية موية وتشربها قبل الاكل او الصباح

كيفك يا معاوية

علي دفع الله زول انبهالة ربنا يبهلا عليهو وعلينا

مشكلة العطور دا أنا برضو عندي لكن جزئيا ما كل العطور

ما عندك غير زول يرش ليك الملابس في الدولاب في الليل والصباح تلبس

شوف في شركة اسمها أوريفليم Oriflame العطور بتاعتها خفيفة وجميلة ومع ذلك بتستمر لفترة طويلة جربها

تحياتي لصاحب البوست وكل الاطباء الزائرين فيه
بوست مفيد ومشبع بالتجارب ،
وأجمل ما فيه أن العلاجات بالأدوية والأعشاب البلدية الطبيعية
ووصيتي لكل مريض ونصيح ، أقعوا الاعشاب الخلوية والجبلية والعطرية،
فيها من الوقاية والصحة مالا توفره كل شركات الادوية المصنعة ،
ومنها تكتسب الحيوانات والطيور مناعتها بلا طبخ لطعمها ولا نار
المواد البلدية البسيطة من حولنا ، القرض ، القونقليز ، الكركدي ،
الحلبة ، الحبوب (كالسمسم) ، الحرجل ... الخ كل ماتلقاها امضغها ،
أذكر وأنا طالب في الاساس ألمت بي بالتهابات تنفسية اتعبتني جدا ،
ذهبت الى طبيب خبير فكتب لي بعض الأدوية ، وقبل أن أخرج قال :
( أمك ماجربت لك القرض بي زيت السمسم ليه؟) ، فقلت له :
(أنا ما قاعد اقتنع بي شغل الحبوبات ده عشان كده جيتك) ،
الطبيب الظريف دخل ايده في جيبه وطلع حبات قرضات،
تناول واحده وقال لي : ( أنا زاتي قاعد أتعالج بعلاج الحبوبات)

كركوم (الاصفر بتاع الاكل) زيت جوز الهند او زيتون تعملهم في الفرش وتنظف به الاسنان
==========
سلام حمد و كل الضيوف
ده شنو؟
ممكن صورة او اسمو بالانجليزي

Quote: ده شنو؟ ممكن صورة او اسمو بالانجليزي

Quote: الكركم أو أو هو جذمور ونبات عشبي أو نبات معمر من الفصيلة الزنجبيلية،. موطنه الأصلي هو جنوب غرب الهند. وهو يحتاج درجات حرارة تتراوح بين 20 و30 °C وكمية كبيرة من الأمطار السنوية ليزدهر. ويكيبيديا الاسم العلمي: Curcuma longa الترتيب: نوع التصنيف الأعلى: كركم

جوز الهند والزيتون ديل شكلهم ما محتاجات تعريف يا محجوب

ياخ والله يا اخ حمد البوست دسم و جميل ..

و قصة بخار الحمام دي عجبتني جداً .. نجربها و نشوف ..
لأني زول بخاخات و بخارات ساي ..
المهم نديكم حاجة مهدئة لضيق التنفس في عدم وجود بخار أو بخاخ أو لغاية ما الصباح يصبح ..

المطلوب : فيكس + حلة متوسطة الحجم + موية ..

-تملا الحلة موية للنص ..
-تخلي الموية تسخن شوية ..
-تضيف ملعقتين طعام من الفيكس ..
-تخفض نار البوتوجاز ..
-تجيب بشكير او طرحة تقيلة وكبيرة ..
-تقرب من الحلة بي وشك و تبدا تستنشق في البخار البطلع ..
-حاول تتغطي بالبشكير عشان البخار يركز فيك مزبوط ..
من 10 - 15 دقيقة .. و الأمور بتكون تمام التمام ..

ممكن تكون القصة شوية حارة مع الوش نسبة للحرارة ..
لكن لا مانع من انك ترفع راسك بضع ثواني وترجع تاني ..

الطريقة مجربة 100% ، و وردتني من أحد الأطباء ..

