اسقى الشمس شاى الصباح

10:10 AM March, 14 2017

سودانيز اون لاين
أبوذر بابكر-
مكتبتى
رابط مختصر

ساساق الروح
البين دروب الليل
وفرقان الغياب
ومن تالاهن مرق منك
عليك ديداب
مضارى من عين الضلام
والشوف مقسم
بين عيونك والدليل
وانت المخسّم
بالدرادر والعذاب
وعطشك هناك
ساكن نواحى النيل
ناشف نميمك
وين تقبل ووين تروح
راجيك سيل
اتوكل على خوفك
وليك الويل
دس يقينك فى الزحام
وليك الويل
ارميهو فى بطن الوجع تيراب
حس الوجع غلبو الكلام
والطين موسّم
بالوجوه الخايفه
من قولة تعال
ضلك معسّم
مكتوف على وش النعال
رمش الهنا وكحل الوئام
مالى العيون النازفه
من شح الوصال
وكيف السبيل
والممكن المسكين بعيد
ما باقى ليك غير المحال
المرقة فى دربك سؤال
والرجعة زادك والجواب
ورحلك مستف بالغباين
بالمشاوير الطوال
موية شرابك
قطرة فى نية السراب
من ياتو جيهة بجيك مناك ؟
وعين الشمس مصرورة
مضاريه بى شقل السحاب
وضو الجهات مسروق
جنات عذابك باليمين
ساكنه العروق
ونيران سعادتك بالشمال
لى ياتو جيهة تسوق غناك ؟
وحس البلود مخنوق
خت الوصية قريب حداك
فى ذمة الليل القديم
اسقى الشمس شاى الصباح
قبال يحين وقت المروق
قبال تداهمك
خيل مواجعك والجراح
قبال يفوت باقى الغنا
الفضل معاك
قبال تضلم
وينكسف خاطر البروق
امرق تعال
اختا الدروب الما بتحن
اضارا بى شوك الرياح
امرق تعال
قبال تجن
مسيومه روحك
وانتم مافى
مربوطة بى مغس الحبال
لملم جروحك
وفى المنافى
صنقر تحت ضل المنى الممحوق
واخير تجى
امرق تعال
قبال تبور فى السوق

المرقة فى درب سؤال
والرجعة زادك والجواب

عود على شوق

و ذات غياب كان فى غيهب الاسى

والشمس و سقياها

والنور اذا امتطى صهوة الصباح

ليخبر العباد
عن ظمأ الليل

عذرا للتكرار