و الله يشفينا و يشفي جميع مرضانا و مرضى المسلمين

تحياتي للجميع

ياهو دا الفيكس .. لمن لا يعرفه

شيخنا حمد وضيوف البوست الكرام

شوفو لينا معاكم علاج لناس المعدة .. او الجهاز الهضمي بشكل عام
المشكلة كلما مشينا لي مستشفى ادونا علاج جرثومة المعدة والاعراض مستمرة
مرات تتشابه لا تعرف هي معدة ولا قولون
والمعاناة مستمرة من سنين
(جدير بالذكر انو الشغيل قبل كم سنة جاب لي حرجل جزاه الله خير)
كل الاعراض الممكنة مرت علينا
طبعا كل الفحوصات والعلاجات الممكنة عملناها
منظار معدة 3 مرات/ اشعة اكتر من 3 مرات/ ألترا ساوند مرتين/ فحوصات مرات لا تعد ولا تحصى
كل العلاجات الطبية للموضوع دا مريت عليها.. بقيت مثقف فيها كمان هههههههههههههههه
ناس العلاج البلدي حبابكم .. وناس المجال الطبي حبابكم .. ولو في مجال تالت والله برضو حبابهم

حاجـة ترجع الشباب يا أخ حمـد

؟؟؟؟

حمد لبد وضيوفه الكرام،
ليكم مني ألف سلآم .

Quote: ضغط الدم الأساسي عليه بأخذ العلاج مدى الحياة

سلآمات دكتور عثمان .
ما هو ضغط الدم الأساسي، وهل هنالك ضغط دم غير أساسي ؟.

شكرا محمد حامد علي المعلومة

الاخ نادر
عليك بالتوم. اعمل ساندوتس فول او اي شئ مع التوم الحي. اعملو في العشاء و نوم براك في الايام التي تستخدمها.

الاخ نادر عليك بالتوم. اعمل ساندوتس فول او اي شئ مع التوم الحي. اعملو في العشاء و نوم براك في الايام التي تستخدمها.
--------------
حبيبنا يا محجوب
يا عمي انا مستعد انوم في السطوح حتى .. بس تظبط الحكاية دي
التوم جربتو فص على الريق لفترة طويلة وماف نتيجة تذكر والله
وكتر خيرك علي المساهمة

حمد وضيوفه تحياتي
صيدلية متحركة ورخيصة بتراب الفلوس وبتداوي كل مشاكل ضعف الدم والبطن والمسالك والبواسيروالمفاصل،
والضغط والسكر والكلى وبتشد الحيل.المكونات الجافة والسائلة:كعكول صمغ عربي، مذاب في كوب ماء شرب.
ملعقتي عسل ( لمن ليس ليهم سكري)...تناول الكوب على الريق بارد أو دافئ ( على مزاجك ) بعد صلاة الفجر...
وسلامتكم اليوم كله زي الحصان.....

المكرم حماد الطاهر عبد الله تحياتي
معاي آلام بطن طولت وما معروف لسة المشكلة وين بالضبط
ح ابدأ بمشيئة الله العلاج بوصفة الصمغ العربي خاصة وانو متوفر بي هنا وعسل نحل اصلي
ربنا يجعل الشفاء وليك مننا دعوات طيبات في جميع الاحوال

كيفكم يا شباب

انا أمس ما قادر ارسل رد في البوست افتكرتو قفل لكن أهو ما شاء الله يا نادر كلك بركات

تعرف يا حاتم الهواري البتاع دا سألت منو كم محل آخرتها وصيت هندي قال لي بقلعوا ليك شكلو كويس

المصران دا سبب بلاوي الجسم دي كلها

عمر التاج مرحب بيك

تعرف الواحد مفروض يكون سيليكتف في مسألة الأعشاب دي

في جبال الأنقسنا في حيوان اسمو الكي كو الناس دي هناك مقتنعة اقتناع شديد إنو لحمو بعالج أي مرض ودا بسبب طريقته الانتخابية الصارمة في اختيار الأعشاب الجبلية البياكلها

فعلا انا مرة حضرت العمدة دوس عمدة أقدي ضابح واحد البتاع دا المعدة والمصارين بتاعتو مليانة لكن شفافة ونضيفة بشكل ما تتصورو كأنو ما ماكل حاجة
بس شكلو بشبه الفار صعب الواحد يأكلو مع إنو معانا ناس أكلو مغبيين لط

يا هوارى دة يلقوا وين؟؟؟

يا حمد الكول موجود بى كثرة اشكال والوان زى ما تدوووور هنا فى جدة

محجوب عبدالله كيفك يا شاب

الكركم حاجة صفراء كدا تلقاها واضحة في طبخ الهنود

اسمو الإنجليزي Turmeric بالإضافة طبعا للاسم العلمي الذكرو ليك محمد حامد

هلا سامر دوشة

البخار منعش وبعدين ما تنظر لحدي ما تحتاج ليهو انتعش حتى في الظروف العادية وخليهو صيانة وقائية
تعرف أنا كل ما انوم مقابل المكيف لازم أقوم ملطم هسه الشغلانة دي بقيت ما بخاف منها على طول البخارات

الفكس طبعا برضو فعّال جدا رغم ريحتو النفاذة

نادر النور
كيفك ياخ ما تشوف شر

البطن دي كلنا معذبانا شوف بعيدا عن جرثومة المعدة والكلام الطبي تأكد إنو ما عندك قولون

انا بديك ممارسات تقوم بيها أول

1- أشرب موية كتير وما تسأهر
2- ما تشرب موية بعد الأكل مباشرة (على الأقل نص ساعة ) أنا عارفها صعبة
3- نوع الأكل بقدر المستطاع وما تشرب حليب ساخن
4- ما تآكل سلطة طازجة ركز على خضارين بس الجزر والبروكلي بعد سلقهم على خفيف لأنو السلق برفع القيمة الغذائية بتاعة الجزر والبروكلي (خليك من ناس خيار وبصل وخس وطماطم)
5- ما تجوع شديد وما تشبع شديد
5- ابعد عن الدهون بقدر المستطاع واستخدم نوعية زيوت جيدة للطهي

جرب وأديني خبر بعد أسبوع

مولانا أحمد الشايقي حياك

إلا ليت الشباب يعود يوما رغم إنك شباب أكتر من د. محمد حسن المشيب دا

انتعش ياخ والرهيفة التنقد

ود المدير
كيفك يا أبو الشباب

منتظرين معاك د عثمان يا ليت لو يجي يتوسع لينا في موضوع الضغط دا مهم جدا معرفة طبيعتو وأنواعو

حمد الطاهر حبابك

ياخ مداخلتك دي قيمة ياخ بس تعال شيل الكوت دا عشان ما تضيع لأنو كوجنها حتى لو تعدلها كلها وتكتبها من جديد

البوست ده ليهو كم يوم؟
ده بوست متزمزِغ ,, لايخلو من دغمسة
ابطالها فيسل هليل وحمد لبد واحتمال ود ابسن.

كيفك الفاضلابي

كنا عايزين نتزمزغ لكن الجماعة كبسونا

في الرابط دا العفش كلو موجود

https://www.facebook.com/Anwar.Thaqafa/videos/1243596382405540/https://www.facebook.com/Anwar.Thaqafa/videos/1243596382405540/

سلام يا حمد ومشكور علي البوست الطحينة لأزالة الحرقان .. الوصفة دي لقيتا قبل كده في منبر بكري ده .. جربتها ونجحت معاي جدا .. معلقة طحينة واحدة بس

هلا عباس محمود

آي ياخ الحرقان دا معذبنا عذاب
دا السهل الممتنع
مشكور

اخونا حمد والضيوف الكرامعجبني جدا البوست دا وكل بوستات اخونا حمد ممتعةنقلت البوست في قروب فيسبوك وواحد اخونا قال علاج بينفع مع الاخ نادر بخصوص جرثومة المعدة وقال انو هو بذات نفسو جرب خل التفاح مع عسل النحل من الصباح على الريق وبيقول انها نفعت معاهو تمام والوصفة كما يلي :
خل التفاح الطبيعي ملعقة كبيرة + ملعقة عسل نحل اصلي في كباية موية دافئة علي الريق لمدة شهر....
وباذن الله الشفاء التام

احد الاخوة برضو قال :
بخصوص جرثومة المعدة دواء الاعشاب بينتهي منها مرة واحدة افضل بي كتير من الدواء المستحضر لانه بشيلها بس لي 3 شهور وبترجع تاني . شهادتي دي بخصوص العلاج بي قشر الرمان

كيفك يا أحمد سيد أحمد
شكرا ليك

أنا مرة سمعت أو قريت تقرير بقول جرثومة المعدة دي ما جرثومة واحدة محددة بالاسم انما هي مجموعة طفيليات كلما توفرت ليها البيئة المناسبة في المعدة أي واحد منها ممكن تكون جرثومة معدة
لو كلامي دا متماسك وصحيح ما خانتني الذاكرة يبقى إزالة أسباب ظهورها هو المطلوب .

سلآمات دكتور عثمان .
ما هو ضغط الدم الأساسي، وهل هنالك ضغط دم غير أساسي ؟.

Quote: سلآمات دكتور عثمان . ما هو ضغط الدم الأساسي، وهل هنالك ضغط دم غير أساسي ؟.

هلا حبيبنا ود المدير

نعم يوجد نوعين من ارتفاع ضغط الدم :
الثانوي أو ال secondary hypertension
وده بتسببو أمراض عديدة ويزول تماما" بعلاج السبب الأساسي منها على سبيل المثال:
زيادة أو نقصان نشاط الغدة الدرقية
زيادة نشاط الغدة الكظرية وغالبا" بكون لاورام حميدة أو استعمال مركبات الكورتيزون
لفترات طويلة
أمراض الكلى ( التهابات الكلى وتكيس الكلى والفشل الكلوي)
أمراض الشرايين مثل تضيق الشريان الكلوي والتضيق في الأورطى
وكذلك بعض العلاجات

وبمعالجة السبب يتم الشفاء من ضغط الدم ولا يحتاج الى علاجات بعد ذلك.

النوع التاني الأساسي أو essential hypertension:

وده سببو الأساسي غير معروف وتوجد عدة نظريات لاسبابو الفعلية وده النوع المنتشر
وغالبا" يرتبط بالوراثة ويحتاج للعلاج المستمر وعندو أنواع علاجات كتيرة تختلف فعاليتها
حسب العمر والجنس والعرق والأمراض الأخرى المصاحبة والأعراض الجانبية عشان كده
ما أي علاج بينفع لكل زول ( مثلا" مريض السكر والضغط في نوع مفضل وذوي الاصول الأفريقية
عندهم علاج مفضل وناس الكلى كذلك وعمر 40 ليس كعمر فوق الستين وهكذا)

الخطير في موضوع الضغط إنو ممكن بدون علاج تكون ما بتحس باعراض معينة لي سنين لكن
الشرايين يكون حصل فيها تغيرات تؤدي الى التصلب والزبحات والنزيف والجلطات الدماغية
والفشل الكلوي بمراحلو المختلفة وضعف النظر والعمى وأخذ العلاج بانتظام يقلل من المضاعفات دي
بنسب عالية جدا" ومذهلة تفوق ال40 % خاصة اذا مصاحبة بامراض الكوليسترول والسكري والسمنة.

حبة ضغط واحدة أو حبة ضغط وكوليسترول بالإضافة للرياضة قد تقيك شر أمراض خطيرة مؤدية للوفاة فجأة في عمر
شباب بالذات فينا نحن السودانيين وذوي الأصول الافريقية ولا أبالغ (بدون دراسة علمية)إن قلت ليك أعتقد أكثر من 75%
من الوفيات في عمر الأربعينات والخمسينات والستينات بالسكتات الدماغية والذبحات الصدرية والفشل الكلوي
السبب الأساسي فيها هو ارتفاع الضغط والكوليسترول بالإضافة للسكري والتدخين .

موضوع ارتفاع ضغط الدم أكبر وأعقد من انو ضغطك في الحدود الطبيعية فقط وأكبر بكتير من كباية كركدي
ولنا تجارب مؤلمة مع هذا المرض خاصة السودانيين ندر من تجده ياخذ ادويته بانتظام ولو كان متعلما" ناهيك عن
ميزانية العلاج الشهرية للمعسرين .

مشكور د. عثمان الامام ز معلومات مفيدة وتدق ناقوس الخطر
ولكن من يسمع ويعي|

والله والله فقدنا أحباب بسبب تعنتهم وعدم سماعهم النصح بأهمية تناول ادوية الضغط وقياس الكوليسترول والتقليل من الدهون
وجاءت السكتة حين غرة فأخذت من أخذت وتركت البعض مشلولا حيا كميت.

بوست ح يغطس حجر ناس كتار مع احترامي وتقديري لصاحب البوست
البوست غير موفق وعبارة عن هرجلة والصحة اغلى ما يملك الانسان
حتى طب الاعشاب لديه جامغات وشهادات مش بالفوضى دي


ويا محاسن كبي حرجل للمغص دة هههه

يديك العافية يا حمد

دكتور أمبدة حبابك

مشكور على الاحترام والتقدير

لكن لا يوجد في البوست ما يشكل خطورة أبدا على حياة إنسان وأنا في الأول قلت مجرد تخفيف وليس علاج
تانيا الحاجات الفي البوست ديل لو هسه فتحت دولاب مطبخكم حتلقاها كلها وكل يوم بستخدم فيها سواء مع أكل أو مشروب شاي قهوة الخ
عني شخصيا ما قاعد اعتمد على العلاج الشعبي لكن بستخدموا احيانا مثلا لو عندي التهاب بشرب جنزبيل لكن في نفس الوقت بكون مواظب على الوصفة الطبية
لو شعرت بشوية مغص بتناول سفة حلبة لو راح فبها وإلا أقرب مستشفى وهكذا

حاجة أخيرة الطب الشعبي البقروا ليهو جامعات ومناهج دا ياهو الغطس حجر الناس فعلا - لأنو حكاية زول دارس طب شعبي دي خلت الناس تطمئن تماما للعلاج الشعبي دا
وتحولوا تماما عن الطب الحديث والعلاج الكيميائي والأمثلة قدامك في السودان لا داعي لذكر أسماء وبأكد ليك عن معرفة إنو تناول الأعشاب بالشكل العلاجي المكثف دا سبب رئيسي للفشل الكلوي الشايفو في السودان دا
لأنو سيقان وأوراق النباتات دي مخازن للفلزات بجميع أنواعها وخاصة النباتات الجبلية ونباتات المناطق الجافة لأنها بتعتمد على عملية التخزين في أجزائها لمقاومة الجفاف ودي ياها البتستخدم غالبا في العلاج

مع دا كلو بناشد معاك أصحاب الأمراض المزمنة أن يكون اعتمادهم أولا وأخيرا على الطب الحديث في العلاج

شكرا على البوست المفيد يا اخ حمد ...

اخونا سامر دوشة ...

Quote: و قصة بخار الحمام دي عجبتني جداً .. نجربها و نشوف .. لأني زول بخاخات و بخارات ساي ..

كنت اعاني من أزمة منذ مولدي لدرجة لا يمر شهر الا وانا بالمستشفى أخذ فينتولين بالدرب والحمد لله وبفضله شفيت من الازمة تماما قبل عدة سنوات والسبب بعد الله سبحنه وتعالى يعود لقصة ..

كنت في مناسبة عائلية وفجأة داهمتني نوبة ربو ولزمت السرير وصدف ان كان من ضمن المعازيم احد الشيوخ المشهورين بالسودان بعلاجه بالاعشاب فأعطى الوالدة وصفة قال انها ستعالج الربو تماما في خلال اسبوع ...

والوصفة سهلة التحضير صعبة الاستخدام وهي عبارة عن خلط بصلة واحدة غير ناضجة تماما .. تخلط بالخلاط ويصفي المحتوى في نصف كوب ... كباية الشاي السادة العادية دي .. ويضاف اليها معلقتين من عسل النحل الاصلي
وتشرب على الريق ..

اذكر تماما انني كنت اتجرع هذه الوصفة ثم امسك بطني اتلوى من الالم !! تصور شرب عصير البصل !! تحملت أربعة او خمسة ايام وبعدها رفضت مواصلة العلاج واكمال الاسبوع لان الام بطني اذدادت .. ولكن ماذا كانت النتيجة |!

الحمد لله بعدها اكثر من من تسعة اشهر لم تعاودني نوبات الربو وبعدها وبعدها سافرت للدراسة بالخارج فعاودتني الازمة وحاولت عمل الوصفة ولكن فشلت في الاستمرار ايضا .. وضرت اتناولها في اوقات متباعدة وكانت تعطي مفعولها ..

اذكر ان احد زملاء الدراسة من عمان شكى لي ان اخته تعاني من الربو فاخبرته بهذه الوصفة فاستخدمتها اخته وشفيت تماما بحمد الله ..

توكل على الله وجربها ولن تندم ..

بالنسبة لحيوان الكي كو الذي ذكره حمد .. فاذكر ايضا في العام 1997 اصبت بيرقان حاد لم ينفع معه الكي .. فاشار لي احد الجيران من غرب السودان بتناول لحم الكي كو الني واكد لي انه يشفي اليرقان تماما ولكن والدي عليه رحمة الله رفض حتى
مناقشة الفكرة ...

يا دكتور
كلامك كزول مختص ما بناباهو لكن
الأعشاب علاج أساسي لناس المجاهل
والصحاري الما بعرفو دكتور أصلا
كما أنها أثبتت فاعليتها زماااان زمن السحارة
والقطيع والمشلعيب .. عموما الشافي الله ..
.........................

يا حمدوف والناس السألت من التوم وزيت الزيتون
عليكم الله السائلين ليها شنو ولشنو ؟؟؟
التوم وزيت الزيتون لا تخلو منهم وجبة
عشان كدا حتي لو ما بفيدن في علاج حاجة ما
ما بضرن أكيد .. فاااااااااااااشنو ما تحكوها و
كلوا وأشربوا ما تيسر حتي يتبين لكم .. خخخخخخ

كيفك يا ناذر

البصل رهيب مع امراض الصدر ما عارف السبب شنو
هسة أنا مرات لما سيلان الأنف يزيد بقطع بصلة حمراء بليمون وبأكلها رغم إنها صحبة جدا لكن بتعالج بسرعة

بخصوص الكي كو شكلو عبارة عن فار كبير عشان كدا ما بنقدر عليهو

على قولك يا طلحة كلو أكل
حتى أنا خسمت حسن مكاوي يستخدمها

عندي تجربة شخصية بخصوص العلاج بالاعشاب ...
مرة مشيت اعمل فحص للكلية بسبب ظهور اعراض تدل على وجود مشكلة بها ...
اتضح بعد عمل الموجات الصوتية من وجود حصوة باحدى الكليتين ... الطبيب كان مصري وقال لي نعمل ليك تفتيت بالليزر وقد كان ... بعد اكمال جلسات التفتيت عملنا صورة بالموجات واتضح وجود بقايا للحصى ...
نصحني الطبيب بعمل عملية تفتيت اخرى وبتكلفة جديدة طبعا ... لحسن حظي وانا بجهز للعملية الاولى لقيت واحدة مصرية وقالت لي انصحك بغلي نبتة البقدونس وشربها وهي دافية لمدة شهر حا تنزل معاك الحصاوي ... في نفسي قلت المصرية دي ما عندها موضوع ... قلت للدكتور في المقابلة التانية يا دكتور البقدونس ممكن يفتت الحصوة ... انزعج الدكتور وقال لي بس (نتايقه) مش مضمونة ...
طلعت من الدكتور ومشيت اشتريت بقدونس وبقيت اغلي الموية وانزلها من النار واخت فيها شوية بقدونس طازج لمدة 10 دقائق ... داومت على شرب البقدونس لمدة شهرين تقريبا ... النتيجة كانت مذهلة جدا وفعلا البقدونس فتت باقي الحصوة ونزلت كميات كبيرة مع البول وانا غير مصدق ...
.
.
مداخلة سابقة لي من بوست لدكتور سيف النصر...
تحياتي يا حمد ...

المصدر : Re: قاطعوا شركة النيل للاعشاب!Re: قاطعوا شركة النيل للاعشاب!

هلا قسم الفضيل

البقدونيس بشكل عام من الخضروات الجيدة للصحة زي النعناع والكسبرة الخ

تجربتك دي موثقة والناس تجرب ما دام الاعشاب دي مستأنسة وموجودة أصلا في البيوت وفي الأسواق وما منها خوف

سلام حمد

للامانة جربت اثنتين من الوصفات المذكورات اعلاه ووصفة كنت قد جربتها سابقا ...

قبل يومين بعد قرأتي لوصفة ازالة الجير من الاسنان .. اشتريت الكركم الاصفر مع زيت زيتون (الوصفة تقول اما زيت زيتون او زيت جوز هند) جربت الوصفة اعلاه في السواك
امس واليوم عدة مرات خلال اليوم .. ورغم قصر المدة كانت النتائج ممتازة .. الاسنان عادت بيضاء ناصعة بشكل ملحوظ وزال الصفار بدرجة ملحوظة ايضا .. ولعلي ساواصل في استخدام الكركم وزيت الزيتون
في السواك في مقبل الايام ان شاء الله ...

اعاني من حيرقان وحموضة وكنت استخدم حبوب اميبرازول بمعدل حبة عند اللزوم كل ثلاثة او اربعة ايام بحسب الطعام المتناول .. ولكنني اليوم تحديدا جربت حين داهمني الحيرقان بسبب وجبة
دسمة تناول عدة ملاعق من الطحينة وقد كانت النتيجة فورية ومذهلة لدرجة انني قررت الاستغناء عن حبوب الاميبرازول واستخدام الطحينة في مقبل الايام بدء من اليوم ..

اما البقدونس فقد قرات عنه قبل شهر تقريبا وانه مفيد لتصفية الشوائب مما علق بها فقد جربته قبل فترة بالوصفة المذكورة اعلاه واعطى نتائج فورية وملحوظة نراها من مراقبة البول والشوائب التي تخرج معه ..


تحياتي لاصحاب الوصفات اعلاه ....


اما من تجربتي فاقول لكل من يعاني الام الظهر والكسل والصداع ... عليكم بالحجامة .. جربتها ونتائجها تظهر فور الانتهاء منها مباشرة ...

ولله الشفاء من قبل ومن بعد ...

كويس يا ناذر
أديتنا فيدباك سريع جدا للكركم والطحينة
والتحية لعمار ومحمود عباس أصحاب الوصفات

بالحجامة

وجع الضهر والصداع دا مأدبنا أدب

تصدق عارف نفسي محتاج ليها وحتنفعني لكن متخوف من عدم احترافية الشخص الممكن يقوم بيها زمان كنا بنخاف من العدة لكن هسة ممكن تشتري عدتك جديدة وتمشي بيها
بس الشخص مهم بيقولوا بعض المستوصفات بعملوها تحت إشراف طبي لكن ما سعيت للموضوع دا
بتعرف زول هنا ؟

سلام حمد ...

تعال علي بريدة عندنا عمك كدة ليو 34 سنة .. مما جا دي شغلتو .. ومتطور جدا وبيستخدم أدوات الحجامة الحديثة وبيطبع اوراق من النيت ...

قبل 4 ساعات تقريبا كنت معاو لاني شعرت بي صداع وقلت امشي ليو .. قال لي الليلة اليوم راح نعال لي بعد بكرة بعد العشا وكلامو دا من السنة النبوية ..

في الرياض ثبل كم شهر الشباب دلوني علي واحد سوداني برضو .. اتصلت عليو وسالتو من عدة الشغل لقيتو ما مواكب التطور ولسع بيستخدم قرون البقر
والبرطمانيات وطبعا دي الطريقة الشغالين بيها السودانيين في القرى والارياف البعيدة ..

ههههههههههههههههههههههههههههههههههههه

قرون البقر والبرطمانيات

قرون البقر دي شنو يا ناذر دا عايش وين؟
انا غايتو عارف بعملوها بالحاجات الزي عدة الخبيز والكعك ديك

لسه بمصوا (شفط) ول الحكاية اتطورت

Quote: حمد الطاهر حبابك ياخ مداخلتك دي قيمة ياخ بس تعال شيل الكوت دا عشان ما تضيع لأنو كوجنها حتى لو تعدلها كلها وتكتبها من جديد

الله يكرمك يا حمد
أخيرا لقيت شوية وقت وركزت وعدلتها. إن شاء الله تظبط.
بعدين يا حمد لا تاكل الألف بتاعة إسمي عشان أكون سميك فإني سمي جدي حماد الكاس.
( كأس ذهب كناية عن كونه غالي لكونه أمير بجيش سلطنة دارفور).

ايوا كدا ظبطت يا حماد
و نأسف لتجريدك من اسم جدك
لكن بالله عليك هسة سمح اسم حمد ولا حمّاد


لعلمك أنا برضو مسمى على جدي لأمي / حمد محمد صالح حسين (العشاري )
أب طاحونةً بتلاليء أب عرباتن بتراري .
لو سألت عنو شيابكم في الجنينة بتلقى سيرتو

حمد وضيوفه سلامات ..

لقيت بيوت الشعر دي في الفيسبوك وانا لافي ..

قلنا نتجدع ليكم بيها ..


---

إذا شكى القولون منك بليلة
فعليك بالينسون دون جدالي

وإذا اصبت بنزلة خذ زعتراً
فهو العلاج لكحةٍ وسعال

واستزرع الجرجير فهو كلحمة
فاللحم قد يأتي على أشكال

واغسل كُلاك بضمتي بقدونسٍ
وعلاج حب للشباب مثال

وعصارة النعناع خير معالجٍ
ومنشطٍ قلب العليل البالي

وعليك بالشوفان أفضل حميةٍ
يكوي الدهون بغير حد نصال

والزنجبيل لوحدهُ مستوصفٍ
كالصيدلية فاغله للغالي

ودوااا التهابات الحشا بابونجٌ
ومنوم للرضع الأطفال

ولدورة دموية خذ قرفةً
او كرفساً ان كان ضغطك عالي

والثوم كم في لبه من نعمةٍ
مئتا علاج يشترى بريال

واهرع إلى الملفوف ان بك سكرٌ
ولمن تصدع فالدواء دوالي

الله يخلق داءنا ودوائنا
سبحانه ربٌ عظيمٌ عالي

أسعد الله أوقاتكم
عن تجربة أحكي
في في عام 2004 اصبت بقرحة في الاثني عشر
نزفت دم داخل البطن ظهر في الاستفراغ والبراز
على اثرها مكثت في المستشفى قرابة العشرين يوما
بعدها خرجت بحمد الله ومعي (التيغمت ثم غير للانذور) كعلاج دائم
والابتعاد عن الدهون والشطة والاكل الدسم عموما ,
استمريت في استخدام الحبوب ولكن في بعض المرات كنت انساها
وفي بعض المرات ايضا كنت اكل أكلات دسمة
في عام 2010 في شهر رمضان أشتدت الالام وشعرت بالنزف
ظهر في البراز بصورة مزعجة (كنت في الدمام) ذهب الى الحوادث مستشفى الدمام بعد الافطار
لم اتمكن من مقابلة طبيب رجعت البيت بالالامي على ان اذهب الى مستوصف المواساة عندما يحضر احد الاخوان ,
من كثرة الالم والضجر تركة مسالة المستوصف وقلة اليحصل يحصل ,,
كان جاري لي هندي (عجوز) يعمل فني عند صائغ ذهب , بيننا ونسات وقفشات , راى تالمي ووجعي وشحوب وجهي
اخبرته بالحاصل , شرح لي وصفة لم افهم ما يقصد , فتبرع بنفسه ونزل الى الخضرجي واتاني
بجزرة واحدة وكوسة واحدة ,, وانا استغرب
اخذ حلة صغير وضع فيها كباية ماء وقطع الكوسة والجزرة ووضعهم في النار (بدون اي اضافات لا ملح ولا اي شي)
قال انت اكل من هذا الاكل كل ما اشعر بالجوع (اكل ليس لدرجة الشبع وايضا لا اترك نفسي للجوع) بالخبز
وانا لا اكل شي اخر , وقال اكله الى ان يصبح لون البراز (اشبه بالابيض اصفر خفيف)
وفعلا بدات فقط استخدم هذه الوصفة يوميا كنت الحظ ان الالام بدات تقل تدريجيا وان لون البراز بداء يرجع طبيعا
بعد 15 يوم عادة النضارة الى وجهى بدل الشحوب وبدأت اشعر بارتياح , وبداء لون البراز اشبه بالابيض ,
اخبرت الهندي , قال لي بعد كل شهر او شهرين احاول اكل نفس الوجبة لمدة اسبوع او اكثر
بعد كم مرة لن تحتاج لحبوب ولن تعود لك الالام القرحة ,,
فعلا جربتها تقريبا بعد المرة الثالثة رجعت انسان طبيعي اكل اي نوع من الاكل بدون تحسس
والحمد لله ,,
وقد جربها أخي واثنين من اصدقائي و وزبطت الامور معهم تمام ,,
ملاحظة ,, في الايام الاولى بكون طعم الوصفة (كانها موية) لكن مع التعود بتصبح مسالة عادية
(في الاول كنت اكل منها تقريبا كل ساعتين او ثلاث ساعات فقط لقيمات معدودة ) ,,

الله يكتب الشفاء لكل المرض

وصفة جيدة يا عمار

برضو زيت الزيتون ملعقة أو اتنين على الريق
ممتازة جدا حسب ما وصف لي واحد

وجع الضهر لما تقوم بيهو من النوم

بعدم وجود مرض عضوي غالبا يكون بسبب:
1- السرير نازل في الوسط
2- المرتبة ما كافية لحماية الضهر من ضغط السرير عليها
3- المخدة عالية وقوية شديد

استخدام سرير مستوي (1)
النوم في مرتبتين واحدة قوية شوية تحت والتانية رخوة اسفنج فوق (2)
استخدام مخدة منخفضة ولينة (3)
تكامل الثلاثة بدي نتائج جيدة جدا

تجنب الجلوس على المحفظة في جيب البنطلون الوراء لفترة طويلة